TATA IBADAH

MINGGU HARI BUMI SEDUNIA

Minggu, 2 April 2023

Tema:
Hasadaon pakon Pangidangion na Marbuah (Kolosse 1:10)

Sub Tema:
Marmalas ni Uhur ma Hita Pataridahkon Buah ni Haluahonta anjaha gabe
Pasu-pasu i Tongah-tongah ni Gareja, Masyarakat ampa Negara Tandani na
dob Matoras Haporsayaonta”
Praeludium
- Ganup sipangidangi persiapan i ruang parhobasan, sosialisasi tata ibadah pakon
tonggo persiapan laho ibadah.
- Bani barisan prosesi dihut 2 halak sipartugas na jongjong holi i lobei aima:
 Sahalak na mamboan bunga hidup ibagas pot.
 Sahalak na mamboan sampah plastik/kortas/tisu/puntung sigaret.

Paragenda (P):
Horas ma hubani nasiam, Bapa, Inang age Namaposo. Selamat hari Minggu! Tarpuji ma
Tuhan na mambere panorang banta boi riap use hita i gareja on laho beribadah. Ibadahta
panorang on memperingati Hari Bumi Sedunia. Tema perayaan Hari Bumi Sedunia tahun
2023 aima, “Invest in Our Planet.”
Presiden na mambidangi gerakan lingkungan dunia, Kathleen Rogers, mangkatahon,
“Marhitei na iperingati hita Hari Bumi Sedunia bani tahun 2023 on, maningon lambin
roh ringgasni do hita manjaga tanoh on. Ganup jolma sonai age pihak pamarentah,
pengusaha pakon masyarakat maningon do riap martanggungjawab laho pataridahkon
dukunganni laho mambahen sonaha ase tanoh on totap ratah, gok damei ampa
hapintoron. Ganupan in boi saud aima anggo marsada ni uhur hita mamingkirhon ampa
mangkobaskon in, ase jorgit-jorgit sidea generasi na mangihut na laho manoruskon
mangiani tanoh on.”
Andohar, marhitei ibadahta panorang on lambin ibotoh hita ma bahasa hita halak na
marhaporsayaon, pagori kuria GKPS, na maningon sipardihut do hape laho
martanggungjawab manjaga tanoh na ibere Tuhan banta na gabe siianonta.
Bani na mamungkah ibadah on, na bere ma panorang hubanta laho bersaat teduh marhitei
tonggo pribadi. Pungkah hita ma!

---------------- Saat teduh ---------------

1. Votum-Introitus-Tonggo
P : Riap ma hita jongjong!
Ibagas goran ni Naibata Bapa pakon Tuhan Jesus Kristus ampa Tonduy
Napansing Sitompa langit pakon tanoh on. Amen. “Ham Jahowa, urupi Ham
ma! Ham Jahowa, sai manumpak ma Ham! Pinasu-pasu ma na roh marhitei
goran ni Jahowa.” Haleluya, Haleluya, Haleluya.
P+K : (Mandodingkon) Haleluya, Haleluya, Haleluya.
P : Martonggo ma hita. Ham Tuhan Naibata na sangap anjaha marmulia. Ham do na
mangatasi haganup kuasa, janah na paluahkon jolma humbani dousa pakon
hamateian. Domma isuruh Ham Tuhan Jesus Kristus roh hu dunia on
marsitaronon banggal ronsi matei tarsilang laho manggalar utang ni dousanami.
Paahapkon Ham ma hu bannami banggal ni holong-Mu marhitei Jesus Kristus na
Hari Bumi Sedunia - Peduli dengan lingkungan, selangkah menyelamatkan kehidupan masa depan .
 dob sirsir mangkopkop pakon paluahkon hanami, ase sintong pangarusion pakon
panjalonami Bamu. Tarima kasih ma homa hatahononnami bani na ra marsaor
Ham pakon hanami. Lambin ipuji janah ipasangap hanami ma Ham ibagas unduk
ampa toruh ni uhurnami. Ibagas Jesus Kristus hanami martonggo. Amen.
(Hundul Kuria)

2. Mandoding Haleluya No. 399:1-2, “Tubuhan Poyon-poyon”

Tubuhan poyon–poyon, i tongah juma in,
manggargar manuk-manuk bai parasaranniin.
Marbagei pakon ihan, ibagas laut in,
ge tinompa na legan, seng targorani in.
Ganupan iparmudu, Tuhanta Naibata,
lobihan iparmudu, ganupan hita da.
Sonai ge halayakon, ibere do homa,
talup hatahononta, diateitupa ma.
Ibere do panondang mataniari in,
bulan ampakon bintang panondang borngin in.
Udan logouni ari, pagantih soluk in,
sonin ma ganup tingki pajagar tanoh in.
Ganupan iparmudu Tuhanta Naibata
lobihan iparmudu ganupan hita da.
Sonai ‘ge halayakon ibere do homa,
talup hatahononta diatei tupa ma.

3. Hasasapan ni Dousa
P : Riap ma hita jongjong! Martonggo ma hita, sopotkon hita ma dousanta hubani
Tuhan Naibata. Ham Tuhan Naibata Bapanami, sitompa langit pakon tanoh on
ampa haganup pangisini. Dear do haganup itompa janah ipasu-pasu Ham
haganupan. Itotapkon Ham do hanami jolma laho manramotkon haganup
tinompa-Mu in. Halani hisap ni daging pakon hampungni uhurnami, gati do lang
ipardulihon hanami hadearon ni tinompa-Mu in, gariada iparseda hanami do use
in. Tuhan holong ma Ham hubennami pardousa on.
K: (Mandodingkon)

--------- hening ±7 detik ----------

Hari Bumi Sedunia - Peduli dengan lingkungan, selangkah menyelamatkan kehidupan masa depan .
Sahalak na mamboan Bunga: Jenges tumang do suan-suanan on, apalagi anggo
sanggah marbunga homa ia, malas tumang uhur mangidah, segar mata ibahen.
Janah gedung gareja on dihut do homa jenges idahon halani adong suan-suanan
pakon bunga, baik ibagas age na i lingkungan ni gareja on. Ibotoh hanami do
sonaha sodap ni mangidah suan-suanan na marbunga, na jenges pertumbuhanni,
tapi, sipata lang parduli hanami bani suan-suanan pakon bunga on. Ipaturut
hanami do hansa anjaha lang iarbahi, lang ibahen napuni ase totap jenges
partubuhni. Bahkan sipata ibahen hanami do homa pot ni on gabe ianan sampah;
sampah tisu, sampah puntung sigaret, pakon sampah-sampah na legan na boi
mangganggu pertumbuhan pakon parsedahon hajengesonni. Sipardousa do
tongon hanami Tuhan, halani lang manjaga pakon mangkargahon tinompa-Mu,
na itompa Ham laho manaksihon ampa pataridahkon kuasa-Mu i dunia on.
Tuhan, holong ma Ham hubannami pardousa on.
K: (Mandodingkon)

--------- hening ±7 detik ----------

Sahalak na mamboan Sampah (plastik/kortas/tisu/puntung sigaret): Jenges tumang

do gareja on, halani lang adong iidah hita sampah (plastik/kortas/tisu/puntung
sigaret) ijon. Sonang tumang do uhur markebaktian anggo sonon ma borsih ni
gareja. Tapi, sipata hajengeson sisonon lang piga dokah, halani anggo domma
mulak marminggu bahat ma use sampah (plastik/kortas/tisu) idahon i toruh ni
bangku, meja pakon sudut-sudut ni jendela ampa pintu. Lang pitah ibagas
gedung, i lingkungan gareja on pe gabe bahat ma use sampah
(plastik/kortas/tisu/puntung sigaret) na lang dong hinan sanggah das nongkan hita
i gareja on. Tuhan, sipata seng marsalah iahap hanami manggijikkon sampah
(plastik/kortas/tisu/puntung sigaret) ija-ija pe i gareja on, hape domma adong
ianan ni sampah na ipasirsir. Bolag tumang do tanoh on, hape gabe ianan ni
sampah (plastik/kortas/tisu/puntung sigaret) do ibahen hanami. Parlahou sisonai
ai pe sipata ipataridahkon hanami do homa bani lingkungan ni rumahnami sandiri
janah hurang do hanami manjaga haborsihon na mambahen urah parohkon
naborit. Sanggah mannaiki kendaraan pe, sipatah urah tumang do hanami
manggijikkon sampah hu dalan, na mangkorhon lang pitah mangagouhon
haborsihon tapi boi homa parrohkon parmaraan bani halak na legan. Sanggah
mardalani hu tempat wisata pe hampung do uhurnami laho manjaga haborsihon.
Gabe maseda ma hajengeson ni ianan wisata ai halani sampahnami. Ase

Hari Bumi Sedunia - Peduli dengan lingkungan, selangkah menyelamatkan kehidupan masa depan .
 sasintongni lang talup hanami martonggo hu Bamu ase ulang adong bencana roh
bennami, anggo dihut ope hanami mangahapkon lang marsalah manggijikkon
sampah (plastik/kortas/tisu/puntung sigaret) bani sembarang ianan. Tuhan,
holong ma Ham hubenanami pardousa on.
K: (Mandodingkon)

--------- hening ±7 detik ----------

P : Tangar anjaha haporsayai hita ma Hata ni Naibata, bagah-bagah pasal hasasapan ni

dousa.
“Ulang ho mabiar ai Ahu do Sipaluah ho, domma Hudilo goranMu, Ahu do
simada ho. Tapi, domma iparjabolon ho Ahu marhitei dousamu, domma ilojai ho
Ahu marhitei hajahatonmu. Ahu, Ahu sandiri pasaloseihon panlanggaronmu
halani Ahu, anjaha dousamu seng be padingat-dingaton-Ku.” (Jesaya 43:1, 24-25)
Ibagas holong ni Naibata, domma isasap haganup dousanta. Halani ai,
pataridahkon hita ma tanda-tanda ni pargoluhon na bayu. Hasangapon ma bani
Naibata i babou.
P+K: Amen. (Hundul Kuria)

4. Mandoding Haleluya No. 115:1-4, “Sadokah Ho i Tanoh on”

Sadokah ho i tanoh on papintor uhurmin,
padingat-dingat ma tongtong nidok ni Tuhanmin.
Sai songon hayu dear ho ramos parbuahniin.
Bulung ni pe tabun homa usihi ma sonin.
Buei do hadearon ni bah tubuh in tongtong.
Pausih dirimin hujin baen uhurmin sintong.
Ambungkon humbai uhurmin na so margagan in.
Ganup na humbai Tuhan in ramot ma jaga in.

5. Hata Haporsayaon
P : Riap ma hita jongjong! Saksihon hita ma haporsayaonta in, songon na sinaksihon
ni haganup halak na porsaya bani sab tanoh on!
P+K : Ahu porsaya bani Naibata Bapa, Pargogoh na so tarimbang, na manompa
langit pakon tanoh on. Ahu porsaya bani Jesus Kristus, Anak ni Naibata na
sasada in, in do Tuhanta, na tinubuhkon ni si Maria sanggah nape haliaban,
marhitei Tonduy Na Pansing. Na manaron na parngit, bani panorang ni si

Hari Bumi Sedunia - Peduli dengan lingkungan, selangkah menyelamatkan kehidupan masa depan .
 Pontius Latus, iparsilangkon, matei anjaha itanom, turun hu nagori toruh. Mulak
manggoluh humbani na matei bani ari patoluhon. Naik hu surga anjaha hundul i
siamun ni Naibata Bapa, Pargogoh na so tarimbang in. Hunjai ma Ia mulak
magira laho manguhumi halak na manggoluh pakon na dob matei. Ahu porsaya
bani Tonduy Na Pansing, bani Kuria parsadaan na mapansing in, parsaoran ni
sagala na mapansing in, bani hasasapan ni dousa, bani parpuhoon ni angkula,
pakon bani hagoluhan na sadokah ni dokahni. Amen. (Hundul Kuria)

6. Acara Khusus
 Mambasa (manaksihon video) Tonah ni Pimpinan Sinode GKPS
 Mambasa Puisi
 Tingting
 Tonggo Pangapition

7. Mandoding Haleluya No. 339:1+2+5, “Jesus Haposanku”

Jesus haposanku, Ham ma hasomanku.
Ulang au tarpunjung, seng dong hasomanku.
Jesus haposanku, hasomani ahu.
Ham ma hasomanku, bai pardalananku.
Ham tumang Rajangku, Ham do balosanku,
jalo Ham ma ahu gabe jabolon-Mu.
Sai sonang ma ahu ai tangkas ma bangku,
Ham tumang Rajangku janah balosanku.
Jesus do Tuhanku baen batar-batarhu,
na gabe onjolan ni haporsayaon.
Lang be au mabiar ‘ge bai parmaraan,
Jesus do Tuhanku baen pangajamanku.

8. Ambilan: Markus 11:1-11

9. Galangan
Prb. : Paima iondoskon hita galanganta, tangar hita ma lobei Hata ni Naibata na gabe
onjolan banta laho manggalang, aima na tarsurat bani Psalmen 50:14,
“Galangkon ma banggal ni uhur bani Naibata, anjaha galari ma bagah-
bagahmu bani Sitimbulan in.”
Sonari ondoskon hita ma galanganta!

10. Tonggo Pakon Doding Galangan

Prb. : Riap ma jongjong! Martonggo ma hita mangondoskon galanganta hubani
Tuhan Naibata.
Ham Tuhan Naibata Bapanami, paridop ni uhur, harohan ni sagala pasu-
pasu. Tarima kasih ma isombahkon uhurnami hu Bamu halani hum Bamu do
Hari Bumi Sedunia - Peduli dengan lingkungan, selangkah menyelamatkan kehidupan masa depan .
 ijalo hanami pasu-pasu na gokan dear pakon na laingan. Bani panorang on
isombahkon hanami do hu Bamu na gabe galangannami, dirinami pakon
humbani hinadongannami na dob binere-Mu in. Pasu-pasu Ham ma galangan
na sinombahkonnami on, gabe galangan na mapansing, na mambahen harajaon-
Mu lambin marhataridahan i dunia on. Ungkab Ham ma uhurnami marhitei
Tonduy-Mu, ase lambin ididah, ibotoh, janah ihamalaskon uhurnami buei ni
silayak-layak-Mu, na dob ijalo hanami pakon na sihol bereon-Mu ope hu
bannami. Ajari Ham ma hanami laho mangondoskon galangannami na patut
galangkononnami hu Bamu. Jalo Ham ma galangan pakon tonggo elek-
eleknami on, ibagas Jesus Kristus Tuhannami. Amen.
Prb+K: (Mandodingkon) Haleluya No. 12:3, “Tonduy, daging uhur ampa gogohniin”
Tonduy, daging uhur, ampa gogohniin,
ulang bai na sambor, sai Bamu ma in!
Ningon gok Bamu ma au hinopkop-Mu,
ase saud martuah au jabolon-Mu.

11. Tonggo Panutup

Prb : Ham Tuhan Naibata Bapanami, na i nagori atas. Diatei tupa ma hatahononnami
hu Bamu marhitei na domma ijalo hanami hasasapan ni dousa humBamu sonai
Ambilan na madear na dob ipaondos juak-juakMu. Bani ganup na ijalo kuria-
Mu bani panorang on gabe gogoh ma in na laho mandalani pargoluhannami
siganup ari. Bani na ipestahon hanami sadari on Hari Bumi Sedunia, gabe
sipardihut ma tongon hanami laho bertanggungjawab pakon mangkargahon
ganup tinompa-Mu na adong i tanoh on, janah gabe halak Kristen na
bertanggungjawab ma homa hanami laho manjaga haborsihon ni rumah, dalan,
ianan wisata, tarlobih rumah-Mu na Pansing in, ase marhiteihon ni ai lambin
tarmulia goran-Mu i sab tanoh on. Tarima kasih ma Bamu Tuhan, ibagas Jesus
Kristus ipaondos hanami ma tonggonami on. Amen.

12. Tonggo Ham Bapanami

Prb : Ham Bapanami na i nagori atas. Sai na papansing ma Goran-Mu. Sai roh ma
harajaon-Mu. Sai saud ma harosuh ni uhur-Mu i nagori tongah on songon na i
nagori atas. Bere Ham ma bannami sadari on hagoluhan ari-ari. Sasap Ham ma
dousanami songon panasapnami bani dousa ni hasoman na mardousa dompak
hanami. Ulang hanami bobai Ham hu parlajouan. Paluah Ham ma hanami
humbani pangagou.
Prb+K: (Mandodingkon) Ai Ham do simada harajaon, pakon hagogohon ampa
hasangapon sadokah ni dokahni. Amen.

13. Paingkatkon

Hari Bumi Sedunia - Peduli dengan lingkungan, selangkah menyelamatkan kehidupan masa depan .
Prb : Laho ma nasiam, janah “Totap ma nasiam, ulang mubah-ubah, anjaha lambin
surung ma ibagas horja ni Tuhan in, ai ibotoh nasiam, sedo na soya
halojaonnasiam ibagas Tuhan in.” (1 Kor. 15:58)

14. Pasu-pasu
Prb : Jalo ham (hita) ma pasu-pasu humbani Tuhan Naibatanta:
Ipasu-pasu anjaha iparorot Tuhan Naibata ma ham (hita). Isondangkon Tuhan
Naibata ma bohi-Ni hu bamu (hu banta) janah maidop ma uhur-Ni mangidah
ham (hita). Idompakkon Tuhan Naibata ma bohi-Ni hu bamu (hu banta) janah
ipasorap ma damei-Ni bani tonduymu (tonduyta bei). Amen.
Prb+K: (Mandodingkon) Amen…Amen….Amen.

Postludium
- Martonggo tarimakasih secara pribadi dob ai marsisalam-salaman.

Hari Bumi Sedunia - Peduli dengan lingkungan, selangkah menyelamatkan kehidupan masa depan .
Puisi berjudul: “SIAPA PELAKUNYA”
Karya: Pdt. Erwin Ar. Saragih

Apa hanya aku yang merasa ?

Bahwa bumi menderita
Kalian tahu siapa pelakunya ?
Bumi marah sehingga wajahnya memerah
Bumi sadar ada sesuatu yang salah
Dulu bumi adalah hutan tak terjamah
Kini berubah jadi gunungan sampah
Kita sadar tak merasa salah bahkan menganggapnya lumrah
Saat sebagian mengajak duduk
Sebagian menunduk dan sisanya saling tunjuk
Sedangkan aku kini sudah melempar handuk
Sadar nasib bumi sudah di ujung tanduk
Bumi yang dulu cantik
Kini makin cantik setelah operasi plastik
Tapi tahukah bahwa itu ilusi optik
Barisan sampah plastik bak catatan kecil tanpa titik
Sampah bebas dimana dia berada
Dia mengangkasa bahkan menelan semua samudera
Seolah si sampah berkata, “dunia lebih berwarna”
Aku pun tertawa mendengarnya
Hahahahahaha........
Saat bumi bertambah parah
Semua menyalahkan si sampah
Dia dituduh penyebab masalah
Dan divonis bersalah
Masih mau menyalahkan si sampah ?
Atau ternyata kitalah si sampah itu.
Cemilan anak senja pun habis, puisi berakhir untuk dibaca
Tak apa kan menitipkan bungkusnya di gereja
Satu bungkus sampah tidak akan mengganggu ketenangannya kan ?
Selamat hari bumi GKPS ku
Selamat untuk tidak menjadi pelaku.
Hari Bumi Sedunia - Peduli dengan lingkungan, selangkah menyelamatkan kehidupan masa depan .