PARTANGIANGAN TAON NA IMBARU

DI GANUP KELUARGA
n\bookfoldsheets0
HURIA KRISTEN BATAK PROTESTAN
SENIN 1 JANUARI 2024

01. PANGARADEON :
 Marpungu ma keluarga rap dohot ianakhon
 Diperbanyak ma acara on hombar tu pamangkena di keluarga
 Tu namanguluhon acara on, asa denggan ma diparade

02. Marende BE. HKBP 70 : 1-2 “O Jesus, Sipangolu au” BL. 36

 Naung salpu taon na buruk i, Ho ma hupuji Tuhanhi.
:,:Ai diramoti Ho tongtong, tondingku dohot dagingkon:,:
 O, Jesus sai asi rohaM paian denggan ni basaM.
:,:Muse di taon na’mbaru on, di nasa huriaM tongtong:,:

03. Tangiang Pamuhai sian na Manguluhon

04. Marende BE. HKBP 64 : 1 “Naung moru do muse sataon” BL.
192
 Naung moru do muse sataon, huhut lam suda bohalhi.
Beha do ahu na sai laon, ture do pangalahongki?
Lam ganda haporseaonhu nang holong ni rohangku pe,
di Jesus dohot Debatangku, nang di donganhu sasude?

05. Hata Ni Tuhanta sijahaon di hita ima sian Psalmen 91 : 1-11

(U: Uluan, K: Keluarga)
U: Pangondingan ni Jahowa. Manang ise na hundul di pangondingan ni
Nasuntimbul i, marborngin do ibana di linggom ni pargogo na so
hatudosan.
K: Ningku do mandok Jahowa: Haporusanhu jala partanobatoanhu,
Debatangku, marhaposan tu Ibana do ahu.
U: Ai anggo Ibana, sai paluaonNa do hita sian sambil ni parsambil,
sian pangago ni begu antuk.
 K: Sai ulosanNa do ho dohot habongNa, jala marhaporusan tu toru ni
hatirNa i do ho, tau lombulombu dohot pangondingan do
hasintonganNa i.
U: Ndang pola mabiar ho maradophon songgotsonggot borngin,
maradophon sumbia, na habang arian.
K: Maradophon begu antuk, na manisipi di na holom marimpotimpot,
maradophon begu masa, na mangago di hos ni ari.
U: Nang pe marribu marragean di lambungmi, jala marloksaloksa di
siamunmi, ndang mangonai ianggo tu ho.
K: Asal ambal matam manaili, idaonmu ma pamaloson tu angka
parjahat i.
U: Ai Ho, do ale Jahowa, haporusanhu; Ho do, Nasuntimbul i nunga
dibahen ho partanobatoanmu.
K: Ndang tagamon mangonai tu ho hinamago, jala ndang tagamon
begu masa i dumonok tu undungundungmu.
U: Ai dohononNa do angka surusuruanNa taringot tu ho, asa dijaga ho
di angka dalanmu sudena.
Ido sahatna, Martua ma na tumangihon Hata ni Debata jala
naumpeopsa, Amen.

06. Marende BE. HKBP 69 : 3 “Jesus sai urupi hami” BL. 84

 Taon parasinirohaon baen di au sandok taon on.
Lam pahot ma hasesaan ni dosangku di au on.
Holan Ho do Jesuski, tuk pasaehon dosangki.

06. Renungan Diuluhon Natoras – dipungka jala diujungi dohot tangiang

Hata ni Tuhanta na gabe renungan di Partangianganta di bona taon 2024 on,

ima na tarsurat di 1 Tesalonika 5 : 16 – 18, songon on HataNa:
Tongtong ma hamu marlas ni roha!
Unang mansadi hamu martangiang!
Mandok mauliate ma hamu siala saluhutna! Ai i do dipangido Debata
sian hamu marhitehite Kristus Jesus”.

Selamat Taon na imbaru ma di hita saluhutna!

Sopot di bona ni taon na imbaru 2024 on, tama situtu hita mamuji dohot
pasangaphon Tuhanta pardengganbasa na sumurung i ala dengganbasaNa
do na mangiringiring hita mardalan dibagasan taon naung salpu i umbahen
tolhas hita nuaeng tu taon na imbaru on. Godang situtu do hamaolon na
tabolus di taon naung salpu, ima angka parungkilon, arsak ni roha na
mambahen hita mabiar laho mandalani ariari ni ngolunta, alai tung tangkas
do diparorot Tuhanta i hita gabe boi hita mangalangka muse tu sada taon na
imbaru, na pinasahat ni Tuhan i lao sidalananta. Tahamauliatehon ma i
nuaeng marhite partangiangan na tapatupa di tingki on.
Hita na marlas roha di borngin on, naeng ingkon tangkas botoonta, tung
dihirim jala dihalomohon Tuhanta i do asa mangolu jala mangula hita
dibagasan lomo ni rohaNa, dia ma lomo ni roha ni Tuhanta i? Ima na nidok
ni Apostel Paulus : Tongtong ma marlasniroha, unang mansadi
martangiang, jala mandok mauliate siala saluhutna. Aha do na boi
mambahen hita marlasniroha, jala songon dia do tama lasnirohanta? Ndada
apala lasniroha na tarida marhite engkelengkel dohot suraksurak nanaeng
patuduhononta, alai lasniroha ala panandaon na tangkas di basabasa na
nilehon ni Tuhanta do tu ganup hita marsadasada. Basabasa ni Tuhan i do
naung manogu hita mardalan di taon naung salpu, laos basabasaNa i do
naung paluahon hita sian ragam ni hamaolon ni ngolu na tabolus. Molo
sahat hita nuaeng tu taon na imbaru on, ingkon tangkas botoonta, basabasa
ni Debata do i, jala silehonlehonNa do i tu hita, ala ni i tama hita jala
tongtong ingkon marlasniroha lao mandalani taon na imbaru na
binasabasahon ni Tuhanta tu hita mamungka sian ari sadari on dohot
salelengna. Tapadao ungutungut, biar ni roha dohot hagangguon lao
mandalani taon on, gariada ingkon lam ta papos do rohanta na sai mangula
do Tuhanta i laho patongonton angka basabasaNa dope tu hita, ala ni i,
songon si ihuthon Jesus Kristus hita, tongtong ma hita marlasniroha!
Disungguli Apostel i do muse, asa unang mansadi hita martangiang. Somal
do tadok martangiang ima manghatai tu Tuhan i. Tontu ndada pasahathon
hata na somal hita disi songon na mandok hata tu angka donganta jolma,
alai tung pasahathon nasa na adong dibagasan rohanta do tu Tuhanta i
 taringot tu angka basabasa naung nilehonNa, songon dia do hita mangolu
hombar tu basabasaNa i, jala songon dia hita paimaimahon basabasa
nanaeng lehononNa dope tu hita. Ala ni i ingkon tongtong solhot hita tu
Tuhanta i, manghatai marhite tangiangta asa tongtong hita diajari mangolu
hombar tu basabasaNa. Unang mansadi hita martangiang, ima na ingkon
ulahononta dung bongot hita nuaeng tu taon na imbaru on, ala sopot di
bona ni taon on, tahirim do lam godang basabasa ni Tuhanta jaloonta
marhite ragam ni sintasintanta di rumatangganta. Tulus angka
parsingkolaan, dapotan parkarejoan na dumenggan angka anakhon.
Marhasohotan ma angka naung patut marhasohotan. Lao paimaimahon i
saluhutna ingkon tongtong do hita sai solhot tu Tuhanta marhite tangiangta,
asa pos rohanta lehononNa do na itahirim i di taon parasinirohaon, taon na
imbaru 2024 on. Antong unang mansadi hita martangiang tu Tuhanta.
Didok dope tu hita asa mandok mauliate siala saluhutna. Tontu siala
saluhut pambahenan ni Tuhan i do. Molo jumpangan lasniroha hita di
ngolunta, taingot pambahenan ni Tuhan i do i tu hita. Molo ro hamaolon tu
hita, taingot na sai tongtong do mangula Tuhanta i laho paluahon hita sian
hamaolon i, jala disi do naeng patongononNa na dumenggan i di hita, ala ni
i do ingkon mandok mauliate hita siala saluhut namasa tu ngolunta. Naeng
dalananta ma nuaeng taon na imbaru naung pinasahat ni Tuhanta tu hita di
taon 2024 on, tontu ndang taboto manang dia nanaeng masa siadopanta, boi
do angka lasniroha na jumpang hita, alai boi do nang ragam ni hamaolon na
sonson tu dirinta ganup marsadasada. Pos ma rohanta tu Tuhanta, jala
manongtong ma haporseaonta tu Ibana, saguru di Tuhan i do saluhut angka
namasa, jala Ibana do na tongtong mangula patongonhon na dumenggan di
hita angka na porsea di Tuhanta. Alani i ingkon sai tadok mauliate tu
Tuhanta, jala sian roha parbagasan ma i tapasahat tu Tuhanta.
Antong borhat ma hita keluarga on lao mandalani taon na imbaru 2024 on
dibagasan lomo ni roha ni Tuhanta, marhite na taulahon ganup ari :
Tongtong marlas ni roha! Unang mansadi martangiang! Mandok
mauliate siala saluhutna! A m e n.

07. Marende BE. HKBP 65: 2 “Majumpang Taon imbaru on” BL. 129
 Dibahen i hupuji Ho, o Jesus Debatangku.
Ai ndang hea mangulon Ho, mambaen partuaonhu.
Rohangku panuratan ni, godang ni denggan basaMi, ai Ho do pangurupi.
09. Mandok hata Selamat Taon na imbaru:
a. Sian ianakhon na ummetmet sahat tu na magodang.
b. Sian Natoras
10. Marende BE. HKBP 68: 2 “Masilelean angka taon” BL. 93
 Di udut Ho do hosangki paidaida ahu.
Manang adong parbue ni na niulaM di ahu.
Hape jotjot tarhirim Ho, parbue i dang olo ro.

11. Tangiang : Sian utusan ni anakhon

12. Marende BE. HKBP 68 : 5 “Masilelean angka taon” BL. 93
 Jesus sai urupi au di taon na ro mamboan
parbue angka na sai tau padaohon hamagoan.
Sai pargogoi ma au tongtong pasangap Ho di ngolungkon.

13. Tangiang : Sian Natoras

14. Marende BE. HKBP 66 : 1 - 3 “Debata baen donganmi” BL. 52
(Pasahat Pelean)
 Debata baen donganmi, lao mangula ulaonmu. Baen Ibana haposanmu;
Sai paserep rohami. Debata baen donganmi, Debata baen donganmi.
 Debata baen donganmi, molo Debata donganmu, ndang tarbaen ho be
lilu, sai ture do langkami, Debata baen donganmi, Debata baen
donganmi.
 Debata baen donganmi, sai na saut do ulaonmu. Sai na tulus do
sangkapmu, jala sonang rohami. Debata baen donganmi, Debata baen
donganmi.

15. Rap mandok Tangiang Ale Amanami – Mangendehon Amen 3x

16. Masijalangan

Selamat Tahun Baru

1 Januari 2024