Jamita Evangelium

Parningotan Ari Hamamate

ni Tuhan Jesus
29 Maret 2024

“Dibungka Jesus do di Hita Dalan na Imbaru Jala na

Mangolu”
(Heber 10:16-25)
Ginurithon ni Pdt. Dr. Robinson Butarbutar,
Ephorus HKBP

I. Patujolo
Hamu angka dongan hinaholongan, di ulaon Parningotan di
Ari Hamamate ni Tuhan Jesus sadarion, marasing sian na
somal ia barita na uli sian hata ni Debata ndang dienet sian
Evangelium Markus, Matius, Lukas dohot Johannes nang
sian surat ni apostel Paulus na manggurithon taringot tu
hamamasa ni hamamate ni Jesus di hau pinorsilang i
manesa dosa ni angka pardosa, alai sian sada surat di Padan
Naimbaru, i ma surat Heber. Ima sada surat na digurithon
tu angka na porsea na tongon mangadopi pangelaelaion
laho meret sian haporseaon di Jesus Kristus dohot di
ulaonNa, laho mulak muse tu haporseaonnasida na robi.
Surat on digurithon di ujung ni taon 80-an abad parjolo, uju
i ndang diongku Kekaisaran Rom dope punguan ni
siihuthon jala sisomba Jesus Kristus i songon ugamo,
ndang dope songon ugamo Jahudi naung diongku
Kekaisaran. Siala ni i gabe tarunjun ma angka na porsea i
(1)
laho mulak muse tu haporseaon di ugamo Jahudi, na
mangondolhon pangulahonon ni angka patik, jala
hinaringkot ni ulaon ni angka malim na bongot tu inganan
na badia di bagas joro nang dung i di angka sinagoge di
parserahan di sandok inganan didia halak Jahudi maringan.
Panghorhonna, nunga tar miduk torop ni siihuthon Jesus
naung mamonai marlosok ni roha marsaor sama na porsea
i, manomba Jesus Kristus.
Siala ni i, di bagasan sada surat na, mangihuthon angka
naung mamarsiajari surat on, surat na marrumanghon
jamita na ganjang, dipatujolo panurat ma pahebahebahon
hasurungan ni Jesus Kristus mamungka sian bindu 1 sahat
tu bindu 10:18, asa umpos roha ni na porseai muse/togu di
hadirion nang ulaon ni Jesus paiashon dosa ni pardosa.
Sumurung do Jesus sian angka surusuruan ni Debata,
sumurung do ibana sian si Musa sijala, sipasahat, jala
sipahebaheba patik ni Debata i. Sumurung do
panghophopion ni Jesus tu pardosa i. Sumurung do
hadirionNa dohot ulaonNa sian hadirion nang ulaon ni
angka malim di ugamo Jahudi na tarbarita jala na diongku
Kekaisaran Rom i. Jala, di bindu 7 sahat tu 10:16-18
dipaandar ma tong hasurungan ni Jesus songon Malim na
patupa pelean hasesaaan ni dosa. Andul asing sian na
pinatupa ni angka malim i, ia ulaon patupa pelean hasesaan
ni dosa pinatupa ni Jesus tung singkop situtu do, sahali,
ndang mulakulak. Siala ni i, hamu angka dongan, di surat
Heber on, di na patoranghon panghorhon ni ulaon ni Jesus i
ndang holan hata ‘hasesaan ni dosa’ pinatupa ni Jesus i na
(2)
so mangharingkothon pelean pardosaon be na dipangke,
alai sahat do tu hata ‘manobus dosa’ alai paiashon dosa,
laho mandok ndang adong na tading dosa i marhite ulaon ni
Jesus sadasada malim na patupahon ulaon paiashon dosa i
holan sahali, ndang songon angka malim ni Jahudi na
mulakulak patupa ulaon panesaion ni dosa marhite pelean
sisesa dosa.
Dung mansai tangkas dipatorang i sian bindu 1 sahat tu
bindu 10: 18, diuduti ma mamungka sian bindu 10: 19
patolhashon angka poda haporseaon, laho mamastihon na
so meret be nasida sian haporseaon di Jesus Kristus Malim
Sipaias dosa i tu ugamo nasida narobi. Turpuk jamitanta di
Minggunta sadarion, Herber 10: 16-25 marisihon dua
bagian, i ma:

II. Ondolan ni Jamita

Ala nunga disesa dosam jala disurathon patikNa di roham,
tong ma ingkon jamothononta dirinta marhite angka dalan
na ampit tu haporeseaonta i
Hamu angka dongan, di turpukta on, siala ni songon i
kondisi pangunjunan na ro tu na porsea i, di poda na
mamanghulingi hita, adong dua bagian impola ni poda i.
Naparjolo ima bagas mangantusi asi ni roha ni Debata
naung pinasahatNa tu hita marhite ulaon ni Jesus.
Napaduahon, beha asa masa parjumpanganta dohot Malim
Bolon i di bagasan haporseaon na sintong, alai dohot do

(3)
tong beha ma dung i di ngolunta marsadasada dohot
saparsaoran.
Naparjolo, (ayat 16-18) mangondolhon dua ulaon ni
Debata tu na porsea, ima (i) Mangalehon dohot manurathon
patik tu ateate ni na porsea; (ii) Ndang marningot dosa ni
na porsea i be, so ingkon sai mamelehon pelean pardosaon.
Paduahon, poda asa hot naporsea i di haporseaonna di
Tuhan Jesus Kristus naung hundul di siamun ni na
Marmulia marhite na mangajarisa dohot pangantusion
taringot tu naung diula Jesus Kristus, sigomgom bagas,
Malim Bolon i.
(Dung ayat 25, mamungka ayat 26 sahat tu ayat 31
dipatolhas ma singotsingot manang nasehat ancaman
tu angka na so patupasa, baliksa na manglaosa (di
ayat 31 tarsurat songon on: “Jorbutna i madabu tu
tangan ni Debata na mangolu i”), alai di ayat 32-39
digurithon do pos ni roha ni panurat tu na porsea i,
na so songon na manglao i nasida. Dung bindu 10:
39 i di bindu 11, dipatorang ma gogo ni haporseaon
i, marhite na patoranghon ndang holan lapatan dohot
panghorhon ni haporseaon i, alai marhite na
paboaboahon panghorhon ni haporseaon i di bahat na
porsea mamungka si Abel di tingki na robi sahat tu
partingkian na jonok tu tingki ni panurat, taringot tu
angka na porsea na hot porsea atik pe porsuk do
ditaonnasida jala ndang diida nasida parbue ni
haporseaonnasida i di ngolu nasida. Dung i, di bindu
(4)
 12-13 dipaandar ma angka poda na asing na
mardomu tu haporseaon ni Jesus i (bindu 12: 1-11),
parsaoran dohot dongan jolma (12: 12-24) jala joujou
asa unang manjua soara ni Jesus (12:25-19) nang
sipaingot na mangihut (bindu 13)).
Di ayat 19-25 i, adong opat poda mangurupi hahohot ni
haporseaon di Jesus i, ima:
Parjolo, joujou tu na porsea na tarunjun i asa mandapothon
di bagasan roha na sintong dohot hagogok ni haporseaon, i
ma mandapothon Jesus Malim Bolon i, ala nunga diurasi
rohanta, asa unang gabe panggora ni rohanta na manolsoli
hita, jala ala nunga diburi dagingta dohot aek na ias di
bagasan hagogok ni haporseaon (ayat 23).
On ma joujou tu naung tarunjun meret tu haporseaon na
marasing sian na tu Jesus Kristus, hape nunga diurasi, tiur
panggora ni roha, jala dagingta pe nunga diburi dohot aek
na ias. Sangkap: Unang diuduti sangkap meret, alai hot ma
marhite na manopot Jesus.
Paduahon, momos maniop panghirimon ala haposan do na
mambagabagahonsa. On ma poda tu na, siala ni dokdok ni
parungkilon, naeng agoan panghirimon na binagabagahon
ni na marbagabagahonsa, ima Jesus Kristus i. Joujou asa
maniop panghirimon diondolhon marhite na mandok
haposan do Jesus Kristus na mambagabagahon
panghirimon i. Uju mangadopi parungkilon, boi do
tarunjun hita mulak tu haporseaon na robi, manadingkon

(5)
Jesus. Di ulaon parningotan di hamamate ni Jesus paias
dosanta, taalo ma pangunjunan manadingkon panghirimon
i.
Patoluhon, masiantoan dohot masipajujuan tu haholongon
dohot angka ulaon na denggan (ayat 24). On ma dalan na
tung mansai denggan sipatupaon ni na porsea i, i ma
mangolu songon sada parsaoran, ndang holan
mamingkirhon diri marsasahalak. Masiantoan dohot
masijujuan tu haholongan na tarida di bagasan ulaon na
denggan, i do dalan na boi pahot sasahalak nang ruas ni
punguan hiras pajumpang dohot Jesus di bagasan
haporseaon, jala patupa na pinangidona i ma
masihaholongan dohot patupa ulaon na denggan.
Paopathon, masipaingotan unang manadingkon
parpunguan/parsaoran sama naporsea (Gorik: episunagogen
heauten).
Hamu angka Dongan, dua bagian isi ni jamita on songon
ima opat poda na di bagian na paduahon i, mansai ringkot
do baritahononta di ulaon Parningotan di hamamate ni
Jesus Kristus. Na boi do ganup gabe jamitanta. Alai molo
so tarbahen do, mansai ringkot tapillit dia na mansai
ringkot tasoarahon tu dirinta, na marhadomuan tu
hadirionta be. Na boi do, i ma bagian na parjolo i
taondolhon di Parningotan ni hamamate ni Jesus i, i ma
sada sian dua bagian ni ayat 16-18, i: (a) ma atik pe naung
dilehon Debata patikna tu rohanta, tong do olo madabu hita
tu bagasan dosa. Alai na tonggi sian ayat 17 on, i ma: (b)
(6)
ndang diingot Debata be dosa ro di hajahatonta. On ma
barita na mansai uli. Intap ni i pe boi do jamita i. Alai,
hataNa tu hita, ndang holan so disi. Dipangido do asa
taargahon pasupasu ni Debata di na so diingotingot be
dosanta siala ulaon ni Jesus. I ma: Tadapothon Ibana, asa
marhite Ibana boi hita masuk tu habangsa na badia i
marhite mudar ni Jesus, Malim Bolon i. Alai dung
tadapothon ibana, songon marsasahalak dohot saparsaoran
mansai ringkot na mangihut on, i ma sahat hita niang tu na
maniop momos panghirimon binagabaganon ni Jesus i tu
ganup na porsea i, nuaeng nang sogot pe, ala haposan do
Ibana. Alai ndang holan i, sama hita ingkon masiantoan,
masipajujuan tu haholongan dohot tu ulaon na denggan.
Dalan tusi, unang ma tadok ndang porlu marsaor dohot
dongan saparsaoran, songon na masa di angka negara di
portibion isara di Eropa, alai ingkon tauduti parsaoran di
parpunguanta.

III. Panimpuli
Jamitanta sadarion tung marisihon barita nauli na sian
Debata, i ma dilehon patikNa tu rohanta, alai nang pe
songon i, molo mardosa hita taingot ma hasisingkop ni
hasesaan ni dosanta binahen ni Jesus Kristus Malim Bolon i
na marhite mudarNa manesa dosanta dohot paias hita. Jala,
jamitanta marisihon barita nauli na mamodai hita asa hot di
haporseaon marhite na momos maniop haporseaon,

(7)
masiantoan dohot masipajujuan tu haholongan dohot ulaon
na denggan, huhut marsaor.
Boasa mansai ringkot duansa barita nauli i di hita nuaeng
ruas ni HKBP? Sotung maon siala adong sian
tongatonganta naung manang na tongon tarunjun laho
manadingkon haporseaonna di hasisingkop ni hasesaan ni
dosa binahen ni Jesus gabe olo be ibana mangantosi
donganna, ndang momos be ibana maniop panghirimon i,
ndang diantoi be donganna, ndang olo be ibana di/manjujui
donganna tu haholongon dohot tu ulaon na denggan, jala
marsaor dohot angka donganna di huria ni Kristus i?
Tatimbangi be ma. Alai halashon ma barita nauli na
patuduhon holong ni roha ni Debata, songon i nang barita
nauli na pabotohon tu hita songon dia asa hot hita
marhaporseaon. Amen.

(8)