BAHAN SERMON PARHALADO HKBP RESSORT SIBAGANDING

MINGGU, 30 Mei 2021 di HKBP Sibaganding

JAMITA TU Minggu I Dung Trinitatis, EV: Markus 3:20-35

‘Unang Mangelai Tondi Parbadia’

I. Patujolo
Turpuk on i ma: udut ni Barita dung dipillit Jesus siseanNa na sampulu dua i. dungkn turun sian dolok Jesus rap
dohot siseanNa, rongom do jolma mandapothon nasida, gabe ndang sanga nasia nanggo mangan. Keluarga ni Jesus
nunga paimahon di luar, na ro do nasida laho mangalap Jesus laho mangorai Ibana, asa unang pagodanghu be
manghatai dohot marpambahenan. Dirimpu keluargaNa naung rintik Ibana (ayat 21), ala tongon na mangalusi halak
Jahudi horong saduse, Farise dohot siboto surat do Jesus di tingki i. Adong na ingkon patorangon ni Jesus taringot tu
pandohan ni angka nasida, i ma na naeng idaonta marhite turpuk on.

II. Hatorangan ni Turpuk:

1. Di ayat 22 on dibaritahon do adong angka sibotosurat na tuat sian huta Jerusalem na mandok: ‘Jesus dirajai
sibolis dohot mangasahon hagogoon ni sibolis mangulahon ulaonNa patupa angka tanda halongangan, jala induk
ni angka sibolis do dipangasahon laho pabalihon angka sibolis. I ma na naeng patorangon ni Jesus tu angka na
menuduh Ibana i, dijou ma nasida. Dipatorang Jesus ma tu nasida marhite sada parumpamaan. Didok ma tu
nasida ‘tagamon ma pabalion ni sibolis i donganna sibolis? (ayat 23) pandohan ni Jesus do laho menangkal
pandangan ni halak Jahudi i: ai molo mangasahon tondi na hodar do Jesus pabalihon na sibolison, ndang logis
pikiran na songon i. diuduti Jesus ma muse panorangionNa marhite na mambahen sada tudosan: ‘ndang hot
manang ndang hibul sada hagogoon molo maralo dohot ibana sandiri Manang ndang margogo sada team molo
so sada nasida songon sada team. Lapatanna: ‘‘ molo hehe team ni sibolis mangalo sibolis, na hian rap do nasida
songon sada team laho mangalo jolma, alai molo gabe saling maralo do sibolis i ndang hot be hagogoon ni i
(Ayat 26). Ai ingkon na jumolo dilumpuhkan do sibolis i (ulubalang) laho mangarampas ugasanna dung pe i asa
tarbuatsa ugasanna. Jadi ndang logika na nidok ni halak Jahudi i manang boa pe ndang tarpabali sibolis molo
mardongan do dohot sibolis.
2. Ayat 28-30 Jala laos dipatudu Jesus ma dison dosa ni angka na menuduh Ibana i ma na manulak huaso ni Tondi
Parbadia ni Debata na mangula di bagasan diriNa. Nunga digohi Tondi ni Debata (tondi Parbadia) Jesus laho
mangulahon ulaon ni Debata. Jadi molo dileai nasida do ulaon ni Jesus, sarupa do dohot na mansoadahon Tondi
Parbadia, mardosa ma nasida dompak Tondi Parbadia, jala dosa maradophon Tondi Parbadia i ma dosa na so boi
diampuni. Tutu do memang dibagabagahon do tu hita hasesaan ni dosa marhite barita na uli, ala hamatean ni
Jesus di hau parsilang mamboan hasesaan ni dosa tu sude jolma pardosa. Gari godang do na manihai Jesus uju
naeng tarsilang sahat tu na tarsilang pe Ibana godang do na manghujat Ibana, alai diondihon Jesus do nasida
marhite na mandok ‘Ale Amang marpamuati ma rohaM, ai ndang diboto nasida na niula nasida i.’’ alai dosa na
sasada on i ma dosa na mangaleai Tondi Parbadia: di na nidok ni angka siboto surat i: sibolis do dipangasahon
laho pabalihon angka sibolis i ma dosa na so tarsesa, ai na menyangkal huaso ni Tondi Parbadia do molo didok
songon i, lapatanna disi ndang adong huaso ni Tondi Parbadia laho patupahon angka tanda halongangan dohot
ndang adong pangulaon ni Tondi. Alai tangkas do taboto paboa ragam do angka talenta (karunia) na nilehon ni
tondi.
3. Ayat 31-35 adong do dison pernyataan ni Jesus paboa natoras ni Jesus dohot angka angina ndang holan
keluargaNa ndang holan hubungan parmudaron, marga, bangso, adat dln, songon na somal di portibion. Alai
dohot do na mangulahon lomo ni roha ni Debata. Tontu nunga taboto angka dia ma na gabe lomo ni roha ni
Debata. Ai mangulahon lomo ni roha ni Debata, sahat do nang tu parsaoran dompak jolma. Molo holong roha ni
sasahalak tu Debata, haholongan ni i do donganna jolma.
III. Aplikasi:
Ditongatonga ni ngolunta talpe do hita jolma madabu tu sikap na sai tong marungutungut molo masa angka hamaolon
di tongatonga ni ngolunta. Sikap na songon i boi do gabe pa ro rimas ni Debata ala dirajumi songon pangaloon tu
Tondi ni Debata nang tu Debata sandiri, molo jumpang sikap na songon i, seakan-akan ndang adong huaso ni Tondi
ni Debata, nang Debata sandiri laho merubah manang gabe padengganhon na masa di tongatonga ni ngoluna (songon
na maningkot ma rupani) dln. Songon i ma nang mangadopi halak na membenci hatigoran ni Debata jala na so pola
manghalomohon taringot tu huaso ni Debata molo tongtong hita manghaporseai Tuhan i, jumpang hita do gogo dohot
hamonangan laho mangadopi angka halak na bersikap benci taringot tu Debata. Ndang hagoonta manang hamaloonta
pangkeonta laho mangadopi nasida, ala mangasahon Tondi ni Debata ma hita mangadopi nasida.