TATA IBADAH NATAL

GKPS
24 Desember 2019

TEMA:
Ibohali Manghobaskon Horja na Madear.
(2 Timoteus 3:17)

SUB TEMA:
Pasirsir, Bohali ma Kuria in Totap Marguru bani Podah ampa Ajaran ni Kristus
Jesus, ase Jonam, Toguh Marurat, Marbuah ibagas Pangarusion ampa Habotohon
pasal Kristus Sipaluah in.
(Kol. 2:7; Lah. 17:23; 1 Korint. 7: 17-20)

1
 I. PRAELIDIUM
1. Persiapan Ibadah
2. Prosesi
3. Mandoding Haleluya No. 316:1+4 (jongjong kuria)
♫ Sai Puji ma Tuhanta in, ai tubuh Jesus in.
Sai jalo ma Rajanta in, pasirsirma uhurmu in.
Mandoding puji ma, mandoding puji ma,
Mandoding puji Tuhan in.
♫ Jesus sigomgom tanoh on, na manramotkon in.
Haganupan manaksihon, hasintonganni Tuhan in.
Banggal do holong-Nin, banggal do holong-Nin,
Banggal do holong atei-Nin.
II. IBADAH
1. Votum-Introitus-Tonggo (Jongjong Kuria)
P : Ibagas Goran ni Naibata Bapa, pakon Tuhan Jesus Kristus ampa Tonduy
Na Pansing, Sitompa langit pakon tanoh on. Amen.
Bangsa na mardalan ibagas hagolapan mangidah sada panondang na
bolon, halak na marianan bani linggoman ni hamatean, poltak do i babou
ni sidea sada panondang.
K : Ipabuei Ham do bangsa in, itambahi Ham malas ni uhurni; marmalas ni
uhur do sidea i lobei ni bohi-Mu, songon malas ni uhur sanggah
pariama, songon halak na marolob-olob sanggah marbagi taban-taban.
P : Ai pasangan na bani tangkuhukni, pakon lanja-lanja na bani abarani ampa
lonsing-lonsing ni sipangodoh-odoh, Ham do na mamonggolhon songon
bani ari ni Midian.
K : Ai sagala sipatu na mardorob-dorob manlangkah, anjaha sagala pakeian
porang na marlapu daroh maningon bois do tutungon, gabe sipanganon
ni apuy.
P: Ai domma tubuh banta sada na etek-etek, ibere do banta sada anak,
tampei bani abarani do panggomgomion, anjaha ibahen do goran-Ni:
2
 Paruhur halongangan, Naibata parkuasa, Bapa sadokah ni dokahni, Raja
Damei. Haleluya!
K: (Mandodingkon Haleluya, songon lagu “banggal tumang do holongMu”)
Haleluya, haleluya, Haleluya, Amen
Haleluya, haleluya, Haleluya, Amen
P: Martonggo ma hita,
Ham Bapa nami na i nagori atas, tongtong ihatahon hanami do
tarimakasih halani banggal ni holong-Mu benami na mambere Kristus
Sipaluah roh hu dunia on. Ipuji anjaha ipestahon hanami do partubuh-
Mu in bani natal sadari on. Tarpuji ma Ham Tuhan sonari ronsi sadokah
ni dokah ni. Amen.

2. Mandoding Haleluya No. 45: 1+5

♫ Malas ni uhur banggal nah u ambilankon on;

Domma tubuh Sipaluah bai hita jolma on.
Sangap bani Naibatanta, damei-damei-damei ma bani jolma.
Malas uhur ni Naibatanta bai hita jolma on.
♫ Malas ni uhur na banggal, sai sogopi uhurhin.
Ase dihut au pabanggal goran na pansing in.
Sangap bani Naibatanta, damei-damei-damei ma bani jolma.
Malas uhur ni Naibatanta bai hita jolma on.

3. Liturgi I: Pasal Panompaon

P: Domma itompa Naibat dunia on ampa haganup isini. Dear do ganupan

janah iharosuhkon Naibata. Haganupan on pataridahkon halongangan na
binahen-Ni. Tonggor hita ma jorei ni ampa jengesni haganupan ai.
1. Mataniari, bulan, bintang-bintang na i langit, jenges do ganupan gabe
panondang arian pakon borngin i dunia on janah pataridahkon
hinabanggal ni Naibata.
3
2. Manggoluh do manuk-manuk, binatang laut, binatang na manjulur, pakon
ganup binatang na marsiboan masammni bei mangisi dunia on janah
pataridahkon buei ni hagoluhan na dear. Buei ni pe masamni ai laho
pataridahkon pasal habayakkonni Naibata na manompa dunia on.
3. Hayu na i dunia on janah marsiboan masammi bei, jenges tumang ididah janah
suang do nabinereni, sonai homa bunga marsiboan masamni na lang marnaloja
mambere hajengeson. Pasu-pasu na banggal tumang ma na binereni Naibata
hubanta boi menikmati haganupan ai.
4. Tao ampa Laut na bolag na gabe ianan hagoluhan bani dengke na marsiboan
masammni, sonai homa manuk-manuk na mangkahabur i atas ni tao ampa laut
ai. Buei homa hasil na boi ibere laut bani hagoluhanni haganup. Bunga,
dengke, manuk-manuk, sonai homa jolma dapotan na madear do humbani tao
ampa laut ai. Pataridahkon bahasa buei do dalan ipakei Naibata na boi
pagoluhkon haganup na ihaholongi-Ni.
5. Dear do homa Jolma i tompa Naibata songon rupa-Ni janah manrajai tanoh
on. Hataruranni panompaon janah ibahen do jolma na parpudi i tompa laho
pataridahkon hapentaran Ni Naibata na lang tarpikirhon jolma.

4. Mandoding Haleluya No. 399: 1-2

♫ Tubuhan poyon–poyon i tongah juma in

Manggargar manuk manuk bai parasarannin
Marbagei pakon ihan i bagas laut in,
Ge tinompa na legan seng targorani in;
Ganupan iparmudu Tuhanta Naibata; lobihan iparmudu ganupan hita da,
Sonai ge halayakon ibere do homa; talup hatahononta diatei tupa ma
♫ Ibere do panondang mataniari in;
Bulan ampakon bintang panondang borngin in
Udan logou ni ari pagantih soluk in;
Sonin ma ganup tingki pajagar tanoh in
4
 Ganupan iparmudu Tuhanta Naibata; lobihan iparmudu ganupan hita da
Sonai ge halayakon ibere do homa; talup hatahononta diatei tupa ma

5. Liturgi II : Pardabuhni Jolma bani dousa

P : Dear do ganupan na tinompani Naibata, ibere do hagoluhan sonai homa

bani jolma in na sonang manggoluh i Eden. Tapi, halani taruyun janah
mangkaporsayai nalegan marimbang Naibata gabe madabuh ma jolma
bani dousa. Sonai homa bani dunia on, buei do jolma taruyun janah hal-
hal na lang patut sihorjahonon na lang iharosuhkon Naibata lang
itangihon jolma.
MJ: Bujur do Naibata na ra mandilo hanami gabe parhorja i pohon anggur-Ni,
i jalo do ai, tapi, sipatah lang ongga songon aha na iharosuhkon Naibata
do na ihorjahon, hurang homa ihagoluhkon pandiloon-Mu ibagas
goluhnami janah taridah ma ai humbani parlahounami na hurang
bertanggungjawab, lape boi gabe siusihon i tongah-tongah ni keluarga
ampa kuria-Mu.
Bp: Malas do tong uhurnami Bapa halani ihaporsayahon Naibata do bennami
gabe ulu i rumah tangga nami bei. Tapi, selaku ulu, gati do maruhur-uhur
bani hanami dompak parinangaonnami uhur-uhur nami hansa ihubani
inang i rumah, pitah dirinami nami hansa na ipingkirhon hanami. Lape
boi songon ulu na iharosuhkon Naibata. Nai homa age mandompakkon
niombah, hurang do hanami mangajari sidea domu hubani harosuhni
hurMu.
Ing: Hanami pe selaku inang, lape boi gabe sipambalosi na dear huba-Mu,
sonai homa hubani paramangon nami, hurang bertanggungjawab selaku
inang, rosunan do belanja-belanja online na sipatah lang homa sai
ihaporluhon tapi halani buei halak na manuhor gabe dihut ma hanami,
sonai homa pasal panorang, na buei ipakei laho mar-sosmed songon
pesbuk. Ibagas na mambere pangajarion hubani niombah pe, hurang bijak
do hanami, hotop hanami mambere fasilitas songon gadget, duit tapi

5
 pangajarion selaku goluh ni halak na porsaya, mangkasomani ibagas masa
pertumbuhan, hurang do hanami ijai.
Pmd: Sadar do hanami selaku pemuda generasi penerus, hurang do hanami
berpartisipasi aktif, i tongah-tongah ni gareja-Mu. Hurang ringgas do
hanami homa marlajar pasal Hata-Mu na pasning in. Lang gabe
persoalan ibagas goluhnami anggo tading Bibel tapi anggo gadget tading
gabe persoalan do ai bennami, na mambaen lang be sai ibotoh hanami
mambuka bible, halani kecanggihan teknologi. Ibagas parmingguan pe,
hurang marurat do hata-Mu, uhur-uhur nami do ija ianan na sosok laho
margareja janah mambaen sonang goluh nami secara hajolmaon.
SM: Hanami selaku anak sikolah minggu, porlu tumang do pangajarion
humbani orang tua, sonai homa lingkungan Gareja ase lambin itandai
hanami ise do Tuhan in. Tapi, hansi pe buei pangajarion, sipatah
lingkungan sekitar na bahat, legan homa agamani mambaen songon na
mela do pangahapnami niombah mangakui Kristus Tuhan in. Ase porlu
tumang do hanami iajari use janah tangi bani hata ni Tuhan ase
margogoh haporsayaonnami.
6. Mandoding Haleluya No. 44: 1-3
♫ Pamalas uhurta do partubuhni
Jesus Sipaluah haholongankin (2x)
♫ Ai buei do dosa, parlajouan pe
Manunsahi hita ronsi matei pe (2x)
♫ Maparah tumang do hamagouan in
Anggo lang roh Jesus Sipaluah in (2x)
7. Liturgi III : Bagah-Bagah pasal Partubuh ni Sipaluah
P: Idop ni uhurni Naibata lang ongga marpunsa, mulak ratah do ai siap sogod.
Age pe hita jolma on mardosa janah memberontak, tapi Idop ni uhur Tuhan

6
 torus do manogu-nogu hita. Ai ibere do Anak hinaholongan ni uhurNi ai
banta gabe jolma laho paluahkon hita jolma pardousa on.
1. Tonggor ma, sai suruhon-Ku do malekat sada i lobeimu, ase iparorot ho
i tongah dalan, anjaha ibobahon ho das hu ianan na dob Hupasirsir bam
(2 Musa 23:20).
2. Ipagijang ma ulunima, ale sagala horbangan, ase tarangkat ma hanima,
ale labah nabasaia, ase masuk raja ni hamuliaon in. Ise ma nani raja ni
hamuliaon in? in ma Jahowa Zebaot, Ia do Raja ni hamuliaon (Psalm.
24:9-10).
3. Ulakan-Ku do mangonai tangan hubam, tapi papitahon-Ku do ho songon
bosi buruk-buruk anjaha padaohon-Ku do humbam timah-timahmu
(Jes.1:25).
4. Ai tobuson do sion marhitei habonaron anjaha pangisini na paubahkon
uhurni marhitei hapintoron (Jes. 1:27).
5. Halani ai paima-imahon do Jahowa, sihol do marulak-ulakan uhur-Ni
dompak nasiam; halani ai bingkat do Ia laho mangidopi nasiam. Ai
Jahowa, ai ma Naibata ni uhum, martuah ma ganup halak na martenger
ni uhur Bani (Jes. 30:18).
6. Ambahni ai sondang ni bulan gabe songon sondang ni mata ni ari ma,
anjaha sondang ni mata ni ari pitu hali lompit ma, songon haliharon ni
pitu ari ma ai bani ari sanggah Jahowa mambaluti na maponggol
humbani bangsa-Ni, anjaha manambari ugahni hinorhon ni hona
bogbogan (Jes. 30:26).
7. Pargogohi nasiam ma tangan na galek, patotap towod na rebad-rebad!
Hatahon nasiam ma bani paruhur na galek, “tenger ma uhur nasiam,
ulang mabiar! Tonggor ma Naibata nasiam, roh do Ia mambalas ampa
marlulu; Ia sandiri do na roh, laho paluahkon nasiam” (Jes. 35:3-4).
8. Anjaha mulak ma halak na tinobus ni Jahowa, roh hu Sion mandoding-
doding, malas ni uhur sisadokah ni dokahni do i atas uluni. Jaloon ni sidea
7
 do hamegahon ampa malas ni uhur, tapi maporus ma pusok ni uhur ampa
hoih-hoih (Jes. 35:10).

8. Mandoding Haleluya No. 32: 1,3,5

♫ Riap ma hita haganup, mamuji Naibata.

Mesek mapan dodingta rup, ai in do na tama, ai in do na tama.
♫ Paratas ni Bapa-Ni do, tinadingkon-Ni in.
Hu hasiangan Ia roh, ianan marsik in, ianan marsik in.
♫ Halani in malas tumang , do uhurhon nuan.
Hujolom Jesus in tongon, ai sonang au ibaen, ai sonang au ibaen.
9. Liturgi IV: Partubuh ni Jesus

P: Naibata parholong ni atei, mangidah bahasa lang dong jolma na boi

paluahkon dirini sandiri humbani dousa. Halani banggal ni holong ni, pala
do Anak-Ni na sasada in iberehon, ase ulang magou ganup na porsaya
Bani, tapi ase hagoluhan na sadokah ni dokahni bani.
1. Marusaha do jolma sadokah goluhni ase maluah tapi totap do lang boi,
ibagas paruntolon na sonai banggal ni, pitah marondos hubani Naibata
hansa ase holong uhur ni janah ipardiatei ni hita.
2. Maria na boratan rumah bingkat do pakon Josep mangindahi ianan
halani songon laho tubuh ma Sipaluah in bani borngin ai, hape ni lang
adong ope halak na mangurupi janah manulak marhiteihon buei ni
sidalian.
3. Marhiteihon hagogohon na humbani Naibata, lang galek sidea hansi pe bahat
na manulak sidea, dob ni, i harang ni pinahan i huta Betlehem ma tubuh
Kristus Jesus Sipaluah in.

8
4. Domma tubuh Kristus Sipaluah na gabe panondang i dunia on, na martoruh ni
uhur, marholong ni atei mangidah haganup jolma pardousa in.
5. Jesus Kristus na tubuh hu dunia on mambere pangarapan na bayu use bani
jolma, marmegah-megah haganup jolma na mambotoh anjaha
mangkaporsayai-Si janah mangihutkon ajaran-Ni.
6. Paruntolon na sonin boratni, lang be pitah jolma sandiri na manaron ai tapi
adong do Jesus Sipaluah na mangurupi anjaha patorsahon haganupan. Ase,
bani partubuhni Jesus gabe tubuh use haporsayaonta na lang maronti.
7. Hadameon, haluahon na iboban Jesus hu dunia on, tongon tumang, iahapkon
hita do sadari on ibagas gok malas ni uhur ase dame ma hita ibagas goluhta
on. “Hasangapon ma bani Naibata na i babou, damei ma i tanoh on bani jolma
hinarosuhkon-Ni in.”

10. Mandoding Haleluya 399 : 1-3 (pagara lilin: Parambilan, PMJ, Mewakili
St, Sy, Bapa, Inang, Pemuda, ASM)
♫ Sonang ni, borngin ni in, sanggah roh Jesus in
Sonang modom do halak ganup dua mando na puho in rup
Mangoromi AnakNi Jesus Tuhanta in
♫ Dear ni borngin ni in sanggah roh Jesus in
Bai parmahan i Betlehem in, ipatugah na hun surga in
Domma roh Sipagoluh, Jesus Tuhanta in
♫ Buei ni tuah ijin, sanggah roh Jesus in
Tor maluah pardousa use, humbai hamagouanNi hape
Ben na roh Sipagoluh, Jesus Tuhanta in

11. Liturgi V : Refleksi Natal

P. Marmalas ni uhur banggal do haganupan jolma na mangkaporsayai-Si
halani tubuh hu dunia on. Tanda malas ni uhur taridah do marhitei
9
doding-doding Natal na tarbogei i Gareja-gareja, rumah-rumah,
dekorasi na adong i toko-toko pakon haganup ianan, na mambahen
lambin taridah tumang ma bahasa jolma in marmalasni uhur
menyambut partubuh ni Jesus. Ase marhiteihon Natal, tongon boi ma
manghartuki uhurta bei bahasa lang adong na soya-soya anggo
ihorjahon hita ibagas Ia, halani ai, tongon ma taridah ai marhitei buah
ni haporsayaonta ibagas goluh on.
Marbuah ma Haporsayaon in
Jesus Kristus Sipaluah in domma tubuh hu dunia on piga ribu taun na
salpu, Parroh-Ni pe halani holong ni na banggal in do bani jolma na
torus marsitaronon
Halani dousa. Holong, Sari, toruh maruhur, tangkas tumang do taridah
ibagas diri-Ni. Karakter na tolu on tongon ningon do manggoluh
ibagas goluh ni halak na mangkaporsayai-Si.
Sadari on, marmalas ni uhur do hita ganupan, halani partubuh ni Jesus
sipaluah in. Semarak na taridah tumang ma ai marhiteihon buei tanda-
tanda bani bulan on.
Tapi, sungkun-sungkun use ibagas dirinta bei, boi do torus on
manggoluh janah marbuah sadokah goluhta? Atap on pitah perayaan
sesaat, rutinitas? Anggo ididah hita sondahan on, hamajuon jaman
mambaen haporsayaon lang pala sai bahat marbuah. Buei halak na lang
marminggu janah lang adong panolsolion ibagas dirini. Buei homa
halak na uhur-uhurni margereja, ija ma pangahapni sonang janah sodap
sitangaron hatani Naibata sesuai pakon aha na ibagas uhurni hujai ma
ia laho. Adong homa domma dokkah gabe halak na porsaya tapi ungut-
ungut, uhur subil, domdom, cuek totap do lang boi magou. Jaman
lambin majuni, haporsayaon lambin otikni.
Marhiteihon Natal sadari on, tongon, boi ma manghartuki uhurta ampa
pikiranta bei, sadar bani haganup hahurangan janah mangahapkon
sonaha banggal ni holong ni Naibata. Boi ma hita pataridahkon
haporsayaonta. Lang be uhur subil na dong banta tapi empathy ma na

10
 dong. Haporsayaonta pe ningun do marbuah i tongah-tongah ni dunia
on janah buah ni haporsayaon ningon do taridah marhitei parlahouta
na marholong ni atei, sari, janah toruh maruhur bani ganup hasoman i
sab tanoh on. Lang pitah sonari tapi sadokah manggoluh, ase ulang
soya-soya Jesus na roh hu dunia on.
12. Mandoding Haleluya No. 315: 1-2
♫ Sangap, sangap bani Jesus Tuhankin,
na roh do Ham hun surga hun rumahMu.
Sangap, sangap bani parroh-Mu hu tanoh on
gabe doskon jolma Tuhan parholong in. sangap, sangap.
♫ Haganup parmahan jalo ma tongon,
Barita malas uhur hun surga in.
Ai saborngin on do tubuh Tuhan Jesus in,
Ai tibal do Ia bani palangka in, sangap, sangap.
13. Renungan Natal

14. Mandoding Haleluya No. 313: 1-2 (Irik patumpu Galangan)

♫ Humbai pulou ‘ge banua sai tarbogei do torus.
Doding na mamuji Tuhan Sipanobus jolma in.
Gloria puji ma Tuhanta. Gloria, puji ma Tuhanta.
♫ Haganupan na i surga pasangapkon Naibata.
Rap mandoding do sidea i lobei ni Naibata.
Gloria, puji ma Tuhanta, Gloria, puji ma Tuhanta.

15. Tonggo Galangan - Tonggo Panutup - Tonggo riap – Paingkathon-Pasu-

pasu (Jongjong Kuria)

11
P: Ondoskon hita ma galanganta hubani Tuhan Naibata.
Martonggo ma hita:
Ham Tuhan Naibata Bapanami, parholong ni uhur banggal mangidah hanami
jolma na madoyuk anjaha pardousa banggal. Diateitupa do ihatahon hanami
halani holong-Mu in, gabe gok ma malas ni uhur, lambin marbuah homa
haporsayaonnami ronsi ujung ni goluhnami, anjaha marulih hanami marhitei
partubuh ni Anak-Mu hu dunia on. Sonai homa Tuhan, pasu-pasu Ham
galangan malasni uhur nami humbani hinadongannami pakon na sihol ope
bereonmu hubennami.
K: Tuhan, Tarima kasih ma halani holong-Mu na mambere Sipaluah hu dunia on.
P: Hanima do panondang ni dunia on! Seng boi ponop huta na i atas dolog. Seng
irungkubkon halak tumba bani suluh na pinagarani, tapi hu atas sagakan do
ibahen, ase isondangi haganup na i rumah ai. Sonai ma marsinalsal
panondangnima i lobei ni halak, ase ididah horjanima na dear in, ase ipuji
sidea Bapanima na i nagori atas in.Amen.
Riap ma hita martonggo marhitei tonggo na pinodahkonni Tuhan Jesus bani
susianNi.
P+K: Ham Bapanami na i nagori atas ... Amen.
P: Laho ma nasiam, janah “Totap ma nasiam, ulang mubah-ubah, anjaha lambin
surung ma ibagas horja ni Tuhan in, ai ibotoh nasiam, sedoa na soya halojaon
nasiam ibagas Tuhan in.”
Jalo hita (ham) ma pasu-pasu humbani Tuhan Naibata:
Idop ni uhur ni Tuhanta Jesus Kristus pakon holong ni atei ni Naibata Bapa
ampa parsaoran ni Tonduy Napansing ma mangkasomani hita (nasiam)
haganupan. Amen
K (Mandodingkon) Amen… Amen…. Amen.
III. Postludium (irik marsisalam-salaman)
12
Haganup Pandita & Penginjil GKPS i Distrik VI
Padashon:
Selamat Hari Natal 25 Des 2019
Pakon
Selamat Tahun Baru 1 Jan 2020

13