Jamita-Paskah-II-Senin-10-April-2023-Ulaon-ni-Apostel-3-ayat-24-26-Dipahehe-Debata-Naposona-

Laho-Mamasumasu

Jamita Paskah II Senin 10 April 2023

Paskah II

Paskah artinya peringatan akan kebangkitan Yesus. Yesus telah mengalami kesengsaraan di kayu
salib, mati dan dikuburkan kemudian bangkit pada hari yang ketiga (lihat Lukas 24:6-7).

TURPUK

Alai nasa panurirang angka na manurirangi, mamungka sian si Samuel ro di angka na sian pudina i,
angka ari on do dibaritahon nasida. Hamu do anak ni angka panurirang i jala partohap di padan na
binahen ni Debata tu angka amanta i, uju na nidokna i tu si Abraham: ‘Dapotan pasupasu ma saluhut
bangso ni tano on marhite sian Pomparanmi.’ Jumolo do di hamu dipahehe Debata naposoNa i,
disuru do Ibana mamasumasu hamu, angka na mulak sian hajahatonmuna be.

PATUJOLO

Tontu hea do hita marnida angka halongangan, na taida sian parnidaanta sandiri marhite na marnida
secara langsung manang marhite angka media. Isarana molo di tingki si saonari on, molo di
haportibion, adong ma i na didokna, sulap; molo sian haporseaonta adong ma masa angka
hamubaon ni roha, hamamalum ni angka sahit nang pangaleleon di angka tondi na jat na dipamasa
di angka Kebaktian Kebangunan Rohani (KKR) dohot angka na asing dope. Marnidasa tontu olo do ro
sungkunsungkun di pingkiranta, tung boha ma boi masa angka i? Songon dia do ulaning patupahon i?
Boi dohonon molo adong halongangan na masa, sai longang do hita marnida i ala ndang boi
tarpatupa hita, angka jolma biasa.

Songon i do nang di turpuk jamitanta sadari on, na tong pataridahon sada halongangan. Turpuk ni
jamitanta i ma na tarsurat di Ulaon ni Apostel 3:24-26. Mamungka di bindu tolu turpuk jamitanta on,
di ayat 2-8 disurathon do songon dia masa halongangan di bagas joro ni Debata na pinamasa ni
Apostel Petrus maradophon sahalak na pangpang sian hatutubuna, gabe boi mardalan. Dijalo do
hamamalum na i, di bagasan Goar ni Jesus Kristus. Hinorhon ni halongangan na masa i gabe godang
situtu ma halak na longang, tarhalomong jala sungkunsungkun di bagas rohana be, tung ise ma
ulaning Jesus Kristus i? Boasa tung marhuaso situtu Ibana? Denggan ma tapamanat marhite jamita
on.

HATORANGAN

Buku Ulaon ni Apostel dohot Evangelium Lukas disurathon sahalak na margoar Lukas, sahalak Jahudi,
sahalak panambari do ulaonna. Ndang holan panuratna na sarupa, na manjalo manang na tinuju ni
surat i pe tong do sarupa, i ma sahalak na margoar Teopilus, halak na so Jahudi, sahalak sian
pinompar ni angka raja (golongan bangsawan). Teopilus marlapatan, dongan ni Debata (ida Lukas
1:1-4; Ulaon ni Apostel 1:1-4). Tujuan panuratan ni buku on, i ma:
Marhite buku on dipasahat si Lukas do sihol ni rohana laho marbarita na uli tu angka halak na so
Jahudi (non-Yahudi) nang tu si Teopilus. Asa tarjangkon ni halak na so Jahudi barita haluaon na sian
Jesus i.

Mansai ringkot do hadirion ni Tondi Porbadia di parngoluan nang misi ni huria. Dipajojor do
pandidion na sian Tondi Porbadia i na gabe haradeon ni Debata laho patoguhon huriaNa laho
marbarita na uli jala mangihuthon ulaon pangkobasion ni Jesus. Mansai tangkas do dipajojor si Lukas
di buku on, na adong tolu hali hagogok ni Tondi Parbadia dohot pangkulingNa (ida Ulaon ni Apostel
2:4; 10:45-46 dohot 19:1-7).

Turpuk ni jamita di ulaon parningotan paduahon di haheheon ni Jesus, tarsurat di Ulaon ni Apostel
3:24-26. Dipajojor turpuk i do taringot tu na marjamita Apostel Petrus di jolo ni na torop di
Jerusalem. Marhite jamitana dipasahat apostel i do tu angka na torop i asa unang ditulak nasida
Barita na Uli taringot tu hadirion ni Jesus Kristus, Tuhan jala sipalua jolma (ida ayat 12-23). Ala, uju
na mangolu dope Jesus, mansai godang do halak na manjua Ibana jala ndang dijangkon nasida
hadirion ni Jesus i, gabe Tuhan di ngolunasida (ida ayat 13-15). Dirimpu nasida do hajonjongan ni
Jesus i holan sahalak panurirang sambing manang jolma biasa (ida ayat 18-23).

Di na marjamita Apostel Petrus adong ma tolu na pinasahatna tu angka na torop na adong di joro ni
Tuhan i, i ma:

1. Bagabaga taringot tu haroro ni Jesus tu tongatonga ni portibi on (ayat 13-24)

Dipahasat Apostel Petrus, sasintongna uju di tingki ni angka natuatua ni Israel, i ma si Abraham, Isak
dohot si Jakkob (ayat 13), Musa (ayat 22) jala si Samuel (ayat 24), nunga adong dibagabagahon goar
ni Jesus, Anak ni Debata, na naeng ro tu tongatonga ni portibi on laho paluahon jolma sian dosa.
Haroro ni Jesus tu portibi on i ma na gabe singkat ni pelean na gok (sempurna) di joro ni Debata,
pelean laho manobus jolma sian dosa (ida 3 Musa 5:14-19; Heber 9:11-28;10:1-18). Jesus do pelean
na gok na so marlaok dosa, mudarNa i ma na gabe singkat ni pelean laho manobus dosa ni jolma
manisia.

2. Bagabaga taringot tu Bangso Jahudi na niramotan nu Tuhan i (ayat 25)

Padan pangaramotion ni Debata tu halak Israel on nunga dipasahat uju i sian masa ni ompunasida si
Abraham (ayat 25, 1 Musa 15:5-6; 16:10 dohot 18:18). Ditorushon do padan i sahat tu Padan na
Imbaru, padan pangaramotion ni Debata tu bangso Israel i digohi marhite hadirion ni Tuhan Jesus
Kristus sian pinompar ni Raja Daud (ida Mateus 1:1-17; Lukas 1:31-33), na ro tu portibi on na gabe
sipalua di jolma manisia pardosa.

3. Hehe do Anak sinuru ni Ama i jala dijou do Ibana asa bongot tu bangso Israel, mamasumasu
jala mamboan nasida tu haluaon sian dosa (ayat 26)

Madabu do tu dosa halak Israel di Padan na Robi. Ala ni i mansai ringkot do di nasida sahalak
uluan/raja manang sipalua laho manobus dosanasida, asa jumpang di nasida haluaon sian dosa jala
dapotan pasupasu sian Jesus Kristus, i ma haluaon si salelenglelengna rap dohot Tuhanta Jesus
Kristus (ida Johannes 3:36). Dipamalum Apostel Petrus do angka halak na pangpang sian hatutubuna
gabe mardalan (ayat 6). Halongangan i gabe sada tanda do i paboa na tontong do Israel diramoti
Tuhan nang pe naung disoadahon nasida Jesus Kristus, Tuhan di parngoluannasida (ayat 14).

Marhite jamitana, naeng pasahaton ni Apostel Petrus tu angka na umbegesa asa dijangkon nasida
Jesus Kristus, gabe Tuhan di parngoluannasida, na mangalehon ngolu na manontong (ayat 19-20).

HAHONAAN
Di partingkian si saonari on godang do jolma na so manjangkon Jesus na gabe Tuhan jala sipalua
jolma manisia. Ragam do alana asa songon i nasida. Alai godang do na marpingkiran holan jolma,
manang panurirang sambing do Jesus Kristus. Di pingkirannasida pe haheheon ni Jesus sian
hamatean i ndang tutu situtu, (dirimpu do i gabus, ida Mateus 28:13-15), halongangan na pinatupa
ni Jesus nang di na mangalele angka begu dohot angka halongangan na asing ndang tutu i didok roha
ni angka na so porsea i.

Tema ni jamita di parningotan paduahon di parheheon ni Jesus i ma “Dipahehe Debata NaposoNa

Laho Mamasumasu” (ayat 26). Ditogihon Apostel Petrus do angka halak Israel asa:

Manjalo jala manjangkon Jesus marhite haheheonna (Paskah) na gabe Tuhan jala sipalua ni angka
siihuthon Ibana di bagasan parngoluan siganup ari.

Marbalik jala paubahon roha sian nasa dosa ala naung mate do Jesus humongkop jolma manisia,
paluahon sian dosa marhite mudarNa na durus di hau silang. Paradeonna ma inganan di angka na
porsea di Ibana, asa rap nasida dohot Jesus.

Halak Kristen ingkon gabe siboan pasupasu (gabe sira nang panondang, ida Mateus 5:13-16) tu
saluhut jolma. Ala naung dipasupasu Debata do hita di parngoluonta si ganup ari, ingkon ma hita
gabe siboan pasupasu tu angka jolma, songon na tarsurat di 1 Musa 12:2 didok, “Hubahen pe ho
gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho.”

Tapelehon ma ganup ngolunta tu Jesus Kristus songon sada pelean na mangolu jala na hinalomohon
ni Debata. Didok di Rom 12:1, “Na huapoi ma hamu, ale angka dongan, marhitehite asi ni roha ni
Debata: Pasahat hamu ma dagingmuna bahen pelean na mangolu, na badia, na hinalomohon ni
Debata; i ma hadaulaton ni na marroha.” Ala naung jumolo do dipelehon Jesus diriNa di hau
pinarsilang laho manobus angka dosa ni jolma manisia.