ACARA PARTANGIANGAN TAON BARU KELUARGA

PUKUL 00.00 WIB (1 JANUARI 2023)

HKBP RESSORT BONGBONGAN DISTRIK V SUMATERA TIMUR

TEMA: “Ulahon Hamu Ma Haluaonmuna” (Pilippi 2: 12)

Pangaradeon:

1. Dipillit ma na manguluhon partangiangan on.

2. Diparade ma lilin.

3. Diparade ma inganan ni pelean.

Partangiangan: (U = Uluan, K = Keluarga, S = Sude).

1. Marende BE. No. 70: 1 - 2 “Naung salpu taon na buruk i” BL. 36

(Laos dipagalak ma lilin)

♪ Naung salpu taon na buruk i, Ho ma hupuji Tuhanki.

Ai diramoti Ho tongtong tondingku dohot dagingkon.

Ai diramoti Ho tongtong tondingku dohot dagingkon.

♪ O Jesus sai asi rohaM, paian denggan ni basaM;

Muse di taon na’mbaru on di nasa huriaM tongtong,

Muse di taon na’mbaru on di nasa huriaM tongtong.

1
2. Pujipujian tu Debata dohot tangiang pamuhai.

U : Puji ma Jahowa, ale tondingku, jala nasa rohangku di bagasan mamuji goarNa na

badia i. Puji ma Jahowa, ale tondingku, jala unang tung halupahon denggan ni

basaNa sudena. Ibana do manesa dosam sudena, Ibana pamalum angka sahitmu

sudena. Ibana paluahon ngolum sian hamagoan, Ibana martumpalhon tu ho denggan

basa dohot asi ni roha. Ibana pamahap roham marhitehite denggan basa, asa mulak

poso ho, songon pidong rajawali.

K : Jahowa do patupahon angka pambahenan hatigoran, jala dipatingkos uhum tu

sude angka na nirupa.

U : Ibana do pabotohon angka dalanNa tu si Musa, tu angka anak ni Israel angka

pambahenNa i. Parasi roha jala pardengganbasa do Jahowa, lambat tarrimas jala

parasi roha godang. Haleluya! Martangiang ma hita! Ale Debata Ama, Anak, dohot

Tondi Parbadia! Ho do na manogu hami bungkas sian taon 2022 naung salpu i jala

dipataru ho hami tu bagasan taon na imbaru, taon 2023 on. Alani i mandok mauliate

hami tu Ho sian nasa rohanami. Tagan so mangula dope hami di taon na imbaru on,

jumolo hami mamuji dohot pasangaphon Ho huhut mangido gogo sian Ho marhite

partangiangannami nuaeng, apala sopot di bona ni taon on. Antong parrohai ma

hami mandok mauliate tu Ho jala jalo ma nasa pamujionnami bahen hasangapon di

goarMu marhitehite Jesus Kristus Tuhannami.

S: Amen.

2
3. Marende BE. No. 265: 1 – 2 “Mauliate Ale Tuhan” BL. 192.

♪ Mauliate ale Tuhan ala ni hahoholongMi.

Ro Ho sian banua ginjang pangolu au na mago i.

Hudok di Ho mauliate, naung singkop hangoluanki.

Ala holong huhut marasi rohaM di au pardosa i.

♪ Tu Ho hulehon ma tondingku sai baen ma i ingananMi.

Sai suru ma TondiM tu ahu manogunogu rohangki.

Na jolo holong ni rohaM do manaiti Ho tu tano on.

Laos i mandasdas Ho nuaning pangolu au na dangol on.

4. Manjaha sian Hata ni Debata:

U : Tajaha ma marsoringsoring hata ni Debata na tarsurat di Buku Poda Sipaingot sian

raja Salomo, ima Poda 30: 24-28! Na opat ragam on do apala na metmet di tano on,

alai tung na bisuk sahali do i jala angka na bistok.

K : I ma angka porhis, sada bangso na so margogo nian, alai diparade do bohalna

di partaonan logo ni ari.

U : Angka ampodi i ma sada bangso na so tambos nian, alai dibahen do asarna di

bagasan dolok batu.

K : Ndang marraja nian angka sihapor, alai sahali borhat do luhutna

marhoronhoron.

U : Babibabi manangkup dohot patna nian, hape maringan do di bagasan jabu ni raja. I

do sahatna. Martua do angka na tumangihon hata ni Debata jala na umpeopsa.

3
 K : Amen.

5. Marende BE. No. 66:1 + 3. “Debata baen Donganmi” BL. 52

♪ Debata baen donganmi, lao mangula ulaonmu.

Baen Ibana haposanmu sai paserep rohami.

Debata baen donganmi, Debata baen donganmi.

♪ Debata baen donganmi sai na saut do ulaonmu.

Sai na tulus do sangkapmu jala sonang rohami.

Debata baen donganmi, Debata baen donganmi.

6. Renungan: (Pilippi 2: 12)

“On pe, hamu na hinaholongan, songon tongtong ni pangoloionmuna na sai laon,

unang holan jumpa di hamuna ahu, lam songon i ma di na padaodao ahu: Mardongan

biar dohot lomos ni roha ulahon hamu ma haluaonmuna”

ULAHON HAMU MA HALUAON MUNA

Selamat taon baru ma di hita saluhutna!

olo dung jumpang taon na imbaru, somal do tadok tu angka donganta marhite hata

M nang marhite na tarsurat di medsos: “Selamat taon baru!” Tontu sada pandohan

sian nasa las ni roha do i siala pandonganion ni Tuhanta tu hita di na sataon bolon

naung tabolus jala dipatolhas hita tu sada taon na imbaru. Ndang na so adong

hamaolon, sitaonon dohot arsak ni roha naung tabolus di bagasan na sataon i alai

sai dipargogoi Ibana do hita jala dilehon ragam ni las ni roha. Ala ni i, tama ma tutu

dohononta: “Selamat taon baru” ai dipalua hita sian ragam ni parmaraan di na mamolus taon
4
naung salpu jala manghirim hita muse asa tongtong diiringiring Ibana hita sian ragam ni

parngoluon sibolusonta di taon na imbaru on.

Ditotophon hurianta do taon 2023 on gabe taon “Profesionalisme Penatalayanan.”

Dipatuduhon pandohan i do paboa na ingkon lam marsitutu hita mangula ulaonta di jabu, di

porlak, di hauma, di kantor, di huria suang songon i nang di angka inganan pangulaonta be,

angka na marragam i. Domu tu si naeng ma tutu hita mangula di bagasan bulus ni roha,

hasintongan (kejujuran), patar songon indahan di balanga (transparan), haposan, akuntabel,

martanggungjawab dohot angka na asing na marhahonaan tu si. Angka i do rumang ni

habisuhon na ingkon lam patar tapatuduhon marhite taon “Profesionalisme Penatalayanan”.

Nuaeng pe, dipangkulingi Debata do hita marhite naposoNa, apostel Paulus: Ia

panjouon nuaeng tu hita ima: “…hamu na hinaholongan…” Pandohan na somal do

pandohan i di apostel Paulus, ai didok ibana do nang di Pilippi 4: 1, “Onpe, hamu angka

donganhu na hinaholongan jala na hinasiholan, halasan ni rohangku jala tumpalhu; songon

i ma marsihohot hamu di bagasan Tuhan i; hamu angka haholongan!” Laos songon i ma

nian nang hita manghangoluhonsa paboa ianakhonta, natorasta, donganta, tondongta nang

nasa ulaonta i, sudena i ima angka haholongan ni rohanta. Asa, ingkon na tangkas do hape

tahaholongi ulaonta, inganan pangulaonta, angka ulaula na tapangke dohot donganta saulaon

asa boi tulus “Profesionalisme Penatalayanan i” manang di dia pe hita mangula.

Disosohon apostel Paulus do asa tongtong pangoloionta mangulahon haluaon i.

Boasa? Alusna, ima ala nunga dipalua hita. Ndang tarbahen jolma na tarhurung mangula

ulaonna. Alai ia dung malua ibana sian hurungan i tarbahensa ma mangula haluaon naung

jinalona. Lapatanna, ndang mulak be ibana tu na mangulahon hajahaton alai ingkon mangula
5
na denggan nama. Nunga dipalua Debata hita sian huaso ni dosa, alani i tarbahen hita ma

mangula so marlaok dosa dohot hajahaton. Antong ia jolma na mangulahon haluaonna ima

jolma na mangula di bagasan hasintongan dohot hatigoran so pola ingkon diparenta. Laos

rumang na songon i do rumang ni jolma na mangula secara professional. Lapatanna, ndada

pola ingkon na diida uluanta i hita mangula asa marsitutu hita mangula alai na manongtong

do hita mangula nang pe holip hita sian parnidaan ni uluanta i.

Antong, songon dia ma hita mangulahon haluaonta i? Apostel Paulus mandok: Ingkon

mardongan biar dohot lomos ni roha do hita laho mangulahonsa. Biar dohot lomos ni roha

di son ndada na patuduhon roha na so porsea tu Tuhan i alai na martudutudu tu haserepon ni

roha do. Serep do roha ni apostel Paulus maradophon huria i umbahen didok ibana:

“Marhagaleon jala marhatahuton do ahu di tongatongamuna jala bobonosan situtu” (1

Korint 2: 3). Serep do roha ni huria Korint maradophon si Titus umbahen didok apostel

Paulus: “Jala lam tu balgana do holong ni rohana di hamu, paingotingot pangoloionmuna

saluhutna, ai dijanghon hamu do ibana mardongan biar dohot lomos ni roha” (2 Korint 7:

15). Ingkon serep do rohanta nang maradophon angka na manguluhon hita songon na nidok

ni apostel Paulus muse: “Hamu angka anak somang, oloi hamu ma angka indukmuna di

hasiangan on mardongan biar dohot lomos ni roha; marroha na bulus songon na

maradophon Kristus! Unang hamu pangoloi di mata, songon na mambuat roha ni jolma;

songon naposo ni Kristus ma ulahon hamu roha ni Debata, sian nasa rohamuna. Sian

burjumuna ma hamu mangoloi: Songon di Tuhan i, unang di jolma i!” (Epesus 6: 5-7).

Di saluhut angka ulaonta di bagasan taon 2023 on dohot tu angka tingki na naeng ro,

naeng tapangasahon gogo, huaso dohot panuturion na sian Debata marhite Tondi Parbadia.
6
Jala taula ma nasa ulaonta i ndada hinorhon ni biar mida jolma manang ala ni angka gogo ni

hasiangan on alai mangasahon biar mida Jahowa do. Biar mida Jahowa do na mambahen hita

tongtong marpanungkun tu Ibana marhite tangiang dohot elehelek asa diparbisuhi hita

songon na nidok ni raja Salomo: “Biar mida Jahowa do parmulaan ni parbinotoan” (Poda

1: 7). Molo songon i tutu, ndada holan hita sandiri be na mangula alai Debata do na mangula

marhite hita gabe boi ma tadok songon na nidok ni panurirang Jesaya i: “Alai anggo di hami,

ale Jahowa hadameon do paradeonMu, ai nasa ulaonnami pe, ho do mangulahon di hami”

(Jesaya 26: 12). Antong taula ma ulaonta di bagasan taon 2023 on di bagasan parsitutuon,

unang ganggu rohanta ai Jahowa mangaramoti dohot mangalehon gogo di hita. Amen.

7. Marende BE. No. 485:1 + 4 “Dongani au Tuhan” BL. 243. (P. Pelean).

 Dongani au Tuhan sondangi rohangki.

Pangiring ni mataM patongon langkangki.

Sandok sude gogongku, padohot pingkiranhu,

Huboan peleanku mangula ulaonMu.

Ai i hinalomohonMi, urupi rohangki.

 Sitolusada Ho, sulingkit rohangki.

Lopokhon rohaMi bagas tu rohangki.

Padiri ma tondingku baen joro ingananMu.

Patolhas ma basaMu tu au niasianMu.

Martua au dibahen Ho, Sitolusada Ho.

8. Mandok hata selamat taon baru (Mamungka sian dakdanak sahat ro di natoras).

7
9. Tangiang Pangondianon

10. Marende BE. No. 68: 2 + 5 “Masilelean angka Taon” BL. 93.

 Diudut Ho hosangki paidaida ahu.

Manang adong parbue ni na niulaM di ahu.

Hape jotjot tarhirim Ho, parbue i ndang olo ro.

 O Jesus sai urupi au di taon na ro mamboan

Parbue angka na sai tau padaohon hamagoan.

Sai pargogoi ma au tongtong pasangap Ho di ngolungkon.

11. Tangiang Panutup: Rap mandok: “Ale Amanami”

Selamat Tahun Baru

01 Januari 2023
8