TATA IBADAH

MINGGU HARI BUMI SEDUNIA

Minggu, 10 April 2022

Tema:
Hasadaon pakon Pangidangion na Marbuah (Kolose 1:10)

Sub Tema :
Mangarahkon Kuria Marsitungkolan pakon Marsipatoguhan ampa
Marsipardiateian Mandompakkon Paruntolan ni Goluh
PERSIAPAN IBADAH ( Ruang konsistori)

PROSESI ( Petugas ibadah pakon Majelis Jemaat memasuki tempat ibadah -

Jongjong Kuria)

Mandoding Haleluya No. 399:1

Tubuhan poyon–poyon i tongah juma in. Manggargar manuk-manuk bai parasarannin.
Marbagei pakon ihan i bagas laut in. Ge tinompa na legan seng targorani in.
Ganupan iparmudu Tuhanta Naibata. Lobihan iparmudu ganupan hita
da.  Sonai ge halayakon ibere do homa. Talup hatahononta diatei tupa ma

PAMUNGKAH/ DILO-DILO
P. Bapa inang hita ganupan kuria ni Tuhanta, riap do hita nuan i rumah
panumbahan on marhasadaon laho mamuji pakon pasangapkon Tuhan. Bani
ibadahta panorang on ipaingat do hita pasal parsuruh ni Tuhan in hubani
jolma laho manramotkon ganup na tinompa-Ni. Tanoh on pakon sagala isini
iondoskon Tuhan do hubanta gabe ianan ampa hagoluhan banta ronsi das
hubani ginomparta magira.
Hari Bumi sihol do paratahkon hubanta pasal parpardiateita hubani alam
semesta, na martujuan laho maningkatkon kesadaran ampa apresiasinta bani
planet bumi na iiani jolma. Pardingatan on itotapkon Perserikatan Bangsa-
bangsa (PBB) panorang mataniari topat bani garis khatulistiwa. Haganupan
in laho paingatkon hita pasal tanggung jawab pakon hinaporlu ni tindakan
nyata laho manramotkon bumi – ianannta manggoluh. Dingat ma hita: Bani
panorang panompaon, iondoskon Tuhan do hubanta tanoh on ase iramotkon
hita. Halani ai paunduk hita ma uhurta mardingat hinabuei ni na tinompa ni
Tuhan in, na gabe pasu-pasu bani goluhta.

1. VOTUM – INTROITUS – TONGGO

P. Ibagas goran ni Naibata Bapa pakon Tuhan Jesus Kristus ampa
Tonduy Napansing Sitompa langit pakon tanoh on.
P,K. Amen
P. Puji ma Jahowa, ale tonduyhu! Ham Jahowa Naibatangku, banggal
tumang do Ham, hasangapon pakon hamuliaon do pakeian Bamu.
K. Haliharon do isabingkon Ham Bamu songon salimut, ipaherbang
Ham do langit songon tenda.
P. Ibahen Ham do loteng-Mu i babou ni bah, hombun do ibahen Ham
gareta-Mu, anjaha mardalan-dalan do Ham i atas ni habong ni logou.
K. Ibahen Ham do logou gabe suruhan-Mu, apuy na marjirlam-jirlam
gabe siparugas-Mu.
 P. Domma ipajonam Ham tanoh on bani palasni, seng anjai dugur be
sadokah ni dokahni.
K. Bah bagas na hampar do manrungkubsi, tinob do sagala dolog
ibahen bah.
P. Maporus do ai ibahen pangasupi-Mu, tarolos do sidea lintun ibahen
sora ni longgur-Mu
K. Gabe timbul ma dolog, matornoh lombang bani ianan na dob
tinotapkon-Mu bani sidea.
P. Ham do na patubuh bah tubuh i lombang-lombang, na mambahen
mabaor bahni i holang-holang ni dolog-dolog.
Ham do patubuhkon poyon-poyon bani pinahan, ampa suan-suanan
sihorjahonon ni jolma, mambahen mandarat ruti humbagas tanoh.
Haleluya..Haleluya…Haleluya
P.K (Mandodingkon) Haleluya, Haleluya, Haleluya
P. Martonggo ma hita! Ham Tuhan Naibata Sitompa tanoh ampa
sagala isini. Ibohali Ham do goluhnami marhitei sagala pangisi ni
tanoh on. Pujion nami do Ham Tuhan bani ranggian ni tangan-Mu
manggoki goluhnami. Pujionnami do Ham Tuhan marhitei ganup
pangisi ni tanoh on, ai ganup na tinompa-Mu in mambaritahon
hinabanggal ni kuasa-Mu do. Hu Bamu ma idompakkon hanami
panonggornami janah hamuliaon-Mu, in ma na manggoki sagala na
manggoluh i atas tanoh on. Tarimakasih ma Bamu Ham Naibata
Sitimbulan in.
P,K. Amen (Hundul Kuria)

2. Doding Haleluya No. 477: 1-3

1. Bai parpoltak ni matani ari sogod in.
Tarbogei lurlur doding ni manuk-manuk in.
Megah do tumang mamuji Sipanompa in
Naibata do in, ipuji ijin.
Naibata do in, ipuji ijin.
2. Rap ampa suan-suanan megah do ijin.
Ipaombus-ombus logou manortor ijin.
Pasangapkon Naibata na marmuduhon in.
Megah do ijin, bai sogod ni in.
Megah do ijin, bai sogod ni in.

3. Hita jolma na tarlobih tinompa -Ni in.

Ningon patut hita dihut marmegah ijin.
Mamuji Tuhanta na marorot hita in.
 Puji ma tongon, Naibata tongtong.
Puji ma tongon, Naibata tongtong.

3. Hasasapan ni Dousa (jongjong kuria)

P. Martonggo ma hita mansopotkon dousanta… Ham Tuhan Naibata
sitompa langit pakon tanoh on ampa haganup pangisini. Songon si
Adam ampa si Hawa i pohon Eden marponop humbani bohi ni Jahowa,
sonai do hanami nuan binahen ni dousanami. Dear do haganup itompa
janah ipasu-pasu Ham janah itotapkon Ham do hanami jolma laho
manramotkon haganup tinompa-Mu in. Tapi halani hisap ni daging
pakon hasurakahonnami lang ipardulihon hanami hadearonni tinompa-
Mu in, iparseda hanmi do in marhitei na mamboiskon gogoh ni tanoh,
manrbohi hayu ampa na parseda harangan asal ma jumpah sininta ni
uhurnami sandiri. Hape hinorhonni in mangarou janah gok hangaluton
ma hagoluhan i tanoh on.
K Ham Bapa, marpangulaki ma uhur-Mu, ai seng ibotoh hanami na
binaennami in…
P Ham Tuhan Naibata Bapanami, gati do homa hanami mangelak
humbani tanggungjawabnami laho mampardiateihon lingkungan ija
hanami marianan. Lingkungannami ipaturut hanmi igoki sampah, zat-zat
beracun, limbah plastik, limbah pabrik pakon limbah rumah tangga,
hinorhonni in gabe menurun ma kualitas kesehatan itongah-tongah ni
dunia on.
K Ham Bapa, marpangulaki ma uhur-Mu, ai seng ibotoh hanami na
binaennami in…
P Sonari iboan hanami do haganup dousanami hulobei-Mu. Maidop ma
uhur-Mu mangidah hahurangannami. Pabayu Ham ma uhurnami janah
pakei Ham ma hanami gabe parhiteian-Mu laho patorsahon janah
paulakhon hinadear ni tinompa-Mu ibagas gok tanggungjawab, ase
sonang hanami manggoluh ilobe-lobei-Mu. Ham Tuhan idop ma uhur-
Mu bannami.
K (Mandodingkon: ‘Tuhan holong ma uhur-Mu” inggouni: ‘deideng”.)
Tuhan holong ma uhur-Mu bannami pardousa on.
P Tangar anjaha haporsayai hita ma Hata ni Naibata, bagah-bagah pasal
hasasapan ni dousanta: “Anggo isopotkon hita dousanta, hatengeran
ni uhur anjaha bonar do Ia manasap dousanta, ampa paborsih hita
humbani haganup hagedukon” (1 Joh.1:9).
Ibagas holong ni Naibata, domma isasap haganup dousanta. Halani ai,
pataridahkon hita ma tanda-tanda ni pargoluhon na bayu. Hasangapon
ma bani Naibata i babou.
P+K Amen

4. Doding Haleluya No. 353:1-3

1. Marsora do Tonduy ni Tuhanta in.
Gati lang itangar, itulak ham in.
Sai tanda dousamu sopotkon homa.
Holong do atei-Ni isasap do in.
2. Marunduk ni uhur sopotkon ma in,
pambaen mu na jahat ampa jungkatmin.
Ondoskon bai Jesus bulat dirimin,
tongtong ma sai dingat pangkopkop-Ni in.
3. Tangihon hata-Ni ihutkon ma in,
ondoskon dirimu bai gomgoman-Nin.
Pangindo bai Tuhan tongtong tonduy-Nin,
pargogoh mangkorjahon hata-Ni in.

5. Mambasa 1 Petrus 1: 3-9 (Tudu-tudu Pargoluhon na Bayu))

P. Pinuji ma Naibata, Bapa ni Tuhanta Jesus Kristus, na dob manubuhkon
hita paduahalihon, domu hubani banggal ni idop ni uhur-Ni, marhitei
parpuhoon ni Jesus Kristus humbani na matei, ase marpangarapan na
manggoluh hita, ase banta siteanon na so ra seda, na so martikas, na so
ra melus, na sinimpan banta i nagori atas. Iramotkon do hita hinorhon ni
gogoh ni Naibata, marhitei haporsayaon, ase das hita hu haluahon, na
dob sirsir sipatalaron bani panorang parpudi. In do ihamalaskon nasiam,
age pe marhoru nasiam tongkin sonari, anggo porlu ibagas bagei ni
parlajouan, ase taridah ma pitah ni haporsayaon nasiam, na harganan
marimbang omas na ra seda, age pe domma iuji ibagas apuy, bahen puji-
pujian, hasangapon ampa hamuliaon bani partalar ni Jesus Kristus.
Ihaholongi nasiam do Ia, age pe seng ididah nasiam Ia, ihaporsayai
nasiam do Ia, age pe seng ididah nasiam Ia sonari, gabe marolob-olob do
nasiam ibagas malas ni uhur na marhasangapon, na so tarpajojor
pamangan, halani dapot nasiam tujuan ni haporsayaon nasiam, ai ma
haluahon ni tonduy nasiam. Amen.

6. Doding Haleluya No. 264:1-2

1.  Sada do naporlu bangku, Jesus bere Ham ma au
Atap aha do nadong bangku, seng na boi pasonang ahu
Ge arta ge sangap, ganup habayakon,
seng boi in mamboban au bai hasonangan
 Ai anggo madapot nasasada in,
sai malas uhur hu hinorhon ni in
2.  Sihol bam ale tonduyhu, arta na sasada in?
Seng tarbaen in pindahanmu, anggo lang i babou in;
Ijin isiamun ni Tuhan Jahowa
do hundul Anak-Ni, na dob gabe jolma
Ai Ia do rupei na gok jenges-Nin

7. Hata Haporsayaon (Jongjong Kuria)

P Saksihon hita ma haporsayaonta in, songon na sinaksihon ni haganup
halak na porsaya bani sab tanoh on!
P+K Ahu porsaya bani Naibata Bapa, Pargogoh na so tarimbang, na
manompa langit pakon tanoh on. Ahu porsaya bani Jesus Kristus, Anak
ni Naibata na sasada in, in do Tuhanta, na tinubuhkon ni si Maria
sanggah nape haliaban, marhitei Tonduy Na Pansing. Na manaron na
parngit, bani panorang ni si Pontius Latus, iparsilangkon, matei anjaha
itanom, turun hu nagori toruh. Mulak manggoluh humbani na matei bani
ari patoluhon. Naik hu surga anjaha hundul i siamun ni Naibata Bapa,
Pargogoh na so tarimbang in. Hunjai ma Ia mulak magira laho
manguhumi halak na manggoluh pakon na dob matei. Ahu porsaya bani
Tonduy Na Pansing, bani Kuria parsadaan na mapansing in, parsaoran ni
sagala na mapansing in, bani hasasapan ni dousa, bani parpuhoon ni
angkula, pakon bani hagoluhan na sadokah ni dokahni. Amen.

8. Acara Khusus
 Mambasa Tonah ni Pimpinan Sinode GKPS
 Puisi
 Tingting
 Tonggo Pangapition

9. Doding Haleluya No. 459:1+3-4

1. O Tuhan tiap jam, au mamorluhon Ham.
Ai ham tumang na boi, pasonang uhurhin.
Bai haganup ianan, Ham do hupindahi.
Na roh do au sonari, holong ma Ham.
3. O, Tuhan tiap jam, bamu ma goluhkin
Anggo daoh do Ham, soya do ganup in.
Bai haganup ianan, Ham do hupindahi.
Na roh do au sonari, holong ma Ham.
 4. O, Tuhan tiap jam, ajari ham ma au.
Ai ningon do totap, hudingat hata-Mu.
Bai haganup ianan, Ham do hupindahi.
Na roh do au sonari, holong ma Ham.

10. Ambilan : Psalmen 118:19-29

11. Galangan
Prb. Paima iondoskon hita galanganta, tangar hita ma lobei Hata ni Naibata
na gabe onjolan banta laho manggalang, aima na tarsurat bani: Psalmen
96:8: “Bere nasiam ma bani Jahowa hamuliaon ni goran-Ni, boan
nasiam ma galangan, masuk ma nasiam bani alaman-Ni”.

12. Tonggo Pakon Doding Galangan

Prb. Ham Tuhan Naibata Bapanami, harohan ni haganup. Hun Bamu do
harohanni pasu-pasu hu bannami. Ibere ham do bannami goluh ampa
hagoluhan ari-ari. Ham Tuhan ijon iondoskon hanami do hu Bamu goluh
pakon pasu-pasu na dob binere-Mu in bannami. Sai lambin margogoh
ma tongon hanami ihasomani idop ni uhur-Mu ampa pasu-pasu-Mu
bani na amndalankon horja nami. Papansing Ham ma galangan na
ginalangkonnami on gabe galangan na misbou ilobei-lobei-Mu, ase
lambin ihargahon hanami tongon dear ni layak pakon pasu-pasu-Mu in
marhitei na pasaudkon harosuh-Mu humbani gogoh, pingkiran ampa
sinadongannami. Tarimakasih ma Bamu Tuhan. Marhitei Kristus Jesus
Tuhannami, jalo Ham ma galangan pakon tonggonami on. Amen.
Prb+K (Mandodingkon) Haleluya No. 249:2
Ganup binere-Mu in, tonduy pakon angkulangku.
Hosah ampa gogohkin, ronsi haganup artangku.
Huondoskon in Bamu, seng paosoronku in

13. Tonggo Panutup

Prb. Ham Tuhan Naibata Bapanami, na i nagori atas. Ipuji janah ipasangap
hanami do Ham halani holong-Mu na banggal in na torus ijalo hanami.
Tarlobih bani Minggu Hari Bumi se-Dunia sadari on. Ase na mangelek
ma hanami Bamu ajari janah pargogohi Ham ma hanami laho
pataridahkon tanggungjawab nami selaku halak na porsaya
manramotkon tinompa-Mu in. Ambahni ai goluhnami lang pitah
mansalahkon halak na legan na parsedahon lingkungan tapi jumpah ma
bannami sikap na tongtong parduli bani kelestarian lingkungan ase bumi
 na tinompa-Mu in gabe ianan nami manggoluh ibagas na sonang. Jalo
Ham ma tonggonami on, ibagas Jesus Kristus Tuhannami. Amen.

14. Tonggo Ham Bapanami

Prb. Ham Bapanami na i nagori atas. Sai na papansing ma Goran-Mu. Sai roh
ma harajaon-Mu. Sai saud ma harosuh ni uhur-Mu i nagori tongah on
songon na i nagori atas. Bere Ham ma bannami sadari on hagoluhan ari-
ari. Sasap Ham ma dousanami songon panasapnami bani dousa ni
hasoman na mardousa dompak hanami. Ulang hanami bobai Ham hu
parlajouan. Paluah Ham ma hanami humbani pangagou
Prb+K (Mandodingkon) Ai Ham do simada harajaon, pakon hagogohon ampa
hasangapon sadokah ni dokahni. Amen.

15. Paingkatkon
Prb. Laho ma hanima su sab dunia on, ambilankon hanima ma Ambilan
namadear in bani sagala na tinompa (Markus 16:15)

16. Pasu-pasu :
Prb. Jalo ham (hita) ma pasu-pasu humbani Tuhan Naibatanta:
Ipasu-pasu anjaha iparorot Tuhan Naibata ma ham (hita). Isondangkon
Tuhan Naibata ma bohi-Ni hu bamu (hu banta) janah maidop ma uhur-
Ni mangidah ham (hita). Idompakkon Tuhan Naibata ma bohi- Ni hu
bamu (hu banta) janah ipasorap ma damei-Ni bani tonduymu (tonduyta
bei). Amen.
Prb+K (Mandodingkon) Amen…Amen….Amen
Puisi: "B U M I"
BUMI
Ketika waktu merentangkan masa
Walaupun semakin renta
Lihatlah dia tetap bertahan dalam asa
Bumi ku,
Andai kau dapat bicara
Polusi,
Banjir’
Illegal loging,
Green House Effect,
Pencemaran laut,
Limbah,
Bencana Alam,
Semua ulah kami para manusia
Tangan nakal merusak ekosistim
yang telah tercipta
Polusi udara yang tak lagi sehat
Karena sampah dimana-mana
Dari tahun ke tahun hutanmu
kami eksploitasi dan semakin berkurang
Paru-parumu kami rusak
Lapisan ozon yang sedikit demi sedikit
semakin lebar
Gletser pun terjadi di kedua kutubmu
Dari hari ke hari air bersih pun semakin sulit untuk didapatkan
Lihat manusia yang kekurangan
sedangkan ada manusia yang berlebihan
Lagi karena ulah manusia yang serakah
Bumiku,
Andai kau dapat bicara
Tapi kau tetap diam
hanya gestur yang kau tampakkan
Alam tak lagi bersahabat
Saat kau memuntahkan isi perutmu
Membuat kami lari kocar-kacir
Saat kau menggeser badanmu
Membuat kami seperti kapas yang berhamburan
 Dan membuat habitat kami tergerus
oleh tanah dan air
Tapi,
Terimakasih Bumi
Kau masih mau menampung kami
Di usiamu yang sudah renta ini
Mars sangat terbatas
walaupun ia mirip dengan kau
Tapi,
Tidak sebaik kau bumi yang masih menyediakan kebutuhan kami
Tuhan sungguh amat sangat baik
Menciptakan kau untuk kami
Semoga manusia segera sadar
Untuk menjaga ekosistim, habitat dan
Ekologi yang telah tercipta
Jika bukan kita siapa lagi yang akan
menjaga keseimbangan alam umat
manusia di muka bumi ini.
(Unknown)