TATA IBADAH

PESTA OLOB-OLOB GKPS

116 Tahun Ambilan Na Madear
Das i Simalungun
(Tingkat Resort)

SEPTEMBER 2019

TEMA:
Ibohali Manghobaskon Horja na Madear.
(2 Timoteus 3:17)

SUB TEMA:
Pasirsir, Bohali ma Kuria in Totap Marguru bani Podah ampa Ajaran ni
Kristus Jesus, ase Jonam, Toguh Marurat, Marbuah ibagas Pangarusion
ampa Habotohon pasal Kristus Sipaluah in.
(Kol. 2:7; Lah. 17:23; 1 Korint. 7: 17-20)
I. PRAELIDIUM
- Iringan Prosesi:
Partugas – Pdt/ Pengurus Res/ Anggota Sinode Bolon– Peng. Jemaat –
Panitia pakon na legan

Mandoding Hal. No. 414:1-2, 5 (Jong-jong Kuria)

Eta nasiam! Eta nasiam!
Misir hita hu gereja laho marminggu.
Sihol manangar ambilan hata ni Tuhan. Eta nasiam!

Roh ma nasiam!Roh Ma nasiam!

Halilian mambaen kahou ulang tangihon.
Dearan ma na marminggu sai na porluhon, roh ma nasiam!

Jolom poltik! Jolom poltik!

Dilo-dilo ni Tuhanta ulang lanseihon.
Ulang ganggang hun tanganta be haluahon, jolom poltik!

------------------------------------ Saat Teduh -------------------------------------

II. KEBAKTIAN
1. VOTUM-INTROITUS-TONGGO
P : Ibagas Goran ni Naibata Bapa pakon Tuhan Jesus Kristus ampa
Tonduy Na Pansing, Sitompa langit pakon tanoh on. Amen .
Jenges ni in rumah ianan-Mu, Ham Jahowa Zebaot. Masihol anjaha
ayak do tonduyhu bani alaman ni Jahowa. Marolob-olob do uhurhu
pakon dagingku manjumpahkon Naibata na manggoluh in.
K : Dingis pe jumpahan jabu do, sonai layang-layang dapotan asar do,
bahen ianan ni anakni i lambung ni anjap-anjapMu. Ham Jahowa
Zebaot, Rajangku anjaha Naibatangku
P : Martuah ma halak na marianan i rumah-Mu, sai Ham do pujion ni
sidea
2
 K : Martuah ma halak, na marhagogohon ibagas Ham, na marugas laho
hu rumah-Mu.
P+K : Ham Jahowa Zebaot, martuah do jolma na marhatengeran Bamu.
P : Haleluya, Haleluya, Haleluya
K : (Mandodingkon: “Haleluya”)
P : Martonggo ma hita!
Ham Tuhan Naibata Bapanami marhitei Jesus Kristus Tuhannami.
Tarima kasih ma hatahononami hu Bamu, halani maruhur Bapa do
Ham tongtong bannami. Ipuji hanami do Ham, halani ipaluah Ham
do hanami humbani hamagouan halani dousanami. Domma 116
tahun dokah ni das barita malas ni uhur i tongah-tongah ni bangsa
Simalungun. Sonari domma ihaporsayai anjaha iauhon hanami
haluahon na binere-Mu bannami. Halani ai do ase marolob-olob
hanami sonari i lobei-lobei-Mu. Paingat Ham ma homa hanami
Tuhan, ase lambin isaksihon hanami habanggalon-Mu hubani dunia
on marhitei ganupan pasu-pasu na dob iondoskon Ham hubannami,
ibagas uhur na martarimakasih, marolob-olob, mamuji pakon
pasangapkon Ham. Amen.

2. MANDODING Hal. No. 305:1-2

Martumpu ganupan manombah Tuhan.
Sai pujima Ia parlayak do in.
Maronti ma ganupan paruntolon. I gantih gabe damei na sonang

Hormati Goran-Ni janah pingkirhon,

Ganup halongangan na binaen-Ni in.
Diatei tupa ma hatahononta, marbuah mahaporsayonta.

3. HASASAPAN NI DOUSA
P : Riap ma hita jong-jong!
Martonggo ma hita, sopotkon hita ma dousanta hubani Tuhan
Naibata.

3
 Ham Tuhan Naibata, Bapanami na i nagori atas, Bapa paridop ni
uhur mangidah hanami. Na roh do hanami jolma pardousa on hu
lobei-Mu, mansopotkon dousanami na buei in.
K : Ham Tuhan Naibata, hotop do hiranan hasoman na mangarapkon
pambahenan na madear humbannami. Goluhnami gati lang
romban hubani hasintongan, hapintoron ampa hapansingon.
Halani ai do ase roh hanami hu lobei-Mu, mansopotkon
dousanami na buei in. Ham Naibata, idop ma uhur-Mu bangku
pardousa on.

-------------------(Mandodingkon hal. No 353: “Sai tanda dousamu

sopotkon homa holong do atei-Ni i sasap do in”) -----------------------

P : Ham Tuhan Naibata, domma 116 tahun Ambilan na Madear in

ipabotohkon Ham hubani kuria-Mu GKPS, aima na hinalojahon ni
ganup suruhan-Mu, tarlobih ma ai sidea para Missionaris na hun
dipar.
K : Tapi gati lang ihargahon hanami hata-Mu in. Igoran do hanami
halak Kristen, siirikkon Ham, tapi gati hanami tangian bani sorani
dunia on.
P+K : Ham Bapa, holong ma uhur-Mu, marpangulaki ma uhur-Mu
mangidah hanami pardousa on.

-------------------(Mandodingkon hal. No 353: “Sai tanda dousamu

sopotkon homa holong do atei-Ni i sasap do in”) ------------------
P : Gati lepak parsahapnami sonai age abaknami. Lang hata-Mu ipakei
hanami gabe rigapan ibagas na mandalani ari-ari ni goluhnami.
K : Halani ai ma ase hotop hanami kahou anjaha magou, gabe sipata
golapan do hanami bani arian bagas janah sipata horahan do
hanami itoruh ni sampuran.
P : Ham Bapa, holong ma uhur-Mu, marpangulaki ma uhur-Mu
mangidah hanami na doyuk on.
4
 P+K : Mandodingkon Hal. No 353:4
Tarsor ho mardousa ibaen uhurmin
Sai ulang nunuti, tundalhon ma in
Dompakhon Tuhanmu, margogoh do in
Manasap dousamu, pamalumhon in.
P : Nasiam hasoman na hinarga ni Tuhan. Buei do horja na lepak halani
pardousaonta hubani Naibata ronsi bani hasoman jolma. Tapi nini
hata in: “halak na mananda dousani ampa na manolsoli, janah na
mansopothon ai hubani Naibata, ia do na dapotan hasasapan ni
dousa”. Anggo sonai, tangar hita ma hata ni Naibata bagah-bagah
pasal hasasapan ni dousa, na tarsurat bani Hesekiel 33: 11 “Songon
sintong ni manggoluh Ahu, nini Tuhan Jahowa, sabonar seng
marosuh uhur-Hu mangidah hamateian ni parjahat, tapi ase mulak do
parjahat ai manadingkon dalanni, ase manggoluh ia”.
Hasangapon ma bani Naibata i babou.
P+K : Amen. (hundul ma kuria)
4. MANDODING Hal. No. 102:1-2
Ham tongtong ihutkononku Jesus sipagoluh au
Seng anjai tadingkononku Ham na paluahkon au.
Humbai haganup dousangku pakon humbai uhum in
Na tongtong habiaranku ibaen pardousaonkin

Ai ija ma jumpah ahu sada Tuhan songon Ham

Na manogu-nogu ahu bai na sonang songon Ham
Na manaron hamateian , lao mangkopkop tonduyhin
Ase masuk au manean, ugas sisurungan in.

5. TONGGO TARIMA KASIH/BORAS TENGER (Galangan Khusus)

P : Tarimakasih ma Bamu Tuhan halani isura Ham do hanami gabe
parsimada bani hagoluhan in. Iranggi Ham do goluh ni kuria-Mu
5
 gabe panean bani harajaon-Mu, sedo halani dear ni gabeinami atap
halani hagogohonnami. Ai itandai Ham do biaknami marsada-sada.
K : Idopni uhur-Mu Tuhan gijangan do ai humbani langit, na so
tardou-dou pingkiran ni jolma.
P : Nuan roh do hanami mamboan boras tenger huBamu, tandani
parsimada do hanami bani hamuliaon ni goran-Mu in. Isurdukhon
hanami in hu Bamu maronjolan bani uhur na gok tarima kasih. Ham
ale Tuhan, bayak do Ham, janah pasu-pasu-Mu pe hubannami buei
tumang janah lang ongga maronti.
K : Boras tengernami on Tuhan, in ma tandani na dihut do hanami
parsimada bani horja i rumah-Mu in.
P+K : Marolob-olob janah marmalas ni uhur ma hita mangondoskon boras
tengerta lanjar riap ma hita mangkatahon, “Haleluya! Puji ma
Tuhan”.
P : Sonari patumpu hita ma galangan boras tengerta.
P+K : (Mandodingkon : Boras Tenger)

6
6. MANDODING “ARBAB”
Sihol do dodingkononku puji-pujian bai Naibatangku
Ooo…sihol do huhamegahkon pasu-pasu-Ni pagoluh au
Du…du…du…du
Du…du…du..du

Reff. : Haleluya sai pujionku Tuhan in

Pasangaponku Goran-Ni in
Ronsi ganup parugas gonrang,ogung pe
Sol pakeionku pasangapkon Goran-Nin

O… Pujionku ma Jahowa marhitei sordam, irandu sulim

O… Pakeionku pakon arbab patambah sangap bai Tuhan in
Du…du….du…du
Du…du…du…du

Reff. : Haleluya sai pujionku Tuhan in

Pasangaponku goran-Ni in
Ronsi ganupparugas gonrang,ogung pe
Sol pakeionku pasangapkon goran Goran-Nin

O… pakeionku ma sarunei
Rap pakon sordam pakon Tulila
O… ronsi bai ganup ianan
Dodingkonku Tuhanta in.

7. HATA HAPORSAYAON
P : Riap ma hita jongjong! Saksihon hita ma haporsayaonta in songon
na sinaksihon ni ganup halak na porsaya bani sab tanoh on!
P+K : Ahu porsaya…….dst. Amen (Hundul Kuria)

7
8. ACARA KHUSUS
a. Mambasa Tonah ni Pimpinan Pusat GKPS
b. Kanon Olob-olob

c. Ting-ting Kuria/Resort
d. Tonggo Syafaat

9. MANDODING Hal. No. 499:1-2, 4

Panorang olob-olob, sai roh ma hita ganupan
Riap mangolobkon, Ambilan na ondos banta
Domma lihar nuan ganup i kehen in, ‘ge i huluan
In ma kuasa ni Hata ni Tuhan in, mandilo hita
Hata ni Naibatanta, do mambaen mangasup hita
Bani sagala horja,na dearbani Tuhanta
Domma lihar nuan…..dst.
Pongkut ma manangihon,hata ni siparambilan
Usihan ni suruhan, mambobai ganup hulanan
Domma lihar nuan….dst.
8
10. AMBILAN
(Dob salpu marambilan, totap ma parambilan bani langgatan das hubani
na manutup ibadah)

11. PATUMPUHON GALANGAN

Parambilan : (Roh ma na marugas patumpuhon galangan hu lobei.
Paima ipatumpu galangan, parlobei ihataon parambilan ma)
Paima iondoskon hita galanganta, tangar hita ma lobei hata ni
Naibata na gabe onjolan banta laho manggalang, aima na tarsurat
bani: Heber 13:16: “Mambahen na madear ampa marsibere-bere,
ulang ma halupahon nasiam ai, ai galangan na sonai do
iharosuhkon Naibata”.
Sonari ondoskon hita ma galanganta!

(Iondoskon paragenda ma ianan ni galangan hubani siparugas, janah

sanggah manggalang P+K mandodingkon Hal. No. 488:1-3)
Pesta bolon marpariama, ganup hasoman parjuma in.
In ma da na ringgas marhorja, manuan omei i juma niin.
Sai marmegah, mangolobkon, Goran ni Tuhanta in.
Parsimada bai hagoluhan, idop ni uhur tumang do in.

Pesta bolon marpariama, na mangirikhon Tuhanta in.

In ma da na ringgas marhorja, mangambilankon Hata-Ni in.
Sai marmegah, mangolobkon, Goran ni Tuhanta in.
Parsimada bai hagoluhan, idop ni uhur tumang do in.

Pesta bolon marpariama, ganup na bujur maruhur in.

In ma da na ringgas marhorja, manuan holong bai jolma in.
Sai marmegah, mangolobkon, Goran ni Tuhanta in.
Parsimada bai hagoluhan, idop ni uhur tumang do in.

9
12. TONGGO & DODING GALANGAN - TONGGO PANUTUP -
PAINGKATKON-PASU-PASU
P : Riap ma hita jongjong!
Martonggo ma hita mangondoskon galanganta hubani Naibata!
Ham Tuhan Naibata, simada hanami pakon haganup goluhnami.
Tarima kasih ma hatahononnami hu Bamu, halani iparmudu-mudu,
iparorot janah ipasu-pasu Ham do goluhnami.
K : Ibere Ham do homa parhiouon, hajorgiton, sipanganon pakon
siinumon ronsi na porlu bani goluhnami.
P : Tanda ni tarima kasihnami, iondoskon hanami do hu Bamu goluh
pakon pasu-pasu na dob binere-Mu, na ipatumpu hanami on gabe
galangannami. Papansing anjaha pasu-pasu Ham ma on gabe
galangan na misbou i lobei-Mu bahen hasangapon-Mu janah
mambahen lambin marhataridahan harajaon-Mu i dunia on.
K : Sai tambahi Ham pasu-pasuMu janah sai lambin paganda Ham ma
holong ni atei-Mu hu bannami.
P : Ajari Ham ma hanami, ase lambin igalangkon hanami dirinami
pakon hinadongannami hubani harajaon-Mu bahen hamuliaon-Mu,
ibagas goran ni Anak-Mu Jesus Kristus, Sipaluah hanami. Amen
K : (Mandodingkon Hal. No. 281:5)
Bamu o Tuhan, manombah au on
Bamu ganupan na dong bangku on
Seng bulih be sirang na rapat Bamu
Martuah sai sonang,na roh hu Bamu
P : Ham Bapanami na i nagori atas. Sai na papansing ma Goran-Mu. Sai
roh ma harajaonMu. Sai saud ma harosuh ni uhur-Mu i nagori
tongah on songon na i nagori atas. Bere Ham ma bannami sadari on
hagoluhan ari-ari. Sasap Ham dousanami songon panasapnami bani
dousa ni hasoman na mardousa dompak hanami. Ulang hanami
bobai Ham hu parlajouan. Paluah Ham ma hanami humbani
pangagou.

10
 K : (Mandodingkon)
Ai Ham do simada harajaon pakon hagogohon
ampa hasangapon sadokah ni dokah ni. Amen
P : Laho ma hanima hu sab dunia on, ambilankon hanima ma Ambilan
Na Madear in bani sagala na tinompa.
(Padaskon pasu-pasu) Jalo Ham ma pasu-pasu humbani Tuhan
Naibatanta:
Ipasu-pasu anjaha iparorot Tuhan Naibata ma ham.
Isondangkon Tuhan Naibata ma bohi-Ni hu bamu
Janah maidop ma uhur-Ni mangidah ham.
Idompakkon Tuhan Naibata ma bohi-Ni hu bamu
Janah ipasorap ma damei-Ni bani tonduymu. Amen.
K : (Mandodingkon : “Amen”)
Amen…Amen…Amen

III. ACARA PESTA OLOB-OLOB RESORT

1. Kata Sambutan Ketua Panitia
2. Kata Sambutan Pengurus Resort
3. Doorprize
4. Lomba Tor-tor Sekolah Minggu
5. Makan Bersama
6. Doorprize
7. Pengumuman Lomba
8. Penutup

11
12
 SELAMAT PESTA OLOB-OLOB
BANTA HAGANUPAN
HORAS

13