TATA IBADAH

JUMAT AGUNG

Jumat, 7 April 2023

TEMA:
“Hasadaon pakon Pangidangion na Marbuah.”
(Kolosse 1:10)

SUB TEMA:
“Marmalas ni Uhur ma Hita Pataridahkon Buah ni Haluahonta anjaha
Gabe Pasu-pasu i Tongah-tongah ni Gareja, Masyarakat, ampa Negara
Tanda ni na dob Matoras Haporsayaonta.”
(1 Tessalonika 5:16-18; Jesaya 9:2; Psalmen 118:24)
PRAELUDIUM/PROSESI (Jongjong Kuria)
Doding Haleluya No. 211:1+3
Silang na mapansing in Ham tongtong baen gantarhin.
Lao manlawan dousa in pakon pandoleian in
bani sitaronon in Ham tongtong baen gantarhin.

Roh do au nuan Bamu, sai lumbang ma uhurMu!

Domma pala matei Ham ibaen holongMu tumang;
Jalo Ham na sombuh on, parhioui tonduyhon.

DILO-DILO MARHASADAON
P. Horas ma hubanta haganupan!
Kuria na ihaholongi Tuhan, sadari on iadongkon hita do ibadah Jumat
Agung, aima pardingatan bani parmatei ni Tuhanta, Jesus Kristus. Topik
bani ibadahta santorap on aima, “Jesus Bona ni Haluahon Sisadokah ni
Dokahni.” Tuhan Jesus do Sipaluah banta humbani dousa ampa
hamateian. Ai do ase tartuju hu Bani do sagala pamujion ni Kuria in,
songon na sinuratkonni parpsalmen, “Ambilankononku ma goran-Mu
bani saninangku, pujionku ma Ham i tongah-tongah ni kuria in.”
(Psalmen 22:23).
Halani ai, pasirsir hita ma dirinta, pungkah hita ma ibadahta.

————————– hening ————————–

1. VOTUM, INTROITUS, TONGGO 

P. : Ibagas Goran ni Naibata Bapa pakon Tuhan Jesus Kristus ampa
Tonduy Na Pansing, Sitompa langit pakon tanoh on. Amen.
Sintua ni Malim na sonin do patut banta, na pansing, na so
ongga marsalah, na so ra martikas,
K. : sirang humbani pardousa, na dob gabe gijangan humbani
nagori atas na so pala songon sintua ni malim na legan,
P. : padaskon ganup ari parlobei galangan halani dousani sandiri,
K. : dob ai pe halani dousa ni bangsani ai,
P. : ai sahali do ihorjahon in, sanggah ginalangkonNi ai diriNi.
Haleluya, Haleluya, Haleluya.

Tata Ibadah Jumat Agung 2023 | 1

 K. : (mandodingkon) Haleluya, Haleluya, Haleluya.
P. : Martonggo ma hita:
Ham Bapanami janah Naibatanami. Banggal ni in idop ni
uhurMu bani haganupan jolma. Domma iberehon Ham AnakMu
Jesus Kristus manaron hahirion, haparngiton ampa hadoyukon,
pala matei tarsilang ase maluah hanami humbani kuasa ni
sibolis, dousa pakon hamateian. Ungkab Ham ma uhurnami
laho mangkargahon janah mangkagoluhkon pangkopkopon ni
AnakMu in, ase marulih hanami bani hasasapan ni dousa pakon
hagoluhan na sadokah ni dokahni. Sai pujion nami ma goran-
Mu na pansing in i tongah-tongahni bangsa-bangsa, ibagas
Kristus Jesus Sipaluah in. Amen.
(hundul Kuria)

2. DODING HALELUYA NO. 62:1+6

Jesus Ham do bah tubuhku, sipagoluh tonduyhin.
Ai ibunuh Ham munsuhku in ma hamateian in.
Ham manaron hamagouan, pasirsirhon hagoluhan.
Halanin hupuji Ham sai marribu hali tong.

GoranMu ma sai hupuji halani boritni in.

DarohMu pe huhargai na binerehonMu in.
Pasalosei dousa nami, ulang magou be hanami.
Ham hupuji halaniin sadokah-dokahni in.

3. HASASAPAN NI DOUSA
P. : Riap ma hita jongjong.
Martonggo ma hita, sopotkon hita ma dousanta hubani Tuhan
Naibata.
Ham Tuhan Naibata, pargogoh na so tarimbang. Ham do bonani
haluahon sisadokah ni dokahni, marhitei AnakMu, Jesus Kristus
Tuhannami. Ihaporsayai hanami, Naibata na bayak do Ham
anjaha na sirsir manguseihon bagei ni pasu-pasu pardagingon
ampa partonduyon hubani jolma. Domma ijalo hanami pasu-
pasuMu in marhitei horja na hinorjahon ni tangannami. I

Tata Ibadah Jumat Agung 2023 | 2

 tongah- tongahnami buei do halak na marhahurangan bani
haporluon ni goluh, bani sipanganon, bani pambotoh, na
madoyuk anjaha masombuh.

————————– hening————————–

P. Bani hasombuhon pakon hadoyukon in, hotop do lang

ipataridahkon hanami goluh haKristenon. Hurang sari ope
hanami bani halak na marhahurangan. Sipata rahanan do
iparambur-ambur hanami sinadongannami marimbang
mambere hubani halak na marhahurangan. Hotop ope pitpit
panonggornami dompak halak na marhahurangan in.

————————– hening————————–

P. Nuan iakuhon hanami do haganup dousanami in, janah roh

hanami hu lobeiMu mansopothon dousa pakon
hahurangannami. Ham Tuhan, marpangulaki ma uhurMu
mangidah hanami. Idop ma uhurMu, sasap Ham ma dousanami,
ibagas goran ni AnakMu Jesus Kristus Tuhan anjaha Sipaluah
hanami. Amen.
Tangar anjaha haporsayai hita ma Hata ni Naibata, bagah-bagah
pasal hasasapan ni dousa.
“Mangkopkop haganup do Ia matei, ase ulang manggoluh bani
dirini bei na manggoluh in, tapi ase manggoluh sidea Bani, na
dob matei anjaha mulak manggoluh mangkopkop sidea” (2
Korint 5:15)
Ibagas holong ni Naibata, domma isasap haganup dousanta.
Halani ai, pataridah hita ma tanda-tanda ni pargoluhon na
bayu. Hasangapon ma bani Naibata i babou.
K. : Amen.
(hundul Kuria)

Tata Ibadah Jumat Agung 2023 | 3

4. DODING HALELUYA NO. 61:1+3
O ulu na sab daroh ibaen ugahMu in.
Humbani janggar-janggar duri parsilang in.
O ulu hatunggungon hinan sihilapMu.
Itaron Ham madorun; manombah au Bamu.

Au on talup, o Tuhan manaron sisonin.

Dousangku do iporsan Ham na tarsilang in.
Sai tonggor Ham, o Tuhan, au na i lobeiMu.
Anjaha patuduhkon hu bangku layakMu.

5. HATA HAPORSAYAON
P. : Riap ma hita jongjong!
Saksihon hita ma haporsayaonta in, songon na sinaksihon ni
haganup halak na porsaya bani sab tanoh on!
P. + K. : Ahu porsaya bani Naibata Bapa .......... Amen.
(hundul Kuria)

6. DODING HALELUYA NO. 321:1+4

Sai orod bai silang-Mu Jesus iananku,
bah tubuh mabaor ijin in ma inumonku.
Silangni Tuhankin in ma pujionku,
anggo das magira au in dodingkononku.

Sai hujolom silang-Mu Ham paimaonku,

Jaloonku surga in, in ma pujionku.
Silang ni Tuhankin, in ma pujionku,
anggo das magira au, in dodingkononku.

7. REFLEKSI 7 HATANI TUHAN JESUS BANI HAYU PARSILANG

P. : Ia Tuhanta Jesus, lang pitah panggalangonni diriNi bani
hayu parsilang ai hansa na paluahkon hita. Ganup hataNi bani
na targantung ai pe mangkorhon pangajarion ronsi barita
malas ni uhur do bani ganup na mambogei ijia, age ronsi
hubanta bani panorang on.

Tata Ibadah Jumat Agung 2023 | 4

M.J. : “Ham Bapa, marpangulaki ma uhur-Mu, ai seng ibotoh
sidea na binahenni ai!” (Lukas 23:34).
P. : Tuhan Jesus mangindohon hasasapan ni dousa humbani
Naibata hubani ganup sidea na mamparsilangkonSi. Hata
on mangondolhon ase hita pe marsisasapan dousa ma
samah hita.
Bapa : “Sintong do hatangKon bam, sadari on rap pakon Ahu ma
ho i Paradeiso!” (Lukas 23:43).
P. : Tuhan Jesus pasirsirhon ianan bani ganup halak na
marhamubahon ni uhur. IpaimaNi anjaha ipangindo Tuhan
in do hamubahon ni uhur ni sasahalak das hubani ujung ni
goluhni. Hata on mangindohon ase hita pe tongtong
marhamubahon ni uhur bani goluhta siganup ari.
Namaposo : “Andin ma Inang, anakmu!” “Andin ma inangmu!”
(Johannes 19:26-27).
P. : Harga do bani Tuhan Jesus hajongjonganni inang. Seng ra Ia
papunjungkon inangNi ai dob honsi parmisirNi. Hata on
mangajari hita ase manghargahon goluhni namatorasta,
tarlobih inangta. Jimot janah holong ma hita marorang tua.
Inang : “Eloi, Eloi, lama sabakhtani!” Artini, “Ale NaibatangKu,
NaibatangKu, mase ma tadingkononMu Ahu?” (Markus
15:34).
P. : Jesus aima Panondang ni dunia on. Sanggah partubuhNi,
adong panondang na marsinalsal bani borngin. Tingki
dohor ma panorang ujung ni goluhNi, sogop ma na
golap bani arian. Ijalo Jesus do hagolapan ai pataridahkon
dirini paima mantaluhon hamateian ai. Hata on mangajari
hita paboa tongkin do hansa ipaturut Tuhan hita
mandompakkon sitaronon. Tapi torsa do ibahen
hadobanni, ase margogoh janah boi ilopusi hita ganup
haparngiton in.
SM : “Horahan Ahu!” (Johannes 19:28).
P. : Lambin dokah, lambin bois do gogohni Jesus bani
hayu parsilang in. Milas ni ari na mambaen horahan Ia
janah mangindahi siinumon. Hata on mangajari hita paboa

Tata Ibadah Jumat Agung 2023 | 5

 maningon horahan tong hita bani tadah partonduyon in, ai
ijin do bosur janah sombuh horahta in.
Lansia : “Domma salosei!” (Johannes 19:30).
P. : Hata on aima hata hamonangan, sedo hata pandoleian. Das
do Ia hubani na mangujungi ibagas na torsa janah gokan
dear. Hata on mangajari hita ase totap ma hita bujur
mandalankon ampa manghorjahon ganup na madear na
dob pinungkahta ronsi das bani ujungni.
K. : “Ham Bapa! Hubagas tanganMu ma Huondoskon
TonduyHu.” (Lukas 23:46)

———————— ipahata ma giring-giring 7 (pitu) hali ———————–

————————– hening————————–

8. DODING HALELUYA NO. 322:1-2

Durus daroh ni Jesus in, i dolog Golgata.
Na paubahkon uhurmin, isasap dousamin.
Isasap dousamin, isasap dousamin.
Na paubahkon uhurmin, isasap dousamin.

DarohNi na madurus in, margogoh do tongon.

Gabe maluah bangsaMu, pansing homa tongtong.
Pansing homa tongtong, pansing homa tongtong.
Gabe maluah bangsaMu, pansing homa tongtong.

9. AMBILAN: Heber 5:7-10

10. GALANGAN
Parambilan : Paima iondoskon hita galanganta, tangar hita ma lobei hata
ni Naibata na gabe onjolan banta laho manggalang,
aima na tarsurat bani Heber 13:16, “Mambahen na madear
ampa na marsibere-bere, ulang ma halupahon nasiam ai, ai
galangan na sonai do iharosuhkon Naibata.”
Sonari ondoskon hita ma galanganta!

Tata Ibadah Jumat Agung 2023 | 6

 K. : (mandodingkon Haleluya No. 213:1+4)
Jesusku na manobus ahu, sai sol haholonganku Ham;
Hu dolog Golgata Ham laho, iojur holong ateiMu.
Hupuji idop uhurMu tarlobih holong ateiMu.

Uhirhon Ham ma bai uhurhu, tinaronMu mangkopkop au;

Hujin sai togu Ham uhurhu, sai tong guru Bamu ma au.
Hupuji idop uhurMu tarlobih holong ateiMu.

11. TONGGO PAKON DODING GALANGAN

Parambilan : Riap ma hita jongjong!
Martonggo ma hita mangondoskon galanganta hubani
Naibata!
Ham Tuhan Naibata, simada hanami pakon haganup
goluhnami. Tarima kasih ma hatahononnami hu Bamu,
halani iparmudu-mudu, iparorot janah ipasu-pasu Ham do
goluhnami. Ibere Ham do homa parhiouon, hajorgiton,
sipanganon pakon siinumon ronsi na porlu bani goluhnami.
Tanda ni tarima kasihnami, iondoskon hanami do hu Bamu
goluh pakon pasu-pasu na dob ondos hubannami, na
ipatumpu hanami on gabe galangannami. Papansing anjaha
pasu-pasu Ham ma on gabe galangan na misbou i lobeiMu
bahen hasangaponMu janah mambahen lambin
marhataridahan harajaonMu i dunia on. Sai tambahi Ham
ma pasu-pasuMu janah sai lambin paganda Ham ma holong
ni ateiMu hu bannami. Ajari Ham ma hanami, ase lambin
igalangkon hanami dirinami pakon hinadongannami hubani
harajaonMu bahen hamuliaonMu, ibagas goran ni AnakMu
Jesus Kristus, Sipaluah hanami. Amen.

K. : (mandodingkon Haleluya No. 340:1)

Huondoskon bani Jesus, haganupan diringkon.
Ia do pasangaponku, sadokah bai goluhkon.
Huondoskon ma, huondoskon ma.
Bani Jesus Sipaluah, huondoskon ma.

Tata Ibadah Jumat Agung 2023 | 7

12. TONGGO PANUTUP
Parambilan : Ham Tuhan Jesus Kristus, biri-biri ni Naibata na dob
mamorsan dousa ni dunia on. Tarima kasih ampa puji-pujian
ma isombahkon hanami hu Bamu, halani domma ipaluah
Ham hanami humbani dousanami marhitei parmateiMu.
Itaron Ham do na borit, horahan janah lang marhiou
ase malum anjaha parsimada hanami bani hagoluhan pakon
hiou hapintoron. Sai tatap Ham ma ganup kuriaMu on, na
dob ihopkop janah itobus Ham. Pargogohi Ham ma hanami
mangkargahon pangkopkopon pakon panobusionMu in,
anjaha manaksihon holong ni ateiMu na dob ondos
bannami. Patoguh Ham ma pangarapannami hu Bamu, ase
manggoluh barang matei pe hanami, Ham ma totap
Rajanami. Balosi Ham ma tonggonami on, ibagas idop
pakon holong ni ateiMu. Amen.

13. TONGGO HAM BAPANAMI

Parambilan : Ham Bapanami na i nagori atas. Sai na papansing ma Goran-
Mu. Sai roh ma harajaon-Mu. Sai saud ma harosuh ni uhur-
Mu i nagori tongah on songon na i nagori atas. Bere Ham ma
bannami sadari on hagoluhan ari-ari. Sasap Ham ma
dousanami songon panasapnami bani dousa ni hasoman na
mardousa dompak hanami. Ulang hanami bobai Ham hu
parlajouan. Paluah Ham ma hanami humbani pangagou.
K. : (mandodingkon)
Ai Ham do simada Harajaon pakon Hagogohon
ampa Hasangapon sadokahni-dokahni. Amen.

14. PAINGKATKON
Parambilan : Laho ma nasiam, janah, “papansing nasiam ma Kristus
Tuhan in ibagas uhurnasiam, tongtong ma nasiam sirsir
patorangkon bani haganup halak na manungkun nasiam
pasal onjolan ni pangarapan nasiam.” (1 Petrus 3:15).

Tata Ibadah Jumat Agung 2023 | 8

15. PASU-PASU
Parambilan : Jalo ham (hita) ma pasu-pasu humbani Tuhan Naibatanta:
Ipasu-pasu anjaha iparorot Tuhan Naibata ma ham (hita).
Isondangkon Tuhan Naibata ma bohi-Ni hu bamu (hu banta)
janah maidop ma uhur-Ni mangidah ham (hita). Idompakkon
Tuhan Naibata na bohi-Ni hu bamu (hu banta) janah
ipasorap ma damei-Ni bani tonduymu (tonduyta bei). Amen.
K. : (mandodingkon) Amen. Amen. Amen.

Tata Ibadah Jumat Agung 2023 | 9