MINGGU, 22 OKTOBER 2023

XX DUNG TRINITATIS

EPISTEL: LUKAS 10:21-24

(Jamita di Partangiangan)

I. PATUJOLO
ARSAK dohot LAS NI ROHA dua hal na so boi tarsirang sian ngolu ni hita jolma. Boi do
godang na mambahen jolma i gabe marsak rohana, songon i nang na mambahen jolma marlas ni
roha. Tontu adong do na gabe melatarbelakangi jolma i gabe marsak dohot jolma i gabe marlas
ni roha. Tuhanta Jesus pe hea do marparsorion, lungun rohaNa, bahkan sahat tu na tangis di
tongatonga ni angka panghobasionNa. Hea do Ibana tangis di tanoman ni si Lasarus di tingki
diida Tuhan Jesus si Maria mansai marhabot ni roha. Hea do Tuhan Jesus mangangguhi di tingki
laho bongot tu Jerusalem andorang so diparsilangkon Ibana. Bahkan di Buku si Jesaya,
disurathon do disi paboa Tuhan Jesus i ma halak na dangol na jotjot mangadopi parsorion.
Alai molo di Lukas manggombarhon Tuhan Jesus namansai marlas ni roha. Alani aha? Aha
na mambahen Tuhan Jesus marolopolop? Di bagasan turpuk on adong pigapiga na mambahen
Tuhanta Jesus marolopolop, ima :

II. HATORANGAN
1. Tuhan Jesus marolopolop, ala barita na uli i ditamondinghon AmaNa i tu angka halak na
pistar dohot na marroha alai dipasahat Ama i do barita na uli i tu angka halak na metmet. Hata
na dipangke Tuhan Jesus di son i ma ‘nepios’ (bayi na marumur 0 - 2 taon), na marlapatan tu
dakdanak na metmet. Bahasa kiasan do i laho patuduhon serep ni roha ni dakdanak na metmet:
na tutu marsigantung, jala na rade manjangkon pangurupion na diharingkothon ibana di ngoluna.
Namarlapatan mansai las roha ni Tuhan Jesus ala Amana i olo papatarhon pangungkapon na
rahasia sian pangungkapon i, tu angka halak na serep marroha dohot tu halak na sai tongtong
marsigantung tu Ibana. Ai molo tutu do hita marserep ni roha di adopan ni Debata dohot dongan
jolma, gabe ungkapon jala pasahaton ni Debata do isi ni rohaNa i tu hita, gabe taboto lomo dohot
sogo ni rohaNa, dung i jaloonta ma muse pasupasuNa di ngolunta (ay. 21).

2. Saluhutna nunga dipasahat Damang tu AnakNa Tuhan Jesus. Sude na i nunga diusehon
Debata buas tu AnakNa. Sude huaso, halongangan, hamuliaon, holongNa dohot asi ni rohaNa
nunga dipasahat tu Jesus Kristus, AnakNa na sasada i, halomoan ni roha ni AmaNa (ay.22).
Jesus i Anak ni Debata. Sada do Ama i dohot Anak i. Ndang adong na tumanda Anak i, dungkon
ni Ama i; Ama i pe, ndang adong na tumanda i, ia so holan Anak i. Huaso dohot otoritas ni
Debata nunga dipasahat tu AnakNa Jesus Kristus. Ai didok Jesus do marolopolop ma hamu,
naung umboto pamotoan hahomion ni harajaon ni Debata I (8:10) ai dipapatar Debata do tu
angka siondihononna ima angka kaum miskin, na metmet, jala namauas di asiniroha ni Debata.
Ibana ma pangamai nabolon, na pature-turehon saluhutna harajaon ni Debata. Jesus Kristus do na
mardaulat di ngolunta. Ngolunta on, Ibana do nampuna. Ndang adong hakta taringot tu ngolunta.
Alani tapasahat ma sudena tu Ibana, ai Ibana do nampuna hita, Ibana do na mangaturhon
pardalanan ni ngolunta.

3. Martua ma angka mata na marnida na niidamuna (ay. 23). Martua ma nasida ala mata nasida
boi marnida jala sipareon nasida boi mambegei. Mata nasida boi mamereng Jesus songon Mesias
ndang songon jolma na biasa. Ai diida nasida sandiri Tuhan Jesus marhuaso patundukhon huaso
ni sibolis. Boi nasida menyaksikan sandiri huaso dohot hagogoon ni Debata na mandongani
nasida. Sada partingkian na jarang/langka do i, alai kesempatan i naeng mangarahon nasida asa
tongtong marsigantung tu Debata Ama. Hasurungan do i di angka sisean i, asa naeng ma i
mambahen nasida tongtong marhasurungan di haporseaon dohot di semangat nasida di angka
panghobasionnnasida.

4. Torop do angka panurirang dohot raja na masihol marnida naung niida ni angka siseanNa i
(ay.24). Angka panurirang dohot raja ndang boi marnida dohot mambegei angka naung niida ni
angka sisean i ala nasida papitung matanasida dohot panengel pinggolnasida. Dipajogal jala
dipatangkang nasida roha dohot pingkirannasida. Ndang porsea nasida tu Tuhan Jesus. Hape
angka sisean i boi marnida dohot mambegei angka pambahenan ni Jesus ala nasida porsea di
Tuhan Jesus. Ai diajarhon Tuhanta Jesus tu hita asa tongtong mandok mauliate di angka naung
niida ni matanta, di angka naung adong di hita dohot di angka naung taadopi di tingki on. Ala na
sudena i silehonlehon na ummuli do i di hita na sian Debata.
Las ni roha ni Tuhan Jesus ndang adong hubunganna tu situasi/keadaan, ala las ni
rohaNa berhubungan do i tu aha naung diulahon Ama i di bagasan Jesus Kristus. Tuhan Jesus
marlas ni roha ndang alani keberhasilan marhite karya na niulaNa, alai ala lomo ni roha ni
Damang i dipatolhas tu Ibana. I ma las ni roha na manontong (sukacita sejati). Sukacita na
songon i ingkon adong di angka na porsea i. “Dibahen i unang holsoan hamu, ai las ni roha mida
Jahowa, i do haroroan ni gogo tu hamu.” (Nehemia 8:10). Las ni roha na sian Debata do
hagogoon di hita. I do las ni roha na mambahen hita asa margogo mangadopi hasusaan dohot
hamaolon di ngolunta.
Mandok mauliate sada pangalaho na muncul sian roha parbagasan ni sahalak jolma, ala
ibana mengalami pambahenan ni Tuhan i dohot mengalami asi ni rohaNa. Pangalaho bersyukur
on tarida di bagasan bentuk pengakuan di huaso dohot na berdaulat do Debata di angka
saluhutna. Unang asal bersyukur. Mandok mauliate ma ala naung taida paboa Jesus do Tuhan na
berdaulat jala marhuaso di ngolunta. Mandok mauliate ma ala Debata Ama i rade manolukkon
asi ni roha dohot papatarhon hamuliaon dohot huaso ni Jesus, asa boi hita manghobasi Ibana.
Angka hita do, na dihalomohon Debata mamparsaulihon sude denggan basaNa. Amen!

III. PANIMPULI
Adong piga na boi sirajuman sian turpuk ni jamitanta on:
1. Sada Sihalashononta, Holan Dibagasan Jesus Kristus do dapotta Haluaon na hot ro
Salelenglelengna. Alani i, Dijou jala disuru do hita gabe siseanNa laho mambaritahon
harajaon ni Debata. Tahamuliatehon ma tu Ibana molo diparar dope hita laho pararathon
barita harajaon ni Debata tu sandok portibi on. kesempatan na arga do na pinasahat ni Tuhan
i tu hita molo tung dipangke hita laho mambaritahon harajaon i.
2. Ulaon ma panjouon dohot parsuruhon ni Tuhan i
Ulaon na borat do panjouon ni Kristus, ai tung godang angka hamaolon-hamaolon na
taadopi laho pararathon barita Na Uli. Gomos ma hita martangiang tu Tuhan asa dilehon hita
gogo mangulahon parsuruonNa i.
3. Jaloonta do parbue ni ulaon parsuruon ni Tuhan i molo benget taulahon
Martua situtu do halak na na manghabengethon ulaon parsuruon ni Tuhan i, mangasahon asi
ni rohaNa parsidohot ma hita di haluaon na binasabasahon Tuhanta tu angka na benget
mangulaon parsuruonNa sahat di ujung ni ngolunta. Pos ma rohanta jala porsea ma hita ai
Debata do sibahen haluaon. Amen.
(Nurafni Aisah Hasibuan)