PARTORDING NI ACARA NATAL KELUARGA

DI HKBP GODUNG LAGUBOTI

Hasangapon ma di Debata na di Ginjang (Lukas 2 : 14)
I. PANGARADEON
1. Ganup keluarga ma patupahon Perayaan Natal on
2. Diparade ma sada Lilin sipagalahon ni na manguluhon, jala tolu Lilin
sipagalahon ni anggota keluarga di tingki mangendehon BE No. 54
3. Diparade ma inganan ni pelean, jala ditongos ma i marhite amplop naung
diparade, dipasahat tu parhalado ni Hurianta.
4. Dipillit ma sian anggota keluarga na manguluhon Ibadah dohot na manguluhon
tangiang
II. PARTANGIANGAN
(U: Uluan, H: Huria)
1. MARENDE BE No. 57: 1,2 “NUNGA JUMPANG MUSE ARI PESTA I”
BL. 202
 Nunga jumpang muse ari pesta i, hatutubu ni Tuhanta Jesus i
Tuat do Ibana sian surgo i mebat tu hita on
Ref: Hasangapon di Debata, dame, dame ma di jolma
Las ni roha ni Debata hajolmaon muse.
 Beta ale dongan tu Betlehem i, itasomba ma Dakdanak na disi,
na tinongos ni Parasiroha i, Debata Ama i
Ref…
2. VOTUM – INTROITUS – TANGIANG
U: Marhitehite Goar ni Debata Ama dohot Goar ni AnakNa Tuhan Jesus
Kristus dohot Goar ni Tondi Parbadia, na tumompa langit dohot tano
on. Amen. Nunga patar hangoluan i jala nunga huida hami jala nunga
huhatindanghon hami dohot hubaritahon hami tu hamu hangoluan na
saleleng ni lelengna, na di lambung ni Ama i hian jala naung patar di
hami. Amen.
Martangiang ma hita!
Ale Tuhan Debata Amanami na di banua ginjang. Mandok mauliate do
hami tu Ho, ala ni godang ni asi dohot holong ni rohaM di hami; ai
dibasabasahon Ho do AnakMu na sasada i tu hami na di pardangolan
on, asa malua hami marhitehite Ibana sian dosa dohot sian hamatean
saleleng ni lelengna. Hupangido hami tu Ho, sai sondangi ma rohanami
na holom i marhitehite Tondi Parbadia i, angkup ni i sai parrohai ma
hami, asa huboto hami mandok mauliate tu Ho, asa tarapul situtu
rohanami di hagogotan dohot di pangunjunan, marhitehite AnakMu,
Tuhan Jesus Kristus Tuhan nami. Amen.
3. MARENDE BE No. 56 : 1 “SAI RO MA HAMUNA” BL. 139
  Sai ro ma hamuna angka na porsea, sai ro ma hamuna tu Betlehem
Ida Dakdanak, Sipalua hita, tasomba ma Ibana, tasomba ma Ibana,
Tasomba ma Ibana Rajanta.
4. LITURGI : Manjaha Jesaya 9 : 1 – 6
(Diparade ma Bibel asa sude manjaha marsingkat sorin)
5. MARENDE BE No. 54: 1, 3 “SONANG NI BORNGINNA I” BL.
64 (Huhut Pagalak Lilin)
 Sonang ni bornginna i, uju ro Jesus i
Sonang modom do halak sude, holan dua na dungo dope;
mangingani Anakna, Jesus Tuhanta i.
 Godang ni tua disi di na ro Jesus i
Tung malua pardosa muse, sian hamagoanna sude;
ala ro Sipangolu, Jesus Tuhanta i.
6. TANGIANG PANGONDIANON SIAN SAHALAK ANGGOTA
KELUARGA
7. MARENDE BE 53 : 1+3 “DI BETLEHEM DO TUBU” BL. 51
 Di Betlehem do tubu di hita Anak i, I do sian na burju hupillit Rajangki
I do, i do, hupillit Rajangki.
 Sai naeng haholonganhu Ho ale Tuhanhi, Nang marsak, las rohangku
ingkon lam ganda i
Olo, olo, ingkon lam ganda i.
8. RENUNGAN NATAL (LUKAS 2 : 14)
Hasangapon ma di Debata na di ginjang,
dame ma di tano on di angka jolma halomoan i.
Kemuliaan bagi Allah ditempat yang Mahatinggi dan damai sejahtera di
bumi diantara manusia yang berkenan kepadaNya.

Selamat Ari Natal ma di hita saluhutna .....Ganup taon tapestahon do

Natal ima Pesta Ari hatutubu ni Tuhanta Jesus Kristus Sipalua i, na
mamboan hadameon dohot Hatiuron tu saluhut jolma. HatutubuNa gabe
hasangapon Ni Debata jala dame di hita (syalom).

Nunga marsaor ditongatonganta Debata (Immanuel) laho sumondangi

rohanta, ndada holan hita tung tu saluhut do, ima tu angka halak na
burju marroha, na jungkat roha, na marsahit, na pogos nang na mora pe
dohot lan na asing na i dope. Jala diborngin on sahat ma barita Natal i tu
tongatonga ni keluarganta on. Marlasni roha ma hita nunga ro Sipalua i.
Nunga ro Syalom dohot Immanuel. Alai na gabe sungkunsungkun di hita,
boasa dope sai adong parporangon di ganup luat, mangahut na so
bagianna, pangarupaon, mangasahon gogo papudi uhum dohot angka
angkalangkal na so gabeak na manjehehon donganna jolma. Pangalaho
na si songon on nunga jotjot masa taida di tongatonga ni parsaoran si
ganup ari, alai ndada holan di tongani masyarakat be, nunga masa nang
ditongatonga ni keluarga, isarana maradophon natoras, na martinodohon,
dohot na mariboto pe, na mambahen hita lomos di partingkianta si
nuaeng.

Ndang dope angka issu na manggugai dohot na naeng marsangkap

manegai parsaoran ditongatonga ni angka parugamoon pe, songoni nang
na mangorai patupahon parmingguon, na mangorai pajongjonghon bagas
joro. Marragam ma angka namasa na taadopi nang sahat tu Natal on
(manalpuhon taon 2023 on hita). Adong do mara bolon, negara
maradophon negara, agama maradophon agama, huta maradophon huta,
songoni nang luat maradophon luat pe. Sandok alani angka na masa on
lam tubu ma biar dohot lomos ni rohanta.

Jala molo tabereng muse tu pudi diangka na masa naung tabolus i, lomos
do nuaeng angka ama dohot ina alani angka media sosial na manghorhon
hasesega ni mental dohot parrohaon, ima na lam tu toropna masa
pangalangkupon dohot na marsirang angka naung mardongan saripe.
Angka natoras pe lomos do maradophon angka ianakhon mamereng
godangni angka perangkap tu narkoba dohot na mamangke obatobat
terlarang songoni nang minuman keras pe, tarlumobi ma seks bebas.
Ndang dope angka panahit dohot angka pandaraman ni ngolu na so pasti
tu ari sogot. Alani syalom mamboan tu lasniroha rap dohot Kristus.

Di hita na hinaholongan ni Tuhan Jesus Kristus ...

Pesta Natal na tapatupa di tingkion on, paingothon hita, paboa syalom i
ingkon hangoluhononta doi nang pe godang angka nanaeng siadopanta
laho mangeahi dame i. Jesus nunga ro tu portibi on na gabe Raja Si
Pardame di hita, na marlapatan hadameon ro ndada satongkin jala hatop,
alai perjuangan na mansai ganjang do i, alani unang pargale hita. Natal
paingothon hita paboa ngolunta on ndang surgo, lapatanna ndang sidung
dope ulaonta, ganjang dope sidalananta, dalan na gok batu dohot angka
buntulbuntul. Alani marhite natal on, didok tu hita, ia hadameon i
 dipasahat tu angka na olo rade manghophop hadameon dibagasan
ngoluna.

Tung songon dia pe borat ni ulaonta di keluarga dohot di angka ulaon na

asing, alai anggo panghirimonta tu ari sogot ingkon hot doi dibagasan
Tuhan i, unang muba unang mose, pos rohanta di Tuhan i pasahatonNai
doi hombar tu lomo ni rohaNa. Martangiang ma hita asa lam denggan jala
uli saluhutna: isarani ekonomi, hahipason, dilehon rongkap ni anak dohot
boru, dilehon anak dohot boru di parsaripeon na so adong ianakhona
alani margogo ma hita pasangaphon Tuhan i di sandok ngolunta. Natal
mangalehon panghirimon di hita lumobi di pangaramotionNa (Immanuel),
Debata ma donganta salelengnilelengna. Unang sumurut jala pargale hita
molo ro angka hamaolon na sonson di jolonta, alai tabahen ma gabe
pahothon haporseaonta laho mananda holong ni Debata, suang songoni
gabe patamba panghirimon dohot hagogoonta, sai na donganan ni
Debata do hita (Immanuel). Amen.
9. MARENDE BE No. 62 : 1-2 ”HALALAS NI ROHA GODANG” BL.
172 (Pasahathon Pelean)
 Halalas ni roha godang, na hubaritahon on
Nunga tubu Sipalua di hita jolma on
Hasangapon di Debata, laos dame, dame, dame ma di jolma;
lomo ni roha ni Debata do hita jolma on.
 Ai saborngin on do binsar bintang di na holom i
Sumondangi hagolapon na di rohanta i
Hasangapon di Debata, d.u........
10. TANGIANG PANGUJUNGI
U: Rap mangido ma hita di Tangiang Ale Amanami!
U+K: Ale Amanami na di Banua Ginjang………
U+K: Mangendehon Amen…Amen…Amen…

(molo partohonan do na manguluhon, diuduti ma tangiang Ale Amanami

dohot tangiang Asi ni Roha……)

Parhalado HKBP Godung Laguboti pasahathon:

Selamat Ari Natal

25 – 26 Desember 2023
jala
Selamat Manomu Taon
Baru
1 Januari 2024