Bahan Sermon Evangelium pospel HKBP JEPARA

Minggu Advent IV, 18 Desember 2022

TOMU MA IBANA NA PINARBAGABAGA NI JAHOWA
Rom 1:1-7

I. Patujolo Ni Turpuk
Kitab Rom ima na marisihon surat ni Apostel Paulus tu halak na porsea na
adong di kota Rom. Huria na so hea dope ditopot ibana. Alani do, marhite surat on,
dipaboa ibana sihol ni rohana tu huria na adong di kota Rom (1:15). Jala marhite
surat na I dipatandahon ibana do hadirionna songon naposo ni Debata na sinuru ni
Debata laho marbarita nauli. Ndada holan patandahon dirina alai laos marhite surat
na I do, Apostel Paulus laho patandahon hadirion ni Tuhan Jesus Kristus songon
sipalua. Alai, huria Rom ima na marhororoan sian hajahudion nunga mian di
parserahan, mian ditongatonga ni parngoluan na menganut kebebasan. Alani, sai
adong dope sian nasida na so apala tangkas mananda jala mangantusi taringot tu
Jesus, alani do gabe ringkot di roha ni Apostel Paulus manaringoti barita naung
sinuriranghon ni angka panurirang ima taringot tu hadirion ni Jesus Kristus manang
Barita Nauli. Alani, tapihutihut ma hatorangan ni turpuk jamita on.
II. Hatorangan Ni Turpuk
1). Hadirion Si Paulus songon Naposo NI Debata. Dipungka Apostel Paulus do
surat on marhite napatandahon dirina. Digoari ibana do dirina ima naposo ni Jesus
Kristus dohot apostel ni Jesus Kritus. Hata naposo na marhororoan do I sian hata
“doulos” na marlapatan ma I “hatoban”. Boasa didok ibana dirina “naposo Jesus
Kristus? Ala dihaporseai ibana naung ditobus Tuhan Jesus ibana sian gomgoman ni
dosa dohot hamatean. Dirajumi ibana hadirionna ima nampuna ni Tuhan Jesus
Kristus jala dipelehon ibana do dirina tu Tuhan Jesus marhite na pinapulik tu ulaon
mamaritahon Barita Nauli na sian Debata. Tohonan na jinalona gabe naposo ni
Tuhan Jesus Kristus ima tohonan na marhobas laho marbarita nauli. Tohonan naung
dipeop ibana gabe parhobas ni Tuhan Jesus Kristus, ndang dirajumi ibana I haleaon,
alai hasangapon do. Sangap do tohonan dohot ulaon marhobas I di ibana ala arga
ibana ditobus Tuhan I laho mameop tohonan dohot ulaon I (1 Kor. 6:20). Jala
mansai tangkas do dipaboa ibana naung dijou Jesus Kristus ibana gabe sahalak
Apostel ima na mangulahon parsuruan ni Debata. Lapatanna, marhite panjouon I,
dirajumi apostel I, ia ngolu na ndang ngolu mangulahon lomo ni roha na sandiri, alai
mangulahon lomo ni roha ni Debata do. Saluhut na jinalona ima gabe naposo dohot
Apostel ni Jesus Kristus I holan alani asi ni roha ni Debata do. Jala ndada gabe
dihaginjanghon ibana I alai ringkot antusan ni natorop paboa songon naposo ni
Debata ibana manghatahon barita nauli I mangasahon huasoNa, ndada sian dirina.
2). Hadirion ni Jesus na gabe Barita Nauli. Dungkon dipatandahon ibana
dirina tu huria Rom, diuduti ibana ma muse manghatahon unok ni Barita Nauli ima
Jesus Kristus. Dibagasan turpuk dipatorang ibana hadirion ni Jesus na binaritahonna
I, ima: parjolo, Jesus ima pomparan ni si Daud (ay.3). Dipatandahon Apostel I do
hadirion ni Jesus songon pinompar ni Raja Daud naung tangkas dipanandaon ni
halak Jahudi. Jala laos sian I botoon nasida ma hasasaut ni bagabaga naung
sinuriranghon angka panurirang na parjolo i. Paduahon, Jesus Anak ni Debata.
Barita Nauli na naeng boanon ni Apostel i ndada holan barita taringot status sosial
ni Jesus alai na mansai arga sian pamaritahon I, ima hadirion ni Jesus songon Anak
ni Debata na marhagogoon sian Tondi Parbadia. Hatutuba dohot haheheon ni Jesus
patuduhon na tutu ma Ibana anak ni Debata. Jala marhite haheheonNa I, dipabangkit
Debata do Ibana gabe Raja, gabe Anak ni Debata na marhuaso ni portibion.
Tung marasing situtu do haheheon ni Jesus sian na mate sian haheheon ni angka na
mate na hea dipangkit Jesus. HaheheonNa na manongtong sian na mate patuduhon
na tutu do Ibana Mesias na dibagabagahon angka panurirang i. Ha-Debata-on dohot
hajolmaon ni Jesus mansai tangkas do I dipasahat Apostel Paulus tu Huria Rom asa
dijangkon nasida Barita Nauli na gabe haluaon di ngolu ni huria. Jala Barita Nauli I
do na gabe asi ni roha na ingkon jangkonon ni angka na porsea songon bangso na
hinaholongan ni Debata hita.
Marhite surat ni Apostel Paulus tu huria Rom nang tu hita halak na porsea
diarahon do hita asa mangantusi hadirion ni Jesus dohot nang hadirionta songon na
nijou ni Kristus hita manang halak na porsea hita asa saluhut hita manjanghon
Barita Nauli I huhut mambaritahon ala nunga dipillit hita jala na pinarbadianNa hita
(ay. 7). Jala laos on do sosososo tu huria Rom nang hita asa marpangalaho hita
songon na niigil ni Debata sian angka na porsea ima mangolu dibagasan asi ni roha
ni Debata dohot Dame (2 Kor. 13:11). Alani, ndang adong be ganggu ni roha di
angka na manghaporseai Debata ala nunga dipalua jala dijou do hita marhite
panjouon na badia.

III. Panimpuli
Nungga Jumpang di hita Minggu Advent IV, jala naeng masuk ma hita tu pesta
Ari Hatutubu ni Tuhan Jesus. Alani, marhite Advent IV on, diarahon do hita laho
mananda jala manjanghon asi ni roha ni Debata tu hita marhite haluaon na binoan ni
AnakNa Tuhan Jesus Kristus. Jala dibagasan turpuk on dipaingot do hita paboa na
sadalan do haluaon dohot panjouon na sian Debata. Alani do, molo nunga tarajumi
dirinta songon na pinalua ni Debata sian gomgoman ni dosa laos i do muse dalan ni
Debata manjou hita asa unduk jala mangolu dibagasan parsuruan ni Debata.
Manjanghon dohot manomunomu Tuhan Jesus marhite ari hatutubuNa, ndada be
holan ulaon perayaan natal sambing alai boha do marhite panomunomuonta di
haroroNa i tapatuduhon parsitutuonta marpangalaho na denggan. Ragam pe angka
hamajuaon nang angka hamaolon na ingkon taadopi alai ingkon do marpos ni roha
ni hita tu Debata sahat diharoroNa na paduahalihon i. Alani, di na mardalan hita di
hasiangan on manomunomu ari haroro ni Tuhan i, taparade ma rohanta
mangulahon na hombar tu lomo ni roha ni Debata. Amen.