BAHAN SERMON JAMITA MINGGU XXIV DUNG TRINITATIS HKBP RESORT IMMANUEL

14 NOPEMBER 2021
MARKUS 13:1-8
TOPIK: DUNGO MA HAMU, UNANG LILU

1. Patujolo

Bagian parpudi panghobasion ni Tuhan Jesus nama turpuk on (ima di bindu 11:1-13:37) andorang so panaononNa.
Jala angka na masa on pe di na humaliang Jerusalem nama, na paiashon bagas Joro (11:1-26), parsulon ni Tuhan
Jesus tu angka pangituai ni Jahudi (11:27-12:44), pangungkapon di dolok Jetun taringot tu Jerusalem dohot bagas
Joro nang ujung ni portibion (13:1- 37). Laos di bindu 13 on, ima na masa di dolok Zaitun dung jolo parsualon
dohot angka pangituai ni Jahudi di alaman ni bagas Joro i. Naadong di bindu 13 on ima: (1) sungkunsungkun ni
angka sisean taringot tu tingki hamamasa ni pangungkapon ni Tuhan Jesus (ayat 1-4), (2) rumang ni na masa di
zaman on (ayat 5-13), (3) harongkingon na naeng masa (ayat 14-23), haroroni Kristus paduahalion (ayat 24-27),
poda manang tona asa jaga (ayat 28-37).

II. HATORANGAN

Ayat 1-2 : Boaboa halelengse ni huta Jerusalem. Marbonsir sian pandohan sisean ni Tuhan Jesus do on di na
tinadingkon nasida bagas Joro i dung di patunggalingkon Tuhan Jesus angka meja partigatigaan na di Jolo ni bagas
joro. Ia pandohanna i, taringot hinauli dohot tongam ni bagas Joro i nang angka jabu di huta Jerusalem. Tung
mansai uli jala arga do idaon bagas Joro i, ai dilapis mas do bagian parduruna. Nang pe silo berengon di na jonok,
alai sian na dao hira dolok mas do idaon bagas Joro i. Nian boi do dua mansam sialana umbahen didok sisean i
pandohan na di ayat on. Parjolo ala na dirotahi halak Jahudi bagas Joro i marhite partigatigaan huhut mambuat
pangomoan na torbang. Alai na paduahon hira na mengalihkan roha ni Tuhan Jesus do sian na muruk marhite na
manunggalingkon meja partigatigaan i, tu na gabe mengagumi hinauli ni jabu dohot bagas Joro i. Alai asing do alus
ni Jesus, tutu diargai Jesus do hinauli ni angka jabu dohot bagas Joro i, alai dipaihut do muse tu nanaeng masa
paboa sega do i sude jala hornop dohot tano. Nang pe timbo angka jabu i, dibahen sian batu dohot sian mas, alai
ndang adong na tinggal nanggo dua batu martinditindi molo nga ro tingkiNa..

Ayat 3-6 : Hehe Angka Na Mangaliluhon. Ndang manigor adong reaksi ni angka sisean i taringot tu pandohan ni
Tuhan Jesus. Dung hundul pe nasida donokhon ni bagas Joro i, disungkunhon 4 halak sisean na (Ima si Petrus, si
Jakobus, si Johannes dohot si Andreas) ma Ibana taringot tu tingki dohot tanda ni hamamasa ni pargargar ni bagas
Joro i. Marhite i sasintongna ndang holan tu hagargar ni bagas Joro na di Jerusalem naeng taringotanna, alai sahat
do tu tingki na dao. Jala memang pandohan ni tuhan Jesus di jamitaNa di Matius 24:36 pe
didok do “ndang Ibana na umboto partingkian nda so holan Ama ido”. Ala ni i ma dipabotohon asa
tongtong jaga nasida, ai na roma torop na manoluk goar ni Tuhan Jesus laho mangaliluhon natorop. Na manoluk
goar on, ndada holan goar boti, alai adong na marhite angka pangajarion gapgap (Nabi palsu), na so mardasor jala
na lipe sian na niajarhon ni Tuhan Jesus.
Ayat 7-8 : Parmulaan ni ari halelengse ni Jerusalem Dohot Haroro ni
Jesus Kristus Napaduhalion. Angka tanda na ginoaran ni Tuhan Jesus di ayat on, martudutudu tu ari Haroro
ni Kristus do muse. Pandohan “Parmulaan pambebeonna” somal dipangke di na laho hasosorang ni posoposo.
Hasosorang ni sada posoposo tontu adong ma ngolu na imbaru manang sada jaman na imbaru. Ala nii ma molo
taida di Alkitab didok “Penderitaan menjelang Zaman baru” ndada holan manaringoti halelengse ni
Jerusalem alai patuduhon tu ari haroro ni Tuhan Jesus muse. Sian ayat 7 on idaonta angka tanda parmulaan
pambebeon i manang parmulaan ni zaman na imbaru i, i ma: barita ni hamusuon ro di gaor ni na marmusu, (1)
pangalaho ni angka bangso, alana tubuma parbadaan sada bangso dohot bangso na sada, harajaon nasada
maralohon harajaon nasada, (2) masa ma haleon, krisis suansuanan dohot sipanganon. Diuduti di ayat 24-27 dohot
do mataniari mangholom, bulan ndang marsinondang, bintang mardabuan nang hagogoon ni parlangitan pe
humuntal do. Alani i sada singotsingot sian Tuhan Jesus didok “Unangtarsonggothamu,ndangidopeujungna”.

III. PANIMPULI

a. Hurang las do rohani Tuhan Jesus manaringoti hauliaon ni bagas joro na di Jerusalem, alana hurang sintong do
pamangkeon dibahen angka pangituai ni Jahudi. Parhundul nasida pe di bagas Joro i holan asa ditabi halak do
nasida, hape parniulaon nasida mamolgak angka na mardangol do. Ala ni i ingkon taargahon do bagas Joro i,
inganan parmingguon, inganan pamujian dohot partangiagan na hombar tu lomo roha ni Debata, inganan
manangihon dohot mangajarhon hata ni Debata.

b. Marhite turpuk on paingothon sisean ni Tuhan Jesus nang songoni saluhut na porsea unang lalap holan
mangargahon hauliaon bangunan na diportibion, nian arga do batu manang mas i alai na olo magargar do i sude.
Alai lobi rumingkot jala ummarga sian i, Tapauli-ulima partondion, roha na ias, jala na tongtong marsigantung
tu Debata.

c. Paima so masa dope tingki na binuhul ni Tuhanta, sai na adong do angka parpoda haliluon, na mangaliliani roha
di ragam ni angka pangajarion. Tarlumobi di hamajuon ni teknologi nuaeng, tung mura jolma tarlumobi sundut
na umposo tartait tu angka ulaon naso dihalomohon ni Debata. Ala nii didok ingkon “jaga”, jala ingkon lam
tangkas ma pangaradotion ni huria i di angka panghobasion, pangajarion ni natoras tu ianakhonna dohot angka
panghobasion lan na asing.

d. Na mansai ringkot tona sian Tuhan Jesus ima “Unang tarsonggot ndang i do pe ujungna”.Ingkon marroha
bisuk do halak kristen di pardalanan na diportibion paima ari na parpudi i. Hombar tu topik mingguta
“Dungomahamu, unang lilu(Waspadalah, jangan sesat) , asa sai tongtong angka
naporsea i dungo/siap sadihari pe tingki haroroNa muse, ala ni i paima adong dope partingkian i ingkon manat
marnida angka na masa, manat mangulahon angka siulaon, manat pasidinghon roha unang tartait tu angka ulaon
naso dihalomohon ni Debata.