Bahan Sermon Jamita Minggu 10 Dung Trinitatis, 13 Agustus 2023 HKI Rs.

Pangaribuan Tengah
Evangelium.: 1 Musa 39:1-5; Epistel.: Mateus 8:5-13; S.patik.: Galatia 5:1

GABE PASU-PASU DIBAGASAN TUHAN

I. Patujolo
Dihasogohon, dipabali, digadis sahat tu tahi laho dibunu, ima na didalani si Josep sian hahana diparngoluanna. Si Josep
(Yusuf) ima anak siampudan sian 12 na martinodohon anakni si Jakob dohot inana si Rahel. Hatubuanni si Josep ima dung
marumur ma si Jakob 91 taon laos I ma gabe sibonsiri boasama gabe anak hasian si Josep. Ala hasian ni amana I si josep,
gabe late do rohani angka hahana marnida ibana, ala patandahu dibahen si Jakob parhasianonna I tu anakna si Josep, pola ro
rimas ni roha hahana gabe digadis ma ibana tu halak Ismael. Tung mansai lea do si Josep dung digadis hahana ibana gabe
hatoban ni halak Misir, dipatudos do si Josep songon barang yang dapat diperjual-belikan. Alai nang pe songoni parngoluan
ni si Jakob, taruli do ibana binahenni pangaramotion ni Debata tu ibana jala dihaporseai ibana do dang loason ni Debata ibana
tarpunjung. Tarsurat doi di Ulaon ni Apostel 7:9 “Dung I dilatei angka ompunta I ma si Josep, digadis ma ibana tu tano Misir,
alai didongani Debata do ibana”. Nang pe pait dalan parngoluanni si Josep binahenni sogo ni rohani hahana, alai gabe tiruan
do ibana di hasatiaonna dohot di pangoloionna I tu Tuhan. Dialo ibana do ela-ela ni portibion ala biarna maradophon Debata,
jala dipataridahon si Josep ma ngoluna I mangolu dibagasan pangaramotion ni Debata.
Ndada holan di ruhut parduru ni hajolmaon I tarida pandonganion ni Debata, dohot do nang sandok roha ni hajolmaon I
di ramoti Debata. Dijou do hita asa mangolu dibagasan pangaramotion ni Tuhan I, asa gabe pasu-pasu hita diportibion
marhite na gabe tiruan na denggan na taulahon jala na tahangoluhon do hata ni Tuhan I di parngoluan siapari.
Dinataparangehon lomo ni roha ni Tuhan I, asa gabe pasu-pasu hita nang pe dibagasan hagogotan i.
Adong piga-piga parsiajaran na boi taputi sian parngoluanni si Josep na dipataridahon ibana dihatiha ro hagogotan I
songgop tu ngoluna:

II. Hatorangan
1. Sai didongani Jahowa do hita molo marsihohot manghabiari Ibana (Ay. 1-4)
Ndada alani hajahaton na niula ni si Josep umbahen gabe digadis hahana ibana gabe hatoban tu halak Ismael, alai ala roha
pangiburuon ni hahana do nagabe bonsirna. Umholong do rohani amana si Jakob tu si Josep martimbangkon hahana 10 halak
I, ala dipatarida si Jakob do holong nai tu si Josep umbaen gabe dipamanja-manja amanai ibana. Alai nang pe dipamanja si
Josep, molo sifatnai memang undokdo tu hata ni natorasna. Diparsangapi ibana do natorasna marhite pambahenanna na so olo
manjua poda i. Uju diparentahon amana I si Josep mangalului hahana nalao marmahan, ndang na gabe di tolak ibana parentai,
alai do oloi do. Dung lao ibana mangalului hahana, gabe nasib buruk do diibana, jala I ma dalan hahanai lao pasingkophon
sangkapna ima manggadis si Josep. Hasomalan do molo dituhor sasahalak sian panggadisan asa gabe hatoban ibana diagasni
na manuhor i. lapatanna, dang adong be argana jala dang boi gabe haposan ibana laho mangaradoti bagas ni tuanna (Ay. 1).
Alai marasing do molo si Josep, songon diama pangalahona tu natorasna, songoni ma muse dibahen ibana dibagasni
tuanna I nang pe gabe hatoban do si Josep dibagasni tuanna si Potifar, alai nang pe hatoban ibana, boi do dibahen si Josep
tubu holongni tuanna I (siPotifar) tu ibana marhite parulaanna denggan na binahennai dibagas ni si Potifar. Ndang pola gabe
menek rohani si Josep ala gabe hatoban ibana jala ndang na gabe I dalanna mandele tu Debata ala sitaonon nai, alai diradoti
ibana do sude angka ulaonna asa unang ro rimas ni tuanna I tu ibana. Boasa ma pola ingkon dipaloas Debata si Josep
mangadopi hamaoloni, tungna burju do si Josep marnatoras alai ingkon ditaon ibana hamaolon i? Di ayat 2 na boi ta ida; “Sai
didongani Jahowa do si Josep i…” Ndang ala so dihalomohon Jahowa parange ni si Josep asa gabe hatoban ibana, alai I ma
dalan ni Debata lao pataridahon holong na I tu si Josep. Dipataridahon Debata do holong nai marhite parkarejoanna di
bagasni tuannai, “… Gabe jolma na martua ibana dibagasni rajana…” Diramoti Debata do sude naniulana, sai manjadi do
saluhut angka sangkap ni si Josep jala gabe pasu pasu dohot silasniroha doi di humaliangna. Ala haburjuan ni si Josep dohot
ala pasu-pasu ni Jahowa tu naniula ni tanganna, gabe dipabangkit ma si Josep gabe siramoti artani tuanna I (siPotifar). Ala
parsihohotonna manghaposi Jahowa, dipasahat si Potifar ma nasa na pineopna gabe ramotan ni si Josep, ala diida si Potifar do
parsihohotanna tu Jahowa umbaen gabe tarpasu-pasu bagas ni si Potifar (Ay. 3-4). Marsihohot ibana mangoloi Debata ndang
holan di na patar idaon, alai dohot do di habunion. Nangpe dipabangkit siPotifar si Josep gabe siramoti bagas dohot sude na
diibana I, ndatung gabe tubu ginjang ni roha ni si Josep jala nda tung gabe marsilomo-lomo si Josep di ulaonna. Diradoti si
Josep do ulaonnai, hobas do ibana mangulahon sude angka parenta ni tuanna jala bertanggungjawab disude pangulaonna.
Sada teladan do on sian parngoluanni si Josep na boi sitiruon ni jolma dihatiha on. Molo dilehon sada tanggungjawab tu hita,
ingkon boi do muse dipertanggungjawabkan, molo dilehon huaso gabe siramoti angka ulaon na naeng siualohononna
(martani, martiga-tiga dohot angka ulaon na asing) ingkon diharinggashon do ulaonna I. Dapotan pasupasu do ia halak na
mangharinggashon ulaonna jala namarpanghirimon diganup ulaonna i.
2. Gabe Pasupasu dihumaliang ala pangaramotion ni Debata (Ay. 5)
Gabe haposan ma si Josep di adopan ni siPotifar. Molo haposan dinaotik, tontu gabe haposan ma I di na godang. Songoni
do na masa tu si Josep. Dung haposan ibana uju gabe hatoban, tontu haposan ma ibana gabe siramoti bagas jala di saluhutna
na adong di siPotifar. Marhite haroro ni si Josep dohot parsihohotanna tu Jahowa, gabe dohot do dapotan pasu pasu halak
Misir. Marhite napantas marroha dohot hapantunon ni si Josep, gabe sahalak haposan ibana tu halak Misir tung pe dang huta
hatubuanna i. Dilehon Jahowa tu siJosep haburjuon dohot hamaloon manjujur nipi. Ima dalanni Debata pabangkithon si Josep
gabe wakil ni raja Parao mangarajai Misir.

III. Refleksi
1. Hombar tu topik ni mingguta “Gabe pasupasu dibagasan Tuhan”, disosoi do hita lao mangulahon na denggan I nang
pe dibagasan sitaonon. Parngolouanni si Josep, sada sitiruan ma I tu hita halak Kristen asa marsihohot manghaposi
Tuhan i. Ido tiruan na denggan na ingkon sipatuduhononta di humaliang. Di zaman on, godang do pangela-elaon.
Diela do hita mansoadahon haporseaonta I asa boi dapotan hita disada parkarejoan manang jabatan. Alai marhite
turpuk on, asa marsihohot ma hita manghabiari Debata. Ta tiru ma si Josep na mabiar mangulahon hadosaon ala
ditanda ibana do Debatana. Molo tauduti turpuk on, di ayat 9, didok si Josep do “…tung olo ma ahu mambahen jean
a sai godang, asa mardosa ahu maradophon Debata?” suang songoni ma dihita halak Kristen. Molo diela hita lao
mangulahon hadosaoni ala hagiot ni daging, ingot ma hatai na gabe ojahan ngolu ni si Josep disitaononna.
2. Habengeton. Habengeton ni si Josep I naeng tiruonta di partingkian on. Ditonga-tonga ni ragam parungkilon na
manosak parngoluanta, di jou do hita mamarangehon habengeton i. habengeton I, ingkon gabe tiruan do I di
 humaliangta. Ingkon gabe jamita na mangoluma parngoluanta I ala benget hita mangadopi nasa parungkilon di
ngolunta ala haporseaonta tu Debata.
3. Haposan. Gabe haposan ma hita di humaliang manang di rumahtangganta. Haposan diangka ulaon na denggan dohot
mangaradoti angka ulaon i. Songon parngoluan ni si Josep, dipapatar ibana do boi ibana gabe haposan di na otik, jala
boi do muse ibana gabe haposan di na godang. Molo haposan hita dinaotik, haposan ma hita dinagodang.