Bahan Sermon Jamita Minggu IV Dung Trinitatis, 10 juli 2022

HKBP Negeri Lama Ressort Negeri Lama

EP : Kolosse 1:1-14 EV: 5 Musa 30:11-14
“ Mamaritahon Huhut Mangulahon Hata Ni Debata”
I. Patujolo
Buku 5 Musa ima buku palimahon sian Torah di padan na robi. 5 musa/Deuteronomy
(Devarim) na marlapatan Perkataan (words) jala na marisihon pandohan sian si Musa tu
Bangso Israel uju dibagasan tano Moab nasida. Di taon 1260 SM ma dipasahat si Musa tu
banso i andorang so marujung ngolu dope ibana. Buku 5 Musa on manang di bahasa
Indonesia Kitab “Ulangan” ima hata ni Debata na marrumang pangaratarataion
(Mengulangi), huhut manungguli Bangso Israel dung haruar sian parhatobanon Misir.
Dirataratai si Musa Patik dohot hata ni Debata ala naeng bongotan ni Bangso i nama huta
Kanaan, ima tano napinarbagaan ni Debata tu Ompunasida si Abraham. Hinaringkot ni Hata
dohot Patik i, uhalon ni si Musa tu Bangso Israel, ala bangso na mubauba do bangsoi, godang
do mangela ela hasatiaon ni nasida tu Debata, mura do nasida tarela marsomba tu debata
sileban manang tu ganaganaan. Disiala ni ido umbahen di rata ratai jala dipasunggulhon Hata
ni Debata dohot Patik i asa padimpos haporseaon ni bangso i. Diparatarata Patik i tu nasida
asa unang lupa manghaholongi Debata, mangulahon dohot mangaradoti PatikNa. Molo
ditangihon nasida Jahowa, gabe tano hatuaon, hasonangan ma tano Kanaan di nasida, jala las
rohani Jahowa marnida nasida laos dapotan hatuaon ma jambar nasida disi.
II. Hatorangan ni Turpuk
II.1 Ayat 11 “Ai Patikhon, na hutonahon i tuho sadarion, Ndang masongkal hu di ho,
manang maholang hu”
Na marlapatan, Pati dohot Hata ni Debata tung naso tarsirang doi di ngoluni halak na
porsea. Ala Patik ima dipadarat dibagasan Hata. Patik ima sada siparorot di tongatonga ni
ngolunta na mamboan hita tu Kristus ( Galatia 3: 24), Patik i laos sorminan doi dingoluni
ganup naporsea, asa molo tapaadop parange ni jolma tu Patik i, gabe taboto ma naung maralo
manang ndang ulaon tai. Ido umbahen na marsitutu si Musa laho mangarataratai Patik i tu
bangso israel. Ala sian pamerenganni si Musa hasomalan ni halak Kanaan naso maradaat i
mangela bangso i mangulahonsa, boi do alani hanapuon dohot hadoharan ni bangso i gabe
mangela bangso i gabe lupa tu Debata. Ondolan ni ayat on dos doi na marsuru bangso i asa
manangihon Patik dohot Hata i. Bagas do lapatan ni hata “ Tangihon” manang shema di
Israel, ndada holan mambege marhite sipareon, alai naumbagas dope ima
1
mamparohahon,mamarateatehon, mamingkiri, manghangoluhon,dohot mangulahon. Ai
taboto do parbue ni halak na manangihon hata ni Debata dapotan jambar. Alani ido, ingkon
rade bangso i marunduk ni roha, manghaholongi Debata dohot dongan” Holong” ido
pangarimpunan ni Patik i.
II.2 Ayat 12-13 “ Ndada di banua ginjang manang dibariba ni laut Hatai”
“ Ise ulaning singkatnami manaek tu banua ginjang, asa mangalapsa di hami dohot
patubegehonsa tuhami asa ulahononnami nian?”. Boasa boi dohonon nasida songon i sai
hira na dao patik i dibanua ginjang hape nunga di tonga tonga nasida. Nunga dipasahat si
Musa tu nasida uju dipardalanan. Unang olo marsomba tu debata sileban manang tu
ganaganaan. Alani ido didok si Musa asa marhamubaon ni roha jala marsitutu manangihon
poda i. Umbahen i do unang marsidalian hita laho mangulahon Patik i. Pandohan ndang
masongkal hu manang paholang hu namarlapatan ndang di banua ginjang hata i manang
dibariba ni laut. Alai nunga jonok Hatai naung dipeakhon Debata dibagasan pamangan dohot
dibagasan roha. Ndang marhite pardisurgo hatai dipasahat, alai marhite jolma do, disurathin,
boi jahaon, boi tangihonon, antusan, hilalaon, peopon dibagasan roha, jala boi hangoluhonon
dohot podahonon tuangka sundut naumposo. Asa unang gabe sipaimaon be hatai, nunga rade
gariada donok do, holan mangulahon nama nasida. Alani ido didok ndang masongkal hu
/maol hata i tangihonon. Hata ndang maholang hu ima patuduhon naung somal” hata”i
ditaringoti jala dipandok bangso i. Alani i sidalian nama didok mangalap hatai tu banua
ginjang dohot tu bariba ni laut. Jala memang ndang sialapon tu banua ginjang mamang tu
bariba ni laut ima hata ni Debata. Alai silehon lehon ni Debata doi naung dipapatar tu
portibion.
II.3 “Mansai donok do Hatai di ho, dibagasan pamanganmu tahe dohot dibagasan
roham, asa ulahononmu i.”
Namarlapatan ima, Hata ni Debata i do hangoluan, laos hata ni Debata i do sulu sulu
di pat dohot hatiuron di dalan ni halak na porsea ( Psalmen 119:105). Laos dipatangkas muse
hadodonok ni Hata, ima na maringanan di pamangan dohot rohani jolma i. Lam patar ma
hamuliaon dohot asi ni roha ni Tuhan i dibagasan hata naung gabe daging i( Johannes 1:14).
Dipadonok Debata do diriNa marhite Jesus tu portibion tu saluhut jolma napogos-namora,
nahipas-namarsahit, baoa- parompuan, nalea-nasangap, tu sude jolma do di topot ibana. Asa
molo Hata dohot Patik ni Debata donok doi, ndang dao, ndang masongkal hu, ndada
maholang hu, jala nunga sangkan dirohani na porsea i , narumingkot di Debata ima mangoloi
dohot mangulahon hata naung donok i nama asa singkop.
2
 III. Panimpuli
Songon Topik minggu ta” Mamaritahon huhut mangulahon Hata ni Debata”, ingkon
tapatuma maon sian ulaon na metmet manang sederhana. Mamaritahon Hata ni Debata ima
asa tangi nasida mangantusi nabinaritahon, jala dibagasan pangantusion songon na nanidok ni
Paulus tu huria Kolosse ( Kolosse 1:9-10). Marthin Luther pasahathon pangajaranna ndada
holan marhite jamita ,alai di taon 1526, marhite Katekismus kecil na sederhana,minimalis,
jala mura niulahon nasida. Nang songon i do dinamangulahon Hata ni Debata sian angka
ulaon na metmet alai balga panghorhonn. Mamaritahon dohot mangulahon Hata ni Debata ,
sian langkah na sederhana gabe lompatan besar ma tu saluhutna mangulahonsa dohot
manangihonsa. Tuhan menginginkan agar kita memilih taat akan firmanNya, asa boi taida
jala tadai angka ragam ni pasupasu ni Debata nang marhite anakNa Jesus Kristus. Parhaseang
ma asi ni roha dohot denggan basaNa i, dan bersandarlah pada Allah, maka hidupmu akan
selamat. Amen

3
 BAHAN SERMON PARHALADO SE-RESSORT HKBP NEGERI LAMA

MINGGU V DUNG TRINITATIS, MINGGU 17 JULI 2022

TOPIK: JESUS NA MANGALULUI JALA PALUAHON NA MAGO (Lukas 19:1-10)

I. PAMUHAI

Ndang hapalang las ni roha ni sasahalak molo jumping na niluluanna. Na marlas ni roha
situtu do si Sakeus ala boi pajumpang dohot Jesus naung hinasiholan ni rohana, gariada tahe
Jesus I sandiri na mangontang diriNa sandiri asa bongot tu jabu ni si Sakeus. Na mamolus do
Jesus sian Jerikho tu Jerusalem. Jeriko, ima huta ni torop pegawai ni sijalo beo. Di Jeriko
adong sahalak namora namargoar si Sakeus songon induk ni si jalo beo I, ala dirajumi halak
Jahudi paboa dongan saulaon manang kaki tangan/ antek-antek ni pemerintahan Romawi do
si Sakeus mamongkihi angka si garar pajak laho tu hamoraon ni Romawi. Di turpuk I naeng
paandaronna tu hita, paboa ndada holan si Sakeus na marlas ni roha ala pajumpang dohot
Jesus, baliksa tahe umbalga do las ni roha ni Jesus ala jumping Ibana dohot pardosa di
portibion.

II. HATORANGAN

1. Ndang adong na boi mangambati hita di na laho pajumpang dohot Jesus.

Pardaging na metmet do si Sakeus, na boi holip ala ni na torop jala sian parsaoran ni
Jahudi pe ndang piga na mandongani ibana. Alai holan diboto ibana barita paboa na naeng
mamolus Jesus sian Jeriko, manigor dihalaputi ibana do naeng idaonna rupa ni Jesus, pola do
marlojong ibana dompak sidalananna ni Jesus, dung I dipanaek ibana hau galagala (memanjat
pohon ara). Uju manjakkit hau I si Sakeus, dipasobok ibana do dirina songon dakdanak na
manjangkit hau i. Ndang dipangke ibana hamoraon dohot huaso ni ibana pasidinghon na
torop i. Haserepon ni roha holan I do dalan pajumpang dohot Jesus i.

2. Ditatap Jesus do Angka na Usouso tu Ibana.

Andul umbagas do sangkap ni Tuhan Jesus sian sangkap ni si Sakeus, di mulana i holan
naeng mamereng rupa ni Jesus i do Ibana. Jala nunga las situtu rohana holan pajumpang
dohot Jesus i. Alai dung diida Jesus si Sakeus disuru Jesus do si Sakeus asa mijur sian hau i
jala laos Jesus I sandiri do mangontag diriNa laho bongot tu bagas ni si Sakeus. Sian on

4
idaonta, tagan so lulululu si Sakeus tu Tuhan i, nunga jumolo Jesus sumangkapi asa
pajumpang dohot si Sakeus. Inisiatif ni Jesus nunga jumolo naeng pajumpang dohot jolma
pardosa di portibion. Alai di na binege angka na torop ima sian tonga ni Jahudi i, naeng
bongot Jesus tu bagas ni si Sakeus, sogo ma roha nasida marnida i. ala di panatapan ni halak
Jahudi, ndang tama Tuhan i manopot pardosa. Ndang dirajumi nasida tangkas paboa nasida
pe pardosa do. Jala laos i do missi manang tujuan ni Jesus tu portibion ima paluahon angka
pardosa, manang mandaoni na hassitan do Tuhan i ndada na hisar daonanNa, manjou angka
pardosa do, ndada partigor. Jala ndada holan si Sakeus naeng paluaonNa, alai saluhutna do
naeng paluaonNa.

3. Dijangkon si Sakeus ma Jesus I marhite parbue ni Haporseaon.

Dung pajumpang Jesus dohot si Sakeus, gabe adong ma na muba sian diri ni si Sakeus
ima gabe parsilehonlehon. Sian naso tinagam ni si Sakeus, ingkon bongot silehon haluaon I tu
jabuna. Ndada sisip naeng manjalo haluaon na pinatupa ni si Sakeus i, jala ndang tarbahen
manang ise manuhor haluaon na sian Jesus i, holan asi ni roha do i. Ai dung dijangkon jala
porsea do ibana tu Jesus i asa taronjar rohana mangurupi na pogos. Tung parbue ni
haporseaonna tu Jesus do i. jala sian haporseaon dohot sian panandaonna tu Debata, rade
ibana mangalehon satonga artana tu na pogos jala molo adong na diangati (diperas) ibana,
siopat lompit paulahonna. Molo hasomalan ni Jahudi holan saparlima sian pandapotan ni
sasahalak di bagasan sataon do dilehon mangurupi na pogos jala lehononna (3 Musa 5:24),
alai si Sakeus dao gumodang sian na binahen ni halak Jahudi.

4. Dapotan Tua do Angka na Porsea I.

Sian hamubaon ni roha dohot haporseaon ni si Sakeus jumping ma tua dohot haluaon di
pangisi ni bagas ni si Sakeus. Haluaon i ndada holan ala pinompar ni si Abraham sian
parmudaron, alai pinompar ni si Abraham do si Sakeus sian haporseaon. Rade mangoloi
dohot manjangkon Jesus, ido pataridahon pinompar ni si Abraham ibana. Tutu do pardosa si
Sakeus, jala dirajumi ibana do na deba sian ulaon mangangati na sumar hamoraon ni ibana i.
Alai ndang mardia imbar di Debata jolma na laho sipaluaonna.

III. PANIMPULI

1. Parjumpangan na tangkas dohot Tuhan Jesus, ido manghorhon hamubaon ni roha ni

jolma.
5
2. Dohot ma hita marlas ni roha, ai dohot do hita na niluluan jala na tinobus ni Tuhan i.

3. Ndang adong na boi mangambati hita pajumpang dohot Tuhan i molo di bagasan
serep ni roha hita.

Amen.

6
 Sermon Parhalado Se-Ressort HKBP Negeri Lama
Minggu VI Dung Trinitatis, 24 Juli 2022
DEBATA NASATIA DIBAGASAN HOLONGNA (Hosea 1:2-9)

Pamuhai
Hira sude do jolma marlomo ni roha umbege angka sarita manang poda namardomu
tu holong ni roha (kisah cinta). Ido umbahen na godang situtu angka buku, novel, sinetron,
film, media sosial na tardok laris alani angka poda dohot sarita taringot tu holong ni roha. Jala
boi dohonon, buku Hosea on pe sada sian Hata ni Debata taringot tu barita holong ni roha do.
Holong ni roha ni Debata, padutuhon Debata nasatia di bagasan holongNa.
Jala tandi jala marasing situtu do holong ni roha na pinatudu ni Debata di bagasan
buku Hosea on sian angka buku manang sarita naasing na hea tubu di liat portibion. Ala
disuru Debata sahalak panurirang laho mambuat sada pelacur na margoar si Gomer bahen
jolmana. Jala dungkon dibuat, tongtong dope diulahon si Gomer pangalahona songon
nasomal, alai tongtong dihaholongi. Suman ni bangso Israel na so marampuna, ala
tumadingkon jala tumundalhon Jahowa manuntun lomona, alai manontong dihaholongi
Debata.

Hatorangan
Dungkon mangkuling Jahowa, hata naparjolo na pinasahatNa tu si Hosea ima taringot
tu diri ni si Hosea sandiri. Ndang piga hita jolma na mian di bagasan pangalaho na songonon,
sai godangan do hita jumolo marnida HataNa i maradophon dongan sian maradophon dirinta
sandiri. Andorang so diborhati Debata si Hosea manurirangi bangsoNa, jumolo do ibana
dipanghulingi dohot diparenta Debata.
Na maol situtu do hata ni Debata na sahat tu ibana. Ingkon buatonna sada boruboru
naung pilit langkana jala naso sumanbe pangalahona (pelacur) bahen jolmana. Bidang do
nian pangantusion taringot tu status ni boruboruon. Alai sada ma tabuat, ima sahalak
parompuan pelacur, na bebas jala nasoadong marnampunahon ibana. Ibana ma disuru Debata
buaton ni si Hosea bahen jolmana.
Sada dalan ni Debata do i, laho patuduhon tu hajolmaon boha do paetna jala
dokdokna molo pola songgop pangalaho na songonon tu ripe ni sahalak jolma. Asa molo
marsak hita jolma songoni ma balga ni hata molo tabahen songoni tu Ibana. Manaon Ibana
songon ni hita jolma. Dipasuman Debata diriNa songon Ama na mangalap bangsoNa. Alai
manimbil bangsoi dibaen hisap dohot hagiot ni rohana manuntun lomona tumundalhon
Jahowa.
Jadi laho do si Hosea mambuat si Gomer, boru ni si Diblaim songon nasinuru ni
Jahowa. Porlu tangkas dihita ndang na sipanolopi Debata tu nasa pangahao na melacurkan
diri. Laho pe si Hosea holan laho manggohi parsuruon ni Jahowa do ibana, jala laho
patuduhon hubungan ni Debata tu jolma, suman ni hubungan ni parsaripeon, ama tu ina di
tonga ni ruma tangga. Boha ma dangolna molo ndang satia ripenta tu hita. Songoni ma
gombaran ni panghilalaan ni Debata molo ndang satia hita tu ibana. Jala ganup halak na
manadingkon Jahowa sumanmai tu halak na so satia tu ripena, jala tardok ma ibana songon
sahalak pelacur. Siala nunga dipaojak Debata hita bahen nampunaNa sandiri (Jes. 43:1).
7
 Gabegabean ma nasida jala ditubuhon di ibana sada anak. Sian pandohan on boi
antusanta ia dakdanak na parjolo on sorang sian nasida nadua, ndang sian pangalaho
nasosuman i. Dung i didok Jahowa ma tu ibana: Jou ma goarna si Jesreel; ai otik nari marlulu
ma ahu di angka utang mudar ni si Jesreel tu pinompar ni si Jehu, jala ahu pasiaphon harajaon
ni pinompar ni Israel (ay. 4). Ianakhonna naparjolo on patuduhon hadosaon ni Israel.
Paingothon nasida di hamumuruk ni si Jehu namunu si Jora, si Amazia, dohot angka
ianakhon ni si Ahab di huta Jesreel. Tung pe na patuduhon rimas ni Jahowa ibana alai
marlomolomo do ibana pasauthon ulaon i. Ndang satia bangsoNa.
Dohot patuduhon na so dipasombu Debata mian manang sada pe hajahaton. Nang pe
boi idaon sai hira namalua halak parjahat i sian uhum, alai di tingkina masa do pamaloson
sian Jahowa. Di ari na sasada i ponggolhononKu ma sior ni Israel di rura Jesreel (ay. 5).
Dung i gabegabean muse ma boruboru i, jala ditubuhon sada boru. Dung i didok
Jahowa ma tu ibana: Jou ma goarna Nai Sohinasian; ai ndang be marpangulahi rohangku tu
pinompar ni Israel, manang marpamuati rohangku tu nasida (ay. 6). Lo-Ruhamah manang
Nai Sohinasian; ai ndang be marpangulahi roha ni Debata tu pinompar ni Israel. Manang
andigan pe dijou goar on, taringot ma bangsoNa na hea jongjong Debata laho manguhumi
nasida.
Alai dungkon i manigor diuduti do muse mandok namarpangulahi do roha ni Jahowa
tu pinompar ni Juda jala paluaonNa nasida (ay.7). Balga situtu do rimas ni Jahowa marnida
hita, alai ndang dipasombu Debata mago pasupasuNa i sian hita. Manontong do mian Debata
di bagasan holongNa. Dohot jompek boi dohononta "asa molo dipalua pe hita, ndang alani
hatigoran dohot hasintonganta, tung holan ala asi ni rohaNa sambing nama. Molo alani dosa
dohot pambahenanta na so tama, ndang tama asianNa be hita. Asa uju songgop nasa
haholomon na holom situtu, dipeop Ibana do tongtong asi ni roha. Ndang adong borngin na
holom situtu na so marsinondang bintang ni Debata. Ndang paluaonNa Juda marhitehite sior
manang podang manang hamusuon, manang hoda manang jolma parsihundul pe (ay. 7), na
marlapatan ndang jasa ni jolma haluaon i. Jahowa sandiri do mambahen dalan tu haluaon i.

Pangujungi
Laos songoni ma dung gabegabean muse boruboru i, manubuhon sada nari anak. Jou
ma goarna Lo Ami, ninna Jahowa, ai ndang bangsongku hamu, jala ndang hamu nampuna
ahu (ay. 8-9). Lam tangkas ma idaonta, pelacuran rohani ni bangso Israel do na tinudu ni
turpuk on. Ndang adong na so sega binahen ni pangalaho nasida na manuntun lomo jala
manundalhon Jahowa. Sahat tu na so dietong be nasida songon bangsoNa. Alai ndang
mansohot di si asi ni roha ni Jahowa. Tu angka bindu na mangihut jumpang hita do na diudut
Jahowa asi ni rohaNa tu angka hinongkopNa. Debata mian di bagasan holongNa.

8
 SERMON PARHALADO SA-RESSORT NEGERI LAMA DISTRIK XXVI
LABUHAN BATU MINGGU VII DUNG TRINITATIS, 31 Juli 2022

“HABISUHON NA SIAN GINJANG”

(Jakobus 3: 13-18)
Patujolo
Di partingkian nuaeng on, dang cukup holan kecerdasan intelektual adong di hita, asa
hasea jala boi mangihuthon zaman on, ingkon adong do nang kecerdasan intelektual (IQ),
kecerdasan emosional (EQ) dohot kecerdasan spiritual (SQ). Kecerdasan songon on boi mai
dohonon na sarupa dohot hikmat. Jala baliksa, mandok diri na berhikmat pe dang menjamin i
paboa na adong di hita hikmat sian ginjang. Di turpuk jamita on tangkas di patorang si
Jakobus taringot tu dua macam hikmat (habisuhon), ima habisuhon na sian portibi on dohot
habisuhon na sian ginjang. Parasingan habisuhon na sian ginjang dohot na di portibi on tarida
mai sian sumberna dohot panghorhonna, jala dung marimbar harorona, ima na mambaen
nang marimbar motivasi. Antong taida ma dia parasingan ni habisuhon na dua i jala angka dia
ma panghorhonna ganup.

Hatorangan
Jumpangta do di turpuk on parjolo taringot tu habisuhon na tutu situtu dohot ciri khas
ni habisuhon i laos dohot parbuena. Didok di ayat 13 i, ise na bisuk jala pantas marroha, sian
parangena ma dipataridahon, ima marhitehite halambohon ni habisuhon, lapatanna naeng
dohononna, ia halak na bisuk situtu ima halak na pantas marroha, ai dang oloi mangalului
goar halak na marbisuk ia so luluanna angka parbinotoan, jala dang olo ibana patimbohon
dirina tung pe godang diantusi ibana, dang olo manghaginjanghon angka parbinotoanna i, ia
so adong habisuhon di ibana laho mamakke manang menerapkan dohot denggan. Di turpuk
on dipabotohon do paboa na sadalan do habisuhon dohot hapantason marroha (gambaran
orang berhikmat), antong taida ma angka parbue ni halak na berhikmat mangihuthon turpukta
on
1. Perilaku yang baik, lapatanna molo umbisuk hita sian dongan, ingkon tarida mai
marhite parangenta na uli, dang parange na kasar atau angkuh, alai angka parange
na mangalehon parbinotoan, na pamalumhon, jala na mambaen na denggan.
Ndang gabe angka hata na sai hira na jago, hape manegai jala parohon
hatongkaron, tu dirinta nang tu dongan jolma.

9
 2. Kelemahlembutan, naeng dohononna, halak na marhalambohon, ima sada contoh
halak na marbisuk yang bisa mengendalikan amarahnya sendiri dan dengan sabar
menghadapi amarah orang lain. Ala tung jotjot situtu do hatongkaron/hagaoron na
mangambati hita mangantusi aha namasa.
Dipabotohon do nang di turpuk on, na maralo do pangiburuon dohot hatongkaron tu
halambohon i, nian rap maringanan di roha do na dua i, alai dang boi mardomu pangiburuon
dohot habisuhon nang hapantason marroha i. Tung mansai tangkas do di pajojor angka
parange na sian tano on manang na sian roha ni jolmai, dia mai? Ima pangiburuon,
pangiburuon i ma na mambaen hatongkaron jala tubu ma nang hagaoron dohot hajahaton.
Disi ma godang halak na mangalului angka sidalianna be laho patingkoshon manang
pasintonghon dirina, diula ma margabus. Sian i boi ma taantusi paboa dang halak na
marbisuk jala na pantas marroha si songoni, karena satu kesalahan yang ditimbulkan
menambah kesalahan yang lain, satu dosa melahirkan dosa yang lain
Ia habisuhon na sian ginjang songon topik ni minggu on jala judul ni turpuk on, ima angka na
bontor, na olo mardame, lambok, pangoloi, gok asi ni roha dohot parbue hadengganon, dao
sian hagangguon nang pangansion (ayat 17). Saluhutna i dang dapot sian jolma manang alani
na mardongan dohot jolma, jala dang alani na marsiajar taringot tu portibion, alai sian ginjang
do ibana ro, ima na sian Debata.

Panimpuli
Sude do hita manghirim asa marbisuk di ngolunta on, jala ganup jolma naeng ma
unang sala di angka parangena si ganup ari. Alani tabaen ma ojahan turpuk on laho
mandalani ngolunta, ima asa tapakke habisuhon na sian ginjang, ndada habisuhon na sian
tano on manang na sian jolma, ala halak na mamakke habisuhon na sian tano on, tontu angka
pambahenanna pe nionjar ni angka na di portibion do, alai halak na marhabisuhon sian
Debata, tarida mai sian pambahenanna na denggan manang marparbuea nauli di portibi on.
Malua do ibana sian hatongkaron nang hagaoron, ala sai saburhononna do angka parbue
hatigoran dibagasan dame.

10
BAHAN SERMON EVANGELIUM MINGGU VIII DUNG TRINITATIS, HKBP RES.
NEGERI LAMA MINGGU, 07 AGUSTUS 2022
MATEUS 24:45-51
DEBATA DO PANGUHUM (ALLAH ADALAH HAKIM)

I. Patujolo
Pangguriton ni buku Psalmen on laho pabotohon tu hita songon dia do na masa dihatiha i.
Psalmen Bindu 24 on manaringoti songon dia panurirangion di tingki halelengse ni Jerusalem
na masa di taon 70 M dohot ajal ni hasingan on, laho manaringoti na naeng masa dope.
Marhite ParPsalmen disosohon do asa jaga, dohot jamot. Debata paingothon manisia marhite
par Psalmen on asa rade sude jolma managamsa, ala ingkon jumpang do sogot ari paruhuman
i. Ala ingkon masa do ari paruhuman tu saluhut jolma alai dang adong na mamboto sadihari
partingkian na. Molo tapamanat do muse mangarisiki ulaon ni Debata, boi do tabereng
panguhumon ni Debata di tingki ni si Noak. Dang adong di paboa sadiharina, jala tu si Noak
sandiri pe dang di paboa Debata namasa i. Alai di suru Debata do si Noak mangarade diri
marhite na paturehon sada parao jala di olo i ibana do parsuruon ni Debata. Molo sian
hajolmaon mamingkiri didok angka na di humaliang na i do ibana na oto di haburjuon na laho
mangulahon hata ni Debata. Alai boi do tabereng dinunuti si Noak do laho pasidunghon parao
i, jala tutu do masa uhum i. Boi do muse tabereng mate mogap, hosahosa, laos lonong boti ma
angka na so mangarade hian. Hombar tu pangaradeon i disosohon do di ayat 45-51 adong boi
dua horong na naeng sipamanat on ta ima mamboan lasniroha situtu jala mangapuli do haroro
ni Tuhan i di angkana marsitutu mangarade, alai sabalikna tu horong paduahon ima mamboan
hamagoan do tu angka na so denggan pangaradeonna be.

I. Hatorangan Ni Turpuk
“Di dia do Naposo Haposan jala na marroha….”(Ayat 45) Sada sungkun-sungkun
pangaluluion do on. Molo sahalak Naposo Haposan tontu di halomohon sude halak do i.
Sahalak induk somang tontu manghirim do sian anak somang na asa gabe haposan jala
marroha, laho mangulahon angka na patut. Dang marsanggasangga ibana mangulahon angka
na patut, alai hot manontong, konstan, torus manorus. Ndang holan di tingki di ida ibana
mangulahon angka ulaon na, manang jolo ditingki jonok induk na baru asa mangula ibana.
Naposo haposan mangulahon angka ulaon na dibagasan tanggung jawab. Di tingki

11
mangarade diri sahalak naposo haposan managam tontu angka ulaon na pe tontu mangulahon
angka na patut hobasan songon:

a. Mangalehon angka na patut, na dumenggan tu angka na manghaporluhonsa ndang

mambuat tu dirina. Hangoluhonon na ma pandohan na diihuthon Apostel Paulus di Ul.
20: 35 Sandok hupatuduhon tu hamu, ingkon songoni i do iba mulaulaon laho
mangurupi angka na so margellok, marningot hata ni Tuhan Jesus, ai Ibana do
mandok: “Martuaan do na mangalehon sian na manjalo”.
b. Mangalehon na patut panganon, ndada manguhumi, ndanda mamuruhi alai
manghaholongi dohot paingothon, tarlumobi mangalehon sorminan na denggan.
c. Mangalehon pangurupion ditingki na, selagi waktu masih ada waktu (en kairo). Jadi
anak somang haposan, ingkon pas do partingkian na mangalehon angka na patut ni
hobasanna.

Ia Naposo Haposan na tutu rade managam haroro ni indukna, martua ma ibana. Ai

managam do ibana di haroro ni induk na i jala di haringkothon do ngolu na marparbue. Dia
ma tua sijaloon ni Naposo haposan i ? Tung tabo do tohap na tu ibana, ima “ Naparjolo
dipabangkit mangaramoti saluhut na di Indukna i (Ayt 47). Tung di parrohahon induk na i do
ibana, tung lungun do roha, molo di karejohon sada ulaon hape so diparrohahon induk na i
iba. Paduahon Lehononna ma hatuaon tu ibana, jala di pabangkit mangaradoti dohot
mangaramoti saluhut na di indukna. Alani i naposo Haposan gabe parsidohot do managam
Anak ni Jolma i dibagasan hasisingkop di haluaon na pinatupa ni Kristus dohot marjambar di
Harajaon ni Debata laos dohot mangaramoti di SiamunNa i. di Joh. 12:26 “Ahu ma di ihuthon
ganup na olo mangoloi Ahu; jala ia disi Ahu, disi ma dohot anak somangHu. Pasangapon ni
Ama i do ganup na mangoloi Ahu.”

Ise do na digoaran na Naposo na jahat? Naposo na jahat ima naposo na so denggan

panagamonna i, jala agoon ni induk i ma ibana. Parjolo didok rohani najahat i marhite
pandohan “ leleng dope asa ro indukhi!” on ma sada pelanggaran tu pandohan ni Kristus i. So
hea didok Kristus leleng do haroroNa. Jala ndang hea didok Jesus na boi tontuhonon ni
manang ise sadiharina. Hape tung mansai gomos do roha ni na jahat mandok “leleng dope asa
ro indukhi!”. Berarti adong haroroan (panguhalan) ni barita na asing dipeop ibana, ndang na
sian indukna i. Mardua panguhalan ni Tona.

12
 Jala ulaon ni naposo na jahat i holan laho mangulahon naso suman do ditahi.
Mangalinsingi angka donganna naposo. Paroaroahon na niula ni donganna. Tung sonang
rohana molo hansitan dongan na. Naposo najahat i dang bertanggung jawab i di angka ulaon
na. Tapamanat ma muse dia do hamagoan dohot tohap ni naposo na jahat i? tung tangkas do
di goari, hamagoan do na patut tu ibana. Adong do 3 ragam didok dison rumang ni uhuman tu
na jahat i, i ma:

a. Agoanna ma ibana, ima uhuman na mamboan tu harorobur (dikotemeo =

memenggal/memutus). Jadi, “dia terputus dari negeri orang-orang hidup”
jala ido lapatan ni “bura” di 5 Musa 29:21.
b. Lehononna ma tohap ni angka pangansi, tohap ni angka na munafik.
Dipasarupa do parjahat tu horong ni pangansi ala so tutu pangaradeon na,
idaon do hira na mangharonsothon ulaon na tama hape holan manjahati do.
c. Anggukangguk dohot na patungoripon na manontong jala na so boi saor be tu
angka halak na bonar i.

II. Panimpuli
Torop do halak na manghilalahon naung merasa cukup parsombaon na tu Debata.
Molo nunga ringgas marminggu dohot martangiang, nangpe dingolu siapari ndang tarida
parbueni parsombaon i. Unang ma songon halak na patama-tama diri nian songon na
berengon ringgas mamuji Debata hape laos ringgas dohot mangulahon naso suman,
mangaleai, manangko, margabus, manindos, paroaroahon dongan dohot lan na asing na
mangaleai Debata. Diparsombaon i sai di patubegehon do holong, dame, lasniroha, hatigoran,
hasintongan dohot hamuliaon ni Debata. Hape na tarida dingolu siapari hosom, late, teal,
gabus, pangarimason, parbadabadaon, pargadombuson, manang angka parbueni hadagingon.
Parsombaon i gabe holan seremonial sambing. Parsombaon i gabe holan kebiasaan manang
tradisi ndada ala holong dohot ketaatan tu Debata. Sahalak naposo haposan na marparbuehon
parsombaon tu Debata marhite mangulahon patik dohot uhumNa, ido ibadah na sejati. Alani i
naeng ma hita gabe songon naposo haposan na mangulahon ulaon parsombaon na tama tu
Debata.

13
 BAHAN SERMON PARHALADO SE-RESSORT HKBP NEGERI LAMA
MINGGU IX Dung Trinitatis, 14 Agustus 2022
Topik: POLIN MANGIHUTHON JESUS (Lukas 12 : 49-53)

PAMUHAI

Godang do jolma manghirim jala paimahon haroro ni Jesus na sai tongtong mamboan
las ni roha nang hasonangan. Hape marasing di pandohanna on. Haroro ni Jesus ndang holan
mamboan pangidoan ni angka jolma i, haroro ni Ibana pe dohot do mandanggurhon api tu
tano on ( ay. 49 ). Godang do naung diulahon Jesus, sian na mambahen halongangan,
mangajari dohot angka na asing dope tong do godang na manghasogohon Ibana. Ala ni i do
ndang tarjua mansai godang do paraloan laho mangihuthon Jesus ( Ay. 52-53 ). Angka
paraloan i godang do i sahat tu sadari on masa. Boi do i taida, persoalan horizontal antara
parugamo Kristen dohot non Kristen songon i nang tu dongan sahaporseaon pola do sahat tu
parbolatbolaton ala ni angka parasingan pangantusion tu hadirion ni Kristus. Nang pe godang
angka paraloan i, turpuk on mangajari hita asa tongtong porhot haporseaonta tu Jesus dohot
Hata ni Debata. Laos angka paraloan i do na boi taida gabe kesempatan laho mambaritahon
barita haluaon na binoan ni Jesus.

Hatorangan ni Turpuk

Panghobasion ni Jesus di portibi on mamboan ngolu na imbaru. Alai ingkon adong ma

hamaolon panghorhon ngolu na imbaru i, alai patar do i dipatorang Jesus. Na parjolo:
Panguhumion. Didok Jesus do: " Na ro do Ahu mandanggurhon api tu tano on. Dihasiholi
nasa rohangKu do, anggiat haru galak nian! ( ay. 49 ). Gombaran ni api di turpuk on i ma
tudosan na marlapatan panirangon songon dua jolma na disirang ni dingding api, songon sere
na pinapita ( dimurnikan ) mardongan api na tung mansai gorgor hian asa bolong sude angka
na rotak. "Na ro do Ahu mandanggurhon api tu tano on" na marlapatan mamboan
panguhumion. Di hata Gorik buku na ginurat ni si Lukas mameakhon hata "api" songon hata
na parjolo di sada kalimat, diondolhon Ibana do hata bolao (api) na marlapatan mandanggur
manang mandanggurhon sagogogogona.

Paduahon : Hamatean. Parungkilon ni Jesus di porlak Getsemani tung mansai dangol,

nunga boi diida Ibana silang na patar di joloNa. Tangiang dohot parsorionNa di porlak i tung
mansai lungun, pola do didok Ibana "Amang, aut olo ma Ho nian pasalpuhon siinumon on

14
sian Ahu! Alai diida Ibana ma Alai unang ma surusuruan sian banua ginjang i, na
margogoihon Ibana. Jala di parungkilonNa i, lam digogo ma martangiang; jadi songon mudar
na himpal do madekdek hodoknai tu tano.

Patoluhon : Parbolatan. Ganup halak na ro tu Ahu ndang tarbahen gabe siseanHu, ia

so dihasogohon ibana amana, inana, na niolina, anakhonna, hahaanggina dohot angka
ibotona, ro di hosana sandiri. Ndang tarbahen gabe siseanHu halak na so manuhuk silang na
tu ibana, laho mangihuthon Ahu! ( Luk. 14 : 26-27 ). Ndang hea Jesus mansuru manang
mangajari manghasogohon keluargana, alai dipapatar Jesus do, angka ise na mangihuthon
Ibana, na marpardomuan tu partalian (hubungan) dung mangihuthon Ibana ingkon
dinomorduahon ma nasida, lapatanna Jesus ma na gabe prioritas na parjolo sian sude
hubungan keluarga manang pardonganon tu manang ise, anakna, amana, inana, boruna,
simatuana, parumaenna, namboruna. Tung sada pe sian nasida ndang boi gabe na parjolo di
ngolu nasida. Didok Jesus ma tu angka siseanNa: "Nasa na giot mangihuthon Ahu,
disoadahon ma dirina, diporsan ma silang na tu ibana; diihuthon ma Ahu! " ( Mat. 16 : 24 ).

Panimpuli

Haroro ni Kristus di turpuk on digombarhon songon api na didanggur tu portibi on.

Api on songon sada tudosan na paiashon dohot manurbu roha ni angka jolma. Api on pe boi
manirang dohot panguhuman. Di tingki ro Jesus tu portibi on ditaon do sude na porsuk i laos
mate diparsilanghon do Ibana, i ma lapatan Pandidion na di jalo ni Jesus. Pandidion na
marlapatan hamatean na dibonomhon tu haporsuhon, alai marhitehite hamatean ni Kristus i
Debata manghajongjonghon panguhumion tu sude jolma. Haroro ni Jesus mamboan paraloan
dohot panguhuman, haroroNa i ndang mamboan dame tu angka nasida na manulak Ibana di
ulaon ni panobusan ni Debata di bagasan Kristus. Hamatean ni Jesus patuduhon dame ni
Debata dohot haluaon sandok jolma, tu angka na manulak hamatean ni Jesus dohot dame ni
Debata ndang maringan di ibana angka holong ni roha. Manulak hamatean ni Kristus
marlapatan manulak parsadaan dohot pardomuan Debata dohot jolma, ala naung hamagoan
dame ni Debata do mambahen angka jolma i mamusui jala manghasogohon keluargana.
Sisean ni Jesus dohot sude na mangihut tu Jesus manghalomohon dame ni Debata di portibi
on tu sude jolma, ai songon birubiru do nasida ditongos tu tonga tonga ni babiat. Amen.

15
 Bahan Sermon Jamita Minggu IV Dung Trinitatis, 21 Agustus 2022
HKBP Negeri Lama Ressort Negeri Lama

EP :Heber 12:18-29 EV:Jesaya 58:9b-14

“Hadaulaton Na Hinalomohon Ni Debata”

I. Patujolo

Hamulak ni bangso dung mulak sian habuangan ima di taon 539 sbM ( Sebelum
Masehi). Laos ido na gabe dalan ni hata ni Debata na marisihon nas Trito Yesaya, pasal 56-
66. Dimasa dung mulak sian habungan i do tarida na semangat laho padengganhon dohot
paulakhon kejayaan Juda. Pembangunan bagas joro naung di runtuhkan gabe dalan laho
paturehon kota dohot kerajaan i.

II. Hatorangan Ni Turpuk

Dibagasan turpuk on, tangkas situtudo panindangion ni haporseaon dohot las ni roha ni
halak na malua ( bebas) sian namangihotisa. Sude do halak manghalomohon haluaon. Alanii
do sude halak naung malua i ingkon marlasniroha jala marolopolp mamuji Debata. Ndang
adong jolma na sai marsak molo dung pinalua. Alai ingkon las rohana tahe. Tarida doi sian
parngoluan siganuop ari. Marende, mengkel, huhut marlasniroha. Alai tutu ndada holan tarida
marhite sian parengkelon, dohot panghilalan paduru sambing diangka naung pinalua ni
Debata. Alai ingkon manarpangkorhon do las niroha i marhite na patupahon angka ulaon las
ni roha diadopan ni Debata dohot di jolo ni jolma di humaliangta. Asa dohot halak na asing
taruli dihaluon nabinoan ni Debata marhite panindangion dohot parniulaonta.

Ido nanidokna dibagasan turpuk on: “ hadaulaton na hinalomohon ni Debata tu bangso ni

Debata naung mulak sian habuanga, parhatobanan dohot hapariron i”. Mulak nasida tu
Jerusalem naung leleng tininggalhon nasida. Asa tangkas nasida mangolu dibagasan
hadaulaton. Songon bangso naung pinalua ni Debata, sian parhatobanon i, ndang sae holan
marlasniroha, alai hataridaan ni naung pinalua tongtong marparbue dibagasan haposeaon tu
Debata. Ndada sae holan martangiang, puasa manang mangulahon ruhut ruhut ni parugamoon
sambing. On do na nidokna dibagasan turpuk on paluahon angka na tarhurung ,
manghaholongi angka na pogos.

16
 II.1 Ayat 9b-10a Hadaulaton na marsitutu

Paholang diri sian sian tonga tonga ni pangarupaon dohot panghuling hajahaton. Ndang
jadi be masa angka pangarupaon ( parhatobanon, kekerasan,kuk perhambaan) diangka naung
pinalua ni Debata. Torop do ditonga tonganta angka nanirupa ni angka na gogo, parhuaso
mambahen hapogoson dohot parniahapan tu donganna jolma. Alai naeng ma nian hita
( saluhut huria) dohot do paluahon nasida sian pangarupaon i manang sian naginagosa gosa
diparhatobanon dohot pangalaho na marlomolomo sian angka halak na mangasahon gogo
dohot parbinotoan portibion. si urupanta do nasida asa maruli las niroha nasian Debata. On do
sada sian panghobasion ni hurianta Diakonia .

II.2 Ayat 10b-12 Padan ni Debata/ janji Tuhan

Saluhutna halak na mangulahon hadaulaton na denggan ingkon do dapotan angka na

denggan. Dibagasan turpuk on, tangkas do dapot angka pasupasu na pinarade ni Debata tu
angka jolma na porsea. Marasiniroha tu namale, ido ulaon las niroha ni halak Kristen. Torop
ditonga tonganta naso dapotan sipanganon dohot parabiton.“ gabe parasiroha ma hamu
songon Ama muna parasiroha i” ( Lukas 6: 36). Di ayat 12 tangkas do dibahen daftar berkat
yangdijanjikan kepada orang benar. Hal ini berkaitan dengan memulihkan reruntuhan dalam
arti fisik (dan juga rohani). Dan ini merujuk kepada orang orang yang membangun kembali
Yerusalem. Tuhan membangkitan Raja Koressy untuk memberi mereka kebebasan untuk
kembali ke Yerusalem sebuah kebebasan yang amat tepat bagi kerinduan mereka.

II.3 Ayat 13-14 “Mangulahon Sabat marningot Asi nirohani Debata”

Alai sabat ndada holan marhite sian parmingguon dohot partangiangan sambing. Sabat
ima namarningot haluaon napinatupa ni Debata marhite Jesus Kristus. Ido molo lao hita tu
bagas joro di ari Minggu i namarningot haluaonta do i. Hehe Jesus sian na mate di ari
patoluhon. ndada holan marningot ari sabat na pintupa ni Jahudi, songon naniaturhon di buku
ni si Musa, maradian diari papituhon i. Alai naumbalga i ima na manghamuliatehon haluaon
na binoan ni Jesus tu hita.

III. Panimpuli

Suang songon ido nang tu hita naung pinulua ni Debata di partingkian sinuaeng on.
Nunga tajalo haluaon na binoan ni Jesus Kristus Anak ni Debata, taulahon ma hadaulaton na

17
hinalomohon nirohani Debata. Ai ndang marisuang saluhut na denggan naung taula gariada
dapot ta doi sian naung tajalo sian Debata. Arga do hita diadopanni Debata ido umbahen
ditobus jala dipalua sian parhatobanon i. Laos songon i do parningotanni HUT RI na 77 taon
di tanggal 17 agustus na salpu, tangkas do taida pangkorhon ni parningotan ni kemerdekaan i.
Ala naung manghilala do bangsoon di parhatobanon saleleng 350 tahun. Alai dibasa basahon
haluaon/ kemerdekaan. Jala tu jamitaon tung mansai ampit do. Halak namarhadaulaton ima
halak mangolu dibagasan haporseaon dohot namangulahon hata ni Debata, ido nanidok ni
Paulus tu si Timoteus: “ pasomalsomal ma dirim mangulahon hadaulaton” ( latihlah dirimu
beribadah) / 1 Timoteus 4:7b. Hadaulaton dibahasa indonesia ima ibadah. Ndada holan
parmingguon, partangiangan sambing nanidokna. Alai ibadah ima pangulmiton ni ngolu
dibagasan hata nang pambahenan na denggan diadopan ni jolma dohot nang diadopan ni
Debata. AMEN

18
 Sermon Parhalado Se-Ressort HKBP Negeri Lama

Jamita tu Minggu XI Dung Trinitatis, 28 Agustus 2022

MANSOADAHON DIRI, MAMORSAN SILANG JALA MANGIHUTHON TUHAN

JESUS (Mateus 16 : 21 – 28)

Latar belakang ni Turpuk

Dung 3 taon lelengna Jesus rap dohot angka siseanNa mangihuthon Ibana, marsiajar
di bagasan pangajarionNa, huhut manangihon angka hataNa, dihilala Jesus nunga tingkina
pasahathon taringot tu hamamateNa dohot haheheonNa tu nasida. Dung i dipapungu Jesus
angka siseanNa jala dipasahat tu nasida taringot tu sitaonon na naeng masa tu Ibana, asa rade
angka siseanNa mangadopi angka na naeng masa tu Ibana, hamamateNa dohot haheheonNa
hombar tu sangkap ni Debata na ingkon pasautonNa. Haradeon na hinirim ni Jesus sian angka
siseanNa i ma haradeon di haporseaon nasida na tuk manjalo sitaonon na naeng adopanNa na
lam jonok na ma tingki ni hamamateNa dohot haheheonNa.

Dipasahat Jesus na adong di bagasan pingkiranNa, asa lam hot haporseaon nasida, asa
tarjalo angka siseanNa hamama teNa dohot haheheonNa hombar tu sangkap ni Debata.
Andorang so dipasahat Jesus taringot tu hamamateNa, diuji Jesus do manungkun tu angka
siseanNa, ise do Ibana diida angka siseanNa. Marasing do parnidaan ni angka siseanNa
taringot tu ise do Jesus di nasida. Adong na mandok si Elia, si Johannes Pandidi, si Jeremia,
sahalak sian panurirang. Alai si Petrus mandok Ibana do Mesias Anak ni Debata na mangolu
( jaha Mat. 16 : 13-20 ). Dihilala Jesus naung ditanda siseanNa do Ibana songon Mesias Anak
ni Debata na mangolu, ala ni do dipaboa Jesus tu angka siseanNa, ingkon mangadopi
sitaonon do Ibana songon Anak ni Debata na mangolu jala hehe sian na mate.

Hatorangan ni Turpuk

Di ayat 21 didok Jesus taringot tu sitaonon na naeng masa tu Ibana, boasa ingkon
marsitaonon Ibana manaon na porsuk, inganan ni sitaonon i di Jerusalem, nang pe gumodang
do tingkina mangula di Galilea, alai ingkon tu Jerusalem do Ibana laho manaon na porsuk.
Boasa ingkon tu Jerusalem Ibana laho? Ala di si do bagas joro ni Debata, inganan ni halak
Jahudi pasahathon pelean tu Debata. Ingkon pasahatonNa diriNa gabe pelean na mangolu tu

19
Debata di Jerusalem. Haporsuhon na songon dia do na tinaon ni Jesus? Godang sitaonon na
porsuk ingkon taononNa andorang so tarbunu Ibana.

Hosom, elat, teal dohot late ni roha na so tarpapuas sian angka na marmusu tu Ibana,
ala habengetonNa na so taralo angka na marsogo ni roha tu Ibana, saluhutna ingkon do
taononNa ( fitnahan, tijur, pastappastap, haleaon, linsinglinsing). Na jumorbut dope na ro sian
angka na manghasogohon Ibana i ma mamunu Jesus, asa mate Ibana. Anggo di hajolmaon
tung mansai godang pe sitaonon, molo ndang sahat tu hamatean ra boi dope niadopan di
bagasan habengeton binsan adong dope hangoluan, adong dope panghirimon. Alai anggo
ingkon mate, ra tadok do, tumagon ma unang godang mangadopi sitaonon andorang so mate,
asa unang tung jorbut situtu (mengerikan) hamatean i. Alai i do na masa tu Jesus, tung
sitaonon na jorbut do na masa tu Ibana, sahat tu na mate Ibana.

Hahonaan Ni Turpuk Tu Ngolu Siganupari

Angka na denggan do sangkap ni Debata tu angka na porsea di Ibana, songon sangkap

ni Debata tu Anak haholongan ni rohaNa Jesus Kristus na paluahon jolma sian dosa nang
hamatean. Ndang adong sangkap na roa na ro sian Debata. Molo pe ingkon marsitaonon
angka na giot mangihuthon Jesus songon Jesus na godang mangadopi haporsuhon, tarsilang,
jala mate, naeng adopanta i di bagasan haporseaon na togu tu Debata jala di bagasan
pangantusion na sintong hombar tu sangkap ni Debata di ngolunta marsadasada. Godang do
halak songon si Petrus na tarsonggot marnida silang dohot haleaon ni silang na pinasahat ni
Jesus. Jala gumodang do jolma na holan menginginkan rasa nyaman dan aman sementara
(rasa aman dan nyaman na semu) di tingki mangula angka ulaon na denggan na pinasahat ni
Debata tu angka na porsea, dao sian haporsuhon, ancaman, tantangan, nang hamatean,
gumodang do halak Kristen marnida sitaonon manang haporsuhon ala mangihuthon Jesus,
Mansoadahon diri, manuhuk silang jala mangihuthon Jesus (ayat 24-26).

Nunga jotjot tabege hata on marhite jamita, alai ra sai maralo do tu roha ni jolma hata
ni Jesus na di turpuk on, ala didok jolma maol mangulahon i. Di tingki diperhadapkan hita
mambuat sada haputusan, aha do haputuson na tabuat? Mangulahon lomo ni roha ni Debata
do, manang mangulahon lomo ni rohanta? Jesus mandok ingkon mansoadahon diri do halak
na so olo mansoadahon diriNa, na holan ganup mangolu di dirina sandiri. Angka na so
mampu mansoadahon dirina i ma angka na mangeahi hasonangan portibi sambing, mangolu
holan di hepeng, arta, ndang olo mangalehon tingkina tu Debata marsiajar di hata ni Debata,
20
holan na sibuk di hasonangan portibi, na holan mangalului huaso, jabatan nang arta ndang
parduli di hasintongan ni Debata.

Dung i didok Jesus, angka na paluahon hosana justru ingkon gabe agoan hosa ibana.
Angka na berusaha paluahon hosana, na marlapatan na holan mangalului rasa aman dan
nyaman, ndang olo menanggung resiko ala ni Kristus, ndang olo berkorban ala ni Kristus.
Angka na so holong rohana di Jesus Kristus tontu ndang olo agoan hosa ala ni Kristus, i ma
angka na humolong di hosana sian di Jesus, angka i do na agoan hosa salelenglelengna. Alai
angka na agoan hosa ala ni Kristus angka i do na jumpangan hosana salelenglelengna.
Dihalomohon Jesus do angka na mansoadahon diri jala gabe agoan hosa ala mangihuthon
Ibana, tontu ala holong ni rohana di Jesus, gabe ingkon agoan hosa ibana. Angka na
manghaho longi Ibana i do jangkononNa di harajaon ni Debata. Dipangido Jesus tu angka na
porsea, unang agoan hosa ala hasonangan portibi, ala mangulahon hajahaton, ala ndang
parduli di hasintongan. Alai molo agoan hosa do jolma ala na mangihuthon Jesus, i do na
jumpangan ngolu salelenglelengna. Amen

21