P : Naibata do na manompa sagala na adong. Gok Bani do haganup na tinompa-Ni in. Bani mungkahni dear do haganup itompa. Taratur domu hubani aturan ni Naibata, seng dong na paseksuk ampa na pasulembang. Ia do homa na manompa jolma gabe haondosan ni haganup jadi-jadian-Ni, ase marhasonangan ganup tinompa-Ni anjaha marsangap Naibata marhitehonsi. 1. Langit mambaritahon hamuliaon ni Tuhan. Awang- awang patugahkon habanggalon ni na tinompa in. Borngin margantih pakon arian, lang adong na ponop i lobei ni Tuhan. Poltak ma mata ni ari, jumpah ma sada ari na bayu janah ipungkah ma goluh na baru. Ganup ari patugahkon hapentaran ni Naibata. Jumpah ma borngin, mata ni ari margantih pakon bulan. Lopus ma sadari margantih hubani minggu, bulan das hubani na satahun. Sonai ma layur, patuduhkon hatotapon ni hapentaran ni Naibata! (Bapa St. Em. Serman Sinaga) 2. Ambah ni ai ijadihon Naibata do homa poyon-poyon, suan-suanan, harangan pakon dolog na maratah sonai age hayu na marbuahkon na madear na gabe sipanganon ni jolma in pakon pinahan sonai age poyon-poyon na marbunga na jenges tumang mambahen dear tonggoron anjaha mambahen sonang paruhuran. (Bapa St. Em. Bernard Sitanggang) 3. Ijadihon Naibata do homa manuk-manuk na marhabangan na patangarhon sora na malurlur laho pasangaphon Naibata, sonai pakon dengke na i laut ampa haganup binatang na manggulmit na i atas tanoh on. Marsiboan masamni anjaha dear do haganup! (Inang St. Em. Imansastra Damanik) 4. Bani mulani dob ididah Naibata jenges haganup na tinompa in, gabe itompa ma use jolma usih songon rupa-Ni. Dalahi pakon naboru do sidea itompa. Iondoskon do homa bani sidea tanggung jawab laho manrajai ampa manramotkon ganup na tinompa-Ni in. Bani mungkahni, haposan do jolma in laho manramotkon tinompa-Ni. Inahkon do sidea bani pohon Eden. Sonang do sidea anjaha aha pe lang na hurang. (Inang St. Em. Roosmi Purba) 5. Anggo na pardiatei haganup na tinompa in, na boi ididah, nijolom ampa na boi iahapkon, lang tarpingkiri sonaha parjadini. Tatap ma dolog in, kawahkon ma langit, bogei ma sora ni bah mardalan anjaha ahapkon ma parhombus ni logou. Pardiatei ma sagala na manggulmit, pinahan, manuk-manuk ronsi na legan. Sonai do homa tinompa na so boi niidah ni panonggor. Tonggor ma jolma in, tapang janah marragam do bangkouni. Lambin lang taranapi do sonaha parjadi ni in. Anggo sonai aha do siparimbagaskononta hunjin? (Bapa St. Lukman Damanik) 6. Halongangan do horja ni Naibata. Haporsayaon do hansa na boi mangarusi ai. Halongangan do parjadi ni na tinompa in. Anjaha halongangan do in banta, halani iondoskon Naibata do haganup na tinompa-Ni ai hubani jolma. (Inang Kemina Purba) 7. Puji ma Naibata na manompa langit, tanoh, laut pakon haganup pangisi ni marhitei kuasa ampa hapentaran-Ni. Puji ma Naibata na tongtong marmuduhon na tinompa-Ni in, marhitei na mangondoskon pasu-pasu-Ni. Totap ma hita gabe saksi pasal pambahenan ni Naibata bani goluhta! (Inang Rumiyati Sitopu) 8. Marhitei haganupan na tinompa in, sai lambin itandai hanami ma Ham Tuhan. Sihol ni uhurnami, ase lambin bagas ma pangarusionnami pasal Ham. Sorapkon Ham ma Tonduy-Mu Napansing in hubannami ase lambin dohor hanami huBamu. Patuduh Ham ma dalan-Mu ase ulang kahou hanami. Buha Ham uhur sonai age pingkirannami ase tubuh haporsayonnami huBamu. Pinuji ma Ham Tuhan humbani gok ni uhurnami. Amen. (Inang St. Em. Roswita Purba) 2. Liturgi II pasal Habanggalon ni Jahowa 1 Jahowa do Raja, hitir ma sagala bangsa; marhotak do Ia bani Herubim, dugur ma tanoh on. Banggal do Jahowa i Sion, anjaha timbul do Ia i atas ni sagala bangsa. Ipuji sidea ma goran-Mu na timbul anjaha matunggung in! Pansing do Ia! (Bapa Jakasmen Damanik) 2 Ham Raja siparkuasa, sihaholongi uhum, Ham do patotapkon uhum; Ham do na patalarhon hapintoron pakon uhum bani Jakob. Pagijang nasiam ma Jahowa Naibatanta in, manrogop ma nasiam bani sidogeian ni nahei-Ni! Pansing do Ia. (Bapa Kesman Purba) 3 Si Musa pakon si Aron, na i tongah-tongah ni malim- Ni, ampa si Samuel na i tongah-tongah ni na mandilo goran-Ni, dilo-dilo do sidea bani Jahowa, jadi ibalosi do sidea. Humbagas hombun na jongjong do Ia marsahap bani sidea; idalankon sidea do hasaksian- Ni, pakon titah na binerehon-Ni bani sidea. (Inang Murnian Damanik) 4 Ham Jahowa Naibatanami, ibalosi Ham do sidea, Naibata parontou ni uhur do Ham bani sidea, age pe Siparlulu Ham bani salah ni sidea. Pagijang nasiam ma Jahowa Naibatanta, manrogop ma nasiam bani dolog- Ni na pansing in! Tongon, pansing do Jahowa Naibatanta. (Inang Masniari Purba) 3. Liturgi III Pasal Pardousaon ni Jolma P : Bani mungkahni jenges anjaha torsa do haganupan itompa Naibata. Sonang anjaha aha pe lang na hurang. Ibere do homa kuasa laho manrajai ampa manramotkon haganup jadi-jadian-Ni. Hape lang ihargahon jolma in kuasa na dob iondoskon Naibata hubani, gariada jolma in sihol dos use pakon Naibata. Suhar do balos ni jolma marimbang pambahenan ni Naibata na jenges in! Dobni madabuh ma jolma in hubagas dousa.
1. Mandodingkon Lagu “Mula Pertama” (Inang
St. Em. Frida Munthe) Mula pertama Allah menjadikan, bumi langit dan laut Surya dan bintang yang memb’ri terang, sempurna dan senang Segala mahluk penghuni dunia, tercipta oleh tangan-Nya Dan manusia dib’ri kuasa terhadap segalanya. Reff : Tapi semuanya itu hilang Damai dinodai oleh p’rang Manusia yang dib’ri budi dan akal, Berbuat dosa ciptakan p’rang Dunia semula sempurna Ternoda oleh dosa manusia Dan Yesus datang menyelamatkan Kembali bawa bahagia 2. Porang, porang, porang….. masa do torus bani jolma in dob madabuh hu bagas dousa. Porang samah na marsanina, sa marga, sa kuria, sa huta, sa haporsayaaon, sa bangsa, sa profesi, sa suku pakon antar suku, sonai sa agama pakon antar agama. (Bapa St. Em. Tunggul Damanik)
3. Ingat hita ma sonaha si Kain, hubani anggini si Abel,
halani uhur subil, gabe pos do uhurni mamunuh anggini si Abel. Sonai do homa age panorang on, buei do masa pambunuhan na terencana pakon na lang irencanahon pakkorhon ni subil, domdom, latei na marasar pakon marbanggal ibagas uhur ni jolma in. Mambunuh halani borit ni uhur, domdom, itug, pakon kecemburuan sosial. Pambunuhan domma hal na biasa, secara langsung sonai age melalui TV, Youtube, Facebook, Tiktok age WA. Lang maharga be jolma in i dunia on. (Inang Normina Sinaga) 4. Ingat hita ma kisah ni si Esau pakon si Jakob, terjadi do ketidakharmonisan halani sikap ni Jakub dompak Esau na mambuat na lang parbagiananni, ai ma hak kesulungan ni Esau. Sonai do homa na masa bani panorang on. Gati do ibangkuhon hita na lang parbagiananta, ijalo hita na lang bagianta, ihunduli hita na lang hundulanta, mambahen gati marporang hita bani goluh on. Masa do in, i rumah tangga, keluarga, i masyarakat sonai age i negara on na saling merebut kekuasaan. Padahal hata ni Tuhan marhitei Tema tahunan ni GKPS tahun 2020 – 2025 domma pasingatkon ase lambin mambangun Hasadaon ma hita, janah horjanta pe lambin marbuah ma, buah na boi iahapkon hasomanta. (Bapa Fernando Damanik)
5. Ingat hita ma homa kisah si Josep anak ni si Jakob
pakon haganup saninani, pos do uhurni sidea merencanahon na jahat dompak anggini marhitei na pamasukkon si Josep hu bagas sumur janah bani ujungni ijual hu pedagang Mesir. Lang adong be holong parsaninaon. Ganupan ai halani subil, latei pakon domdom. Hal on manular do das hubani panorang on. Lang dong be hasadaon apalagi mangkorjahon horja na pataridahkon buah na madear. (Inang St. Em. Rustiana Purba) 6. Ingat hita ma kisah ni Ananias pakon Safira, suami isteri na sepakat mangoto-otoi Tuhan marhitei juak- juak-Ni bani sinadongan/harta na imiliki sidea. Hape ganup na dong bani, na humbani Tuhan in do, tapi barani do ia mangoto-otoi pasal sinadonganni, ase ulang pala marsibere bere bani horja ni Tuhan in. Buei do homa sonin sondahan on, na lang ra mambere na dong bani, na porlu bani Tuhan in, tapi hotop mangkatahon haganup na dong bani, aima pasu-pasu ni Tuhan. (Bapa Jalaut Damanik)
Ganup na Marliturgi : “Lang adong be uhur biar
dompak Naibata, biaran mando jolma in bani artani, jabatanni, pakon kuasani.” (Sahalak Inang Mandodingkon Haleluya No. 300:1+3, Paubah Ham Uhurmu) Paubah ham uhurmu bapa, porsaya sirahanan! (Ayat 1: Inang Normina Sinaga) Porsaya bani Jesus bapa,’se dapot hasonangan Banggal do, banggal holong ni Tuhanta bapa, mambere hasonangan Paubah hita uhurta ale, na sombah ma Tuhanta (Ayat 2: Ganup na Marliturgi) Harga hita itobus ale, sai ulang namin soya Abakkon, abakkon na mapansing ale, galangan bai Tuhanta 4. Liturgi IV Pasal Partubuh ni Jesus 1 Jadi roh ma ijia parentah humbani Kesar Augustus, ase isuratkon sagala jolma na ibagas gomgomanni. Panuratan na parlobei ma ai, sanggah si Kerenius manggomgomi tanoh Siria. Jadi misir ma haganup, ase isuratkon, ganup hu huta hasusuranni bei. (Bapa Albert Tamar Purba)
2 Misir ma homa si Josep hun Galilea, hun huta
Nasaret, laho hu Judea, hu huta ni si Daud, na margoran Betlehem, halani hun marga ampa humbani ginompar ni raja Daud ia. Laho ma ia pasuratkon dirini rap pakon si Maria, tunanganni ai, na dob boratan rumah ai. Anjaha sanggah na ijai sidea, jumpah ma panorangni tubuhan tuah ia. (Inang Ermiati Sembiring)
3 Jadi itubuhkon ma anak bunga tubuhni, ibaluti ma
bani ampan, anjaha ipatibal bani panggagatan, halani seng dong ianan bani sidea i rumah parbornginan. Jadi adong ma parmahan marborngin i sampalan na bani ianan ai, manjagai pinahan ni sidea. Jadi roh ma sada malekat marayak sidea, anjaha marsinalsal ma sangap ni Tuhan inggot sidea, gabe mabiar tumang ma sidea. (Inang Puspa Dewi Sinaga) 4 Tapi nini malekat ai ma hubani sidea, “Ulang mabiar hanima! Tonggor ma, ai ambilan malas ni uhur banggal do huboan bannima, parulihan ni ganup bangsa. Ai domma tubuh bannima saborngin on, i huta ni si Daud, Sipaluah in, in ma Kristus Tuhan in! (Bapa Warmanson Damanik)
5 On ma partinandaan bannima: Jumpahonnima do
sada na etek-etek, ibaluti bani ampan, tibal bani panggagatan.” Jadi sompong adong ma hasoman ni malekat ai, buei bala parnagori atas, ipuji sidea ma Naibata, nini ma, “Hasangapon ma bani Naibata na i babou, damei ma i tanoh on bani jolma hinarosuhkon-Ni in.” (Inang Withri Saragih)
6 Dob laho malekat ai humbani sidea dompak nagori
atas, nini parmahan ai ma samah sidea, “Laho ma hita hu Betlehem mangidah na masa ai, na pinabotohkon ni Tuhan in banta.” Jadi podas ma sidea laho hujai, anjaha jumpah sidea ma tongon si Maria ampa si Josep ampa Dakdanak ai ibagas panggagatan. Ase dob ididah sidea Ia, ipatugah sidea ma sahap na dob ihatahon bani sidea pasal Dakdanak ai. (Bapa Sahat Saragih) 7 Anjaha haganup na manangar ai, longang bei do pasal na hinatahon ni parmahan ai bani sidea. Ia si Maria iparimbagaskon do haganup hata ai, anjaha ipingkir- pingkiri ibagas uhurni. Mulak ma parmahan ondi, ipasangap anjaha ipuji sidea do Naibata halani haganup na tinangar ampa na nididah ni sidea, songon na dob hinatahon hinan bani sidea. (Inang Angel Sinaga) 5. Liturgi V Pasal Refleksi Natal P : Ham Kristus TUHAN, domma isondangkon Ham sondang-Mu in hu bannami jolma on. Tatap Ham ma hamarsikhonnami ase ulang magou haganup halak na porsaya huBamu. 1. Tuhan, sai ipindahi hanami do Panondang in. Tapi hotop do hagolapan in monang ibagas hadirionnami. Sasap Ham ma dousanami. (Inang St. Komwelth Ida Erika Munthe)
2. Tuhan, dihut do hanami tarsonggot bani barita ni
malekat in. Tapi ra do sipata pingkiran age panlangkahnami dompak na jahat in do. Tolong Ham hanami Tuhan. (Bapa Jamesdin Sinaga)
3. Iakui hanami do damei ni Natal bani panorang on,
tapi gati do hanami lang mangindahi dalan hadameion na humBamu. Sai pabayu Ham ma goluhnami Tuhan ase marhasonangan hanami kuria-Mu. (Inang Maria Saragih)
4. Age bani hasomannami na marpusok ni uhur bani
panorang Natal on, lungun janah tariluh do sidea Tuhan, sai apohi Ham ma sidea. (Bapa Bonando Siagian) 5. Tuhan maidop ma Ham bani hasomannami na ibagas sitaronon nuan, halani parmaraan amapa musibah, holong ma Ham Tuhan... mangarap do sidea marmalas ni uhur bai panorang Natal on, tapi madotei do pangahap ni sidea. Urupi janah pargogohi Ham ma sidea Tuhan. (Inang Hasanah Tambunan)
P : Domma ijalo hita haluahon na humbani Naibata, sai
ra ma hita manaksihon in. Marhitei bani Natal Bapa pakon Inang sadari on, merayahon pesta pardingatan partubuh ni Tuhan Jesus Kristus, lambin margogoh ma tongon hita janah lambin marbanggal ma haporsayaonta dompak Tuhan Naibata.