Bahan Sermon GKPI Resort Pangantaran

Minggu, 02 April 2023, PALMARUM (Ungu)

Evangelium: Markus 11:1-11 Epistel: Jesaya 50:4-9
Tema: Hosianna Ma Diginjang Ni Ginjangan
Patujolo
Somalna do molo sada raja manang panggomgomi di sada negara manang hata nuaeng didok ma i presiden.
Molo ro sada presiden tu sada luat manang sada daerah marragam do acara dipatupa akka kepala daerah dohot akka
masyarakat di nalaho manomu-nomu presiden. Adong mai marhite tortor manang taritarian ni budaya na adong di
luat i, dohot akka na asing pe dipatupa do bohama asa las rohani presiden i. Jala diturpuk on pe boe idaonta paboa
na adong do upaya na pinatupa ni akka jolma laho manomunomu haroro ni Jesus tu huta Jerusalem. Ditomutomu
nasida do songon sada raja. Dihatihai makkirim do rohani halak Israel diharoro ni sada raja na boi paluahon nasida
sian akka parukkilon manang penindasan na niae nasida. Jala dirajumi nasida Jesus ma raja na boi paluahon nasida.

Hatorangan Ni Turpuk

Dung jonok Jesus dohot akka siseanNa di Jerusalem disuru Jesusma dua halak siseanNa laho tu sosor na di
jolo nai jala dapot nasida sada anak ni halode naso dung dope hinundulan. Dihatihai halode on dipakke do gabe alat
trasnportasi. Dungi diulahon siseanNa i ma hombar tu na didok ni Jesus. Jala diboan nasida ma halode i tu Jesus.
Jala diampehon nasida ma ulos nasida tu atasna jadi marsihundulma Jesus disi. Songon sahalak raja dang hoda
dipakke Jesus alai halode do. On ma penggenapan ni nubuatan nabi Zakaria (Zak 9:9). Ia hoda ima simbol sian
akka hagogoon manang keperkasaan na gogo laho marporang (Yes 31:1; 1Raja 4:26). Alai Tuhan Jesus halode do
dipillit na laho pakkeonna. Ima dinalaho menggenapi na ni dok ni nabi. Sasintongna Tuhan Jesus naeng mandok tu
akka saluhut jolma na manomunomu Ibana, paboa Ibana ma Mesias alai dang Mesias na didok manang na hinirim
ni bangso Israel. Tuhan Jesus dang na laho memimpin bangso i laho mangulahon parporangan dohot laho
mangalele penjajah sian tano Israel. Alai Ibana ro laho mangalehon haluaon tu akka jolma dohot laho padamehon
akka jolmai dohot Debata.

Adong do piga-piga ahli na mandok halak Israel biasa mamakke akka bulung rata sian ladang (daun palem)
dibagas joro ni Debata di tikki perayaan pondok daun, jala nungga diparade nasida hian i di bagas nasida be, dungi
ditikki pajumpang nasida dohot Jesus dipakke nasida ma i manomunomu haroroni Jesus. Dipatupa nasida
songonima songon sada tanda penghormatan nasida tu halak na monang manang manomu-nomu pahlawan perang
na mulak sian parporangan. Jala dang holan i, torop do halak na pahembangkon ulos nasida di dalan na naeng si
boluson ni Jesus. Ditomutomu akka natorop i do haroro ni Jesus songon sahalak raja na mulak mamboan
hamonangan. Tuhan Jesus memiliki misi naumbalga sian na sekedar na paluahon bangso Israel sian akka penjajah.
Jala Tuhan Jesus dang holan na laho paluahon bangso Israel alai laho paluahon saluhut akka jolmai do sian
gomgoman ni dosa. Di na laho mandalanhon misi i pola ikkon mate Ibana di hau pinarsilang i, ingkon hansit
aeonNa humokkop akka jolmai. Boi do tahilala songon dia lungun ni roha ni Jesus dipanomunomuon ni akka
bangso i na tung meriah, alai dang diantusi nasida na dihirim nasida marbalik do sian roha ni Debata. Ia Tuhan
Jesus ikkon mate do di hau pinarsilang i.

Panimpuli

Marhite turpuk on boi idaonta songon dia balga ni holong ni Debata tu hita akka jolma na tinompaNa. Pola
do dipatutoru Debata diriNa jala dilehon anakNa na sasadai laho manobus hita akka pardosai sian hamatean i. Ai
na mate do hita alani akka dosanta, alani dosa i mate ma hubunganta tu Debata na manompa hita, dohot na
mangalehon hangoluan di hita. Alai ala balga do holong ni Debata tu hita ido umbahen olo tarsilang Jesus i
humokkop hita. Alani ikkon mandok mauliate do Debata ala holong ni rohana jala ala naung ditongos do anakNa
na sasadai laho manobus hita. Onpe las ma rohanta”Hosianna Ma Diginjang Ni Ginjangan”. Ai nungga ro Jesus i
mardongan asi dohot holong ni rohana na maboan hadameon tu hita, nungga ro Ibana laho paluahon hita ima
marhite hamamate ni Kristus di hau pinarsilang i. Jala nungga ro Ibana mamboan hamonangan ni partondionta.
Dang marhuaso be akka parjahat i, ai nungga ro Jesus laho pajongjonghon harajaonNa tu portibion.
 Bahan Sermon GKPI Resort Pangantaran
Minggu, 09 April 2023, PASKAH I (Putih)
Evangelium: Kolosse 3:1-4 Epistel: Psalmen 118:14-21
Tema: Dipahehe Rap Dohot Kristus
Patujolo
Tung tangkas do di endeta i na mandok “Haleluya, Haleluya, nungga hehe Jesus I, Haleluya, Haleluya,
nunga hehe Jesus I”. On do pos ni rohanta jala gabe unok ni haporseaonta di sude halak Kristen na di portibion
unang ragu jala sangsi hita taringot hu haheheon ni Kristus Jesus i. Ai didok Hata ni Tuhanta marhite panindangion
ni Apostel Paulus di 1 Korintus 15:14,17 “Ai anggo so hehe Kristus sian angka na mate, rumar ma jamitanami, laos
rumar ma nang haporseaon muna. Alai anggo so dipahehe Kristus i, magopo ma haporseaonmuna, jala tong dope
hamu dibagasan dosamuna”. Asa ingkon halashononta marhite na mandok mauliate tu Jahowa ai taruli hita
dihaluaon na so tarasam dohot tartuhor hita i, holan alani basabasa dohot asi ni rohana tu hita jolma pardosa on.
Marojahan tu haheheon ni Tuhanta Jesus Kristus na tahalashon/tapestahon parningotan sadarion, ido dasar dohot
panghirimon ta di na gabe dohot hita siihuthon Jesus Kristus, laos on do nang ojahan di haporseaon ni halak
Kristen taringot tu haheheon ni angka donganta naung mate.

Hatorangan Ni Turpuk
Peristiwa haheheon ni Tuhanta Jesus Kristus i ma peristiwa kemenagan na luar biasa, na so tarpingkiri ni
jolma, na so haambatan ni portibion huaso dohot sangkap ni Debata. Dang peristiwa dongeng, turiturian, cerita
rakyat manang ilusi bayang-bayang. Alai sada fakta hal na nyata do diportibion, i do umbahen na tarhalongang
angka parompuan dohot sisean i, dung sabbat i marnida na masa i ala dang di tanoman i be Jesus, batu na
mangalangkopi baba ni kuburan i nungga guling (Mat 28:1-10; Mark 16:1-8; Luk 24:1-12; Joh 20:1-18). Maol do
siat tu roha ni nasida atik pe tagan di ngolu ni panghobasion ni Tuhan Jesus nungga sai di lumbahon na hehe do
Ibana di ari na patoluhon (Joh 11:25-26; Mark 8:31; 9:31; 10:33-34) sahat tu na manaek tu banua ginjang
paradehon inganan di angka na porsea di Ibana. Naringkot sibotoonta paboa peristiwa haheheon i do dang ulaon
namasa secara kebetulan manang na peristiwa na mendadak i alai sada ulaon naung ditahi Tuhanta sandiri do
hombar tu sangkapNa.
Huria Kolosse ima sada kota di Asia na metmet di Timur ni Efesus. Kota Efesus di hatihai gabe sada
ibukota Provinsi di Asia na metmet (Asia kecil), didok mai Turki si nuaeng. Masuk tu huaso gomgoman ni bangso
Roma do ujui. Tongon di hurungan do Apostel Paulus manogos suraton. Dipangkulingi ibana do ruas ni Kolosse
dalan patubuhon, huhut patoguhon haporseaon ni huria mangadopi sumbia ni angka hamaolon, galumbang na
mangontak na naeng mangarongom haporseaon ni huria i, atik pe dang lupa si Paulus marningot las ni roha ni huria
i ala marpabue do haporseaon nasida jala mangerbang do huriaon na gabe pamatang ni Kristus (1:3-4), atik pe
mansai gogo do ajaran-ajaran sesat i manegai haporseaon ni huria i asa manadingkon haporseaon sian Tuhanta
Jesus Kristus. Di ancaman na songon i ma diarahon si Paulus huria Kolosse ingkon do naeng tangkas marurat jala
togu marhaporseaon tu Jesus Kristus huhut jamot, jaga di sude angka na naeng mangagohon na porsea i.
Didok Apostel Paulus asa togu nasida tu Debata, tongtong ma nasida manjalahi na di ginjang na nidok na
mangula ulaon na tau lomo ni roha ni Debata asa saut ma sangkap ni Debata marhite ngolu dohot ulaonta (Mat
6:33). Jala ingkon ma marparange na imbaru, nungga salpu pangalaho na robi, gabe na imbaru ma i. Angka
pangalaho na robi i dang sai paianon be, unang be sai mangadop tu daging, molo sai marparage tu daging hita,
mate ma. Alai molo tapamate ulaon ni pamatang marhite tondi mangolu ma hita (Rom 6:6). Nungga mangolu hita
nuaeng dibagasan haheheon ni Tuhanta Jesus Kristus. Taparhatopot do nungga mate, nungga hehe, jala manaek
Tuhanta Jesus. Jesus Kristus tu banua ginjang jala hundul do nuaeng Ibana di siamun ni Debata Ama i. Tahaporseai
do nungga mate hita dibagasan hamateanNa i, jala nungga hehe hita dibagasan haheheonNa i jala huhut nungga di
panaek hita marhite hananaekNa i. Ala ni i si ingoton ni rohanta na gabe kontrol ni ngolunta on holan sian banua
ginjang do, ima Jesus naung hehe i.

Panimpuli
Hamu angka dongan naung tinobus ni holong ni Tuhanta Jesus Kristus! Ala naung di tobus holong ni
Tuhanta do hita sian gomgoman ni dosa, sibolis tarlumobi hamatean i, jala mian di portibion dope hita huhut
dibagasan pardalanan do hita nuaeng manopot surgo, inganan naung pinarade ni Tuhanta Jesus, ima hasonangan
sisalelengna. Tusi do mata haporseaon /partondionta di jou, diarahon tu saluhut angka na porsea i. So tung
talu/tartading hita hinorhon angka hisaphisap dohot godaan angka na ro sian portibion. Ingkon hamonanghononta
do i sude marhite na lam pahibulon ngolu dohot parsaoran rap dohot Tuhan i. Jaminan dilehon Tuhanta tu angka na
porsea ingkon monang do hita, ai Tuhanta Jesus Kristus i pe si Parmonang do. Taingot ma huhut naingkon sude do
hita mamolus hamatean alai ndang hamatean ujung ni ngolu ni halak Kristen angka na porsea ala adong do hape
haheheon dohot haluaon di angka na manghangoluhon hamamate dohot haheheon ni Tuhanta Jesus. Taingotma
Debata do haroroan jala marhapatean tu Ibana do sude jolma/ngolunta on.