Bahan Sermon Daerah X Kepri, Jamita Minggu PENTAKOSTA I

Ev: Johannes 20:19-23 ; Ep: 1.Samuel 10:6-13

Jalo Hamuma Tondi Porbadia

I. Patujolo

Saor Tondi ni Porbadia tu nasa na mardaging, laho padarathon pangantusionta di ha

Kristenonta, asa marimpola jala sar ma nang barita Hamuliaon ni Debata Jahowa marhite
haheheon ni Tuhan Jesus Kristus. Nasa na mardaging porsea jala gabe sitindangi tu liat portibi
on. Turpuk Jamita on, laho pabotohon tu hita, dung hehe Tuhan Jesus di ari patoluhon dung
salpu ari sabat, tung godang do angka siseanNa i na mabiar jala humolso nang rohanasida ala
parnidaan nasida na mago do bangke ni Tuhan Jesus sian tanoman i, ima di na magulang batu i,
di tingki bongot si Maria Magdalena ina ni Tuhan Jesus, Maria ni si Jakkobus, rap dohot si
Salome hatiha dapot manogot di buhabuha ijuk di ari na patoluhon. Ala ndang adong nanggo
sada sian angka nasida (Sisean nang angka Parompuan i) na marningot di ganup hata naung ni
dok ni Tuhan Jesus tagan di ngoluNa rap dohot angka na torop i. Ido umbahen sae diula nasida
angka hasomalan ni halak Jahudi, molo adong na monding, molo dung dapot ari patoluhon, ro
ma nasida nang angka sisolhot ni na mondingna be laho mamiaki bangke ni ganup angka na
mondingna. Hinorhon ni i mabiar jala holsoan situtu angka sisean ni Tuhan Jesus, dirimpu nasida
mangalualu angka halak Jahudi i dompak tu angka soldadu ni halak Rom, gabe laho ma nasida
songon na martabuni huhut manghinsu ganup pintu ni inganan parsaoran ni angka siseanNa i,
ala dihilala nasida na laho ro nama angka Soldadu harajaon ni halak Rom laho pasudahon nasida
ima angka siseanNa i.

II. Hatorangan Ni Turpuk

Tuhan Jesus tangkas diboto ganup na mian di bagas roha ni angka SiseanNa i, pola do Jesus
laho patuduhon diriNa tu angka siseanNa i, jongjong ma Ibana ditongatonga ni nasida, jala di dok
ma tu nasida: “Dame ma di hamu” (19). Hata DAME di Padan na Imbaru di dok do: EIRENE.
Molo di Padan Na Robi, di dok ma i: Shalom. Saluhutna i martudutudu tu haluaon na binoanNa
jala marhaujungan tu pandohan ESKATOLOGIS ima ngolu tu ari pangapudian (Kehidupan
setelah kematian secara daging). Hal na wajar do molo tung mabiar angka Sisean i laho jumpang
dohot angka Jahudi nang angka Soldadu ni halak Roma, ala dirajumi nasida do tagan mangolu
dope Tuhan Jesus, sae rap do nasida ganup ari jala ganup tingki. Ido dasor ni habiaran dohot
holso ni roha nasida andorang so dipatuduhon Tuhanta Jesus dope hadirionNa di jolo ni angka
siseanNa i. Luarbiasa Tuhan Jesus, ndada holan hataNa na binege ni nasida alai dohot do
dipatuduhon Ibana diriNa marhite tangan dohot daging ima andoraNa di adopan ni angka
SiseanNa i, huhut dilehon do asa diida jala ditiop angka siseanNa i, asa mago holso dohot biar
nasida jala porsea situtu nasida naung hehe Tuhan Jesus sian hamatean (20).

Dung di dok Tuhanta Jesus hata pandohan Dame ma di hamu, disi ma tarida las situtu
rohanasida umbege hata ni Jesus, tung pe songon na humordit jala humitir nasida ala ni biarna.
Dipadua hali muse di hata ni Jesus na mandok Dame ma di hamu, laos pabotohon hadirionNa na
sinuru ni Ama ahu, suruonku ma hamu (21), asa gabe parbaritanauli pabotohon huaso dohot
hamonangan naung pinapatar marhitehagogoonNa i, talu hamatean, soluk hamonangan jala
marlasniroha saluhutna jolma na tinobusNa. Ido umbahen di dok di hataNa, Ai arga do hamu
ditobus, dibahen i pasangap hamu ma Debatamuna marhitehite daging dohot tondimuna.
Marhite i ma di pangidohon Tuhan Jesus tu angka SiseanNa asa saluhut nasida manjangkon
Tondi Porbadia (22) na laho saor tu angka na mardaging, dung i pe asa borhat laho mamaritahon
barita haluaon i. Disi ma gabe patar hahomion ni Tuhan i, di naso sarupa hata nang pandohanna
be, alai marhite parbinotoan na sian Debata Ama i, gabe masiantusan nasida sama nasida, ido na
ni dok na Glosalia (Bahasa Lidah). Hata pandohan ni Jesus tu angka siseanNa, asa tarjangkon
nasida hasasaor ni Tondi Porbadia, asa jumolo nasida sama nasida masipasesaan dosa manang
masisalpuan di angka na humurang. Baliksa molo di angka naso rade masipasesaan dosa nasida
sama nasida, na tarihot ma saluhutna di banua ginjang dohot di tano on (bnd.ayat.23)

III. Impola Ni Jamita

1. Pentakosta, ima lima pulu ari dung salpu haheheon ni Tuhanta Jesus. Pabotohon tu saluhut
hita, HasasaorNa patauhon angka na porsea gabe sitindangi di liat portibion.
2. Rade jala hobas laho mamaritahon Barita Haluaon ima hamonangan ni Jesus sian hamatean.
3. Unang be adong sian tongatonganta na sae marsidalian laho pararahon barita hasintongan
ni hata ni Debata. Sandok patoguonNa do angka na unduk di hataNa marhite gogo dohot
pangurupionNa.
4. Ndang pasombuonNa ganup na mangulahon hataNa mian di bagasan biar nang holso ganup
ari nang di ganup tingki. Sandok donganan ni Debata Jahowa do hita rasi rasa ro ajal ni
portibion.
5. Masisalpuan di angka na humurang, jala masipasiseaan dosa ma hita saluhutna, asa bongot
tu hita pasupasuNa. Ai ido na nihirim ni Debata marhite Tuhan Jesus sian saluhutna jolma, ai
di haradeonNa (Jesus) di hamamateNa di hau silang i, dapot hita pardengganan dohot
pardameanta raphon Debata Jahowa. Amen!