TOPIK : Kristus Na Paluahon Hita Kamis, 18 Maret 2021
01. Marende BE No. 570 : 1 – 2 O Jesus Tuhanki Hupuji Ho
O Jesus Tuhanki hupuji Ho ala ni holongMi. Di au tongon di haradeonMi mamelehon diriMi. Lao manobus tondingki las rohangki. Aut unang Ho Tuhan sitobus au. Aut so rade rohaM manatap au. Tudia pe au lao ndada na margogo au. Lao paluahon au, mago tutu
02. Votum – Introitus – Tangiang: AVI/B5 – D.V/19
U: Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Porbadia na tumompa langit dohot tano on. Lulohon ma ahu, ale Debata, jala parbadahon badangku dompak bangso na so daulat roha, sai palua ma ahu sian baoa siulahon sipaotooto dohot hajengkelon. R: Ai Ho do Debata haroroan ni hagogoonku. Tongos ma hatiuronMu dohot hatigoranMu, angka na manogu ahu, pataru ahu tu dolok ni habadiaonMu dohot tu ingananMu U: Haleluya, Martangiang Ma Hita, Ale Amanami Parasi roha na sumurung, Debata ni hatuaonnami! Huingot hami do di angka ari on panaonon dohot hamamate ni Tuhan Jesus Kristus, Tuhannami. Pahibul ma rohanami jala parbadiai mamingkiri sude na tinaonNa i. Patandahon ma tu hami dosanami, asa diarsakhon rohanami, asa hupompomi hami hisaphisap dohot sangkapsangkap ni rohanami, jala asa hupasaut hami lomo ni roha ni na manobus hami, asa martua hami marhite sian i ro di salelenglelengna. Sai patupa ma i di hami marhitehite Tuhan Jesus Kristus, Anak haholongan ni rohaM. Amen
03. Marende BE No. 256 : 1 + 4 Jesus Kristus I do Raja
Jesus Kristus i do Raja pinabangkit ni AmaNa. Manggomgomi sasude manggomgomi sasude. Jala nasa hajolmaon tu Ibana do marTuhan. Parhatopotonna be parhatopotonna be. Holan Jesus patupahon na malua hajolmaon. Ala ni mudarNa i, Ala ni mudarNa i. Nunga sahat hangoluan Sai tongtong do partuaon. Dibagasan Jesus i, Dibagasan Jesus i 04. Manjaha Epistel : Heber 5 : 5 – 10 U: Tajaha ma turpuk Epistel di partangianganta na tarsurat Heber 5 : 5 - 10. Laos songon i do nang Kristus: Ndang Ibana mangaithon sahala sintua ni malim tu dirina; Debata do, na mandok tu Ibana: "Anakku do Ho; sadari on do Ho hutubuhon!" R: Songon nidokna i di na asing: "Malim do Ho ro di salelenglelengna, mangihuthon horong ni si Melkisedek!" U: Tagan jolma Ibana, dipelehon do angka pangidoanna dohot elehelekna, mardongan angguk bolon dohot iluilu tu na tuk paluahon Ibana sian hamatean; jadi ditangihon do Ibana, gabe malua sian hatahuton i. R: Ai atik pe Anak i Ibana, diguruhon do pangoloion marhite sian na tinaonanna i! U: Jala dung rimpas gabe sihorhon haluaon salelenglelengna do Ibana di sude na mangoloi Ibana. R: Digoar Debata do Ibana sintua ni malim, mangihuthon horong ni si Melkisedek. U: I ma sahatna, martua ma natumangihon hata ni Debata jala naumpeopsa. Amen 05. Marende BE No. 774 : 1 – 2 Tung Mabaor Sian Ho Tung mabaor sian Ho, mual hangoluan i. Ai torop pe batang aek angka dolok dohot rura. Nang pe langit dohot tano. Ho do na manompa i. Ho do na manompa i, Ho do na manompa i. Ho do manompa i, Ho do na manompa i. Ai huboto do tangkas hagoonMi Tuhan. Ho do na so hatudosan na tongtong Ho pasangapon. Las rohangku pasangaphon, Ro marsomba tu joloM, ro marsomba tu joloM. Ro marsomba tu joloM, ro marsomba tu joloM 06. Tangiang Pangondianon 07. Marende BE No. 756 : 1 – 2 Huboto Do Huboto do: “Ho mandongani au”, sonang do au. Huboto do: “Ho sumarihon au”, sonang do au. Debatangki padame rohangki, pos rohangki Pasaut ma lomoMi. Huboto do, “Ho Sipalua au”, sonang do au, Huboto do, “Ho do manghophop au”, sonang do au. Monang do Ho talu sibolis I, Uhirhon ibagas tu rohangki. 08. Jamita : Jeremia 31 : 31 – 34 Tema: Kristus Na Paluahon Hita
Nunga marpadan bangso Israel na ingkon Jahowa sombaon nasida, jala
marpadan Debata mangain nasida gabe bangsoNa. Ala hontot ni padan i digombarhon do rumang ni parpadanan i songon pardomuan ni na mardongan saripe. I do lapatan ni pandohan “Ahu gabe harajaannasida” ay,32. Laho padimundimun padan i dilehon Debata tu bangso i patikNa, asa marhite patik i tubu di nasida haunduhon, pos ni roha di Jahowa. Hape jotjot do marlangka pilit (selingkuh) bangso i, diose padan na i. Ndang satia nasida di padan naung ni undukhonna. Di uji raja Josia do nian patupahon reformasi di taon 622 BC, di tingki ni si Jeremia, alai ndang leleng haimbaruon i mian ditongatonga ni bangso i, mulak do nasida marsomba tu debata sileban. Padan na imbaru na ni dok ni si Jeremia on, ndada padan reformasi (dirumuskan ulang), roha ni jolma i do sipaimbaruon asa unduk tu Debata. Parsaoran ni jolma tu Debata do sipaimbaruon, sian na ganggu gabe marpos ni roha.
Sude do jolma malungun di haimbaruon. Aha do na imbaru?
Sasintongna ndang adong na imbaru di portibi on. Nunga buruk di rohanta baju naung leleng tapangke, alai molo talehon i tu na so marbajubaju, gabe imbaru do i di ibana. Boi do dohonon ni sada halak marbaju na imbaru ibana, hape burukburuk ni halak do na pinangke na i. Rohana do na mambahen imbaru baju i. Tudos tusi do na nidok ni si Jeremia dibagasan turpuk on. Sian ganggu gabe marpos ni roha di Jahowa. Haporseanon Debata do na niingil ni turpuk on. Jalonnta na imbaru di pargoluonta molo tapaimbaru pangoloionta tu Debata, molo tapaimbaru parsaoranta tu ibaNa. Rohanta i tapaimbaru asa marpos ni roha tu Tuhan i.
Patik i disurathot tu roha dohot tu ateate asa unang holan tarsurat di
bungku. Aut sugari lohot di rohana patik i ndang sumombaon nasida Debata sileban. Saleleng so ias rohana nasida maradophon Debata, panggalaho na jat do parbuehononna. Hamubaon ni roha do na niigil ni padan na imbaru i. Hamubaon no roha i do hataridaan ni haporseaon tu Debata. Muba sian ngolu na manundalhon Tuhan i gabe mandompakhon Ibana. Hamubaon ndada na marganti kulit, alai paiashon roha parbagsan asa marparbuehon pangoloion, holong dohot las ni roha, lambas ni roha, habasaron, habasaon, haporseaon, halambohon dohot hatomanon, (Gal. 5:22).
Dilapathon si Hesekiel hamubaon i marhite pandohan, “halak parjahat
na manadinghon hajahaton” Hes.33,12. Sadalan do hamubaon ni roha dohot asi ni roha ni Debata, ai ndang boi jolma sian dirina paubahon rohana, holan asi ni roha ni Tuhan i do na patauhon jolma sian dirina paubahon rohana. Ndan ulaon parsahalian hamubaon ni roha di ngolu ni jolma, ulaon na kontiniu do i saleleng mangolu jolma i. Hamubaon ni roha ni halak Kristen unang songon hamubaon bindorang, molo tu na rata gabe rata, tu na gorsing gabe gorsing, ndang adong pandirianna. Uang songon parmuba ni ulok ; molo tukkar kulit lam uli rupana hape bisana hot do. Panampilan meyakinkan, panghataion alkitabiah, hape hajahaton i ndang bolong sian roha dohot pingkiranna. Hamubaon ni roha I ma manundalhon parange na buruk jala mangulahon na dengan. Roha i do sipaiason ai i do sobongotan ni Jesus asa marhuaso disi lomo ni rohaNa. Amin
09. Marende BE No. 690 : 1 – 2 (Papungu Pelean)
Hibul rohangku tu Tuhan Jesus. Sude ngolungku di Tuhan Jesus, ihuthononku do Tuhan Jesus, ndang olo au sumurut be. Sai hutundalhon haportibion, Silang ni Kristus ma hudapothon, Sai hutundalhon haportibion, Ndang olo au sumurut be