Halak Partigor Mangolu do Binahen Ni Haporseaonna

EV: Habakuk 2:1-4

A. Patujolo

Horas ma dihita saluhutna, dongan sahaporseaon dibagasan Tuhanta Jesus Kristus.

Damang/dainang na hinaholongan, ditingki katekisasi sidi hita, diajari pangajari katekisasi do
hita taringot tu ajaran ni Martin Luther, ima taringot tu tri sola. Sada sian sola na tolu i, adong
ma nanidokna sola fide lapatanna holan ala haporseaon. On sada sian ajaran ni Luther na
mansai tangkas di boto sude ruas ni Kristen Protestan. Jotjot do dilapati godang halak, ajaran
Luther on holan na sian Padan Na Imbaru. Nian ajaran sola fide on dibuat sian Surat ni
Apostel Paulus tu ruas na adong di huta Rom dohot na di Galatia (Rom.1:16-17, 2:8-9, 3:28,
5:1;Gal.2:16), alai adong do dasor ni ajaran on di Padan Na Robi. Tarsurat do i diturpukta
sadarion, sudung na di ayat na paopathon (ay.4). Turpukta sadarion na tarsurat di Habakuk
2:1-4, manaringoti alus ni Debata tu panurirang Habakuk ditingki nasida mangalualu tu
Debata taringot tu bangsona Israel dohot sude angka na binahen ni musu Israel. Dialusi
Debata ma alualu ni panurirang Habakuk jala disuru ibana manurathon pangungkapon na
pinatudu ni Debata tu ibana, dohot angka hata ni Debata.

Panurirang Habakuk manurirangi di Harajaon ni Yehuda andorang tarbuang bangso

Israel na di Jehuda tu Babel. Godang do na dikritik panurirang Habakuk taringot tu situasi di
tingki i, tarlumobi tu angka pangalaho ni Bangso Israel na so olo unduk tu hata ni Debata. Di
bukku na sinuratna, mangalualu do nasida tu Debata boasa ma hira na di loas Debata angka
na masa di bangso i.

B. Hatorangan Ni Turpuk

Sian turpukta sadarion, adong 3 bagian na boi putihonta gabe pangajarion dibagasan
ngolunta. Naparjolo ima, rade jala olo manangihon hata ni Debata. Di ayat na parjolo,
dipingkiri roha ni si Habakuk alus ni Debata taringot tu alualuna. Mansai bagas do lapatan ni
ayat na parjolo on. Di surathon si Habakuk do hatana ”manatapnatap ahu marnida manang
aha sidohononna tu ahu” sian on diajari do hita angka na porsea asa mangolu dibagasan
pangiringon ni Debata jala manangihon hata ni Debata tu hita ganup marsadasada.
Persoalanna nuaeng hira na terbalik do pamahaman ni halak Kristen taringot tu angka na
songonon. Jotjot do molo martangiang halak Kristen, holan na ibana na manghatai dibagasan
tangiangan, jadi songon na hira mananginangi ma Debata. Hita pe sasintongna porlu do tong
manangihon alus ni Debata dibagasan tangiang ta tu Debata. I do umbahen na sai diajari
angka pangula ni huria, ia martangiang ndang na holan hita na manghatai tu Debata, alai
dohot do hita manangihon Debata dibagasan tangiangta. Ido umbahen di terjemahon lapatan
”doa” gabe tangiang di bagasan bahasa Batak Toba. Sian hata tangi ”mendengar”. Debata
manangihon hita, jala hita manangihon hata ni Debata (dengar-dengaran). Luther pasidinghon
tingkina 3 jom martangiang tu Debata sadari, alai ndang na ibana na leleng manghatai tu
Debata, um godang do ibana hohom dibagasan tangiangna jala unduk rohana laho
manangihon Debata di tangiangna i. Angka pangalaho na sisongonon porlu do di ulahon
angka na porsea. Hohom jala unduk roha laho manangihon hata ni Debata di bagasan
ngolunta tarlumobi di bagasan tangiangta.

Napaduahon, gomos dibagasan panghirimon. di ayat na paduahon dohot patoluhon,

di alusi Debata ma alualu ni si Habakuk, jala di podahon Debata asa olo ibana paimahon
sangkap ni Debata taringot tu Bangso Israel. Diajari Debata do si Habakuk asa
marpangkirimon. Di suratton do hata ”sai paimaima ma i”. Dipaboa Debata to ”sai na ro do”.
Sian hata on, gabe ajarajar ma hata on tu ruas ni Tuhanta. Hatop manang ndang, hata ni
debata na ingkon manjadi do. Ingkon gomos jala lambas do roha laho paimahon sude
sangkap ni Debata dibagasan ngolu ni halak na porsea, songon na napinodahon ni Debata tu
panurirang Habakuk. Hagomoson dohot lambas ni rohanta di uji Debata do, alai pos ma
rohanta, satia do Debata di sude hatana. Ndang songon jolma Debata. Molo jolma olo dope
lupa di hata manang padan na nidokna, alai Debata ndang olo margabus, ibana pahothon hata
naung niuarihon Ibana (4 Musa 9:5).

Napatoluhon, mangolu dibagasan haporseaon. Di ayat opat, di podahon Debata tu si

Habakuk, ”halak partigor i mangolu do binahen ni parsihohotna marhaporseaon”. Di tingki i,
madabu do bangso Israel tu pangunjunan. Maol dilapati nasida songon dia dalan laho
mangolu. Dirimpu nasida hola na mangulahon rutinitas ugama boi mangolu nasida. Ringgas
do halak Israel mengulahon ritus ni ugamo Israel, alai ndang tudos ulaon parugamoonna tu
pangalahona. Ndang na ritus ugamo na mambahen hita mangolu. Holan Debata do na boi
pangoluhon hita, jala angka namangolu ingkon marsitutu rohana dohot pangalahona tu
haporseaon dibagasan Debata.

Haporseaon i do na mambahen halak na porsea mandapot hangoluan, songon na nidok

ni Tuhan Jesus (Yoh.20:31). Haluaon ndang ro sian pangulaon di ritus, manang ulaon na
denggan. Holan ala haporseaon natogu do mangolu jolma i. Tapasiding ma angka pangalaho
na so denggan, manang sude angka ritus kemunafikan sian ngolunta. Marsihohot ma hita
marhaporseaon tu Debata, ai ido na paluahon hita.

C. Siparhusorhusoron

Damang dainang na hinaholongan di bagasan Tuhanta Jesus Kristus, godang do poda

manang pangajarion na nidapot ni si Habakuk sian hata ni Debata tu ibana (2:1-4). Di ajari
Debata do ibana asa sai rade jala olo rohana laho manangihon hata ni Debata, gomos
dibagasan panghirimon jala mangolu dibagasan haporseaon. Pos ma rohanta, jala toguma
haporseaonta, molo halak partigor mangolu do binahen ni haporseaonna. Marsihohot ma hita
dibagasan haporseaon tu Debata. Antong marhite turpukta on, asa boi manongtong
haporseaon ingkon ma tapatogu paralealeonta tu Ibana. Songon dia ma carana? Tongtong
martangiang jala pasahat ma sude nasa na adong di bagasan roham, jala tangihon ibana,
marpangkirimon dibagasan Ibana jala marsihohot di bagasan haporseaon tu Ibana sambing.
Amen.

Halak Partigor Mangolu do Binahen Ni Haporseaonna

EP: Rom.1:16-17

A. Patujolo

Digoari do Surat Rom on songon ”testamentum Paulus”. Lapatanna sada surat wasiat
manang warisan na mansai arga sian Paulus tu angka na porsea di huria na parjolo. Mansai
nonor do digurithon apostel Paulus do di Surat Rom on taringot tu pangantusion di poda
haporsean ni halak kristen (pokok ajaran, Rom.1-11) sahat tu angka pangalaho dia ma
sihangoluhonon ni halak Kristen si ganup ari (etika Kekristenan, Rom.12-16). Jadi molo
digoar pe surat on tu huria Rom, sasintongna ndada holan tu Huria Rom anggo hasahatan
dohot tujuan ni surat on, alai songon sada bukku na sengaja digurithon Paulus patoranghon
taringot tu buhubuhu pangajarion di poda hakristenon. Laos ido sada hasurungan ni surat
Rom on; molo di surat na asing apostel Paulus mangalehon hatorangan manang solusi di
parungkilon na niadopan ni huria marsadasada, alai anggo di surat Rom, ima sada uraian na
mansai nonor (sistematis) na porlu botoon ni sude na porsea di bagasan Kristus.

Turpuk epistel di minggu on dihita tarsurat di Rom.1:16-17, i ma patoranghon taringot

tu haporseaon. Di ayat 16 dipabotohon si Paulus do tu ruas na adong di Rom, ia barita na uli,
na di pasahat tu tongatonga nasida, hagogoon ni Debata do i paluahon angka na porsea, jala
nasa na porsea mangolu hinorhon ni haporseaonna. Pangajarion na mansai mendasar do na di
pabotohon Apostel i tu nasida, asa unang tarboan angka poda ni hajahudion na manirpang
sian hata ni Debata. Holan ala ni haporseaon do umbahen na malua jolma i sian dosa.

B. Hatorangan ni Turpuk

Damang dainang na hinaholongan dibagasan goarni Tuhanta Jesus Kristus, sian hata
ni Tuhan Jesus, tangkas do taboto, ia Jesus di tongos tu halak Israel, tu angka birubiru na
mago (Mat.15:24), alai ingkon ta ingot do tong, hata ni Jesus na mandok Torop do na ro sogot
sian purba dohot sian pastima, gabe dongan sapanganan ni si Abraham dohot si Isak dohot si
Jakkob di harajaon banua ginjang I (Mat.8:11). Tudos ma i songon na nidok ni Apostel Paulus
di turpukta Rom.1:16 on, halak Jahudi jumolo, dung i dohot do halak Junani. Barita na uli
napinasahat ni Debata marhite Jesus Kristus, tu halak Jahudi do mulana, alai ndang na laho so
disi barita i, sahat do tu liat ni portibion, tu halak Junani dungi tu saluhut portibion. Alai gabe
sada sungkunsungkun di hita nuaeng, piga porsen ma halak Yahudi na gabe Kristen. Sian data
ni penduduk Jahudi di Portibion, adong do hirahira 15 juta nasida, alai ndang torop na gabe
sisean ni Kristus. Ndang na sian nuaeng saotik halak Jahudi na gabe Kristen. Disaksihon
angka Apostel i, ndang olo nasida porsea tu Jesus dohot barita na uli na binoanna sian Debata.
Jala Jesus pe didok di Mateus 8:12 Alai anggo angka anak ni Harajaon i hian, sipabalion do i
sogot tu na holom marimpotimpot. Di dok Tuhan Jesus tu nasida ala ndang olo halak Jahudi
laho porsea.

On ma sada pangajarion tu hita angka naporsea nuaeng. Diboan Tuhan Jesus barita na
uli sian banua ginjang, dipabotohon tu hita marhite angka apostel na pinabangkit ni Debata,
asa malua hita sian dosa na adong di portibion. Di pasahat do i tuhalak Jahudi, Junani, dungi
sahat ma tu hita halak Batak nuaeng. I do hagoon na laho paluahon hita. Sian on boi taida
haluaon i, dilehon Debata tu saluhut jolma ndang holan tu halak Jahudi sambing alai dohot do
sude houm dohot bangso na adong di portibion.

Damang dainang na hinaholongan dibagasan goarni Tuhanta Jesus Kristus,

napaduaohon, di ayat 17 diajari Apostel Paulus ruas na adong di Rom, ia barita nauli na
dijangkon nasida sian Jesus Kristus marhite sian angka apostel i, papatarhon hatigoran ni
Debata do i. Hatigoran i ingkon diungkap dibagasan barita nauli (evangelium). Di turpuk on,
dibuat si Paulus do ayat sian bukku ni panurirang Habakuk di Habakuk 2:4 Na mangolu do
partigor i hinorhon ni haporseaonna. Jala haporseaon na mangolu dibagasan Tuhan Jesus,
ndang sian na asing. Ndang sian parulaon, prestasi, ritus ugamo, manang lan na asing. Holan
ala haporseaon sambing, umbahen na malua jolma i. Mura do mangantusi lapatan ni hata on,
alai maol do mangulahon i. Molo ro tantangan dibagasan ngolu, gabe olo do lupa angka na
porsea. Alai marhite turpuk on, dipaingot Debata do hita, mangolu pe hita nuaeng jala malua
hita sian dosa, holan ala haporseaon dibagasan Tuhan Jesus sambing do. Mangolu ma hita
dibagasan haporseaon na manongtong dibagasan Jesus Kristus. Mangolu jala hot
haporseaonta di Ibana, ta lehon dirinta diurupi Tondi Porbadia. Songon di dok di Endenta
BE.763 ”Molo Jesus donganmi las roham. Jesus i pangurupim, las roham. Hot haporseaonmi
dohot pos ni rohami. Mardonganhon Jesus i las roham….,”. las ma rohanta, hot ma
haporseaonta, jala manongtong ma haporseaonta di Jesus Kristus.

C. Refleksi

Sian turpukta nuaeng, on ma na gabe refleksi di hita angka na porsea. Turpukta on

mangajari hita pangajarion taringot tu hatigoran ni barita na uli dibagasan ngolunta. Di jou do
hita asa unang maila pasahathon barita nauli tu portibion ala ido hagogoon jala haluaon tu
saluhut jolma. Angkup ni i, di togihon do hita asa mangolu di bagasan haporseaon na
mangolu jala manongtong dibagasan Jesus Kristus. Sian pangalapation ni turpuk on, hita
angka na porsea, diarahon Debata asa sai olo hita manghatindangkon hatihgoran ni barita na
uli, jala mangolu dibagasan haporseaon na togu. Mangolu do angka partigor, hinorhon ni
haporseaonna. Amen.