TATA IBADAH

NATAL NAMAPOSO GKPS

TAHUN 2023

TEMA:
“Hasadaon pakon Pangidangion na Marbuah.”
(Kolosse 1:10)

SUB TEMA:
“Marmalas ni Uhur ma Hita Pataridahkon Buah ni Haluahonta anjaha Gabe
Pasu-pasu i Tongah-tongah ni Gareja, Masyarakat, ampa Negara Tanda ni na
dob Matoras Haporsayaonta.”
(1 Tessalonika 5:16-18; Jesaya 9:2; Psalmen 118:24)
A. Prosesi Petugas Ibadah
Mandoding humbani Haleluya No. 317: 1-2
Martumpu ma hita malas ma uhurta laho ma hita hu Betlehem.
Tonggor malekat mamuji Tuhanta. Sai sombah puji Ia,
sai sombah puji Ia, sai sombah puji Ia, Rajanta in.

Mandoding ganupan malekat ni Tuhan, rap pakon jolma mandoding ma.

Puji Tuhanta Sipaluah hita. Sai sombah puji Ia,
sai sombah puji Ia, sai sombah puji Ia, Rajanta in.

B. Pagara Lilin Natal

1. Parambilan
2. Pimpinan Majelis Jemaat
3. Ketua Seksi Namaposo
4. Ketua Panitia Natal Namaposo
5. Pembimbing Seksi Namaposo
6. Mewakili Namaposo
7. Mewakili Orang Tua

C. Ibadah
1. Votum, Introitus, Tonggo
P. Riap ma hita jongjong.
Ibagas Goran ni Naibata Bapa pakon Tuhan Jesus Kristus ampa
Tonduy Napansing, Sitompa langit pakon tanoh on. Amen.
“Tubuhan Anak ma ia, anjaha bahen ma goranni Jesus,
K. ai paluahonNi do bangsani humbani dousa ni sidea.
P. Haleluya. Martonggo ma hita.
Ham Bapanami na i nagori atas, puji-pujian ampa hata tarima
kasih ipadas hanami hu Bamu, bani na dob ibere Ham AnakMu,
Jesus Kristus, gabe Sipaluah bannami humbani dousa pakon
hamateian. Martumpu do nuan hanami nuan bani Natal
Namaposo GKPS, ase ipasu-pasu Ham ma hanami marhitei
ibadah pakon perayaan Natal nami on. Ibagas Goranni AnakMu,
Jesus Kristus, ipadas hanami tonggonami on hu Bamu. Amen.
Natal Namaposo GKPS Tahun 2023| 1
 (hundul Kuria)

2. Mandoding humbani Haleluya No. 313:1-2

Humbai pulo ‘ge banua sai tarbogei do torus.
Doding na mamuji Tuhan Sipanobus jolma in.
Glo…..ria puji ma Tuhanta. Glo…….ria, puji ma Tuhanta.

Haganupan na i surga pasangapkon Naibata.

Rap mandoding do sidea i lobei ni Naibata.
Glo…..ria puji ma Tuhanta. Glo…….ria, puji ma Tuhanta.

3. Liturgi 1: Tinompa ni Naibata

P. Kawahkon hita ma tanoh on. Tinompa ni Naibata do haganup
na dong i tanoh on. Laut, dolog, bah, suan-suanan, mataniari,
manuk-manuk, ronsi jolma, jenges do ganup itompa Naibata.

1 Bani mungkahni, golap do ganup. Lungun do age ija. Marsahap

do Naibata, ase jadi ma na lihar. Gabe lihar ma tongon.

2 Bani mungkahni, seng dong langit i tanoh on. Maragu do na i

atas pakon na i toruh in. Marsahap ma Naibata ase jadi ma
hajang-kajang. Adong ma langit na gabe parsirangan ni bah na i
toruh humbani bah na i atas ni hajang-kajang ai.

3 Bani mungkahni lang ope adong tanoh na pataridahkon ianan

na horah. Marsahap ma Naibata ase martumpu ma sagala bah
na i toruh ni langit in hubani sada ianan, ase taridah na horah,
na patubuhkon poyon-poyon, suan-suanan, pakon hayu.

4 Bani mungkahni lape dong panondang i hajang-kajang, na

manirang arian pakon borngin. Itompa Naibata ma dua
panondang bolon. Panondang sibanggalan ai manrajai arian,
panondang sietekan ai manrajai borngin.

Natal Namaposo GKPS Tahun 2023| 2

 5 Bani mungkahni lape adong na manggoluh na ibagas bah ai.
Anjaha lape adong na habang i atas ni tanoh. Marsahap ma
Naibata, itompa ma binatang laut pakon manuk-manuk na
marhabong.

6 Bani mungkahni lape adong tinompa na manggoluh i tanoh on.

Jadi marsahap ma Naibata, itompa ma pinahan pakon binatang
na manjulur pakon na i talun marsiboan masamni. Anjaha
itompa Naibata do homa jolma in, usih songon rupa ni Naibata.

7 Sonai ma pardob ni langit, tanoh in ampa haganup isini. Ipasu-

pasu anjaha ipapansing Naibata ma sagala na tinompa in,
anjaha marsaran ma Ia bani ari papituhon ai. Amen.

4. Mandoding humbani Haleluya No. 314:1-2

Doding ni malekat in, pasangapkon Tuhan in.
Na mambere hasonangan, Raja na dob tubuh in.
Haganupan bangsa-bangsa, sai mamuji bani Tuhan
Jesus na hun surga in tubuh i Betlehem in,
doding ni malekat in pasangapkon Tuhan in.

Ganup na i surga in, sai manombah Tuhan in.

Tuhan Jesus jadi jolma, roh bai hajolmaon in.
Lao mamboan haluahon, ganup dousa isalpuhon.
goranNiin Immanuel, rapkon hita Tuhan in.
doding ni malekat in, pasangapkon Tuhan in.

5. Liturgi 2: Dousa ni Jolma

P. Jolma, na tinompani Naibata usih do songon rupani, marosuh
bani na lobih. Tapi ilanggar jolma in do parentah ni Naibata.
Gabe madabuh ma sidea hubagas dousa, anjaha manggoluh ma
jolma in bani buei ni panghorhonni dousa.

Natal Namaposo GKPS Tahun 2023| 3

Subil: Au aima si subil. Seng marosuh au anggo dong na legan
na lobih humbangku. Ibotoh nasiam do paboa sonari on
sanggah masa do biakni hajolmaon, “Megah mangidah
paruntolon ni halak, anjaha maruntol mangidah
hamegahon ni halak?” Halani subil ma ai.

Judi: Adong chip mu? Bere lobei bangku pala 3b, ase mar-
scatter (basa: sketer) au. Judi ma goranni ai. Sonari, na
marjudi lang be porlu martumpu-tumpu pakon
hasoman bani sada ianan. Sahalak diri pe boi do marjudi
online nuan on. Kalah penasaran, menang ketagihan.
Bois uang sikolah pakon belanja bulananku hubaen
halani na marjudi online on.

Gijang
ni uhur: “Ha ha ha… tonggor ma, jenges ni in tasku on bah.
Bajuku pe model terbaru janah mahal homa. Seng dong
hasomanku na legan na boi mamboli songon on. Pitah
au hansa.” Jolma na masombuh do ganupan in. Seng
songon au, bayak janah marhinadongan. Bahat do
duitku. Ase ibotoh nasiam, sonari on marlumba-lumba
do halak pataridahkon hinadonganni pakon aktivitasni
marhitei Facebook live, Instastory live, pakon TikTok live.
Tubuh do gijang ni uhur pangkorhonni ai.

Panggosip: Tukang gosip do au. Bahasa keren ni sonari aima ghibah.

Marosuh tumang do au mansahap-sahapi hahurangan
ni halak sanggah lang ijin halakni. Halani sifatku on, boi
do au mam-provokasi halak na legan anjaha maseda do
parsaoranni halak hubaen.

Pangoto-otoi: Ai ise gatni hita na martumpu ijon na lang ongga

mangoto-otoi? Pasti ongga do, kan? Sodap do na
mangoto-otoi on. Boi do huatur-atur halak na legan,
Natal Namaposo GKPS Tahun 2023| 4
 tarmasuk orang tuaku. Huoto-otoi sidea pasal uang
kuliah, belanja bulananku, pakon nilai ni ujianku.
Porsaya do sidea lalap. Ai lang gabe marosuh ma au
torus mangoto-otoi sidea.

6. Mandoding humbani Haleluya No. 38:1-2

I Betlehem do tubuh Anak na banta in.
In do halak na bujur, hu todoh Rajangkin.
In do, in do hutodoh Rajangkin.

Gok bai holong ateiNi na mando uhurhon.

Hubere ma hu Bani ganup na bangku on.
Nai ma, nai ma ganup na bangku on.

7. Liturgi 3: Bagah-bagah ni Naibata

P. Harga do jolma in bani Naibata. Age pe domma madabuh
hubagas dousa anjaha manggoluh ibagas hisap-hisap ni daging,
sirsir do Naibata paluahkon jolma in. Marulak-ulak do ipadas
Naibata bagah-bagah pasal haluahon in hubani jolma.

1 Jesaya 7:14-15
Halani ai bereon ni Tuhan sandiri ma bannima sada tanda,
ʻTonggor ma, boratan rumah ma sada anak boru, anjaha
tubuhkononni ma sada anak, anjaha bahenonni ma goranni:
Immanuel.ʼ Mantega pakon manisan do sipanganonni, paima
ibotoh manulak na jahat ampa mamilih na madear.

2 Jesaya 9:5-6
Ai domma tubuh banta sada na etek-etek, ibere do banta sada
anak, tampei bani abarani do panggomgomion, anjaha ibahen
do goran-Ni: Paruhur Halongangan, Naibata Parkuasa, Bapa
sadokah ni dokahni, Raja Damei. Parrarat ni harajaon-Ni ampa
hadameion-Ni seng marpunsa ai bani hotak ni si Daud ampa
bani harajaonni, halani ipatotap anjaha ipatoguh do ai marhitei
Natal Namaposo GKPS Tahun 2023| 5
 uhum pakon hapintoron humbani sonari nari ronsi sadokah ni
dokahni. Simburu ni Jahowa Zebaot do mambahen sonai.

3 Jesaya 11:1-2
Dob ai mandarat ma sada tunas humbani tutuho ni si Isai,
anjaha marbuah sada tumbor na roh humbani uratni. Sogop ma
hubani Tonduy ni Jahowa, tonduy hauhuron ampa pangarusion,
tonduy panuturion ampa hagogohon, tonduy habotohon ampa
biar bani Jahowa.

4 Jesaya 32:1-3
Tonggor ma, ibagas hapintoron marrajai sada raja, anjaha
pambobai romban hubani habonaron manggomgom. Anjaha
ganup sidea songon parlingodan humbani logou madoras do,
songon panisioan humbani haba-haba, songon bah mardalan
bani tanoh na horah, anjaha songon linggom ni dolog batu na
banggal i tanoh dorging-dorging. Jadi seng be tutupon mata ni
halak na marpangidah, anjaha tangi do pinggol ni halak na
marpanangar.

5 Jesaya 55:3-4
Pateleng pinggolnima, anjaha roh ma hanima hu Bangku!
Tangihon ma, ase manggoluh tonduynima! Bahenon-Ku do
bannima padan sisadokah ni dokahni, ai ma idop ni uhur na
bani si Daud, na manongtong in. Tonggor ma, Hubahen do ia
gabe hasaksian bani bangsa-bangsa, gabe raja pakon
panggomgom bani bangsa-bangsa. Amen.

8. Galangan Pujian (Koor/Vokal Grup)

9. Mandoding humbani Haleluya No. 39:1-2

Sonangni, bornginni in, sanggah roh Jesus in.
Sonang modom do halak ganup dua mando na puho in rup.
Mangoromi AnakNi Jesus Tuhanta in.
Natal Namaposo GKPS Tahun 2023| 6
 Dear ni bornginni in sanggah roh Jesus in.
Bai parmahan i Betlehem in, ipatugah na hun surga in.
Domma roh Sipagoluh, Jesus Tuhanta in.

10. Liturgi 4: Hata in na Gabe Daging

P. Igoki Naibata do bagah-bagahNi in marhitei partubuh ni
AnakNi, Jesus Kristus. Hata na dob pinadas ni Naibata ai domma
gabe daging anjaha marianan i tongah-tongah ni jolma.

1 Bani mungkahni domma adong Hata in, anjaha rap pakon

Naibata do Hata in, anjaha Naibata do Hata in. Rap do in pakon
Naibata bani mungkahni.

2 Haganup marhiteihon-Si do ase adong, anjaha seng dong na

dob dong in, na so marhiteihon-Si. Ibagas Hata in do hagoluhan,
anjaha hagoluhan in do panondang ni hajolmaon,

3 Na marsinondang do panondang in ibagas na golap, tapi seng

ijalo na golap in. Bangkit ma sada halak, na sinuruh ni Naibata,
na margoran si Johannes.

4 Laho manaksihon do ia ase roh, ase isaksihon panondang in,

ase haganup porsaya marhiteihonsi. Seng ia panondang in, tapi
sisaksihon panondang in do ia.

5 Panondang na sintong in, na manondangi ganup jolma do, na

roh hu dunia on. I dunia on hinan do Ia, anjaha marhiteihon-Si
do adong dunia on, hape seng itanda dunia on Ia.

6 Na roh do Ia marayak na dong Bani, tapi seng ijalo na dong Bani

in Ia. Tapi barang piga na manjalo-Si, hujai do ibere kuasa, ase
gabe anak ni Naibata sidea, ai ma na porsaya bani goran-Ni.

Natal Namaposo GKPS Tahun 2023| 7

 7 Ai ma na so tubuh humbani daroh barang humbani rosuh ni
daging barang humbani rosuh ni dalahi, tapi humbani Naibata
do.

8 Gabe daging ma Hata in anjaha marianan i tongah-tongahta;

jadi ididah hanami ma hasangapon-Ni songon hasangapon ni
Anak Sasada na humbani Bapa in, gok idop ni uhur ampa
hasintongan. Amen.

11. Mandoding humbani Haleluya No. 315:1-2

Sangap, sangap bani Jesus Tuhankin,
na roh do Ham hun surga hun rumahMu.
Sangap, sangap bani parrohMu hu tanoh on
gabe doskon jolma Tuhan parholong in, sangap, sangap.

Haganup parmahan jalo ma tongon,

barita malas uhur hun surga in.
Ai saborngin on do tubuh Tuhan Jesus in,
ai tibal do Ia bani palangka in, sangap, sangap.

12. Liturgi 5: Parhatuahon na Ualuh in

P. Martuah ma hita, na manjalohon parrohni Tuhan in marhitei
partubuhni Jesus Kristus i Betlehem. Porsaya do hita pasal ai,
ase porsaya ma hita homa bani Hatani Jesus Kristus pasal
hatuahon in.

1 Maluah ma haluhui,
seng boi tangkapon das hu tongah borngin.
Martuah ma na sombuh tonduy,
ai bani sidea do harajaon nagori atas in.

2 Marsikolah ulang maruhur-uhur,

age sonari kurikulum domma merdeka.
Martuah ma na pusok uhur,
Natal Namaposo GKPS Tahun 2023| 8
 ai siapohan do sidea.

3 Siluah ni par Bandar Maruhur,

radei jenges ibagas tombuan.
Martuah ma na lamlam uhur,
ai teanon ni sidea do tanoh on.

4 Maluah ma susur bani raboyon,

merap janah misir marsidua-dua.
Martuah ma na horahan loheian bani hapintoron,
ai sipabosuron do sidea.

5 Habang ma gan anduhur,

sogop bai tupang dua.
Martuah ma na idop uhur,
ai siidopan do sidea.

6 Durian hun huta Sinasih,

iboan das hu huta Ajibata.
Martuah ma paruhur na borsih,
ai idahon ni sidea do Naibata.

7 Marbuah ma potei san lambei,

dohor hulananni buluh limbatar.
Martuah ma sibahen damei,
ai goranon do sidea anak ni Naibata.

8 Garama anak boru mangidangi i GKPS Buah Bolon,

iurupi sidea do pagori ni kuria na adong ijin.
Martuah ma na pinarburu ni halak halani hapintoron,
ai bani sidea do harajaon nagori atas in.

Natal Namaposo GKPS Tahun 2023| 9

13. Mandoding humbani Haleluya No. 37:1-2
Hatuahon do, hamegahon do partubuhon ni Jesus in.
Roh Sipagoluh bani na magou megah-megah ma uhurta in.
Roh Sipagoluh bani na magou megah megah ma uhurta in.

Hatuahon do, hamegahon do partubuhon ni Jesus in.

Rapat ma hita bai Naibatanta, megah-megah ma uhurta in.
Rapat ma hita bai Naibatanta, megah-megah ma uhurta in.

14. Ambilan

15. Galangan (Mandoding humbani Haleluya No. 316:1-2)

Sai puji ma Tuhanta in, ai tubuh Jesus in.
Sai jalo ma Rajanta in, pasirsir ma uhurmu in.
Mandoding puji ma, mandoding puji ma,
mandoding puji Tuhan in.

Megah ganup dunia on, marsangap Tuhan in.

Ganup mamuji Tuhan in, pakon ganup tinompaNiin.
Mandoding puji ma, mandoding puji ma,
mandoding puji Tuhan in.

16. Tonggo Galangan, Tonggo Ham Bapanami, Pasu-pasu

P. Riap ma hita jongjong.
Martonggo ma hita mangondoskon galanganta hubani Naibata.
Ham Naibata Bapanami na i nagori atas, iakuhon hanami do
paboa Ham do bona ni sagala pasu-pasu bannami. Domma
igalangkon hanami pasu-pasu na dob ijalo hanami in humBamu.
Jalo anjaha papansing Ham ma Tuhan, laho ipakei bani horja
pangidangion i tongah-tongah ni kuriaMu. Buhai Ham ma
uhurnami ase lambin itarimakasihkon hanami buei ni pasu-pasu
na dob anjaha na sihol bereonMu ope bannami. Ibagas Goranni
AnakMu, Jesus Kristus, ipadas hanami tonggo ampa
galangannami on hu Bamu. Amen.
Natal Namaposo GKPS Tahun 2023| 10
 P. Riap ma hita martonggo marhitei tonggo Ham Bapanami.
P. + K. Ham Bapanami na i nagori atas, …… Amen.
P. Jalo ham (hita) ma pasu-pasu humbani Tuhan Naibatanta:
Ipasu-pasu anjaha iparorot Tuhan Naibata ma ham (hita).
Isondangkon Tuhan Naibata ma bohi-Ni hu bamu (hu banta)
janah maidop ma uhur-Ni mangidah ham (hita). Idompakkon
Tuhan Naibata na bohi-Ni hu bamu (hu banta) janah
ipasorap ma damei-Ni bani tonduymu (tonduyta bei). Amen.
K. (Mandodingkon) Amen. Amen. Amen.

D. Perayaan Natal

Natal Namaposo GKPS Tahun 2023| 11