GKPS

Gereja Kristen Protestan Simalungun

(Simalungun Protestant Christian Church)

Mobile Version :

GKPS

Organisasi
o
o
o
o
o
 o
Peraturan
o
o
Ibadah
o
o
o
o
o
o
KONFESI
Artikel

Home
TATA IBADAH NATAL PEMUDA GKPS 2017

TATA IBADAH NATAL PEMUDA GKPS 2017

By: GKPS on November 13, 2017 at 9:40

DOWNLOAD DISINI=> TATA IBADAH NATAL PEMUDA GKPS 2017

 TATA IBADAH

NATAL PEMUDA GKPS 2017

TEMA:
Ibohali Manghobaskon Horja na Madear. (2 Timoteus 3:17)

SUB TEMA:
Ajari ma Kuria in gabe Sipangidangi Ibagas Hapentaron, Haporsayaon
ampa Bulus ni Uhur ase Lambin Torsa Kuria in, Mangkorhon Hadoharon
pakon Hadearon i tongah-tongah ni Gareja, Masyarakat ampa Negara (2
Petr. 1:5; Ef. 4: 13-15)

PERSIAPAN

Persiapan petugas ibadah

Pengkondisian ibadah
Tonggo i konsistori

PRAELUDIUM

1. : Hita haganupan pemuda riap pakon ganup kuriani Tuhanta, ipestahon hita do nuan
partubuh ni Tuhanta, Jesus Kristus Sipaluah in. Ia domma gabe jolma songon na dob
ibagah-bagahkon Naibata Bapanta na gabe hagogok ni holong-Ni bani dunia on.
Paunduk hita ma uhurta manjalohon-Si marhitei ibadah Natalta bani panorang on, ase
lambin iahapkon hita holong ni Naibata hubanta.

- saat teduh -

PROSESI

Barisan Prosesi (Parambilan, Panitia, Pengurus Pemuda, Pembimbing Pemuda, Pimpinan

Majelis) mammasuki gareja/ ruangan ibadah

Singers: (mandodingkon) Haleluya No. 316:1-2

Sai puji ma Tuhanta in, ai tubuh Jesus in

Sai jalo ma Rajanta in, pasirsir ma uhurmu in

Mandoding puji ma, mandoding puji ma, mandoding puji Tuhan in.

Megah ganup dunia on, marsangap Tuhan in

Ganup mamuji Tuhan in, pakon ganup tinompa-Niin

Mandoding puji ma, mandoding puji ma, mandoding puji Tuhan in

1. VOTUM INTROITUS TONGGO

P : Ibagas goran ni Naibata Bapa pakon Tuhan Jesus Kristus ampa Tonduy Napansing,
sitompa langit pakon tanoh on. Amen

Ai domma tubuh banta sada na etek-etek, ibere do banta sada anak, tampei bani abara-Ni do
panggomgomion, anjaha ibahen do goran-Ni; Paruhur Halongangan, Naibata Parkuasa, Bapa
sadokah ni dokahni, Raja Damei

K : Sai na puji ma Tuhanta ibagas Kristus Sipaluah in

P : Puji hita ma Tuhanta na dob tubuh ibagas daging, doskon hita manisia ase parsimada
hita bani harajaon-Ni

K : Puji ma Kristus na dob marianan i tongah-tongahta

P : Ia do manirang hita humbani kuasa ni dousa na bajan in, Ia do tongon Sipaluah banta

K : Halani ai dodingkon hita ma goran-Ni na pansing in

P : Martonggo ma hita: Ham Jesus Kristus Sipaluah bannami jolma pardousa, ipuji janah
ipasangap hanami do Ham bani hotak paratas-Mu halani itodoh Ham do hanami gabe
parsimada bani haluahon in. Ajari janah bobai Ham ma hanami ase lambin pongkut
mangkagoluhkon haluahon in, ase lambin matoras hanami bani hauhuron ampa haporsayaon
janah lambin tangkas ibagas goluhnami na dob parsimada hanami bani hakuahon na hun
Bamu. Tarimakasih ma Bamu Ham Tuhan Jesus Raja janah Sipaluah bani dunia on. Amen

2. DODING HALELUYA NO 41:1-2

Domma jumpah use ari pesta in,

partubuhanni Tuhanta Jesus in

Turun hape la roh hun surga in,roh manohu hujon

Hasangapon bai Naibata, damei damei bani jolma

Megah uhur ni Naibata, hajolmaon use

Laita hita misir hita hu Betlehem in,

Sombah hita ma Dakdanak na ijin,

Tinongoskon ni Parholong atei in, Naibata, Bapa in,

Hasangapon bai Naibata, damei damei bani jolma

Megah uhur ni Naibata, hajolmaon use

3. LITURGI I (RAMOTKON MA NA TINOMPA)

Prolog: Jenges do tanoh on itompa Naibata bani mungkahni. Alam semesta pasirsirhon
hagoluhan bani haganup pangianni. Ibere do homa kuasa hubani jolma ase manramotkon
ganup tinompa in. Tapi anggo ipardiatei hita nuan on, mubah do ganup hinajengesni tanoh
on. Harangan ripas, dolog-dolog pe lang be maratah. Pangkorhonni ai, hotop ma masa
bencana alam.

1. Hita hasoman, sonaha do anggo bani sada panorang holi lang dong be bah? Tontu
gabe terancam ma goluh i tanoh on; lang boi be maridi, manussi ronsi horja na legan
pe gabe lumpuh ma. Tubuh ma naborit na marujung hu bani hamateian. Majangin
tumang! Halani ai ramotkon hita ma bah, ulang iparbois-bois.
2. Sonaha do anggo bani sada panorang holi lang dong be hayu? Milas ma tanoh on
lang tartarongkon, dob ai lang be martambah oksigen mambahen boi be tartoruskon
hagoluhan. Lang be tubuh poyon-poyon sipanganonni pinahan. Tanoh pe horah janah
siltag ma. Halani ai ramotkon hita ma suan-suanan pakon hayu na i harangan.
3. Sonaha do anggo bani sada panorang holi lang dong be hombun. Meningkat ma suhu
udara gabe lang tartarokkon be milasni. Suan-suanan pe lang dong na boi manggoluh.
Aha ma na gabe sipanganon ni jolma in? Ujungni gabe hamateian do tong. Halani ai
ramotkon hita ma na tinompa in ase ulang maseda pardalanan ni hagoluhan na i tanoh
on.
4. Sonaha do anggo bani sada panorang holi lang dong be minak pakon bahan bakar na
legan, lang dong be masin na manggoluh janah sotto ma buei horja na
mamakei Lumpuh ma hagoluhan na i tanoh on, ai ganup do hita jolma manggunahon
energi na marasal humbani tanoh on. Halani ai ramotkon hita ma ganup na tinompa
in, jimot ma bahen hita. Dingat hita ma ginomparta magira na mamorluhon
haganupan in.
5. Hita na tinompani Naibata, lang dong ubahta hubani tinompa na legan na adong i atas
tanoh on. Maningon marsihaholongan janah marsitogu-toguan do hita songon na
marsanina, ai dos do hita i lobei ni Tuhan in. Ulang ma hita marsipaetekan,
ulang adong na manganggap dirini gijangan tapi Tuhanta Sipanompa in ma pagijang
hita.

Cat: Masing-masing liturgi didukung visual (gambar atau video)

4. DODING HALELUYA NO. 313:1-2

Humbai pulou ge banua sai tarbogei do torus

Doding na mamuji Tuhan Sipanobus jolma in

Gloria, puji ma Tuhanta, Gloria, puji ma Tuhanta

Haganupan na i surga pasangapkon Naibata

Rap mandoding do sidea i lobei ni Naibata

Gloria, puji ma Tuhanta, Gloria puji ma Tuhanta

5. LITURGI II (DOSA PAKON IDOP NI UHUR)

(Pemeran: Narator, Korban/ Orang Israel, 3 halak Penyamun, Malim/ Imam, Orang Lewi,
Pemuda 1 s/d 4, Orang Samaria, Inang simada penginapan)

Nar. Marhitei idop ni uhur do hita ipaluah Tuhanta, ai lang marpamboli hita bani haluahon
in. Tapi gati do lang isadari hita in bani goluhta marsada-sada. Keegoisan, lang ra berkorban
hubani halak na mamorluhon hita, in do na gati masa bani goluh ni jolma. Sonaha do hita
patut mambalosi idop ni uhur ni Naibata?

Adegan: Sahalak Israel mardalan manuju Jeriko mamboan barang-barang na maharga. Dob
ai ia idohori 3 halak penyamun, ia ipukuli janah artani irampas. Ia pingsan janah
hampir matei. Dob ai na 3 halak ai manadingkonsi tarhatos.

Nar. Goluh ni halak na lang ibagas Tuhan daoh do humbani holong janah horja
hajahaton do na manrajaisi

Malim. (Sahalak malim lopus manimbili na tarsamun ai). Au sahalak malim i rumah
panumbahan. Lang sompat au manolong in, holi tarlambat au mangidangi, halani horjakkon
domma tarjadwal. Misir ma lah ahu. (dengan sombong)

Lewi. (Sahalak Lewi montas janah manimbili na tarsamun). Ahu sahalak Lewi, siparhorja
bani rumahni Tuhan. Nini uhurhu halani ulahni do ase songon in jaloonni. Dasar jolma na
jahat! Jolma pardosa! Ah misir ma lah ahu!

Nar. O, bangsani Naibata, ija do holongmu, ija do idopni uhurmu?

- instrument

Pmd1. Lang marlaku sonari holong, na penting hita maluah. Ise do nani na pot lalab rugi?
Pmd2. Idop ni uhur? Lang tongon ai zaman sonari on. Anggo hutolong in, gabe tarlibat ma
au, iboban hu pengadilan, isungkuni gabe saksi. Lang tarhorjahon ai, urusan diri pe lang
tarurusi. Huh. Sidearan ma misir au podas

Nar. Nini hata ni Tuhanta, haholongi ma hasomanmu songon dirimu sandiri.

Adegan: Sahalak Samaria montas janah tarsonggot mangidah na masa ai. Ia mintor
mandohori na tarsamun. Ia mamaluti luka-lukani bani kain janah manapuhon minak bani
angkulani. Dob ai ia manogu na tarsamun laho mamboansi hu partambaran.

Nar. Halak Samaria, isobut do sidea bangsa pardousa na lang talup marhasoman pakon
bangsa ni Naibata. Gok do idop ni uhurni, iurupi do na hona samun in. Ai manggoluh do bani
hata ni Tuhan in age pe lang pandei ia maobut hata ni Tuhan.

Sam. (Manuktuk labah ni sada penginapan, dob ai labah ibuka sahalak inang). Au halak
Samaria, bangsa sipardosa do au, tapi holong do uhurhu mangidah na tarsamun on, ai anggo
lang hutolong ia, ise pe lang na manolongsi be. (ia mandohori simada penginapan ai).
Inang, ijon ma lobei huondoskon hasomankon, ai na hona bogbogan do nongkan ia i dalan.
Pasal na porlu hujai, au pe martanggung jawab.

Inang. Dear bapa, tapi anggo pasal na hona bogbogan legan pahara ma ai. Anggo i
penginapannami on, na sonaha pe halakni maningon manggalar do! Holong memang holong,
tapi bisnis yah bisnis ma homa (sidea manadingkon pentas)

Nar. Ulang ma hita ra ibobai dunia on bani rosuhni, tapi totap ma hita pataridahkon holong
ni Kristus in

Pmd3. Tuhan, ajari Ham ma hanami pataridahkon buah ni holongMu in. Ai in do na tang
siharganan marimbangkon na mansahapkon tumang.

Pmd4. Tuhan, ajari Ham ma hanami maridopni uhur songon Ham, ase ulang sarupa songon
dunia on hanami. Ase ulang pitah mambotoh tapi sidalankon hataMu in ma hanami.

Nar. Idop ni uhur-Muu dearan do ai marimbang goluh. Sai pujion ni pamanganku do ham
ronsi sadokah ni dokahni.

6. PANGAKUAN/ HASASAPANNI DOSA

P : Tonggor ma bangsa na mardalan ibagas hagolapan: goluh na so manrattei, na so siat

bani aturan pakon podah. Uhur sisei na lambin hurang mambahen moru parhasomanon, moru
ma homa rasa empati, dob ni gabe lang be taridah langkah marsitogu-toguan. Lambin ari,
lambin mamingkirhon diri sandiri do goluh hajolmaon on.
K : Iakuhon hanami do ganup hahurangan ampa dousanami, hubani hasomannami
tarlobih hu-Bamu ale Tuhan. Holong ma Ham mangidah hanami pardousa on.

P : Goluhnami pe, lape ope pataridahkon buah na madear, gati do hanami holsohan
anjaha hurang porsaya dompak Ham. Urah ope hanami madabuh bani ringis ampa gila,
hengkeng janah lang ra patoruhkon diri.

K : Iakuhon hanami do hurang ni pangkagoluhkonnami bani hata-Mu. Holong ma

Ham bannami Tuhan, ulang ma mintor manringis Ham mangidah hanami

PK : (mandodingkon) Tuhan Kasihani

P : Ham ale Tuhan, holong ma Ham mangidah hanami; ai lang adong dalan haluahon
bannami anggo lang marhitei holong ampa idop ni uhur-Mu. Ai na golap do dunia on, tapi
anggo dalan-Mu in ma sondang hasintongan na so ra salpu

K : Topa Ham ma bannami uhur na bayu ase margogoh hanami mangimbang dousa

P : Marpangulaki ma uhur-Mu mangidah hanami, Ham ale Kristus na dob tubuh gabe
jolma. Kuasa-Mu do na boi paluahkon hanami humbani siding ni sibolis na bajan.

K : Ajari Ham ma hanami ale Tuhan, ase bujur hanami mandalankon parentah-Mu.

PK : (mandodingkon) Tuhan Kasihani

P : Halani ai botoh nasiam ma, Jahowa do Naibatamu, Naibata na sintong anjaha na

bonar, na manramotkon padan pakon idop ni uhur bani halak na mangkaholongisi, pakon na
manramotkon tonahNi, ronsi marribu-ribu sundut. Hasangapon ma bani Naibata i babou.

PK : Amen

7. DODING HALELUYA NO. 32:1-2+6

Riap ma hita haganup mamuji Naibata

Mesek ma pandodingta rup, Ai in do na tama, ai in do na tama

Iungkab Naibatanta in nagori atas in

Isuruh do Anak ni in, Hagoluhanta in, hagoluhanta in

Antong ganupan nasiam, pardousa na horu

Buhai uhurmu rahanan, manjalo Jesusmu, manjalo Jesusmu

8. LITURGI III (TUGAH-TUGAH PARTUBUH NI JESUS)

NARATOR1. Marratus-ratus tahun dokahni paima partubuh ni Kristus, domma

ibagahkon Naibata pasal parroh ni Mesias in marhitei hata ni nabi-nabi:

NABI MIKA. Tapi anggo ho, ale Betlehem Efrata, age pe etek ho i tongah-tongah ni
marga Juda, humbam do roh Bangku na gabe panggomgomi bani Israel, anjaha harorohanni
humbani na hinan, humbani ari na basaia. Hatahon ma hubani boru Sion, tonggor ma na roh
ma Sipaluah ho mamboban damei

NARATOR2. Salpu onom bulan isuruh Naibata ma malekat Gabriel hu sada huta i tanoh
Galilea, na margoran Nasaret, marayak sada anak-boru, tunangan ni sada dalahi, na margoran
si Josep, humbani ginompar ni si Daud; si Maria do goranni. Masuk ma malekat ai
marayaksi, anjaha nini ma:

MALEKAT. Tabi ma bamu, ale na niidopan! Ihasomani Tuhan do ham!

NARATOR1. Tapi tarsonggot do ia pasal hata ai, anjaha iparuhurhon do, atap aha do arti
ni hata tabi ai.

MALEKAT. Ulang ma mabiar ham Maria, ai dapotan idop ni uhur do ham humbani
Naibata.Tonggor ma, boratan rumah ma ham anjaha tubuhan anak; bahen ma goranni Jesus.
Banggal do Ia use, goranon do Ia Anak ni Sitimbulan in; bereon ni Naibata do Bani paratas ni
si Daud, bapani ai. Rajaanni do ginompar ni si Jakob sadokah ni dokahni, anjaha seng dong
ujung ni harajaonni ai.

MARIA. Sonaha ma parjadi ni ai, ai seng dong hutanda dalahi?

MALEKAT. Sogopan ni Tonduy Na pansing ma ham, anjaha linggoman ni hagogohon

ni Sitimbulan in; halani ai; Na pansing do goranon na sihol tubuh in, Anak ni Naibata. Anjaha
tonggor ma, si Elisabet pe, sindohormu ai, na dob targoran lambang, domma boratan rumah,
paonom bulankon ma nuan. Ai seng dong na so boi bani Naibata.

MARIA. Tonggor ma, jabolon ni Tuhan in do ahu. Sai saud ma hubangku songon na
hinatahonmu in!Nuan mandoding ma au bani Tuhan in: Ipatimbul uhurhu do Tuhan
in! Marmegah-megah do tonduyhu mangidah Naibata, Sipaluah ahu. Ai itatap do haetekon
ni jabolonni on. Tonggor ma, ai olat ni on parhatuahon ni sagala sundut ma ahu. Ai banggal
do na binahen ni Pargogoh in bangku. Na pansing do goranni ai.

NARATOR2. Ia si Josep, paramangonni ai, paruhur na pintor do, anjaha seng sihol
uhurni laho pabadorhonsi, gabe tubuh ma uhurni manirangkonsi sipsip.

JOSEP. Au pe, hubotoh do pasal hajongjonganku dompak si Maria. Na so boi

pasaudonku ganup in. sidearan ma hutadingkon si Maria. Ia sandiri ma manjalo habadoron na
sihol roh bani
MALEKAT. Tapi sanggah sonai ope sura-sura ni uhurni, iidah ma ibagas nipini malekat
ni Tuhan in, na mangkatahon hubani: O Josep, anak ni si Daud, ulang ma mabiar ho
mangalop si Maria gabe parinangonmu, ai na adong bani ai, ai ma na humbani Tonduy Na
pansing.

NARATOR1. Jadi roh ma ijia parentah humbani kesar Augustus, ase isurathon sagala
jolma na ibagas gomgomanni. Panuratan na parlobei ma ai, sanggah si Kerenius
manggomgomi tanoh Siria. Jadi misir ma haganup, ase isuratkon, ganup hu huta hasusuranni
bei. Misir ma homa si Josep hun Galilea, hun huta Nasaret, laho hu Judea, hu huta ni si Daud,
na margoran Betlehem, halani hun marga ampa humbani ginompar ni raja Daud ia.laho ma
pasuratkon dirini rap pakon si Maria, tunanganni ai, na dob boratan rumah ai.

MARIA & JOSEP. Mardalan ma sidea manuju huta Betlehem, ai ijin do huta hasusuran ni
sidea.

NARATOR. Halani holong ni uhurni Naibata hubani dunia on, ibere do anakNi gabe
jolma, roh marhitei dalan hahirion. Haganupan in aima ase jumpahan hita bani goluh
anjaha maluah humbani rahut-rahut ni sibolis.

9. DODING HALELUYA NO. 314:1-2

Doding ni malekat in, pasangapkon Tuhan in.

Na mambere hasonangan, Raja na dob tubuh in

Haganupan bangsa-bangsa, sai mamuji bani Tuhan

Jesus na hun surga in tubuh i Betlehem in

Doding ni Malekat in, pasangapkon Naibata

Ganup na i surga in, sai manombah Tuhan in

Tuhan Jesus jadi jolma, roh bai hajolmaon in

Lao mamboban haluahon, ganup dousa isalpuhon

Goran-Niin Immanuel, rapkon hita Naibata

Doding ni Malekat in, pasangapkon Naibata

10. ADVENTUS
11. : Marmalas ni uhur tumang ma ho, ale boru Sion, marolob-olob ma ho, ale boru
Jerusalem! Tonggor ma, na roh do Rajamin marayak ho; parpintor anjaha
 siparmonang do Ia. Toruh do uhurni anjaha mangajak halode, anak ni halode boru-
boru. Siaphononni do gareta porang hun Efraim ampa huda porang hun Jerusalem,
siaphononni do homa sior na pinakei marporang. Dob ai ambilankononni ma damei
bani bangsa-bangsa, anjaha gomgomanni hun laut hu laut, hun Eufrat das ronsi ujung
ni tanoh on.

Haganup halak na porsaya sirsir do paimahon Kristus Sipaluah in. Roh ma Ham ale Tuhan,
patorsa Ham ma goluhnami, ase ulang dousa manrajai hanami.

K : Ham ale Tuhan, rajai Ham ma hanami bani damei-Mu, ase margogoh hanami
mandompakkon kuasa ni dunia na lambin jahat.

P : Torus do dunia on pataridahkon hagogohonni laho mangodoh-odoh goluhni halak

na porsaya. Ham ale Tuhan, galek do hanami anggo lang kuasa-Mu manrajai hanami.

1. : Ham do na boi mambahen torang hauhuronnami ase tongtong hanami manggoluh

ibagas holong.
2. : Ham ale Kristus, kuasa-Mu do na boi manirang dousa humbani goluhnami. Daroh-
Mu do na gabe tobusan bannami.
3. : Pareksa Ham hanami bani buei ni dousa na ihorjahon hanami bani goluhnami.
Patangkas Ham ma kuasa-Mu ase pansing hanami janah talup gabe sipangihut bani
hasintongan-Mu.
4. : Ham ale Kristus, sondangi Ham ma uhurnami ase mardalan ibagas na torang janah
margogoh mantaluhon kuasa ni hagolapan in.
5. : Roh ma Ham ale Tuhan, rajai Ham ma hanami
6. : Sora na dilo-dilo: Pasirsir dalan ni Jahowa i halimisan, bahen pintor dalan na bolon
bani Naibatanta i tanoh dorging-dorging! Ganup lombang pagijangon do, anjaha
patoruhon ganup dolog ampa buntu-buntu; tanoh na marholbung-holbung padosdoson
do, anjaha gabe pamah dolog batu. Jadi talar ma hamuliaon ni Jahowa anjaha sagala
daging do mangidah ai, haganup ai pamangan ni Jahowa do mangkatahon ai.
7. : Tarimakasih ma Bamu Tuhan, ipasaud Ham do sura-sura haluahon in bannami.
Amen

11. DODING HALELUYA NO. 312:1-2

Boru Sion megah ho, megah ho Jerusalem

Ai na roh do Rajamin, siboan damei Rajamin

Boru Sion megah ho, megah ho Jerusalem

Hosiana Anak Daud, sai paluah bangsa-Mu

Sai martuah bangsa-Mu, damei nirajaan-Mu

Hosianna Anak Daud, sai paluah bangsa-Mu

 12. LITURGI IV (GOLUH NI HALAK NA PORSAYA)

Narator: Harga do bani Tuhan haganup na porsaya Bani, na bujur mandalankon

parentahNi, pakeionni do in romban hubani sura-suraNi.

Tikki bani sada panorang i huta Betlehem, masa ma lohei maningting, mahol do pargoluhan
bani panorang ijia, pala do masa hamarsikon halani hurang ni sipanganon. Sonai do homa
Elimelekh pakon parinangonni Naomi, pala do bingkat sidea hun tanoh hatubuhan ai laho
manambung pargoluhan i huta Moab.

Adegan: Alimelek pakon Naomi mardalan mamboan bohal manuju Moab.

Elimelek: Domma pala ijual hita parbagiananta i hutanta, sai andohar ma holong uhur ni
Tuhan in tene inang, ibere hubanta goluh na talup. Sai ulang be jumpahan hita bani lohei
maningting in, songon hasomanta pala mandagei hamarsikon, deba ma ai hamateian

Naomi: Tongon ma ai bapa! Anggo au mangihut do hubani sagala na madear na

binahenmu. Sai andohar ma ipasu-pasu Tuhan in suran-suranta

Adegan: Mardalan irik manadingkon pentas

INTERVAL

Narator: Tongon ma hape tene, na manggoluh on lang tarbahen ganup mardalan songon na
sinura. Dob das sidea i Moab, sedo malasni uhur na jumpah sidea. Marujung goluh ma ijai
paramangonni si Naomi. Maruntun do pusok ni uhur jumpahsi. Lang piga dokah dob
mambuat boru niombahni si Mahlon pakon Kilion, lanjar marujung goluh do homa sidea na
dua.

Adegan: Naomi pakon dua parumaenni sanggah hundul-hundul

Naomi: Mulak ma nasiam, inang, ai domma matua tu ahu anggo marparamangon ahu use.
Porini pe huhatahon: Adong ope pangarapan bangku, anjaha borngin on ope marparamangon
ahu, anjaha tubuhan anak ahu, tor tarpaima nasiam ma sidea paima magodang?

Orpa: Huahap pe dearan ma hutadingkon ham inang, ganjang ope goluh sidalanonku
pakon paramangonku magira anggo jumpah au. Misir ma au inang, sai horas-horas ma
nasiam.

Adegan: Orpa manadingkon pentas tapi Rut totap do martahan lang miut.
Naomi: Ulang be goran nasiam ahu si Naomi, goran nasiam ma ahu si Mara, ai paet
tumang do pambahenan ni Pargogoh na so tarimbang in hubangku. Misir ma ham homa,
tadingkon ma ahu!

Rut: Ulang ma sai ajar-ajari ham ahu manadingkon ham, barang sirang humbamu; ia
huja ham laho, hujai do ahu laho, ia huja ham marianan, hujai do ahu marianan; bangsamu
mando bangsangku, anjaha Naibatamu mando Naibatangku.

Narator: Dob na masa ai gabe mulak ma sidea use hu huta hasusuranni hu Betlehem, age
pe lang adong sijumpahkononni sidea ijai, ai domma bois ganup tikki parborhat ni sidea na
hinan.

Adegan: Mardalan manadingkon pentas

INTERVAL

Narator: Tapi adong ma bani si Naomi sada hade-hade mangihutkon paramangonni hinan,
na bayak tumang, hasoman samarga ni si Elimelek, na margoran si Boas

Adegan: Naomi pakon Rut das i Betlehem janah manrageihon bohal ni sidea

Rut: Mahua lopas ham ma ahu laho hu juma manjomputi buyur ni gandum mangirik-
irik halak na maridop ni uhur mangidah ahu.

Naomi: (marpingkir manimbang-nimbang) Laho ma ham, inang

INTERVAL

Adegan: Rut ipudini parhorja ni Boas, pongkut patumpuhon sulei-sulei ni gandum.

Sasahali taridah ia marsahapi pakon parhorja ai.

Narator: Bujur do anggo si Rut mandompakkon parhorjani si Boas anjaha basar do ia

patugahkon hajongjonganni, ai boru asing do ia mangihutkon simatuani.

Adegan: Boas hujai hujon mangawasi parhorjani. Taridah Boas sanggah marhorja pakon
sahalak parhorjani.

Boas: Ai ise do ambia anak boru na mangihut-ihut hun pudi an, na patumpuhon bulir
ni sima-sima ni gandum on.

Parhorja: Si Rut do ai tuan, sada halak Moab na binobanni simatuani si Naomi. Halak na
bujur do in anjaha porsaya hubani Jahowa.
Narator: Bagas do iparuhurhon si Boas pasal in anjaha holong do uhurni mangidah si Rut
sonai homa age si Naomi, ai hade-hade ope ai bani. Gabe ibahen do partobusan hubani tanoh
ni sidea na hinan janah iondoskon do ai hubani sidea.

Adegan: Boas mardalan mandohori Rut

Boas: Tangar ham ma hatangkon botou! Ulang ma ham laho manjomputi bani ladang na
legan, ulang ma laho ham hunjon, tapi sai ilambung ni jabolonku naboru in ma ham!

Rut: (manowod i lobei ni Boas) Aha do dalanni, ase dapotan idop ni uhur ahu i
lobeimu, gabe isarihon uhurmu ahu, ahu halak dagang on?

Boas: Domma hubogei haganup, sagala na binahenmu hubani simatuamu, dobkonsi

matei paramangonmu, naha panadingkonmu bani namatorasmu pakon tanoh hatubuhanmu,
gabe laho ham marayak bangsa na so tinandamu. Sai Naibata ma mambalaskon hubamu
sagala na madear na binahenmu ai, anjaha upah na gok ma bagianmu humbani Jahowa,
Naibata ni Israel, na pinarayakmu laho maronding-onding hutoruh ni habongni.

Narator: Si Rut aima sada inang na bujur anjaha holong hubani simatuani, janah porsaya
hubani Tuhan. Jumpahan pasu-pasu do ia, ai ibuat si Boas do ia gabe parinangonni. Si Ruth
manubuhkon si Obed aima bapani si Isai, janah si Isai ma bapani si Daud na mangkasusurhon
Tuhan Jesus Kristus.

13. DODING HALELUYA NO. 39:1-2 (* Pagara Lilin)

Sonangni, bornginni in, sanggah roh Jesus in

Sonang modom do halak ganup dua mando na puho in rup

Mangoromi AnakNi Jesus Tuhanta in

Dear ni bornginni in sanggah roh Jesus in

Bai parmahan i Betlehem in, ipatugah na hun surga in

Domma roh Sipagoluh, Jesus Tuhanta in

Buei ni tuah ijin, sanggah roh Jesus in

Tor maluah pardousa use, humbai hamagouanNi hape

Ben na roh Sipagoluh, Jesus Tuhanta in.

*Pagara Lilin :
 1. Parambilan
2. Pengantar Jemaat
3. Ketua Seksi Bapa
4. Ketua Seksi Wanita
5. Ketua Seksi Pemuda
6. Ketua Seksi S.Minggu
7. Mewakili Anggota Seksi Bapa

14. AMBILAN

15. DODING HALELUYA NO. 385:1-2 (Patumpu Galangan)

Ai domma tubuh saborngin on, Panondang ni dunia on.

Usih songon angkulanta in, Immanuel goran-Nin.

Tarbogei doding ni malekat, i talun Efrata.

Mamuji Tuhanta na sangap, panggomgom na totap.

Age sombuh partubuh-Ni in, daulat do tong uhur-Ni in

Ase ganup na tinompa in mamuji goran-Nin.

Ai Ia simada kuasa, gok bai do ganup in.

Mangimbang sibolis ge dousa, seng dong usihan-Nin.

16. TONGGO PANUTUP/ PASU-PASU

P : Ham ale Tuhan, ibotoh hanami do partubuh-Mu hu dunia on, in ma na

laho patorsahon goluhnami janah pabayuhon hanami usih songon bohi-Mu. Sirsir do hanami
gabe parhiteian ni holong-Mu hubani hasoman jolma.

K : Marmalas ni uhur do hanami Tuhan bani haluahon marhitei partubuh-Mu. Damei-Mu

ma na tongtong manrajai hanami sadokah goluhnami.

P : Goki Ham ma hanami marhitei kuasa-Mu laho pataridahkon haluahon in bani tanoh
on, ase lambin marmulia goran-Mu bani bangsa-bangsa.

K : Goluhnami pe gabe pasu-pasu ma bani keluarga ampa hasoman janah holong ni

Kristus ma manrajai goluhnami.
P : Domma ipatumpu hanami galangannami na gabe tanda tarimakasih bani ganup pasu-
pasu-Mu bani goluhnami.

K : Gok malasn ni uhur do hanami bani Pesta Natal on na sai tongtong paratahkon
uhurnami bani banggal ni holong-Mu.

P : Jalo anjaha papansing Ham ma galangannami on ale Tuhan, age pe anggo irimang-
rimangi hanami na so sadiha on marimbang bueini pasu-pasu-Mu bannami.

K : Pasu-pasu Ham ma hanami ase tongtong pataridahkon goluh sipambalosi, tarlobih ma

ai i tongah-tongah ni seksi Pemuda bani kuria-Mu, ase gabe saksi hanami bani harajaon-Mu i
tanoh on.

P : Riap ma hita martonggo, songon tonggo na pinodahkon ni Tuhan Jesus hubani susian-
Ni:

PK : Ham Bapanami na i nagori atas

P : Jalo hita/ Ham ma pasu-pasu humbani Tuhan Naibata: Idopni uhur. Amen

POSTLUDIUM

1. Mandodingkon: We Wish You A Marry Christmas

We wish you a Merry Christmas

We wish you a Merry Christmas

We wish you a Merry Christmas

And Happy New Year

13 November 2017

dalam "Tata Ibadah"