TATA IBADAH

MINGGU BAPA GKPS 2023

TEMA:
“HASADAON PAKON PANGIDANGION NA MARBUAH.”
(Kolosse 1:10)

SUB TEMA:
“Marmalas ni Uhur ma Hita Pataridahkon Buah ni Haluahonta anjaha Gabe Pasu-
pasu i Tongah-tongah ni Gareja, Masyarakat, ampa Negara Tanda ni na dob
Matoras Haporsayaonta.”
(1 Tessalonika 5:16-18; Jesaya 9:2; Psalmen 118:24)

Minggu XXII Dob Trinitatis, 5 November 2023

PRAELUDIUM
P. : Hita haganup kuriani Tuhanta, sada do nuan hita bani Minggu Pesta Bapa
sadarion. Ibobahon do hita laho mangidah hajongjonganni bapa i tongah-
tongahni horja pangidangion i kurianta sonai age bani keluarganta bei.
Tunggung do hajongjonganni bapa, ai hitei ni Naibata do ganup bapa –
laho patangkashon holongni Tuhan na banggal in. Bapa do sijujung
hatotorsani keluarga janah ia do homa na gabe malim bani keluargani bei.
Domu hujin, riap pakon ganup bapa i kuria on, roh ma hita mandompakhon
Tuhan ta. Parholong na tarsulur do Tuhan in janah lang ongga marpunsa
holongni ateini. Riap ma hita jongjong!
P+K. : Mandodingkon: Hal. No. 471:1-2+5 (Barisan Prosesi masuk hu gareja).
1. Na Pansing, Na Pansing, do Ham Naibatanami.
Sigomgom haganup tanoh on, Na Pansing do Ham.
2. Na Pansing, Na Pansing, do Ham Naibatanami.
Ai domma roh hanami Bamu, jalo Ham ganup.
5. Na Pansing, Na Pansing, do Ham Naibatanami.
Dompakkon Ham homa bohi-Mu, sorap damei-Mu.
------------------ marhata giring-giring ------------------------
1. VOTUM – INTROITUS – TONGGO
P. : Ibagas goranni Naibata Bapa pakon Tuhan Jesus Kristus ampa
Tonduy Napansing
P+K. : Sitompa langit pakon tanoh on. Amen
P. : Sai pujionku do Jahowa sadokah ahu manggoluh, sai dodingkononku
do Naibata sadokah dong ahu.
K. : Ulang ma marhatengeran nasiam bani halak na sangap-sangap,
bani anak ni jolma, na seng dong pangurupion bani. Rotaphonsi
hosahni mulak ma ia hu tanoh, jadi bani ari ai magou ma ganup
sura-surani.
P. : Martuah ma halak, na mambahen Naibata ni si Jakob gabe
pangurupini, na marpangarapan bani Jahowa Naibatani, ai ma
Sitompa langit pakon tanoh sonai laut ronsi ganup isini; na
manramotkon hasintongan ronsi sadokah ni dokahni.

1
 K. : Na mamintori halak na niodoh-odoh, na mambere sipanganon bani
halak na loheian. Jahowa do na paluahkon halak na tartutup.
P. : Jahowa do na mangungkab mata ni na mapitung, Jahowa do na
pajongjong halak na pinatunduk, Jahowa do na mangkaholongi halak
parpintor.
K. : Jahowa do na manramotkon halak panginsolat; isarihon do halak
na tading maetek pakon na mabalu, tapi ipapelet do dalan ni halak
parjahat.
P. : Jahowa do manrajai ronsi sadokah ni dokahni. Marsundut-sundut do
Naibatamu, ale Sion. Haleluya! Haleluya! Haleluya!
P+K. : (mandodingkon) Haleluya – Haleluya – Haleluya
P. : Martonggo ma hita: Ham ale Jahowa na marianan bani hotak
hamuliaon i nagori atas, na talup sisombahon ni ganup na tinompa
in, pujion nami do goran-Mu na pansing in, marhitei holong ampa
panramotion na tongtong bani goluh nami. Goki Ham ma uhur nami
laho mamuji ampa martarima kasih bani ganup pasu-pasu ampa
holong-Mu na sai tong ondos bannami. Ase buhul uhur nami
mangkamalaskon Minggu Bapa GKPS na ipamasa sadarion.
Marhitei Jesus Kristus, ipaondos hanami tonggo nami.
P+K. : Amen (hundul kuria)

2. MANDODING HAL. NO. 395:1-2

1. Pasangap ma Tuhanta marhasoman arbab pakon doding
Sombahkon ma pujian marhiteihon inggou maraloling
Dear ma riap mandoding haganupan malas uhur rap mangolobkon
Porini adong pusok ni paruhuron roh do Tuhan lao patorsahon

2. Dodingkon doding baru, marhasoman sora na malurlur

Pamaling ma soramu songon parmaling ni taur-taur
Dear ma riap mandoding haganupan malas uhur rap mangolobkon
Porini adong pusok ni paruhuron roh do Tuhan lao patorsahon

3. GANTIHNI TITAH
P. : Tangar hita ma gantihni Titah na sapuluh in, aima na tarsurat bani
Johannes 15:10, “Anggo ihorjahon hanima titah-Ku, marianan ma
hanima ibagas holong ni uhur-Hu songon Ahu na manghorjahon titah
ni Bapa, gabe marianan ibagas holongni uhur-Ni.” Riap ma hita
mangindo:

2
 P+K. : Ham Tuhan Naibata, pargogohi Ham ma ahu mangkorjahon hata-Mu
ai. Amen.

4. MANDODING HAL. NO. 404:1-2

1. Ganup ari do in, ronsi tahun hu taun
Sihol do hudodingkon Goran mu.
Ham Tuhan Naibata, sai hupuji do Ham,
halani haganup layak-Mu.
Ham arta na harga, poltik hujolom in,
humbani na hinan Ham do tong Naibatangkin.
Bonani na dear, ronsi sadokahnin,
Panondang na lihar, bai ganup na golap in.

2. HataMu do Tuhan, hupindahi nuan,

bahen suluh bai pardalanankin.
Pitah Ham hansa in, na mambotoh ijin,
Aha na huporluhon Tuhan.
Ham arta na harga, poltik hujolom in,
humbani na hinan Ham do tong Naibatangkin.
Bonani na dear, ronsi sadokahnin,
Panondang na lihar, bai ganup na golap in.

5. HASASAPANNI DOUSA (jongjong kuria)

P. : Ham o Tuhan Naibata parholong na tarsulur. Roh do nuan hanami hu
lobei-lobei-Mu mambobankon hadirion nami na lang romban bani sura-
sura-Mu. Gok dousa ampa hahurangan do hanami i lobei-lobei-Mu
marhitei parsahap, pangabak ampa paruhuronnami. Ham ale Tuhan,
pitah holong-Mu do na boi papansingkon hanami.
Singers : (mandodingkon) “Ham Naibatangku”

3
P. : Ham ale Tuhan, na roh do nuan hanami mangarap holong ampa idopni
uhur-Mu. Magou do hanami anggo ganggang humBamu janah kahou do
langkah nami anggo lang bani panogu-noguon-Mu. Ham ale Tuhan,
tatap Ham ma hanami na mangarap on.
Bapa : Pajojorhon hasintongan-Mu marhitei parsahap ampa pangabak, na
talup sihorjahononni bapa i tongah-tongahni keluarga; lape ope
idalankon hanami humbani gok ni uhur nami. Pangajarion ampa
panogu-noguon, hurang ope taridah bani hajongjongan nami selaku
sipambobai. Ham ale Tuhan, marpanatap ma Ham bannami na galek
on.
K. : Bere Ham ma bannami uhur sipambalosi, ase tongtong tangi bani
parentah-Mu ampa bani podah na madear in. Ajari Ham ma hanami
ase pangkei maruhur janah saluju mangihutkon langkah-Mu.
P+K. : (mandodingkon) “Ham Naibatangku”
P. : Mangaku do hanami bani hahurangan nami, tarlobih ma ai bani na
mandalankon horja pangidangion. Hurang ope hanami mambere uhur
ampa panorang.
Bapa : Hotop do hanami maruhur hengkeng, iboan hanami pikkiran nami
sandiri, hampung janah lansei hanami bani tanggung jawab na talup
siabaraon nami.
K. : Urah do hanami gobir bani pargoluhon na idompakhon hanami.
Iunsagahkon hanami gogoh ampa pambotoh nami. Pori mangindo pe
hanami marhitei tonggo, gati maningon harosuh nami namin na saud.
Ham ale Tuhan, bere Ham ma bannami uhur na bayu, uhur sipambalosi
bani Hata-Mu.
P+K. : (mandodingkon) “Ham Naibatangku”
P. : Roh ma hita hubani Tuhan janah taluhon hita ma dirinta. Jolom hita ma
poltik ganup podah na madear. Ulang be mubah-ubah hadirionta.

4
 K. : Ham ale Tuhan, holong ma uhur-Mu mangidah hanami jolma na galek
on. Ganup dousa ampa hahurangan nami ibobankon hanami hu-Bamu.
Idop ma uhur-Mu mangidah hanami!
P+K. : (mandodingkon) “Ham Naibatangku”
P. : Tangar hita ma hatani Naibata bagah-bagah pasal hasasapanni dousa.
“Songon sintongni manggoluh Ahu nini Tuhan Jahowa: Sabonar seng
marosuh uhur-Hu mangidah hamateian ni parjahat, tapi ase mulak do
parjahat in manadingkon dalanni, ase manggoluh ia.” Ibagas holongni
Naibata, domma isasap haganup dousanta. Halani ai, pataridahkon hita
ma tanda-tanda ni pargoluhan na bayu. Hasangapon ma bani Naibata i
babou!
P+K. : Amen (hundul kuria)
6. MANDODING HAL. NO. 388:1-3
1. Ham o Naibatangku na manompa au, ai na loja dagingkon,
ibaen goluhkon, sai bulinsah au
Seng dong i tanoh on, haporusanku.
Pitah Ham do haposankin, togu Ham au na loja on.
Pitah Ham do haposankin, togu Ham au na loja on.

2. Ham o Tuhan Jesus, na manobus au, ai na pusok uhurhon,

ibaen dousangkon, sai holsohan au.
Seng dong i tanoh on, haporusanku.
Pitah Ham do haposankin, togu Ham au na loja on.
Pitah Ham do haposankin, togu Ham au na loja on.

3. Ham Tonduy Napansing, sai ajari au sai pagolpa Ham au on

Bani goluh on ulang magou au
Seng dong i tanoh on, haporusanku.
Pitah Ham do haposankin, togu Ham au na loja on.
Pitah Ham do haposankin, togu Ham au na loja on.

7. MANAKSIHON HAPORSAYAON
P. : Riap ma hita jongjong! Saksihon hita ma haporsayaonta in, songon na
sinaksihonni ganup halak na porsaya bai sab tanoh on.
P+K. : Ahu porsaya … psb. (hundul kuria)

8. ACARA KHUSUS

5
 a. Mambasa/manaksihon Tonah Pimpinan Sinode GKPS
b. Koor Bapa
c. Refleksi Minggu Bapa/Puisi: Bapa Na Bujur
d. Tingting Kuria
e. Tonggo Pangapition

9. MANDODING HAL. NO. 264:1-2

1. Sada do na porlu bangku, Jesus bere Ham ma au
Atap aha do na dong bangku, seng na boi pasonang ahu
‘Ge arta ge sangap, ganup habayakon,
seng boi in mamboban au bai hasonangan
Ai anggo ma dapot na sasada in,
sai malas uhurhu hinorhon ni in.

2. Sihol bam ale tonduyhu, arta na sasada in?

Seng tarbaen in pindahanmu, anggo lang i babou in;
Ijin i siamun ni Tuhan Jahowa
do hundul Anak-Ni, na dob gabe jolma
Ai Ia do rupei na gok jenges-Nin
sai in ma pindahi da, o tonduyhin!

10.AMBILAN: Podah 3:9-10

11.PATUMPU GALANGAN
P. : Sonari sihol padasonta ma galangan tanda tarimakasihta hubani Tuhan
tanda ni parsimada do hita bani harajaon-Ni in. Halani ai, paima
ipatumpu hita galanganta, tangar hita ma lobei hatani Naibata na gabe
onjolan banta laho manggalang, aima na tarsurat bani Heber 13:16,
“mambahen na madear amp ana marsibere-bere, ulang ma
halupahon nasiam ai, ai galangan na sonai do iharosuhkon Naibata.”
Sonari patumpu hita ma galanganta.
Singers : (mandodingkon): Galangan Odak-odak

6
12. TONGGO GALANGAN, PANUTUP (jongjong kuria)
P. : Ham ale Tuhan, kuasa-Mu do na patorsahon goluh nami janah holong-
Mu do na manggomgomi hanami arian pakon borngin. Pagijangon
nami do Ham ale Tuhan janah baritahonon nami goran-Mu sadokah
manggoluh hanami i tanoh on. Domma mardalan Minggu Bapa i
tongah-tongahni kuria-Mu GKPS – paratahkon hu tongah-tongah nami
hajongjonganni bapa bani keluarga ampa bani kuria. Pasu-pasu Ham
ma ganup bapa i tongah-tongahni kuria-Mu GKPS, ase gabe
parhiteianni pasu-pasu ampa ganup dearni layak-Mu. Pasu-pasu Ham
ma homa galangan na dob ipatumpu hanami, gabe galangan na misbou
janah susi. Patangkas Ham ma hubannami ase lambin iparayak hanami
goluh na marsibere-bere janah gabe pasu-pasu hubani ganup na
tinompa in; ase marhiteihonni in lambin tarbarita harajaon-Mu i tanoh
on.
P+K. : (mandodingkon) Hal. No. 12:3

7
 Tonduy, daging, uhur ampa gogohnin
Ulang bai na sambor, sai Bamu ma in
Ningon gok Bamu ma au hinopkop-Mu
Ase saud martuah au jabolon-Mu
P. : Ilangkahkon hanami ma goluh nami mandompakhon bagei ni
pargoluhan. Ham ma na gabe gogoh bannami mandalani ganupan in.
Pambobaion-Mu ma na gabe pangarapan nami sadokah goluh nami.
P. : Ham Bapa nami na i nagori atas, sai na papansing ma goran-Mu! Sai
roh ma harajaon-Mu. Sai saud ma harosuhni uhur-Mu i nagori tongah
on songon na i nagori atas! Bere Ham ma bannami sadari on
hagoluhan ari-ari. Sasap Ham ma dousa nami songon panasap nami
bani dousa ni hasoman na mardousa dompak hanami! Ulang hanami
bobai Ham hu parlajouan! Paluah Ham ma hanami humbani
pangagou!
P+K. : (mandodingkon) Ai Ham do simada harajaon pakon hagogohon
ampa hasangapon sadokahni-dokahni. Amen.
P. : Laho ma nasiam janah “Pindahi nasiam ma na madear, ulang ma na
jahat, ase manggoluh nasiam; ase tongon ma Jahowa, Naibata
Zebaot hasoman nasiam, songon na hinatahon nasiam” (Amos 5:14).
Jalo ham/hita ma pasu-pasu humbani Tuhan Naibata:
“Ipasu-pasu anjaha iparorot Naibata ma ham/hita, isondangkon Tuhan
Naibata ma bohi-Ni hubamu/hubanta janah maidop ma uhur-Ni
mangidah ham/hita. Idompakhon Tuhan Naibata ma bohi-Nu
hubamu/hubanta janah ipasorap ma damei-Ni bani tonduymu/tonduyta
bei. Amen.
P+K. : (mandodingkon) Amen, amen, amen! (hundul kuria)

POSTLUDIUM
Singers (mandodingkon): Hal. No. 409 “Naibata mangkasomani ham”
1. Naibata mangkasomani ham, ronsi boi hita pajumpah
Kristus ma mambere tuah, Naibata mangkasomani ham
Sai horas ma ham, sai horas, ronsi na pajumpah sai horas
Sai horas ma ham, sai horas, Naibata mangkasomani ham

2. Naibata mangkasomani ham, kuasa-Nin parlinggomanmu.

Hata-Nin hagoluhanmu, Naibata mangkasomani ham.
Sai horas ma ham, sai horas, ronsi na pajumpah sai horas

8
Sai horas ma ham, sai horas, Naibata mangkasomani ham.

Puisi:

BAPA NA BUJUR

Bani sada bod dob sahei ganup nolih

Huidah ham tarpunjung hundul sobih
Panonggormu songon na sai torih-torih
Das hu ujungni langit na ampar borsih

O bapa, lang ongga surut holongmu marniombah

Ihopkop ham, ituhuk ham, gendo boi marsikolah
Lang ongga loja, lang ongga ham marhoih
Na sagang na hurang pe ibahen ham do lobih

O bapa ulang ma ham sai maruhur holsoh

Songon hayu na surdung i huta Bornoh
Uhur na haru boi do in pamagou soloh
Uhur na marpangarapan do na boi patubuh gogoh

Ham do tanganni Tuhan bannami ganup niombah

Patorsa-torsa langkah nami marhitei bagei podah
Manogu-nogu hanami tikki roh uhur lang piah
Padameihon hanami tikki ahap sai tong mangisah

9
Holongmu lang tarsibar age pe sai lang ningon taridah
Tabun jenges songon suan-suanan na ramos marbuah
Tunggung do ham usih bai langit na majagiah
Paruhur bujur, lurlur songon inggou na mariah

O bapa, ham do pangarapan nami ganup niombah

Uhur ampa tonggo nami layur do, lang pitah salopah
Sai ipasu-pasu Tuhan ma sura-suramu ganup langkah
Sehat jorgit ma ham bapa, bai Tuhan ma tong marsombah

Humbani hanami niombah

Na sai tong paima podah

10