1. Marende BE HKBP No. 70:1-2. “Naung salpu taon na buruk i” BL.36. (Laos dipagalak ma lilin)
Naung salpu taon naburuk i, Ho ma hupuji Tuhanhi. Ai diramoti Ho tongtong tondingku dohot
dagingkon. Ai diramoti Ho tongtong tondingku dohot dagingkon.
O Jesus sai asi rohaM, paian denggan ni basaM; muse di taon na’mbaru on di nasa huriaM
tongtong, muse di taon na’mbaru on di nasa huriaM tongtong.
1
4. Manjaha sian Hata ni Debata:
U: Tajaha ma marsoringsoring hata ni Debata na tarsurat di Buku Poda Sipaingot sian raja Salomo,
ima Poda 30:24-28!Na opat ragam on do apala na metmet di tano on, alai tung na bisuk sahali
do i jala angka na bistok.
K: I ma angka porhis, sada bangso na so margogo nian, alai diparade do bohalna di
partaonan logo ni ari.
U: Angka ampodi i ma sada bangso na so tambos nian, alai dibahen do asarna di bagasan dolok
batu.
K: Ndang marraja nian angka sihapor, alai sahali borhat do luhutna marhoronhoron.
U: Babibabi manangkup dohot patna nian, hape maringan do di bagasan jabu ni raja. I do sahatna.
Martua do angka na tumangihon hata ni Debata jala na umpeopsa.
K: Amen.
5. Marende BE HKBP No.66:1 + 3. “Debata baen donganmi” BL. 52
Debata baen donganmi, lao mangula ulaonmu.Baen Ibana haposanmu sai paserep rohami. Debata
baen donganmi, Debata baen donganmi.
Debata baen donganmi sai na saut do ulaonmu. Sai na tulus do sangkapmu jala sonang rohami.
Debata baen donganmi, Debata baen donganmi.
6. Renungan:
“Onpe, hamuna hinaholongan, songon tongtong ni pangoloionmuna nasailaon, unang holan jumpa di
hamuna ahu, lam songon i ma di na padaodao ahu: Mardongan biar dohot lomos ni roha ulahon hamu
ma haluaonmuna” (Pilippi 2:12).
2
marhite porhis, ampodi, sihapor dohot babibabi. Nang pe angka na metmet do i jala gale idaon, alai
bisuk mangamudihon ngoluna gabe taruli di sipanganon jala malua sian nasa parmaraan.
Nuaeng pe, dipanghulingi Debata do hita marhite naposoNa, apostel Paulus.Ia panjouon nuaeng
tu hita ima: “…hamu na hinaholongan…”Pandohan na somal do pandohan i di apostel Paulus, ai didok
ibana do nang di Pilippi 4:1, “Onpe, hamu angka donganhu na hinaholongan jala na hinasiholan,
halasan ni rohangku jala tumpalhu; songon i ma marsihohot hamu di bagasan Tuhan i; hamu angka
haholongan!” Laos songon i ma nian nang hita manghangoluhonsa paboa ianakhonta, natorasta,
donganta, tondongta nang nasa ulaonta i, sudena i ima angka haholongan ni rohanta. Asa, ingkon na
tangkas do hape tahaholongi ulaonta, inganan pangulaonta, angka ulaula na tapangke dohot donganta
saulaon asa boi tulus “Profesionalisme Penatalayanan” i manang di dia pe hita mangula.
Disosohon apostel Paulus do asa tongtong pangoloionta mangulahon haluaon i. Boasa? Alusna
ima ala nunga dipalua hita. Ndang tarbahen jolma na tarhurung mangula ulaonna. Alai ia dung malua
ibana sian hurungan i terbahensa ma mangula haluaon naung jinalona. Lapatanna ndang mulak be ibana
tu na mangulahon hajahaton alai ingkon mangula na denggan nama. Nunga dipalua Debata hita sian
huaso ni dosa, alani i tarbahen hita ma mangula so marlaok dosa dohot hajahaton. Antong ia jolma na
mangulahon haluaonna ima jolma na mangula di bagasan hasintongan dohot hatigoran so pola ingkon
diparenta. Laos rumang na songon i do rumang ni jolma na mangula secara professional. Lapatanna
ndada pola ingkon na diida uluanta i hita mangula asa marsitutu hita mangula alai na manongtong do
hita mangula nang pe holip hita sian parnidaan ni uluanta i. Ido umbahen didok apostel Paulus marhite
ayat on: “On pe, hamu na hinaholongan, songon tongtong ni pangoloionmuna na sai laon, unang holan
jumpa di hamuna ahu, lam songon i ma di na padaodao ahu.” Alani i do paboa hata “ulahon”dison
sasintongna ima nadituturi sian hata Gorik i ma pandohan: “katergazomai” bentuk “present continuous”
lapatanna tongtong mangula so marpansohotan jala ingkon sahat tu na sidung. Songon i do nang
Tuhanta Jesus, diulahon Ibana do parsuruon ni Ama i sahat tu na sidung jala mampanghorhon tu sude
hajolmaon marhite haluaon i songon na tarsurat di buku Heber: “Jala dung rimpas gabe sihorhon
haluaon salelenglelengna do Ibana di sude na mangoloi Ibana” (Heber 5:9).
Antong songon dia ma hita mangulahon haluaonta i? Apostel Paulus mandok, ingkon mardongan
biar dohot lomos ni roha do hita laho mangulahonsa. Biar dohot lomos ni roha dison ndada na
patuduhon roha na so porsea tu Tuhan i alai na martudutudu tu haserepon ni roha do. Serep do roha ni
apostel Paulus maradophon huria i umbahen didok ibana: “Marhagaleon jala marhatahuton do ahu di
tongatongamuna jala bobonosan situtu” (1 Korint 2:3). Serep do roha nihuria Korint maradophon si
Titus umbahen didok apostel Paulus: “Jala lam tu balgana do holong ni rohana di hamu, paingotingot
pangoloionmuna saluhutna, ai dijanghon hamu do ibana mardongan biar dohot lomos ni roha” (2
Korint 7:15). Ingkon serep do rohanta nang maradophon angka na manguluhon hita songon na nidok ni
apostel Paulus muse: “Hamu angka anak somang, oloi hamu ma angka indukmuna di hasiangan on
mardongan biar dohot lomos ni roha; marroha na bulus songon na maradophon Kristus! Unang hamu
pangoloi di mata, songon na mambuat roha ni jolma; songon naposo ni Kristus ma ulahon hamu roha
ni Debata, sian nasa rohamuna. Sian burjumuna ma hamu mangoloi: Songon di Tuhan i, unang di
jolma i!”(Epesus 6:5-7). Laos songon i ma nang hita, tontu bagian niprofesionalisme do molo di
bagasan haserepon hita mangula, di bagasan haserepon rohanta nang maradophon donganta sa bagas,
donganta saulaon dohot maradophon uluanta suang songon i nang maradophon donganta sa huria pe
tahe. Lobi sian i, di bagasan haserepon hita maradophon Debata di na mangula ulaonta i hita.
3
Di saluhut siulaonta di bagasan taon 2023 on dohot tu angka tingki na naeng ro, naeng
tapangasahon gogo, huaso dohot panuturion na sian Debata marhite Tondi Parbadia. Jala taula ma nasa
ulaonta i ndada hinorhon ni biar mida jolma manang angka na gogo ni hasiangan on alai mangasahon
biar mida Jahowa do. Biar mida Jahowa do na mambahen hita tongtong marpanungkun tu Ibana marhite
tangiang dohot elehelek asa diparbisuhi hita songon na nidok ni raja Salomo: “Biar mida Jahowa do
parmulaan ni parbinotoan” (Poda 1:7). Molo songon i tutu, ndada holan hita sandiri be na mangula alai
Debata do na mangula marhite hita gabe boi ma tadok songon na nidok ni panurirang Jesaya i: “Alai
anggo di hami, ale Jahowa hadameon do paradeonMu, ai nasa ulaonnami pe, ho do mangulahon di
hami” (Jesaya 26:12). Antong taula ma ulaonta di bagasan taon 2023 on di bagasan parsitutuon, unang
ganggu rohanta ai Jahowa paradehon hadameon di hita. Amen.
7. Marende BE HKBP No. 485:1 + 4. “Dongani au Tuhan” BL. 243. (Papungu Pelean).
Dongani au Tuhan sondangi rohangki. Pangiring ni mataM patongon langkangki.Sandok sude
gogongku, padohot pingkiranhu, huboan peleanhu mangula ulaonMu.Ai i hinalomohonMi, urupi
rohangki.
Sitolusada Ho, sulingkit rohangki. Lopokhon rohaMi bagas tu rohangki.Padiri ma tondingku baen
joro ingananMu. Patolhas ma basaMu tu au niasianMu. Martua au dibahen Ho, Sitolusada Ho.
8. Mandok hata selamat taon baru (mamungka sian dakdanak sahat ro di na toras).