SERMON PANGULA NA GOK TINGKI – HKBP DISTRIK III HUMBANG
Turpuk Jamita Minggu, 31 Maret 2024 (Minggu Paskah I)
JESAYA 25 : 6 – 9 “Marlas Ni Roha Mida HatuaonNa I”
I. Patujolo
Jesaya 25 on masuk do tu horong Proto Jesaya, na mangondolhon
hagogoon dohot huaso ni Debata na so hatudosan, na mangatasi saluhut harajaon na di portibi on. Jala sada bagian do bindu 24 – 27, na mamaritahon salpu do saluhut harajaon na di portibi on, jala hot do jongjong sada harajaon na so olo salpu, na hot salelengna, na ginonggoman ni Debata na gabe Raja di ginjang ni saluhut raja. Songon goar ni si Jesaya, na marlapatan : Jahowa do Haluaon manang partanobatoan di ahu.
Alai ndang porsea bangso Juda dihagogoon ni Jahowa na boi paluahon
nasida. Dihatiha i nunga gumodangan panghaposion ni Raja Ahas tu harajaon Assur, dipangido ibana pangurupion tu Raja Assur. Mamungka sian i ma harajaon Assur marhuaso maradophon harajaon Juda. Ingkon parsidohot ma Juda marsomba tu debata ni Assur. Dipaksa ma harajaon Juda manggarar upeti songon sada bentuk amal pangurupion ni harajaon Assur tu nasida. Laho paluahon diri sian gomgoman ni Assur dipangido raja Ahas ma muse pangurupion sian Misir hape ndang marlapatan pangidoanna i, ai ingkon tu Jahowa do nasida mangido pangurupion. Mandate nasida di pardagingon lumobi ma dipartondion, hira naung ditadinghon Debata nasida di pardangolan nasida. Penguasaan Assur dirajumi nasida songon uhum na pinamasa ni Debata tu nasida.
Disituasi na songon i ma, disuru si Jesaya paingothon Juda asa unang
mangunsande nasida tu harajaon portibi, alai tu Jahowa ma. Alani i, di ayat 1 – 5, dihatindanghon si Jesaya do hatimbulon ni Debata, jala borhat do i sian angka pengalaman ni bangso i rap dohot Tuhan I (ay.1). Dipataridahon si Jesaya do ia hatimbulonNa i tung dao do tumimbo sian harajaon portibi on. Dibagabagahon Debata do angka silas ni roha ima haroan bolon. Asa marhite i boi mulak bangso i manghaposi, mamuji huhut patimbulhon Debata di ngolunasida. Pambahenan manang tindakan ni Debata tu angka halak manang bangso na sai manegai ngolu ni na porsea, tangkas situtu do i tarida songon pangalohaNa tu harajaon Aram songon i dohot hasesega ni harajaon Assur, na gabe huta pantil batu muse ujungna (ay,2).
Dihatindanghon si Jesaya do, Debata do na gabe partanobatoan
disaluhut bangso na niasianNa (ay.4). Tano bato dison marlapatan do i inganan parlinggoman di tingki masa porang. Jadi, ianggo tano bato na songon on naung tangkas do diuji hatoguonna i. Ndada boi be i pultahan ni bodil. Molo didok Debata partanobatoan; ndang tarbahen hagogoon ni portibi on be laho manegai ngolunta, ai sai padaoon ni Debata ma angka mara dohot hamagoan sian hita (ay.5). Jala nyata do i dibagasan hadirion ni Jesus Kristus. Holan Ibana do tano bato na boi pasohothon ari na marngiarngiar dohot angka udan tipotipo di angka ngolunta be. Songon ari na marngiarngiar di tano bangkalbangkal, morpo jala dipasohot Ibana do I marhite haheheonNa sian hamatean i, hamonanganNa manaluhon huaso ni portibi on.
II. Hatorangan Ni Turpuk
1. Ay. 6 – 8. Padirion ni Jahowa sada haroan bolon tu saluhut bangso di
dolok Sion. Sian Sion do Debata marhuaso dohot mangomgomi bangsoNa. Tu Sion nasa bangso ro marudurudur manjalo pangajarion dohot marsomba tu Ibana. Debata do na patupahon jala na manggokhon tu pesta bolon i, ndada jolma na manggokhon Tuhan i. Dipapatar ma disi inganan las ni roha, nasa bangso ro mangalului parlinggoman di Sion, disi ma Debata manamuei (memberi makan dan minum) marhite sipanganon na dumenggan ima sipanganon na talmis, siinumon sian tuak anggur naung leleng. Haroan manang sipanganon songon symbol ni halalas ni roha ni bangso ala Debata na patupahon. Dang holan mangalului sipanganon pardagingon na dilului bangso Israel di dolok Sion alai dohot do mangalului pangapulion dohot hasonangan ni partondion, ala di Sion do Debata pasisihon tujungtujung (hirehire) na mambahen marsak, tariluilu bangsoNa. Buaton ni Jahowa ma na ngalut I sian ngolu ni bangsoNa.
2. Ayat 9. Panandaon ni bangso ni Debata di ulaon ni Debata
marpardomuan tu haporseaon. Ingkon do tarida alus/respon ni haporseaon nasida manghaposi Debata ala tangkas pangurupionNa tu nasida. Panindangion ni haporseaon i naeng ma tarida marhite na mandok mauliate tu Debata marhitehite olopolop dohot las ni roha mida haluaon i. Haluaon i do na mangonjar angka na porsea gabe marolopolop mandok mauliate marhite ende pujipujian, jala satia tongtong manghaposi Tuhan I di ngolu na.
III. Sipahusorhusoron (Hahonaan Ni Jamita)
1. Haheheon ni Jesus : Patuduhon Huaso ni Debata di ginjang ni
saluhut huaso na di portibi on. Ndang manghohom Debata marnida parungkilon ni bangsoNa. Nang pe alani pangalaosionta hita mangadopi parungkilon, alai dipalua do hita alani holongNa. Ndang adong na boi dibahen jolma laho paluahon dirina sian upa na tinuhor ni dosa i, ndang adong na boi dibahen jolma laho mamintori dirina. Ndang adong huaso di portibi on na boi paluahon jolma i sian parungkilonna. Haheheon ni Tuhan Jesus Kristus i ma peristiwa kemenangan na luar biasa, na so tarpingkiri jolma, na so hambatan ni portibion huaso dohot sangkap ni Debata. Marhite hamamate dohot haheheon ni Tuhan Jesus Kristus, gabe hapapatar ni huaso, hasangapon, hamuliaon dohot asi ni roha ni Jahowa tu ganup jolma ro disaleleng ni lelengna. Tung holan asi ni roha ni Jahowa sambing ma di bagasan Jesus Kristus gabe dipintori hita sian dosa manang ditobus sian hamatean sisalelengnilelengna. Ndang hahuahon ni hamatean na jorbut i pe hita ala nung parsidohot hita dipanobusionNa i. Huaso haheheonNa i patuduhon, ndang margogo portibi on mangambati huasoNa I. Huaso haheheonNa I ma gabe gogo di hita laho manaluhon na sa parungkilon dohot na sa huaso na di portibi on. 2. Haheheon ni Jesus : Haroan Bolon tu saluhut bangso, mansohot ma iluilu, ro ma angka las ni roha. Haheheon ni Jesus gabe pesta bolon tu saluhut na bangso angka na olo ro manghaporseai ibana, ala marhite haheheonNa salpu ma angka iluilu jala ro ma las n iroha, ima panobusion dohot haluaon di hita angka na mardosa. Debata do na patupahon Haroan Bolon i marhite Jesus Kristus. Ndang jolma na na patupahon I, alai ro sian inisiatif ni Debata sandiri do i. Barita las ni roha do di hita barita sitaonon nang haheheon ni Jesus sian silangNa. Ai molo taingot sude parniahapan ni Jesus andorang so mate tarsilang Ibana, taantusi ma songon dia bagas ni holong ni Debata di portibi on. Hamamate dohot haheheon ni Jesus gabe haroan bolon na pinarade ni Debata, marhite na gantung Jesus di silang i, jala mudarNa na durus, gabe sipanganon na talmis, siinumon sian tuak anggur naung leleng. Tarida ma disi parpadanan na imbaru, parpadanan na badia, asa di bagasan Ibana na gantung di hau pinarsilang jala naung hehe sian na mate gabe mediator (penghubung) manang penyambung hubunganta tu Debata. Ai asa saluhutna i, ima: "asa jumpang songon na ni dok ni panurirang Jesaya" Ibana do mangusung pardangolanta jala angka sahitta diporsan".
3. Haheheon Ni Jesus : Panindangion na mangolu di angka na
porsea. Haheheon ni Tuhan Jesus manungguli hita asa marolopolop, marlasniroha, mamuji dohot manghatindangkon huaso ni Tuhan i naung hehe sian na mate. Naeng ma hehe hita sian ngolu na buruk tu ngolu na imbaru ima ngolu na mamparbuehon hata ni Debata. Sada semangat na imbaru ma haheheon ni Jesus di hita laho manghobasi ulaon na hombar tu lomo ni rohaNa huhut menata haporseaonta asa lam gomos, dimpos, jala uli laho manungkoli ngolunta on maradophon saluhut na masa. Nuaeng molo taauhon jala tahangoluhon panobusion dohot panghophopon ni Jesus, tama do lam tatingkathon ngolu haporseaonta. Tapelehon ma roha dohot dirinta laho manghaporseai Jesus naung hehe i. Dung i taihuthon ma Ibana, marhite na rade hita mamelehon diri, gogo dohot tingki tu ulaon na hombar tu lomo ni roha ni Tuhanta i. Jala marpos ni roha ma hita tu Debata, ai "Debata sandiri do naung manghatahonsa". Amen. (Pdt. Yobel R. Sihombing, STh – HKBP Ress. Sitinjak)