TATA IBADAH

HUT SEKSI NAMAPOSO GKPS

TAHUN 2022

NATAL II
26 DESEMBER 2022

Tema:
Hasadaon pakon Pangidangion na Marbuah
(Kolosse 1:10)

Sub Tema:
“Mangarahkon Kuria Marsitungkolan pakon
Marsipatoguhan ampa Marsipardiateian Mandompakkon
Paruntolon ni Goluh.”
1. Dilo-dilo Marhasadaon
P. Horas. Selamat Natal ma hubanta.
Bapa, Inang, pakon Hasoman, bani na mandalankon horja pandiloon
ampa suruhan ni Tuhan i tongah-tongah ni GKPS, itotapkon GKPS do
Badan Pelayanan bani na mandalankon horja pangidangionni bani
bidang kategorial. Salah sada seksi kategorial ai aima Kategorial
Namaposo, na isobut hita Seksi Namaposo GKPS. Bani tanggal 26
Desember 1953 do jongjong Seksi Namaposo on, anjaha bani panorang
ibadah Natal II sadari on, ipestahon hita do parjongjong ni Seksi
Namaposo GKPS. Ibadah HUT Seksi Namaposo GKPS on iadongkon
hita marhasoman Tema: Hasadaon pakon Pangidangion na Marbuah,
pakon topik Mingguan banta sadarion aima: Domma Talar Idop ni Uhur
ni Naibata.
Ase, pasirsir hita ma dirinta, pungkah hita ma ibadahta.

2. Saat Teduh

3. Pagara Lilin
(Pengantar Jemaat pakon Ketua Seksi Namaposo pagarahon 2 buah lilin)

4. Votum, Introitus, Tonggo (P. = Paragenda; K. = Kuria; Nmp. = Namaposo)

P. Riap ma hita jongjong!
Ibagas Goran ni Naibata Bapa pakon Tuhan Jesus Kristus ampa Tonduy Na
Pansing, Sitompa langit pakon tanoh on. Amen.
“Gabe daging ma Hata in, anjaha marianan i tongah-tongahta;
K. Jadi iidah hanami ma hasangapon-Ni songon hasangapon ni Anak sasada
humbani Bapa in,
Nmp. Gok idop ni uhur ampa hasintongan.
P. Haleluya. Haleluya. Haleluya.
K. (mandodingkon) Haleluya. Haleluya. Haleluya.
P. Martonggo ma hita!
Ham Tuhan Naibata Bapanami, Paridop ni uhur na tarsulur. Puji-pujian,
hasangapon pakon tarima kasih ma isombahkon hanami hu Bamu,
mardingat na dob isuruh Ham Anak-Mu Jesus Kristus hu bannami jolma.
Gabe madoyuk janah sombuh do Ia, tubuh i huta Betlehem bani harang ni
pinahan, ase gabe bayak hanami. Pasaor Ham ma diri-Mu marhitei Tonduy-
Mu, ase lambin ididah hanami banggal ni pangkopkopon-Mu bannami
marhitei Jesus Kristus. Amen.

1
 (hundul Kuria)

5. Doding (Haleluya No. 32:1-2, 7)

Riap ma hita haganup, mamuji Naibata.
Mesek ma pandodingta rup, ai in do na tama, ai in do na tama.

Iungkab Naibatanta in, Nagori atas in.

Isuruh do Anak-Ni in, hagoluhanta in, hagoluhanta in.

Ringgas ma hita haganup, mamuji Naibata.

Gomos ma pandodingta rup, Amen, Haleluya, Amen, Haleluya.

6. Hasasapan ni Dousa
P. Riap ma hita jongjong!
Martonggo ma hita, sopotkon hita ma dousanta hubani Tuhan Naibata.
Ham Tuhan Naibata Bapanami paridop ni uhur hubani jolma pardousa.
Domma iberehon Ham Anak-Mu Jesus Kristus gabe jolma anjaha manaron
hahirion pakon hadoyukon, pala matei tarsilang laho mangkopkop hanami
anjaha mulak manggoluh, naik hu nagori atas laho mangapiti hanami. Tapi
gati do lang iahapkon hanami banggal ni pangkopkop-Mu in bannami, janah
gati homa seng ihargahon hanami in bani goluhnami. Haganupan in, in ma
pangkorhon ni gijang ni uhur, hampung janah hurang ni pangarusionnami.
On pe na roh do hanami hu Bamu mansopotkon dousanami. Sai palumbang
Ham ma uhur-Mu, sasap Ham ma dousanami. Pargogohi Ham ma hanami
laho manangihon hata-Mu, ase lambin ididah, iahapkon janah iarusi hanami
na dob ihopkop Ham do hanami. Ajari Ham ma hanami, ase ibotoh hanami
martarimakasih marhiteihon ni uhur, hata ampa pambahenannami. Jalo
Ham ma tonggo elek-eleknami on ibagas goran ni Anak-Mu Jesus Kristus,
Sipaluah hanami. Amen.
Tangar anjaha haporsayai hita ma Hata ni Naibata, bagah-bagah pasal
hasasapan ni dousa.
“Ai sonon do holong ni uhur-Ni Naibata bani dunia on, pala do Anak-Ni na
sasada in iberehon, ase ulang magou ganup na porsaya Bani, tapi ase
hagoluhan na sadokah ni dokahni bani.”
Ibagas holong ni Naibata, domma isasap haganup dousanta. Halani ai,
pataridahkon hita ma tanda-tanda ni pargoluhon na bayu. Hasangapon ma
bani Naibata i babou.
K. Amen.
(hundul Kuria)
2
7. Doding (Ge Pe Gerger)
Halani ai, oh hasoman, haganupan hita da, hita da.
Ulang lupa hita da bai Hata ni Tuhan in.
Porini au, oh Tuhanku, na manlanggar titah-Mu, titahMu.
Ulang moru holong-Mu bangku na pardousa on.

Ge pe gerger dousanta songon pargerger ni hiou hasumba.

Gabe putih boi ibahen Ham songon parputih ni kapas.

Halani ai, oh hasoman, haganupan hita da, hita da.

Ulang lupa hita da bai Hata ni Tuhan in.
Porini au, oh Tuhanku, na manlanggar titah-Mu, titah-Mu.
Ulang moru holong-Mu bangku na pardousa on.

Ge pe gerger dousanta songon pargerger ni hiou hasumba.

Gabe putih boi ibahen Ham songon parputih ni kapas.
Hubanta pardousa on. Hubanta pardousa on.
Hubanta pardousa on. Hubanta pardousa on.

8. Hata Haporsayaon
P. Riap ma hita jongjong!
Saksihon hita ma haporsayaonta in, songon na sinaksihon ni haganup
halak na porsaya bani sab tanoh on!
P. + K. Ahu porsaya bani Naibata Bapa, ..... Amen.
(hundul Kuria)

9. Acara Khusus:
a. Mambasa Tonah ni Pimpinan Sinode GKPS
b. Mandodingkon Mars Namaposo GKPS
c. Refleksi HUT Seksi Namaposo GKPS :Mambasa Umpasa
d. Vokal Grup Namaposo: Tunas Namajenges
e. Tingting Kuria
f. Tonggo Pangapition

10. Doding (Pribadi yang Mengenal Hatiku)

S’perti rusa yang haus rindu aliran sungai-Mu.
Hatiku tak tahan menunggu-Mu.
3
 Bagai tanah gersang menanti datangnya hujan.
Begitu pun jiwaku Tuhan.

Hanya Engkau Pribadi yang mengenal hatiku,

tiada yang tersembunyi bagi-Mu, s’luruh isi hatiku Kau tahu.
Dan bawaku ‘tuk lebih dekat lagi pada-Mu,
tinggal dalam indahnya dekapan kasih-Mu.

11. Ambilan (Titus 2:11-15)

12. Galangan
Parambilan Paima iondoskon hita galanganta, tangar hita ma lobei hata ni Naibata
na gabe onjolan banta laho manggalang, aima na tarsurat bani Jona
2:10, “Tapi anggo ahu marhasoman sora puji-pujian do ahu
manggalang Bamu, galaronku do na dob hubagahkon. Bani Jahowa
do haluahon.”

Sonari ondoskon hita ma galanganta!

Kuria (mandodingkon: Ondos Ganupan)

Anggo seng Jahowa na pauli rumah,
soya-soya do si panukangni in.
Anggo seng Jahowa na manramotkon huta,
soya-soya do halak na manjaga.

Ge girah pe puho lang ondos bani Tuhan,

soya-soya do na ipungkahni in.
Ge dokah pe modom lang dong ibagas Tuhan,
soya-soya do na ihorjahon in.

Ondos ganupan bai sagala horjamu.

Ondos bai Tuhan ganup pingkiranmin.
Ai bani Tuhan torsa do ganupan,
sai marondos ma hita ganup.

13. Tonggo pakon Doding Galangan

Parambilan Riap ma hita jongjong!
Martonggo ma hita mangondoskon galanganta hubani Naibata!
4
 Ham Tuhan Naibata, simada hanami pakon haganup goluhnami.
Tarima kasih ma hatahononnami hu Bamu, halani iparmudu-mudu,
iparorot janah ipasu-pasu Ham do goluhnami. Ibere Ham do homa
parhiouon, hajorgiton, sipanganon pakon siinumon ronsi na porlu
bani goluhnami. Tanda ni tarima kasihnami, iondoskon hanami do hu
Bamu goluh pakon pasu-pasu na dob binere-Mu, na ipatumpu
hanami on gabe galangannami. Papansing anjaha pasu-pasu Ham
ma on gabe galangan na misbou i lobei-Mu bahen hasangapon-Mu
janah mambahen lambin marhataridahan harajaon-Mu i dunia on.
Sai tambahi Ham ma pasu-pasu-Mu janah sai lambin paganda Ham
ma holong ni atei-Mu hu bannami. Ajari Ham ma hanami, ase lambin
igalangkon hanami dirinami pakon hinadongannami hubani harajaon-
Mu bahen hamuliaon-Mu, ibagas goran ni Anak-Mu Jesus Kristus,
Sipaluah hanami. Amen.

Kuria (mandodingkon Haleluya No. 340:1)

Huondoskon bani Jesus haganupan diringkon.
Ia do pasangaponku sadokah bai goluhkon.
Huondoskon ma, huondoskon ma,
bani Jesus Sipaluah huondoskon ma.

14. Tonggo Ham Bapanami

Parambilan Ham Bapanami na i nagori atas. Sai na papansing ma Goran-Mu.
Sai roh ma harajaon-Mu. Sai saud ma harosuh ni uhur-Mu i nagori
tongah on songon na i nagori atas. Bere Ham ma bannami sadari on
hagoluhan ari-ari. Sasap Ham ma dousanami songon panasapnami
bani dousa ni hasoman na mardousa dompak hanami. Ulang hanami
bobai Ham hu parlajouan. Paluah Ham ma hanami humbani
pangagou.
Kuria (mandodingkon)
Ai Ham do simada Harajaon pakon Hagogohon
ampa Hasangapon sadokah ni dokahni. Amen.

15. Paingkatkon
Parambilan Sora ni Tuhan mangkatahon, “Ise do suruhon-Ku? Ise do
utusannami?
Kuria Ijon do hanam Tuhani, suruh Ham ma hanami.

Parambilan
5
 & Kuria (mandodingkon: Refrein ni Haleluya No. 299:2)
Laho ma hita misir ma hita, mangambilankon Tuhan parholong in.
Ase maluah homa hasomanta, gabe manggoluh bai Tuhanta in.

16. Pasu-pasu
Parambilan Jalo ham (hita) ma pasu-pasu humbani Tuhan Naibatanta:
Ipasu-pasu anjaha iparorot Tuhan Naibata ma ham (hita).
Isondangkon Tuhan Naibata ma bohi-Ni hu bamu (hu banta) janah
maidop ma uhur-Ni mangidah ham (hita). Idompakkon Tuhan
Naibata na bohi-Ni hu bamu (hu banta) janah ipasorap ma damei-Ni
bani tonduymu (tonduyta bei). Amen.
Kuria (mandodingkon) Amen. Amen. Amen.

6
Vokal Grup Namaposo: Tunas Namajenges
Tonggor ma Tuhan haganup kuriaMu, laho marsombah manrogop hu Bamu.
Bere Ham bannami uhur na totap toguh, laho mamuji pasangapkon GoranMu.
Nasiam hasoman haganup naposo in, marsada ma ibagas Jesus in.
Ambugkon ham ma uhurmu na lekluk in, totap bujur ma ham manjalo Jesus in.

Ge buei pe paruntolon na roh bamu, totap bujur ma ham manjalo Jesus in.
Oh.. oh.. oh... oh… malas ma uhurta in. Domma roh Jesus in lao paluahkon ham.
Hita ma hape tunas namajenges, batu na toguh agepe roh logou bolon in.

Sai urupi Ham hanami on ganup naposo in marsada uhur ibagas Jesus in.
Lao mangkorjahon titahMu in Naibata hasomankin.
Hita do saksi Kristus in.

Refleksi HUT Seksi Namaposo GKPS: Umpasa

1. Hayu na lang ongga melus,
ulang mintor hona sinso.
Sadarion ipestahon hita partubuhni Jesus,
dihut homa partubuhni Seksi Namaposo.

2. Marsaran ibagas sopou.

Irik marmasak bani tataring.
Selamat ulang tahun seksi namaposo.
Totap marsada, ulang dong na tading.

3. Anggo dapot ma juara,

ijalo ma sortali.
Anggo sihol hita marsada,
ialo ma mamorluhon diri sandiri.

4. I pulau Jawa adong huta na margoran Jogja,

i pulau Sumatera adong huta Duri.
Tulimat ma hita marhorja,
7
 ase dapotan na sinari.

5. Ipatumpu ma lowoh,
iboan hu Tambun Marisi.
Ulang halani lalap martiktok,
gabe sundat ujian skripsi.

6. Marodor ma porkis,
marganjang bani dingding.
Padaoh ma ringis ampa sibolis,
etah ma hita mandoding.