TATA IBADAH GKPS SALEMBA

MINGGU, 12 Februari 2023

BAHASA SIMALUNGUN, MODEL C

1. MANDODING : Haleluya No. 417 : 1 - 3

1. Marhata giring-giring bapa, mandilo roh marminggu.
Sai ulang hita tading bapa, bai ontangan ni Jesus
Ai in do arta sijengesan, na gok malas ni uhur
Naima tongon eta mada tapang hita marminggu
2. Dear ma ham marhobas Inang ase borhat sonari
Riap pakon niombah inang on mada panorangni
Odor lao hu Gareja inang tapang hita sonari
Naima tongon eta mada tapang hita marminggu
3. Sai ulang homa lupa tong-tong arahkon ma hasoman
Ai do tandani hita tongon na dob gabe susian
Ra mandalankon holong sintong songon tonahni Tuhan
Naima tongon eta mada tapang hita marminggu

2. VOTUM – INTROITUS – TONGGO

P : Ibagas goran ni Naibata Bapa, pakon Tuhan Jesus Kristus ampa Tonduy Na
Pansing, Sitompa langit pakon tanoh on.
K : Amen.
P : Puji ma Jahowa ale Tonduyhu.
K : Anjaha humbani gok ni uhurhu mamuji goran-Ni na Pansing in!
P : Puji ma Jahowa ale tonduyhu.
K : Anjaha ulang ma halupahon ganup dear ni layak-Ni.
P : Ia do na manasap sagala dousamu.
K : Anjaha na pamalumkon sagala naboritmu.
P : Na paluahkon goluhmu humbani hamagouan.
K : Na mansortalihon bam dear layak ampa idop ni uhur.
P : Na pabosurhon sura - suramu marhitei na madear.
K : Ase mulak bayu haposoonmu songon manuk - manuk nanggordaha.
P : Jahowa na mambahen hapintoron.
K : Anjaha na pasintongkon uhum bani halak na hona dorun.
P : Haleluya, Haleluya, Haleluya
P+K : (Mandodingkon) Haleluya, Haleluya, Haleluya.
P : Martonggo ma hita !
Ham Tuhan Naibata Bapanami marhitei Jesus Kristus Tuhannami. Tarimakasih
ma hatahononnami hu Bamu, halani maruhur Bapa do Ham tongtong bannami.
Ipuji hanami do Ham, halani ipaluah Ham do hanami humbani hamagouan, aima
1
 halani dousanami. Sonari domma ihaporsayai anjaha iauhon hanami haluahon na
binere-Mu bannami. Halani ai do ase marolob – olob hanami sonari i lobei – lobei-
Mu. Na mangelek do hanami, ase pargogohi Ham ma hanami mangkorjahon hata-
Mu, janah patalup Ham ma pamujionnami hu Bamu. Urupi Ham ma hanami
mamakei hapentaran na hun Bamu, ase galouhnami on totap bahen hasangapon
pakon hamuliaon-Mu. Jalo Ham ma tonggo pakon pamujionnami on gabe
hasangapon Bamu. Amen.
(hundul kuria)
3. MANDODING : Haleluya No. 238 : 1, 3, 5, 6
1. Sai hulobei Mu Tuhanku, hu useihon uhurhon
Sai pasiat Ham tonggongku, pakon ganup iluhkon
3. Sai gati do hutadingkon dalan Mu na pintor in
Kristen au hape hujolom dalan hamagouan in
5. Sai bujur ma hupadankon uhurhon nuan Bamu
Sai hu surga tujuanku! Jesus togu Ham ma au.
6. Mangirikkon Ham, Tuhanku sai malas ma uhurhin
Sai totap ma in padanku! Amen, saud ma Hata in!

4. HASASAPAN NI DOUSA
P : Riap ma hita jongjong!  Martonggo ma hita sopotkon hita ma dousanta hubani
Tuhan Naibata !.
Ham Tuhan Naibata Bapanami, na pansing janah pargogoh na so tarimbang.
Ibagas unduk ampa toruh ni uhur, roh do hanami mansopotkon dousanami na
banggal in. Gati do hanami lang martenger ni uhur hu Bamu ; maruhur sangsi
janah taruyun bani na masa i tanoh on. Hotop do soya pangkopkopon-Mu in
ibahen hanami. Lang humbani gok ni uhurnami mangkaholongi Ham.
Hapansingon pakon hasintongan-Mu pe gati do ipabutak hanami ibagas
dirinami, aima halani hagalekon pakon hurang ni haporsayaonnami hu Bamu.
Bani haganupan dousanami in, marpangulaki ma uhur-Mu bannami. lbagas Jesus
Kristus sihopkop hanami.
……….. (Saat Teduh) ………..
Riap ma hita mangindo!
K : Ham Naibata, idop ma uhur-Mu bangku pardousa on.
P: Ham Tuhan Naibata, Paridop ni uhur ampa Parholong atei hubani haganup
jolma. Ihasiholi uhur-Mu do ase manggoluh hanami ibagas holong, damei ampa
halayakon-Mu. Tapi gati do hanami lang mangasup mandalankon in dompak
hasomannami. Hasadaon i tongah-tongahnami pe lape songon na hinarosuhkon-
Mu. Buei do halak na hiranan bani buah-buah ni haporsayaonnami.
Hajongjongannami selaku garam pakon panondang, in pe gati do lang

2
 ihagoluhkon hanami. Bani haganupan hahurangan pakon dousanami in,
marpanganju ma Ham bannami.
……….. (Saat Teduh) ………..
Riap ma hita mangindo!
K : Ham Naibata, idop ma uhur-Mu bangku pardousa on.
P: Ham Tuhan Naibata Bapanami, simada kuasa ampa na gok hasintongan. Domma
ipilih janah ipapansing Ham hanami marhitei Anak-Mu Jesus Kristus. Tapi gati
do lang ihajongjongkon hanami pandiloon ampa parsuruh-Mu in. Pingkiran
ampa horjanami ari - ari pe, gati do lang songon na hinarosuhkon ni uhur-Mu.
Age pasu – pasu na binere-Mu in pe, gati do ibahen hanami gabe dalan laho
manundalhon Ham. Ronsi tanggung-jawabnami laho manramotkon na tinompa-
Mu marhitei na melestarihon lingkungan hidup, ai pe gati do lolei hanami. Bani
haganupan panlaosionnami in, idop ma uhur-Mu, sasap Ham ma dousanami in.
Amen
……….. (Saat Teduh) ………..
Riap ma hita mangindo!
K:  Ham Naibata, idop ma uhur-Mu bangku pardousa on.
P: Tangar anjaha haporsayai hita ma Hata ni Naibata, bagah-bagah pasal hasasapan
ni dousa.
“Ia na mangkaholongi hita, anjaha na paluahkon hita humbani dousanta marhitei
daroh-Ni, na manjadihon hita gabe harajaon hamalimon bani Naibata Bapa-Ni”
Ibagas holong ni Naibata, domma isasap haganup dousanta. Halani ai,
pataridahkon hita ma tanda – tanda ni pargoluhon na bayu. Hasangapon ma bani
Naibata i babou.
K :  Amen.

5. MANDODING : Haleluya No. 501 : 1, 3, 4

1. Sada ma ganup na tardilo rup, manjalo Tuhan in.
Mandoding rumbuk, marmegah pe rup, mamuji Goran-Niin
Mandoding rumbuk, marmegah pe rup, mamuji Goran-Niin
3. Sauhur ganup, na porsaya in, ibagas Tuhan in.
Lurlur do ijin, pandodingni in, mamuji Goran-Niin.
Lurlur do ijin, pandodingni in, mamuji Goran-Niin.
4. Totap ma Tuhan, baen Ham hanai on, sada ampakon Ham.
Sai Ham ma tongtong, Parmahan tongon, manjaga hanai on.
Sai Ham ma tongtong, Parmahan tongon, manjaga hanai on.

6. MAMBASA SIBASAON
3
 P : Tangar hita ma Hata ni Naibata na tarsurat bani : 1 Korintus 3 : 1 – 9
Uhur na Marpartei i Kuria Korint
1Ahu pe, nasiam sanina, seng tarbahen ahu hinan marsahap bani nasiam songon
bani partonduy, tapi songon dompak pardaging do, anjaha poso-poso ibagas
Kristus.
2Dadih do hupainumkon bani nasiam, sedo sipanganon hinan, ai seng tarjalo
nasiam ope in; gari sonari, seng tarjalo nasiam ope,
3ai tong ope nasiam pardaging. Ai anggo masa bani nasiam parsimburuon ampa
parsalisihan, ai lang pardaging do nasiam, anjaha marparlahou domu hubani
biak hajolmaon?
4Ai anggo adong na mangkatahon, “Susian ni si Paulus do ahu,” anjaha na legan
use mangkatahon, “Susian ni si Apollos do ahu,” ai lang paruhur hajolmaon do
nasiam ai?
Juakjuak ni Naibata do Hansa Siparambilan na Madear
5Ai ise do si Apollos? Ise si Paulus? Juakjuak do sidea, parhiteian nasiam gabe
porsaya, anjaha ganup domu hubani pambere ni Tuhan bani.
6Ahu do manuan, si Apollos mangarbahi, tapi Naibata do patubuhkon.
7Sedo sipanuan atap sipangarbahi na penting, tapi Naibata, na patubuhkon ai
do.
8Dos do sipanuan ampa sipangarbahi, anjaha ganup manjalo upahni domu
hubani horjani bei.
9Ai hasoman parhorja ni Naibata do hanami; juma ni Naibata anjaha rumah ni
Naibata do ia nasiam.
Amen, martuah do na manangar Hata ni Naibata anjaha na marimbagashonsi!
K : Amen.

8. MANDODING : HALELUYA NO. 339 : 1, 2, 4

1. Jesus haposanku, Ham ma hasomanku
Ulang au tarpunjung, seng dong hasomanku
Jesus haposanku, hasomani ahu
Ham ma hasomanku, bai pardalananku
2. Ham tumang Rajangku, Ham do balosanku
Jalo Ham ma ahu gabe jabolon-Mu
Sai sonang ma ahu ai tangkas ma bangku
Ham tumang Rajangku janah balosanku
4. Ham paridop uhur bai ganup pardousa
daroh-Mu madurus, baen tobus ni dousa
In do na margogoh mamintori jolma
Ham paridop uhur bai ganup pardousa

9. MANAKSIHON HAPORSAYAON
4
 P : Riap ma hita jongjong !
Saksihon hita ma haporsayaonta in, songon na sinaksihon ni haganup halak
na porsaya bani sab tanoh on!
P&K : Ahu porsaya bani Naibata Bapa, Pargogoh na so tarimbang, na manompa
langit pakon tanoh on.
Ahu porsaya bani Jesus Kristus, Anak ni Naibata na sasada in, in do Tuhanta,
na tinubuhkon ni si Maria sanggah nape haliaban, marhitei Tonduy Na
Pansing. Na manaron na parngit, bani panorang ni si Pontius Latus,
iparsilangkon, matei anjaha itanom, turun hu nagori toruh. Mulak manggoluh
humbani na matei bani ari patoluhon. Naik hu surga anjaha hundul i siamun
ni Naibata Bapa, Pargogoh na so tarimbang in. Hunjai ma Ia mulak magira
laho manguhumi halak na manggoluh pakon na dob matei.
Ahu porsaya bani Tonduy Na Pansing, bani Kuria parsadaan na mapansing in,
parsaoran ni sagala na mapansing in, bani hasasapan ni dousa, bani
parpuhoon ni angkula, pakon bani hagoluhan na sadokah ni dokahni. Amen.
10. MANDODING : Haleluya No. 114 : 1 + 3
1. Gopas parugasnima ganupan balani,
Tuhanta Jesus Kristus hu parmusuhan in.
Ai seng tarbaen lang monang manlawan malah ho;
Ai munsuh ni Tuhanta maningon talu do.
3. Seng dong tarpangajamhon pargogoh diri da.
Ai seng dong in margagan anggo bai Naibata.
Ai sihol bereon-Ni do bam sinjata-Nin.
Ai seng tarbaen lang talu munsuhmu baenon-Nin.
11. LAPORAN PANITIA PESTA GEREJAWI TAHUN 2022
12. TING – TING
13. Mandoding : Haleluya No. 299 : 1 - 3
1. Domma i hopkop Tuhanku tonduyhu
ase maluah tonduyhu tongtong
Domma isasap Tuhanku dousangku
ase manggoluh tonduyhu tongtong
Malas uhurhu megah uhurhu
lao pasangapkon Tuhan bai goluhkon.
Nai ma hapeni holongni atei-Ni
hita pe patut marholong tongtong
2. Domma ipilih Tuhanta ge hita,
lao manaksihon holongni tongtong.
Domma isuruh Tuhanta ge hita,

5
 lao mangkatahon Hata-Ni tongtong.
Laho ma hita misir ma hita,
mangambilankon Tuhan parholong in.
Ase maluah homa hasomanta,
gabe manggoluh bai Tuhanta in.
3. Jolom Hata-Ni, sai jalo Tonduy-Ni,
ulang be ganggang humbai Tuhan in.
Ulang be holang martonggo hu Bani!
Ai do gogohta bai horja-Ni in.
Ulang mabiar, ulang be gobir,
lao mantaluhon gogoh ni setan in!
Tenger uhurta hubani Tuhanta;
ihasomani do hita tongtong.
14. Tonggo Pangapition pakon Tonggo Ham Bapanami
P : Riap ma hita jongjong! Martonggo ma hita ………Amen.
Riap ma hita martonggo marhitei tonggo na niajarhon ni Tuhan Jesus hubanta :
P&K: Ham Bapanami na i Nagori Atas. Sai na papansing ma goran-Mu. Sai roh ma
Harajaon-Mu. Sai saud ma harosuh ni uhur-Mu i nagori tongah on songon na i
nagoni atas. Bere Ham ma bannami sadari on hagoluhan ari-ari. Sasap Ham ma
dousanami songon panasapnami bani dousa ni hasoman na mardousa dompak
hanami. Ulang hanami bobai Ham hu parlajouan. Paluah Ham ma hanami
humbani pangagou! Ai Ham do simada Harajaon, pakon Hagogohon ampa
Hasangapon sadokah ni dokahni. Amen.

15. MANDODING : Hal. 337 : 1 - 3

1. Husombah Ham Tuhan tangihon au!
Sai uhur-Mu Tuhan pasaud Ham
Sai lambin tambah ma holongku hu Bamu
Sai tambah ma holong Bamu 
2. Sanggah na kahou au, daoh hun Bamu.
Sai ipindahi Ham, jumpah Ham au.
Halani in holong do, uhurhon Bamu.
Sai tambahma holong Bamu.
3. Sanggah tarsosak au, parngit tumang,
Iapoh Ham do a, sonang tumang .
Haposankin do Ham, Ham Sipagoluh au.
Sai tambah ma holong Bamu.
16. AMBILAN : Psalmen 119 : 1 - 8
Kuasa ni Hata ni Naibata; Alep = A

6
 1Martuah ma halak na daulat marparlahou, na mardalan bani titah ni Jahowa.
2Martuah ma halak na manramotkon hasaksian-Ni, na mangindahi Ia humbani gok ni
uhurni.
3na so mangkorjahon hajahaton, tapi na mardalan bani dalan-Ni.
4Domma itonahkon Ham parentah-Mu, ase dalankononkon ai pongkut.
5Sai totap ma namin langkahku, laho mandalankon aturan-Mu.
6Tongon, seng anjai tarbador ahu, anggo hupardimata ganup aturan-Mu.
7Sai pujionku do Ham humbani putih ni uhurhu, anggo huguruhon titah-Mu na pintor in.
8Sai dalankononku do uhum-Mu, sai ulang ma tadingkon Ham ahu.
17. MANGGALANG (3 Kantong + 1 Kotak : 1. Kantor Pusat, 2. Kas Jemaat, 3.
Pembangunan Gereja, 4. Kas Seksi Sekolah Minggu)
P: Paima iondoskon hita galanganta, tangar hita ma lobei Hata ni Naibata na gabe
onjolan banta laho manggalang, aima na tarsurat bani : Psalmen 50 : 23 “Ise na
manggalangkon banggal ni uhur, ai do na pasangapkon Ahu, anjaha ise na
mardalan ibagas hapintoron, hubani do patalaron-Ku hatuahon-Ku.”
Sonari ondoskon hita ma galanganta!
18. TONGGO PAKON DODING GALANGAN
P : Riap ma hita jongjong ! Martonggo ma hita mangondoskon galanganta hubani
Naibata!
Ham Tuhan Naibata Bapanami, horahan ni haganup. Hun Bamu do horahan ni pasu
– pasu hu bannami. Ibere Ham do bannami goluh ampa hagoluhan ari – ari. Ham
Tuhan, ijon iondoshon hanami do hu Bamu goluh pakon pasu – pasu na dob binere-
Mu in bannami. Sai lambin margogoh ma tongon hanami ihasomani idop ni uhur-Mu
ampa pasu – pasu-Mu bani na mandalonkon horjanami. Papansing Ham ma
galangan na ginalangkonnami on gabe galangan na misbou i lobei – ilobei-Mu, ase
lambin ihargahon hanami tongon dear ni layak pakon pasu – pasu-Mu in marhitei na
pasaudhon harosuh-Mu humbani gogoh, pingkiran ampa sinadongannami. Tarima
kasih ma Bamu Tuhan. Marhitei Kristus Jesus Tuhannami, jalo Ham ma galangan
pakon tonggonami on. Amen.
K : (Mandodingkon) Haleluya No. 5 : 4
Bamu sadokah ni dokahni, au on o Jesus Tuhankin,
Ham ma ‘lah haganup ompungni,
gogohku pakon artangkin,
Ai iberehon Ham daroh-Mu,
manggalar utang ni dousangku.
19. TONGGO PENUTUP
P : Ham Bapa parholong atei na tarsulur, Bapa na sintong anjaha Bapa pardear layak
hubannami jolma. Domma iain Ham hanami gabe anak-Mu. Lang ipaturut Ham

7
 hanami hona uhum janah manaron halani pardousanami. Tapi isuruh Ham do Anak-
Mu na sasada in, in ma Jesus Kristus laho manobus hanami humbani dousa. Lang
humbani omas barang pirak hanami itobus Ham, tapi marhitei daroh ni Anak-Mu na
sasada in do na maningon manaron janah matei tarsilang. Ham Bapa, bobai Ham ma
tongtong hanami ase manggoluh hanami bani goluh na bayu, anjaha buhai Ham ma
uhurnami laho patalarhon harosuh ni uhur-Mu ibagas parsaorannami pakon Ham
ampa hasomannami jolma. Ibagas Kristus Jesus hanami martonggo. Amen.
20. PENGUTUSAN
P : Laho ma nasiam, “janah totap ma nasiam, ulang mubah-ubah, anjaha lambin surung
ma ibagas horja ni Tuhan in, ai ibotoh nasiam, sedo na soya halojaon nasiam ibagas
Tuhan in”.
21. PASU - PASU
P : (Padaskon hata pasu-pasu)
Jalo ham ma pasu – pasu humbani Tuhan Naibatanta :
Ipasu-pasu anjaha iparorot Tuhan Naibata ma ham. Isondangkon Tuhan Naibata ma
bohi-Ni hu bamu, janah maidop ma uhur-Ni mangidah ham. Idompakkon Tuhan
Naibata ma bohi-Ni hu bamu, janah ipasorap ma damei-Ni bani Tonduymu. Amen.
K : (Mandodingkon) Amen, Amen, Amen.
Persembahan Kebaktian Minggu, 12 Februari 2023

1 Kantor Pusat Rp.

2 Kas Jemaat Rp.

3 Kas Pembangunan Gereja Rp.

4 Kas Seksi Sekolah Minggu Rp.

Transfer ke no. Rek. 0663333353,

BCA KCU Bekasi a.n GKPS
atau
melalui QR Code GKPS Salemba