Epistel Minggu 16 April 2023

MINGGU QUASIMODOGENITI

DITUBUHON PADUAHALIHON MARHITE HATA NI DEBATA

Pangungkapon 21:5-7

Quasimodogeniti - Lat. sicut modo geniti artinya sama seperti bayi yang baru lahir (songon
posoposo na imbaru tubu) (lihat 1 Petrus 2:2a).

Tutup langgatan – Na Bontar

TURPUK
Dung i didok na hundul di habangsa i ma: "Ida ma, saluhutna do Hupaimbaru." Jadi
didok ma: "Surathon ma i, ai haposan do angka hata on jala na sintong." Laos didok ma tu ahu:
"Nunga saut. Ahu do Parjolo jala Parpudi, Bonana jala Ujungna. LehononHu ma tu na mauas
sian mual aek hangoluan i, so pola tuhoron. Teanon ni na monang i ma saluhutna; jala Ahu
gabe Debatana, ibana gabe anakHu."

PATUJOLO
Buku Pangungkapon molo di hata Gorik didok ma i "apokalipto," lapatanna
pangungkapon angka na naeng masa. Diungkap Debata do angka na naeng masa. Di Bibelta i
Buku Pangungkapon on dibahen ma gabe buku na parpudi. Godang do dipangke angka simbol
na pataridahon hasangapon dohot hagogoon ni Tuhan i. Dipangido Debata do asa disurathon
si Johannes angka na niidana manang angka na pinatudu ni Debata.
Si Johannes i ma sahalak naposo ni Debata. Partohap do ibana di haporsuhon uju masa
pangaleleon na posa di gomgoman ni Kesar Rom na manghasogohon hakristenon.
Digomgoman ni Kesar Nero dohot Kesar Domitianus ma luat Rom hatiha i. Dipatupa angka
kesar on do aturan manang uhum asa sude na ginomgomanna manomba nasida. Alai ditulak
halak Kristen do aturan on, dihatindangkon nasida do tung holan Debata di bagasan Kristus do
na patut si sombaon. I ma bonsirna gabe masa ma pangaleleon jala dipusa do halak Kristen uju
i.
Buku Pangungkapon on marisi dua pulu dua bindu jala adong mar opat ratus opat ayat.
Digurithon si Johannes ma buku on hirahira taon sia pulu sahat tu sia pulu onom dung Kristus.
Digurithon ibana ma i uju na tarbuang ibana di sada pulo na margoar Patmos (ida
1|Epistel Minggu 16 April 2023
Pangungkapon 1:9). Jala pangarimpunan ni buku on i ma: Jesus do Raja na mangatasi angka
raja, Tuhan na mangatasi saluhut tuhan.

HATORANGAN
1. Saluhutna do dipaimbaru Debata (ayat 5).
Turpuk Epistel sadari on paboahon taringot parnidaan ni si Johannes uju diungkap
Debata tu ibana angka na naeng masa di ari ni Tuhan i. Dipatudu Debata tu ibana banua
ginjang dohot tano na imbaru. Diida si Johannes huta na badia tuat sian banua ginjang sian
Debata, i ma Jerusalem na imbaru. Hundul ma Debata di habangsaNa i jala didok,
"saluhutna do Hupaimbaru." Didok "imbaru" dison, naeng patoranghon na dipaimbaru i
ndang dos be dohot haportibion. Tontu haimbaruon na nidok ni Debata dison i ma ngolu
na so sarombang be dohot portibi on. Ngolu si songon i ma na ingkon adong di hita, dalan
laho manomunomu na naeng masa i.
Dipangido Debata do asa disurathon si Johannes angka Hata i, ai sintong jala
haposan do Hata i. Didok di turpuk on asa disurathon ndada holan marlapatan asa disurat
songon di hita saonari, songon manurat tu buku, alai asa dohot do manghangoluhon Hata i.
Jala "Hata" na nidokna di turpuk on, molo di hata gorik didok "logos," patoranghon Jesus
do Hata i. Sian on boi ma antusanta, asa tarbahen hita dapotan haimbaruon na sian Debata,
ingkon tahangoluhon do Jesus i, di bagasan ngolunta.

2. Debata do Parjolo jala Parpudi (ayat 6).

Didok Debata ma muse tu si Johannes, "nunga saut." Didok saut na marlapatan do
i, di bagasan Jesus nunga singkop be saluhutna. Di bagasan Jesus do dipasingkop nasa
sangkap ni Debata, na so tarpauba, na so tarunsat jala na so tarambati. Ingkon saut do.
Di bagasan Jesus do gok hadirion ni Debata di tongatonga ni nasa na tinompa ni
Debata. Di bagasan Jesus gabe patar ma, Debata do na Parjolo jala na Parpudi, molo di hata
Gorik didok "alpha kai omega." Debata do Bonana jala Ujungna. Tarimangi ma, tutu do
adong hasintongan jala haulion dohot hadengganon ni Debata di liat portibi on. Holan di
bagasan Jesus i do singkop haulion dohot hadengganon ni Debatanta i. Ala ni i nasa jolma,
nasa na marhosa, mansai ringkot do ro tu Jesus, asa dohot taruli di hasisingkop ni nauli na
denggan na sian Debata.

2|Epistel Minggu 16 April 2023

3. Gabe Anak ni Debata (ayat 7).
Na mangihut, adong do relasi ni Jesus dohot halak na manean bagabaga ni Debata.
Hata panean dison patoranghon "hak waris" manang "na mewarisi." Jesus do na gabe
patujolo ni jolma di adopan ni Debata, asa adong siteanonna manang bagianna di haluaon
i. Ndada be mamereng disi manang manang marguru tu nasib asa dapotan haluaon na sian
Tuhan i, alai gabe siteanon do i molo di bagasan Jesus jolma i.
Ia dung di bagasan Jesus jolma i, masa ma hamubaon ni jolma i di adopan ni Debata.
Sian jolma na ramun jala pardosa, gabe ianakhon ni Debata. Molo didok "anak," i ma na
gabe gombaran ni bapana, panean di angka siteanon ni amongna. Boi do tong dohonon
dongan jala na rap dohot amongna. Molo ianakhon ni Debata hita, tontu ingkon tarida do
gombaran ni Debata di nasa parngoluonta, jala parange ni Debata ma na tarida di bagasan
parangenta. Jala parsaoranta pe dohot Debata ingkon totap do jala mardalan torus tudos
songon parsaoran ni angka ianakhon tu amongna.

HAHONAAN
Goar ni Minggunta sadari on, i ma Quasimodogeniti, na marlapatan songon posoposo
na imbaru tubu, na uasan di susu na tama. Tontu molo didok songon posoposo hita di adopan
ni Debata, ingkon uasan do hita di angka susu na tama na sian Debata. Tarimangi ma amang
dohot inang, tasungkun ma dirinta, tutu do naung gabe ianakhon ni Debata hita nang
pangalahonta? Asa boi gabe ianakhon ni Debata hita, ingkon ditubuhon do hita paduahalihon
di bagasan Hata ni Debata, jala Jesus i do na nidokna disi. Ala ni i nda tung mungkin jolma i
boi gabe ianakhon ni Debata, molo ngoluna sandiri pe ndang porsea jala ndang
manghangoluhon angka uhum dohot patik ni Debata. Molo didok ditubuhon paduahalihon na
marlapatan do i asa marhamubaon ni roha hita, ala marhaporseaon hita tu Tuhanta Jesus. Amen.
(ejs)

Ginurithon ni Pdt. Ewen Josua Silitonga

Disunting oleh Vic. Pdt. Timothy Saragi

HKI Immanuel – Magetan, Jawa Timur

Tulisan ini telah terbit di timothysaragi.com dengan link

https://www.timothysaragi.com/2023/04/epistel-minggu-16-april-2023-pangungkapon-21-
ayat-5-7.html
3|Epistel Minggu 16 April 2023
Dapatkan update artikel terbaru dari timothysaragi.com. Mari bergabung di Channel
Telegram "timothysaragi.com Artikel Update", caranya klik link
https://t.me/timothysaragicomupdate, kemudian join. Anda harus install aplikasi Telegram
terlebih dulu di ponsel.

4|Epistel Minggu 16 April 2023