TATA IBADAH NATAL

SEKSI BAPA GKPS

Desember 2022

TEMA:
Hasadaon pakon Pangidangion na Marbuah.
(Kolose 1:10)

SUB TEMA:
Mangarahkon Kuria Marsitungkolan pakon Marsipatoguhan ampa
Marsipardiateian Mandompakkon Paruntolon ni Goluh.
1
I. PRAELUDIUM
- Sipangidangi mambahen persiapan, Penjemaatan ibadah pakon Martonggo
- Prosesi mamasuki gareja janah kuria mandodingkon:
Haleluya No. 41:1+3, “Domma Jumpah Use Ari Pesta In”
(Jongjong kuria)
Domma jumpah use ari pesta in, patubuhon ni Tuhanta Jesus in
Turun hape Ia roh hun surga in, roh ma nohu hujon
Hasangapon bai Naibata, damei-damei bani jolma
Megah uhurni Naibata, hajolmaon use
Sombahnami hu Bamu na dob roh on, Ham siboan damei hu dunia on
Sai pasorap Ham bai uhurnami on, damei-Mu o Jesus!
Hasangapon bai Naibata, damei-damei bani jolma
Megah uhurni Naibata, hajolmaon use

II. IBADAH
1. Votum-Introitus-Tonggo
P : Ibagas Goran ni Naibata Bapa, pakon Tuhan Jesus Kristus ampa Tonduy Na
Pansing, Sitompa langit pakon tanoh on. Amen.
Hasangapon ma bani Naibata na i babou damei ma i tanoh on bani jolma
hinarosuhkon-Ni in. Haleluya
P+K :(Mandoding Haleluya No 306, (Huhamegahkon do in Tongtong)
Marmegah-megah mandoding au, mamuji Jesus parholong in.
Marmegah-megah mandoding au, mamuji Jesus parholong in.
P : Martonggo ma hita! Ham Tuhan Naibata Bapanami, paridop ni uhur na
tarsulur, puji-pujian ampa tarimakasih ma isombahkon hanami huBamu
mardingat na dob isuruh Ham Anak-Mu Tuhan Jesus Kristus hubannami.
Gabe madoyuk, anjaha masombuh do Ia tubuh i huta Betlehem bani harang
ni pinahan ase bayak hanami. Pasaor Ham ma diri-Mu marhitei Tonduy-
Mu ase ididah hanami banggal ni pangkopkop-Mu hubannami marhitei
Tuhan Jesus Kristus Tuhannami. Amen
(Hundul kuria)

2. Mandoding lagu Pujian, “Hutonggor Hu Siambilou”

Hutonggor hu siambilou, hutatap hu siamun
Jenges ni in, ganupan natinompa
Torsa ibahen Tuhanta, ge suan-suanan pe tabun, ramos marbuah
Harangan pakon dolog, maratah do ganupan
2
 Jenges ni in nai do ge manuk-manuk
Lurlur do pandodingni, pasangapkon Tuhan Naibata, ganup panorang
Ramotkon ma, jimot ma jagain
Torsa ma baen hinajengesni, alinan ni haporsayaon
Sauhur ma ganupan hita da, riap ma hita marmuduhon
Na iondoskon ni Tuhanta
Halani ai hasoman, manat ma paruhurhon
Ganupan in ulang sompat maseda, ganup suan-suanan
Ge pinahan na i talun in, ulang marmara
Ulang lansei uhurta, dear ma napatorsa
Ganupan in ase ulang marngayot, ganupan na itompa
Bai panorang ni goluhta on, ronsi magira
3. Liturgi Pasal Panompaon
4. Mandoding Haleluya No. 314: 1-2, “Doding ni Malekat in”
Doding ni malekat in, pasangapkon Tuhan in
Na mambere hasonangan Raja na dob tubuh in
Haganupan bangsa-bangsa sai mamuji bani Tuhan
Jesus na hun surga in tubuh i Betlehem in
Dodingni malekat in pasangapkon Tuhan in
Ganup na i surga in, sai manombah Tuhan in
Tuhan Jesus jadi jolma, roh bai hajolmaon in
Lao mamboban haluahon, ganup dousa isalpuhon
Goran-Nin Immanuel, rapkon hita Tuhan in
Doding ni malekat in, pasangapkon Tuhan in
5. Liturgi Pasal Dousa ni Jolma
6. Mandoding Haleluya No. 37: 1-2, “Hatuahon do Hamegahon”
Hatuahon do hamegahon do partubuhon ni Jesus in
Roh Sipaluah bani na magou, megah-megah ma uhurta in
Roh Sipaluah bani na magou, megah-megah ma uhurta in
Hatuahon do hamegahon do partubuhon ni Jesus in
Rapat ma hita bai Naibatanta, megah-megah ma uhurta in
Rapat ma hita bai Naibatanta, megah-megah ma uhurta in
7. Liturgi Bagah-Bagah pasal Partubuh ni Sipaluah
8. Mandoding Haleluya No. 421: 1 -3, “Girah Sogod Golap Ijin”
Girah sogod golap ijin, misir do lao parmahan in
Mangidah Kristus, songon tonah ni malekat in
Ididah do ijin, ididah do ijin
3
 Ididah na dob tubuh Sipaluah in
Seng pala sangsi hita on, na marianan ia na daoh
‘Ge bangsa na i tanoh on, bogei ma hata on
Sai eta ma tongon, sai eta ma tongon
Ai domma tubuh Kristus banta borngin on
Ulang sai soh hita ganup, eta ma misir hita rup
Malekat padosdoskon in, bai dalan turun naik
Marsurak ma ganup, marsurak ma ganup
Patugah na dob tubuh Sipaluah in
9. Liturgi Pasal Partubuh ni Jesus Kristus
10. Mandoding Haleluya 39:1-3, “Sonang ni Bornginni in”(irik pagara lilin)
Sonang ni, bornginni in, sanggah roh Jesus in
Sonang modom do halak ganup dua mando na puho in rup
Mangoromi AnakNi Jesus Tuhanta in
Dear ni bornginni in sanggah roh Jesus in
Bai parmahan i Betlehem in, ipatugah na hun surga in
Domma roh Sipagoluh, Jesus Tuhanta in
Buei ni tuah ijin, sanggah roh Jesus in
Tor maluah pardousa use, humbai hamagouanNi hape
Ben na roh Sipagoluh, Jesus Tuhanta in
11. Liturgi Refleksi Natal
12. Mandoding Haleluya No. 313: 1-2, “Humbai Pulou ge Banua”
Humbai pulou ge banua sai tarbogei do torus
Doding na mamuji Tuhan Sipanobus jolma in
Gloria, puji ma Tuhanta, Gloria, puji ma Tuhanta
Haganupan na i surga pasangapkon Naibata
Rap mandoding do sidea i lobei ni Naibata
Gloria, puji ma Tuhanta, Gloria puji ma Tuhanta
13. Ambilan
14. Mandoding Haleluya No. 45: 1-2, “Malas ni Uhur na Banggal”
(Irik Patumpuhon Galangan)
Malas ni uhur na banggal na hu ambilankon on
Domma tubuh Sipaluah bai hita jolma on
Sangap bani Naibatanta, damei-damei ma bani jolma
Malas uhur ni Naibatanta bai hita jolma on
Ai saborngin on do poltak bintang bai na golap in
Na lao palihar na golap bani uhurta in
4
 Sangap bani Naibatanta, damei-damei ma bani jolma
Malas uhur ni Naibatanta bai hita jolma on
15. Tonggo Galangan - Tonggo riap - Paingkathon - Pasu-pasu
(Jongjong Kuria)
P : Ondoskon hita ma galanganta hubani Tuhan Naibata.
Martonggo ma hita:
Ham Tuhan Naibata Bapanami na marhabangsa i nagori atas. Ipuji janah
ipasangap hanami do Ham, halani sirsir do Ham patoruhkon diri marhitei
partubuh ni Anak-Mu Jesus Kristus, ibagas na doyuk, bani harang ni pinahan
i Betlehem, ase gabe bayak hanami. Ajari Ham ma hanami marhitei Tonduy-
Mu, ase lambin marbanggal hanami haganup ibagas panandaion bani holong
ni atei-Mu na dob padomuhon hanami hu Bamu, gabe jumpahan haluahon
hanami. Idop ma uhur-Mu, ipadas hanami tonggonami on ibagas Jesus
Kristus sihopkop hanami. Amen.
P : Naibata ma haporusanmu arian pakon borngin, tangi ma ham bani hata ni
Tuhanta, ai martuah do ham anggo tanginan ham bani hata ni Naibata anjaha
mangkorjahon ai.
K: Bahen Ham ma tongon hanami Tuhan gabe saksi-saksi na bujur laho
manaksihon pardameian i tongah-tongah ni dunia on.
P : Sai ibere Naibata ma bani nasiam uhur na mangkaholongi, tangan na
mangidangi, ase boi iahapkon nasiam damei na humBani. Bani ganup
tantangan ni goluh on ase arapkon nasiam ma pangurupion-Ni bani nasiam.
K : Tuhan, bere Ham ma damei-Mu in, ase boi homa hanami mangidangi Ham
marhitei pangidangionnami hubani haganup jolma janah ase gabe pasu-pasu
hanami on ganupan.
P : Hasangapon ma bani Naibata na mampargogohi hita laho mangkorjahon
hataNi in. Amen.
Riap ma hita martonggo marhitei tonggo na pinodahkon ni Tuhan Jesus bani
susian-Ni.
P+K : Ham Bapanami na i nagori atas ....... Amen.
P Laho ma nasiam, janah, “Hupabangkit do hanima, ase laho hanima marbuah,
anjaha ase totap buahnima ai, ase ibere bannima sagala sipindoonima
humbani Bapa in marhitei goran-Ku
Jalo hita (ham) ma pasu-pasu humbani Tuhan Naibata:
Idop ni uhur ni Tuhanta Jesus Kristus pakon holong ni atei ni Naibata Bapa
ampa parsaoran ni Tonduy Napansing ma mangkasomani hita (nasiam)
haganupan. Amen
5
PK (Mandodingkon) Amen… Amen…. Amen.
III. Postludium
Mandodingkon, “Selamat Hari Natal” (irik marsisalam-salaman)

LITURGI PASAL PANOMPAON

Prolog: Naibata do na manompa sagala na adong. Gok Bani do haganup na

tinompa-Ni in. Bani mungkahni dear do haganup itompa. Taratur domu hubani
aturan ni Naibata, seng dong na paseksuk ampa na pasulembang. Ia do homa
na manompa jolma gabe haondosan ni haganup jadi-jadian-Ni, ase
marhasonangan ganup tinompa-Ni anjaha marsangap Naibata marhitehonsi.

Bapa 1: Langit mambaritahon hamuliaon ni Tuhan. Awang-awang patugahkon

habanggalon ni na tinompa in. Borngin margantih pakon arian, lang adong na
ponop i lobei ni Tuhan. Poltak ma mata ni ari, jumpah ma sada ari na bayu
janah ipungkah ma goluh na baru. Ganup ari patugahkon hapentaran ni Naibata.
Jumpah ma borngin, mata ni ari margantih pakon bulan. Lopus ma sadari
margantih hubani minggu, bulan das hubani na satahun. Sonai ma layur,
patuduhkon hatotapon ni hapentaran ni Naibata!

Bapa 2: Ambah ni ai ijadihon Naibata do homa poyon-poyon, suan-suanan,

harangan pakon dolog na maratah sonai age hayu na marbuahkon na madear na
gabe sipanganon ni jolma in pakon pinahan sonai age poyon-poyon na
marbunga na jenges tumang mambahen dear tonggoron anjaha mambahen
sonang paruhuran.

Bapa 3: Ijadihon Naibata do homa manuk-manuk na marhabangan na

patangarhon sora na malurlur laho pasangaphon Naibata, sonai pakon dengke
na i laut ampa haganup binatang na manggulmit na i atas tanoh on. Marsiboan
masamni anjaha dear do haganup!

6
 Bapa 4: Bani mulani dob ididah Naibata jenges haganup na tinompa in, gabe
itompa ma use jolma usih songon rupa-Ni. Dalahi pakon naboru do sidea
itompa. Iondoskon do homa bani sidea tanggung jawab laho manrajai ampa
manramotkon ganup na tinompa-Ni in. Bani mungkahni, haposan do jolma in
laho manramotkon tinompa-Ni. Inahkon do sidea bani pohon Eden. Sonang do
sidea anjaha aha pe lang na hurang.

Bapa 5: Anggo na pardiatei haganup na tinompa in, na boi ididah, nijolom

ampa na boi iahapkon, lang tarpingkiri sonaha parjadini. Tatap ma dolog in,
kawahkon ma langit, bogei ma sora ni bah mardalan anjaha ahapkon ma
parhombus ni logou. Pardiatei ma sagala na manggulmit, pinahan, manuk-
manuk ronsi na legan. Sonai do homa tinompa na so boi niidah ni panonggor.
Tonggor ma jolma in, tapang janah marragam do bangkouni. Lambin lang
taranapi do sonaha parjadi ni in. Anggo sonai aha do siparimbagaskononta
hunjin?

Bapa 6: Halongangan do horja ni Naibata. Haporsayaon do hansa na boi

mangarusi ai. Halongangan do parjadi ni na tinompa in. Anjaha halongangan do
in banta, halani iondoskon Naibata do haganup na tinompa-Ni ai hubani jolma.

Bapa 7: Puji ma Naibata na manompa langit, tanoh, laut pakon haganup pangisi
ni marhitei kuasa ampa hapentaran-Ni. Puji ma Naibata na tongtong
marmuduhon na tinompa-Ni in, marhitei na mangondoskon pasu-pasu-Ni.
Totap ma hita gabe saksi pasal pambahenan ni Naibata bani goluhta!

Bapa 8: Marhitei haganupan na tinompa in, sai lambin itandai hanami ma Ham
Tuhan. Sihol ni uhurnami, ase lambin bagas ma pangarusionnami pasal Ham.
Sorapkon Ham ma Tonduy-Mu Napansing in hubannami ase lambin dohor
hanami huBamu. Patuduh Ham ma dalan-Mu ase ulang kahou hanami. Buha
Ham uhur sonai age pingkirannami ase tubuh haporsayonnami huBamu. Pinuji
ma Ham Tuhan humbani gok ni uhurnami. Amen

LITURGI PASAL PARDOUSAON NI JOLMA.

7
Prolog : Bani mungkahni jenges anjaha torsa do haganupan itompa Naibata.
Sonang anjaha aha pe lang na hurang. Ibere do homa kuasa laho manrajai ampa
manramotkon haganup jadi-jadian-Ni. Hape lang ihargahon jolma in kuasa na
dob iondoskon Naibata hubani, gariada jolma in sihol dos use pakon Naibata.
Suhar do balos ni jolma marimbang pambahenan ni Naibata na jenges in! Dobni
madabuh ma jolma in hubagas dousa.

Bapa 1: (Mandodingkon lagu, “Mula Pertama”)

Mula pertama Allah jadikan, bumi langit dan laut
Surya dan bintang yang memb’ri terang, sempurna dan senang
Segala mahluk penghuni dunia, tercipta oleh tangan-Nya
Dan manusia dib’ri kuasa terhadap segalanya
Reff: Tapi semuanya itu hilang
Damai dinodai oleh p’rang
Manusia yang dib’ri budi dan akal,
Berbuat dosa ciptakan p’rang
Dunia semula sempurna
Ternoda oleh dosa manusia
Dan Yesus datang menyelamatkan
Kembali bawa bahagia

Bapa 2: Porang, porang, porang….. masa do torus bani jolma in dob madabuh
hu bagas dousa. Porang samah na marsanina, sa marga, sa kuria, sa huta, sa
haporsayaaon, sa bangsa, sa profesi, sa suku pakon antar suku, sonai sa agama
pakon antar agama.

Bapa 3: Ingat hita ma sonaha si Kain, hubani anggini si Abel, halani uhur subil,
gabe pos do uhurni mamunuh anggini si Abel. Sonai do homa age panorang on,
buei do masa pambunuhan na terencana pakon na lang irencanahon pakkorhon
ni subil, domdom, latei na marasar pakon marbanggal ibagas uhur ni jolma in.
Mambunuh halani borit ni uhur, domdom, itug, pakon kecemburuan sosial.
Pambunuhan domma hal na biasa, secara langsung sonai age melalui TV,
Youtube, Facebook, Tiktok age Wa. Lang maharga be jolma in i dunia on.

Bapa 4: Ingat hita ma kisah ni si Esau pakon si Jakob, terjadi do

ketidakharmonisan halani sikap ni Jakub dompak Esau na mambuat na lang
parbagiananni, ai ma hak kesulungan ni Esau. Sonai do homa na masa bani
8
panorang on. Gati do ibangkuhon hita na lang parbagiananta, ijalo hita na lang
bagianta, ihunduli hita na lang hundulanta, mambahen gati marporang hita bani
goluh on. Masa do in, i rumah tangga, keluarga, i masyarakat sonai age i negara
on na saling merebut kekuasaan. Padahal hata ni Tuhan marhitei Tema tahunan
ni GKPS tahun 2020 – 2025 domma pasingatkon ase lambin mambangun
Hasadaon ma hita, janah horjanta pe lambin marbuah ma, buah na boi iahapkon
hasomanta.

Bapa 5: Ingat hita ma homa kisah si Josep anak ni si Jakob pakon haganup
saninani, pos do uhurni sidea merencanahon na jahat dompak anggini marhitei
na pamasukkon si Josep hu bagas sumur janah bani ujungni ijual hu pedagang
Mesir. Lang adong be holong parsaninaon. Ganupan ai halani subil, latei pakon
domdom. Hal on manular do das hubani panorang on. Lang dong be hasadaon
apalagi mangkorjahon horja na pataridahkon buah na madear.

Bapa 6: Ingat hita ma kisah ni Ananias pakon Safira, suami isteri na sepakat
mangoto-otoi Tuhan marhitei juak-juak-Ni bani sinadongan/harta na imiliki
sidea. Hape ganup na dong bani, na humbani Tuhan in do, tapi barani do ia
mangoto-otoi pasal sinadonganni, ase ulang pala marsibere bere bani horja ni
Tuhan in. Buei do homa sonin sondahan on, na lang ra mambere na dong bani,
na porlu bani Tuhan in, tapi hotop mangkatahon haganup na dong bani, aima
pasu-pasu ni Tuhan.

Ganup Bapa na Marliturgi : “Lang adong be uhur biar dompak Naibata,

biaran mando jolma in bani artani, jabatanni, pakon kuasani”.
(Mandodingkon Haleluya No. 300:1, 3, Paubah Ham Uhurmu)
Paubah ham uhurmu bapa, porsaya sirahanan!
Porsaya bani Jesus bapa,’se dapot hasonangan
Banggal do, banggal holong ni Tuhanta bapa, mambere hasonangan
Paubah hita uhurta ale, na sombah ma Tuhanta
Harga hita itobus ale, sai ulang namin soya
Abakkon, abakkon na mapansing ale, galangan bai Tuhanta

LITURGI PASAL BAGAH-BAGAH PARTUBUH NI SIPALUAH

9
 Prolog : Anggo idingati hita haganup pambahenanta na so margagan,
mangkorhon persoalan do i tongah-tongah ni keluarga, gereja ampa masyarakat;
lang tarbahen lang sapatutni uhumon mando hita. Tapi halani banggal ni idop
pakon holong ni Tuhan hubanta, ipasirsir do haluahon banta marhitei na
ipadankon sada tumbor na pintor. Ai nini do, ase dapotan haluahon Juda anjaha
marsonang-marsonang Israel marianan. Tontu patut do malas uhurta
manjalohon janah manggolom bagah-bagah in
Bapa 1: Dob ai mandarat ma sada tunas humbani tutuho ni si Isai, anjaha
marbuah sada tumbor na roh humbani uratni. Sogop ma hubani Tonduy ni
Jahowa, Tonduy hauhuron ampa pangarusion, Tonduy panuturion ampa
hagogohon, Tonduy habotohon ampa biar bani Jahowa. (Jesaya 11:1-2)
Bapa 2: Dob das ijai, laho ma ia marianan bani sada huta na margoran Nasaret,
gabe jumpah ma hata ni nabi, na manggkhatahon,”Goranon do Ia halak
Nasaret”. (Matius 2:23)
Bapa 3: Patugahonku ma na dob tinotapkon ni Jahowa: Domma ihatahon
Jahowa bangku, “Anak-Ku do ho, sadari on do ho Hutubuhkon!”(Psalmen 2:7)
Bapa 4: Ai ma pasal anak-Ni, na dob tubuh humbani ginompar ni si Daud ia
daging-Ni. (Rom 1:3).
Bapa 5: Halani ai bereon ni Tuhan sandiri ma bannima sada tanda, “Tonggor
ma, boratan rumah ma sada anak boru, anjaha tubuhkononni ma sada anak,
anjaha bahenonni ma goranni: Immanuel.” (Jes. 7:14).
Bapa 6: Marmalas ni uhur tumang ma ho, ale boru Sion, marolob-olob ma ho,
ale boru Jerusalem! Tonggor ma, na roh do Rajamin marayak ho: Parpintor
anjaha Siparmonang do Ia. Toruh do uhur-Ni anjaha mangajak halode, anak ni
halode boru-boru. (Zak. 9:9).
Bapa 7: Tonggor ma, na roh ma panorang ni, nini Jahowa, “Pajongjongon-Ku
ma bani si Daud sada Tumbor na pintor; manggomgomi do Ia songon Raja
marhasoman hapentaran, anjaha dalankonon-Ni do hasingtongan ampa
hapintoron i nagori in. (Jer. 23 :5)

LITURGI PASAL PARTUBUH NI JESUS

10
 Prolog: Buei do sibere-bere-Mu bani jolma manisia. Tapi adong do sibere-bere-
Mu na tang sibagalan hubannami. Ibere Ham do Anak-Mu, haholongan-Mu
bannami haganupan jolma. Jesus na dob tubuh ai, ai ma Sipaluah, parpintor
anjaha Raja Damei. Manrogop do sidea marsombah hu Bani, anjaha igalangkon
sidea do, arta na maharga bani Jesus.
Bapa 1: Ibere Ham do Anak-Mu Jesus Kristus manobus hanami, ase dapotan
hagoluhan hanami, janah manggoluh ibagas na hagoluhan na sasintongni
songon goluh ni Kristus i dunia on.
Bapa 2: Tuhan, diatei tupa ma bani sibere-bere-Mu in. In ma sibere-bere na
pagoluhkon hanami, na mambahen lambin iarusi hanami pasal hagoluhan na
sintong.
Bapa 3: Tuhan Naibatanami, nuan domma ipatandahon Ham diri-Mu, lambin
tangkas marhitei Jesus Kristus Tuhannami. Ia do na dob manobus hanami, na
mambere goluh na bayu, ase adong na gabe sijolomannami ganup ari. Tuhan
tarimakasih ma Bamu.
Bapa 4: Ham Kristus, TUHAN. Ham do na roh hu dunia on, Ham do na dob
manopot hanami. Roh Ham hu dunia on hubani hadoyukonnami. Roh do ham
mambere tangan-Mu laho manogu hanami, laho padameihon hanami pakon
Naibata, padameihon hanami samah hanami.

LITURGI REFLEKSI NATAL

Prolog: Ham Kristus TUHAN, domma isondangkon Ham sondang-Mu in hu

bannami jolma on. Tatap Ham ma hamarsikhonnami ase ulang magou haganup
halak na porsaya huBamu
Bapa 1: Tuhan, sai ipindahi hanami do Panondang in. Tapi hotop do hagolapan
in monang ibagas hadirionnami. Sasap Ham ma dousanami.

Bapa 2: Tuhan, dihut do hanami tarsonggot bani barita ni malekat in. Tapi ra
do sipata pingkiran age panlangkahnami dompak na jahat in do. Tolong Ham
hanami Tuhan.

11
Bapa 3: Iakui hanami do damei ni Natal bani panorang on, tapi gati do hanami
lang mangindahi dalan hadameion na humBamu. Sai pabayu Ham ma
goluhnami Tuhan ase marhasonangan hanami kuria-Mu.

Bapa 4: Age bani hasomannami na marpusok ni uhur bani panorang Natal on,
lungun janah tariluh do sidea Tuhan, sai apohi Ham ma sidea.

Bapa 5: Tuhan maidop ma Ham bani hasomannami na ibagas sitaronon nuan,

halani parmaraan amapa musibah, holong ma Ham Tuhan... mangarap do sidea
marmalas ni uhur bai panorang Natal on, tapi madotei do pangahap ni sidea.
Urupi janah pargogohi Ham ma sidea Tuhan.

12