Debata Marmahani Birubiruna

EV: Jeremia 23:1-6

A. Patujolo

Horas ma dihita damang dainang haha anggi pinaribot na dihaholongi Tuhanta. Turpuk
jamita dihita sadarion ima na tarsurat di bukku ni panurirang Jeremia bindu 23 mamungka ma
sian ayat na parjolo sahat tu ayat na paonomhon. Damang dainang na hinaholongan, turpuk on
manaringoti hata ni Debata na pinatolhas panurirang Jeremia tu halak Israel, taringot tu
hasundatan ni angka partogi ni Israel na manguluhon bangso i. Didok Panurirang Jeremia do
halaki angka parmahan na mangago dohot paserakkon. Debata patandaphon tu nasida, hona
uhum do songot angka partogi na mangulahon angka na sisongoni tu bangsona. Jala maruari do
Debata, tongosonna ma angka parmahan na haposan, na marmahani nasida asa unang tahutan,
tarsonggot manang mago birubiru i. Digoari do parmahan i, sada tumbur na tigor disi David, ima
Mesias. Panurirang Jeremia, ima sada panurirang na pinabangkit ni Debata di tingki poso dope
ibana di Jehuda. Panurirang on mangolu jala manurirangi di tingki adong pergolakan na mansai
balga di harajaon Jehuda. Ndung mate raja Assur, ro ma sada harajaon na balga ima Babel laho
manggomgomi sude wilayah Assur dohot sekitarna. Mansai godang do permasalahan di tingki i
tarlumobi gejolak ekonomi, politik, sosial bahkan ugamo.

B. Hatorangan Ni Turpuk

Sian turpukta nuaeng on, adong 3 pangajarion na boi taida. Naparjolo, Debata
Marmahani Birubiruna. Di turpukta on dipabotohon Panurirang Jeremia, sai diparateatehon
Debata do bangso na Israel. Sian dia do taboto i?, di ayat na parjolo, diboto Debata, ai nunga
mago dohot marserak birubiru na diparmahani Debata. Sasintongna Debata sandiri do na
marmahani birubiru na, alai dipabangkit Debata ma angka partogi laho marmahani bangso i asa
boi lam jonok angka pelayanan tu angka birubiru ni Debata. Alai ndang haposan angka parmahan
i laho mangulahonsa. Dipabojok manang dibahen parbolatan di tongatonga birubiru i dungi ro
ma angka parsalisihan. On sada metafora do digombarhon Debata taringot tu raja manang sude
partogi na adong di Israel, na mambahen haliluon di bangso i, gabe sega ma haporseaon nasida.
Dipaingot Debata do bangso i dohot angka partogina, Debata do parmahan na sintong di
bangsona. Nuaeng idaonna jala papunguonna ma pasipasi ni punguanna dungi aduonna ma
nasida mulak tu panjampalannasida. Uhumon ni Debata ma angka parmahan na sohaposan i, jala
ibana sandiri na langsung mangadopi bangso na.

Damang dainang na hinaholongan, situasi na di gombarhon dibagasan teks ta on,

sasintongna kontektual hian do tu parngoluonta di tingki on. Diturpukta on dipabotohon do tu
hita, Debata do na marmahani birubiruna, jala ndang loasanna hita mago. Tudos do songon na
sinurat di Psalmen 23, Jahowa do Siparmahan, dipatongon do angka na porsea tu jampalan na
lomak jala dipatogu di lambung aek hasonangan. Molo Debata do na marmahani hita, unang be
mabiar hita mandalani ngolunta. Diramoti do hita, jala ndang diloas hita mago manang marserak.
Ibana Debata na tigor, na mamparateatehon hita angka birubiruna.

Napaduahon, holong ni Debata na satia di bangso na. On ma sada bukti na berbeda

Jahowa Debata tu angka debata sileban. Ai molo Debata ni Israel, mansai holong do rohana tu
bangsona. Nata pe nunga mardosa nasida ala partogi na so haposan na mambahen lilu
haporseaonna, alai manongtong do holong ni Debata tu bangso i. Ndang tadinghononna nasida
jala ndang loasanna mago ibana. Sai asi do rohana mida bangso na, jala sai dilehon dalan asa
denggan ngolu ni bangso i, jala mulak rohana tu Debata. Dipaingot Panurirang Jeremia do nasida
asa marnida hinabalga ni holong Debata tu bangso i.

On ma gabe pangajarion tong tu hita angka ruas ni Debata, mansai holong do roha ni
Debata tu hita angka halak na porsea. Songon di endenta i di BE.No.195:1 ”Holong do roha Ni
Debatangku Holong rohaNa tongtong di au”. Alani balga ni holongna, diramoti do ngolu ni
bangso na Israel, suang songoni hita angka jolma na gabe Israel dibagasan haporseaon di Jesus
Kristus. Mansai holong do rohani Debata tu ahu, tu hamuna, tu hita saluhutna. Denggan ma
tarimangi balga ni holong ni Debata tu hita, jala taulahon ma songoni. Ta haholongi ma Debata
songon na didok Tuhan Jesus, ”haholonganmu do Tuhan Debatam sian nasa ateatem, sian nasa
hosam, sian nasa roham dohot sian nasa gogom!”.

Napatoluhon, di tongos Debata do Mesias. Di ayat na paonomhon, gabe songon

kesimpulan ma i sian turpuk on. Ai marjanji do Debata, tongosanna ma mesias tu tongatonga ni
bangsona laho paluahon bangso i. Gabe sada pangungkapon ma i tu bangso i, asa malua nasida.
Di dok Debata ”patindangonku ma di si David sada tumbur na tigor, na bangkit raja jala na
pistar, jala hajongjongkononna ma uhum dohot hatigoran di tano i”. Di padan naimbaru
dipatorang do, ia mesias na dijanjihon Debata di bukku Jeremia on ima Jesus Kristus, na
paluahon bango Israel dohot portibion sian dosa. Asa mangolu nasida dibagasan hadameon
dohot haluaon.

C. Siparhusorhusoron

Damang dainang na hinaholongan, dipasupasu Debata do hita marhite hatana di tingki on

na sian Jeremia 23:1-6. Hata ni Debata on ndang holan sahat tu bangso Israel di tingki naung
salpu, alai dohot do tu hita di tingki on. Angka partogi na pinabangkit ni Debata laho
manggomgomi bangso na di pamarentaon manang ugamo, gabe parmahan na so hasea do nasida,
na mambahen gabe mago bangso i. Alai di turpuk on, marjanji do Debata, papunguonna do sogot
angka birubiruna, ima bangsona, angka naporsea, jala ibana sandiri na marmahani bangso i,
suang songoni sude angka na porsea. Ala holongna tu angka na porsea, dijanjihon Debata do
mangalehon mesias, na laho paluahon angka na porsea. I ma holong ni roha ni Debata na
manongos Jesus Kristus na gabe mesias laho paluahon angka naporsea dohot portibion.
Andorang so ro Jesus, nunga di janjihon Debata harorona, di turpuktaon. Jala sian on ma
tarajumi, songon dia balga ni holong na tu hita angka na porsea di Ibana, jala Ibana na
marmahani hita songon di dok di bukku endenta i di BE. No. 188 ”Jahowa Siparmahan au, ndang
hurang manang aha, Ai nasa jea dipadao, do sian dorbiana. Tongon dibaen na lomak i, lao
pangoluhon tondingki, Dibaen asi rohaNa”. Amen.
 Asima Rohana Mida Nasida

EP: Markus 6:30-34

A. Patujolo

Huria ni Tuhanta di bagasan Jesus Kristus, hata ni Debata di hita sadarion tarsurat di
Markus 6:30-34. Damang dainang na hinaholongan, turpuk on i ma sada patujolo halonganan
manang mujizat na di bahen Jesus tu angka jolma na mangihuthon ibana. Ditingki Jesus
mangajari torop jolma taringot tu harajaon ni Debata, diihuthon bangso i do ibana manang tudia,
jala diajari nasida gaup marsadasada, asa mangalalui harajaon ni Debata, jala mulak rohana tu
Debata. Sian angka pangajarion ni Jesus, disurathon si Markus do pardalanan pelayanan ni Jesus
uju di portibion dope ibana. Adong do pigapiga pangajarion na boi tabuat sian turpuk on gabe
pangajarion di hita angka na porsea nuaeng.

B. Hatorangan ni Turpuk

Sian turpuk ta on, di paboa Apostel i ma tu Jesus angka aha naung niulana dohot na
niajarhonna. Dungi manghatai ma Jesus tu angka siseanna i, asa sumurut ma nasida laho
pahosahon saotik. Jala angka apostel i pe nunga loja, ndang sempat dope nasida mangan. Dung
borhat Jesus dohot angka siseanna, diihuthon anga natorop i do nasida sian jalur darat. Ala tong
dope diihuthon Ibana, diida Jesus ma nasida jala asima rohana mida nasida.

Adong pigapiga pangajarion na diajarhon Jesus sian turpuk on. Naparjolo, dipaboa
angka na niula dohot na niajarhon. Molo dihurianta HKBP, adong do laporan praktek goarna,
tu angka calon pelayan di HKBP, secara berkala dijalo kantor pusat ni HKBP do i, laho
mengevaluasi kinerja dohot angka parsiajaran na nidapot nasida tingki mangula di bagasan huria
manang lembaga. Adong do evaluasi na dibahen hurianta, asa sian on, boi ma diida pimpinan ni
HKBP songon dia perkembangan ni pelayanan nasida, jala molo adong na hurang lobi, boi gohan
ni pimpinan, laho mangajari manang mangalehon poda dohot semangat taringot tu pelayanan ni
nasida namangihut. On do tong na dibahen Jesus tu angka sisean na. Dung diajari Jesus nasida,
ndang holan na gabe sisean nasida, alai dipersiaphon Jesus do nasida asa boi gabe pangajari
jolma na asing taringot tu harajaon ni Debata. Di ayat 30 dipapungu Jesus do angka siseanna
dungi dipaboa apostel ima angka naung niulanan. Hita pe angka naporsea, ringkot do tapaboa
aha na taula dibagasan ngolunta on. Pasahat tu Debata, dibagasan tangiang ta be. Asa sian i hita
evaluasi. Sian hata ni Debata na tajaha di Bibel dohot angka jamita na nunga ta tangihon sian
angka parjamita, aha do naung taula? Gabe siula manang sihobas hatai do hita manang holan na
gabe pananginangi do hita?. Sian turpuk on, dipaingot do hita angka naporsea, asa rade rohanta
mengevaluasi jala tapaboa tu Debata marhite Jesus Kristus, angka aha ma na nunga taula laho
pahembanghon harajaonna. Molo na hurang do hita mangulahonsa, tapangido ma tu Debata asa
dilehon hagogoon dohot pangajarion marhite angka parjamita na ditongos ni Debata tu hita
ganup, jala tondi parbadia na margogoihon hita. Rade ma rohanta mangulahonsa.

Napaduahon, Asima Rohana Mida nasida. Diida Jesus, nunga songon birubiru na so
marparmahan nasida. Somalna molo angka birubiru na so adong parmahanna, gabe olo do mate
birubiru i ala ndang diboto manang tudia. Jala molo ndang adong parmahanna, olo do ro angka
babiat laho memburu angka birubiru i. Songonima diida Jesus angka jolma na torop
mangihuthon ibana i. Alai alani balga ni holongna, gabe asi ma roha ni Jesus mida nasida.
Songon holong roha ni Debata, dipatudos Jesus do holong na torop i. Songon i roha ni Debata tu
angka jolma na adong di portibion. Ala diida Debata nunga songon birubiru na lilu jolma
i,ditongos do anak na ima Jesus Kristus, asa ro tu portibion laho marmahani sude bangso dohot
houm. Tudos ma songon na sinurathon si Johannes di Johannes 3:16 ”Ai songon on do holong ni
roha ni Debata di portibi on, pola do Anakna na sasada i dilehon, asa unang mago ganup na
porsea di Ibana...”. Holong ni Jesus songon holong ni Debata do, holong agave, na tulus. Jadi ala
holong na tulus sian Jesus, di ajari ma nasida taringot hata ni Debata, jala bahen ibana ma sada
halonganan di tongatonga nasida, asa diidana nasida songon dia do holong ni Debata na nionjar
asi ni rohana tu jolma i. Songon i ma hita angka na porsea nuaeng, mansai asi do rohani Debata
dihita. Marhite holong agave, holong na nionjar asi ni rohana dohot ketulusan ni Debata,
dihaholongi do hita angka na porsea. Ndang ditadinghon Debata hita, ndang di loas hita mago.
Alai diurupi do hita, dipatupa Debata do halonganan di ngolunta asa boi hita marlas ni roha, jala
mangolu hita di portibion.

C. Siparhusorhusoron
 Huria ni Tuhanta di bagasan Jesus Kristus, turpukta on mangajarhon hita songon dia hita
mengevaluasi angka pangajarion naung ta dapot sian Debata marhite angka parjamita na
patolhashon hatana tu hita. Ingkon rade do rohanta laho mengevaluasi sude angka kinerjanta
manang aha na nunga ta ulahon laho pahembanghon harajaon ni Debata. Dungi diajari dohita
angka na porsea, asa sai marningot balga ni holong roha Debata tu angka na porsea. Sai asi do
rohani Debata di hita angka naporsea. Songon holong ni Jesus tu angka jolma na torop na
mangihuthon ibana, songoni do tong holong ni roha ni Debata tu hita saluhutna angka naporsea.
Amen.