BAHAN SERMON PARHALADO POSPEL HKBP JEPARA

MINGGU IX Dung Trinitatis, 14 Agustus 2022

Topik: POLIN MANGIHUTHON JESUS (Lukas 12: 49-53)

I. Patujolo
Mansai torang do pangajarion ni Jesus tu angka siseanNa laho mangantusi pardalanan ni
tingki. Ia tingki on na mardalan do sahat ro di ujungna. Adong tingki naung salpu, adong tingki
nuaeng jala laos adong muse tingki na naeng ro. Pardalanan ni angka na porsea, i ma manuju tu
tingki hasonangan salelenglelengna songon naung pinarbaga na i hian tagan di hasiangan on
dope Ibana. Disi ma singkop parsidohoton ni angka na porsea di harajaon ni Debata na
manontong i. Sada pangalaho na ingkon hangoluhonon ni angka sisean i tagan di hasiangan on, i
ma pangalaho na dungo jala hobas managam haroro ni Tuhan i, ai na ro do Anak ni Jolma i di
tingki na so panagamanna. Angka na porsea i, ingkon mangarade diri mangadopi angka na masa
nuaeng, ai ari pambeheon do angka tingki on na manirang angka na porsea sian na so porsea.
Ingkon lam malo do angka na porsea mangantusi partingkian huhut mangantusi angka pangalaho
na masa disi.
II. Hatorangan
Aha do na masa dohot na naeng masa? Didok Tuhan Jesus "Na ro do Ahu
mandanggurhon api tu tano on. Dihasiholi rohangku do anggiat haru galak nian". Lam jonok tu
ari haroro ni Tuhan i, masa ma api na manguji haporseaon ni jolma i. la api i gombaran ni ragam
ni haporsuhon dohot parungkilon do i na manguji haporseaon ni jolma i. Masa ma haporsuhon
dohot ragam ni sitaonon laho papitahon dohot papolinhon haporseaon ni jolma i. songon na
tarsurat di 1 Petrus 1:7"Ai naeng jumpang do hatauon ni haporseaonmuna, na andul ummarga
sian sere na so manahan nang pe diuji api i. bahen pujipujian dohot hamuliaon dohot hasangapon
ni Jesus Kristus i. Lam ditutung api i haporseaon ni jolma i laos ido dalan laho papitahon
haporseaon ni jolma i. Asa molo masa haporsuhon di naung jonok haroro ni Tuhan i do, dohot
papolinhon haporseaon do i. Tutu do na nidok ni angka pande bisuk i, di haporsuhon do patar,
tarida hapolinon ni haporseaon ni marsadasada halak. Asa molo masa haporsuhon di tano on,
dalan papatarhon hapolinon ni haporseaon doi, bahen pujipujian dohot hasangapon di Debata
Didok Tuhan Jesus dope: "Na dirimpu rohamuna do na laho mangalehon dame Ahu tu
atas tano on umbahen na ro? Nda tung, Hudok ma di hamu: Panirangon do tahe". Hira na
maralo do hataon sian pandohan na somal na ro sian Jesus na mandok "dame ma di hamu". I do
tutu sintongna, nunga dipadame Debata diriNa tu jolma pardosa di marhite Jesus Kristus. Pola do
haporsuhon dohot hamatean masa tu Jesus i manggarar utang dosa ni jolma i asa saut mardame
jolma i tu Debata. Dibagasan i do boi antusan dame do na binoan ni Jesus i. Alai nuaeng didok
Jesus ndang mamboan dame Ibana alai panirangon do. Nunga dipadame Debata diriNa tu jolma
pardosa i. Hinorhon ni i, ganup halak naung manjalo dame na sian Debata dibagasan Jesus
Kristus saut ma ibana dipadame tu Debata, bongot ma ibana tu hangoluan naso ra suda. Ganup
naung mardame tu Debata malua ma ibana sian gomgoman ni sibolis, dosa dohot hamatean. Alai
angka na so manjangkon dame na sian Debata di bagasan Jesus Kristus, tading ma ibana di
bagasan sibolis, dosa dohot hamatean i. Marhite i gabe torang ma antusan ni jolma i ia haroro ni
Jesus i laho manirang halak na porsea di Jesus Kristus (i ma naung manjangkon dame na sian
Debata) sian halak na so porsea di Jesus Kristus (na so manjangkon dame na sian Debata).
Nunga dijangkon Jesus pandidion i, i ma ragam ni haporsuhon i, sahat ro di na mate
Ibana di hau pinarsilang i. Ingkon diadopi Jesus saluhutna i. Asa molo masa api haporsuhon tu
jolma i, nunga jumolo Jesus mangadopi i. Hinorhon ni i margogo situtu angka siihuthon Jesus i
mangadopisa, jala tolhas ro di na papitahon dohot papolinhon haporseaonna. Alai anggo angka
na so mangihuthon Jesus i, mandao do sian api haporsuhon i, laos marsihohot dibagasan dosana.
Disirang ma disi angka na porsea sian na so porsea i. Marsirang ma disi angka na polin
mangihuthon Jesus sian angka na marsipaula mangihuthon Jesus rap dohot na so porsea di Tuhan
Jesus i. Asa molo didok Jesus na mamboan panirangon do Ibana di haroroNa, i ma laho
manirang angka na porses sian angka na so porsea do i. Polin ma angka na porsea i rap dohot
Jesus di hasonangan na manontong i.
Didok Tuhan Jesus ma muse: "Ai olat ni on ma maralo lima halak di na sajabu: Natolu
maralohon na dua, jala na dua maralohon na tolu. Maralo ama tu anakna, anak i tu amana; ina
tu boruna, boru i tu inana, simatua boru tu panumaenna, parumaen tu namboruna". Ia
panirangon i tung di saluhut inganan do i masa. Sahat do panirangon i ro di angka na sajabu, na
so tagamon nian masa adong parsirangan disi. Ndang adong be na boi holiphononhon manang
tabunihon angka na masa di ari haroro ni Tuhan i. Somalna, molo parsalisian di angka jabu, sai
adong do usaho laho manutupi i, asa unang pola tarboto tu duru ni jabu, Hailaon do i

1
mangihuthon adat molo tarbege parsalisian di angka jabu sahat tu balian ni huta, gabe dihuphupi
ma angka parsalisian i. Idaon sian duru sai hira na dame jala sada do na sajabu i, hape nunga
dibagasan parsalisian.
Ngolu na mardangol do sasintongna ngolu na hinangoluhon nasida, alai sai dihuphupi do
i tu duru asa unang maila ninna rohana. Alai di haroro ni Tuhan i, ndang adong be na boi
huphupan ni jolma jala holiphonon ni jolma i, saluhutna do ingkon patar. Ganup halak ingkon
mambuat hajongjonganna, porsea di Tuhan Jesus manang ndang porsea. Asa molo na rap do ama
dohot anakna, ina dohot boruna, parumaen dohot namboruna marhaporseaon tu Tuhan Jesus, rap
ma nasida manjangkon haluaon na manontong i. Alai molo ndang rap amana dohot anakna, inana
dohot boruna, parumaenna dohot namboruna manghaporseai Tuhan Jesus, ndang tarbahen be rap
nasida nang pe sajabu. Ingkon sirang ma nasida. Na porsea tu Tuhan Jesus i jala mangadopi api
na papitahon i, bongot ma tu hasonangan salelenglelengna. Na so porsea tu Tuhan Jesus jala na
so mangadopi api na papitahon i, tading ma di hamatean i. Hinorhon ni i do, naeng di ganup jabu
marsaringar hata ni Debata asa unang adong parsirangan di haroro ni Tuhan i. Ama dohot
anakna, ina dohot boruna, simatua boru dohot parumaenna, naeng rap ro marhaporseaon tu
Tuhan Jesus i. Naeng ma unang masa parsalisian di ganup jabu lumobi parsalisian na sai buni
jala di huphupi na mambahen marniae pangisi ni bagas i Alai polin ma marhaporseaon tu Tuhan
Jesus i, asa-jumpang dame na marhasadaon di ganup jabu.
III. Panimpuli
Pangajarion ni Jesus taringot tu ari penguhuman, asa parade diri jala hobas di saluhut ulaon
na denggan. Haporsuhon na adong di ngolu ni na porsea i dalan laho papitahon dohot papolinhon
haporseaon ni jolma i. Haroro ni Jesus tu portibion ima mamboan dame, alai ganup naso
manjakkon dame na sian Debata marhitehite hamamate ni Jesus, sirang mai sian angka na
manjangkon dame i. Hata ni Debata na manirang jolma i sian dosa asa lam tu polin na
haporseaon i bahen pujipujian dohot dohot hasangapon di Debata. Asa jumpang dame di
tongatonga ni keluarga nang portibi. Amen