Bahan Jamita/Sermon HKI Pangaribuan Tengah, Minggu : ADVENT I Tanggal : 27 Nopember

2022
Evanggelium : Jesaya 11:1-10 Epistel : Mateus 3:1-12 (Oj.ayat8).

I. Patujolo/Sibonsiri/pengantar
Bungku na sinurat ni panurirang Jesaya on patuduhon keadaan ni bangso israel dohot angka
panggomgomina na so unduk be tu hatani Debata, asa hona uhum ma nasida jala tarbuang tu babel. Alai nang
pe songoni sai tongtong do Debata manghaholongi bangso i. Asa dilehon Debata tu nasida partingkian laho
mulak muse huhut padengganhon / paulihon huta Juda dohot Jerusalem, tarlumobi bagas joro Debata na adong
disi. Marhite haburjuon ni Debata dapotan ma nasida dibagabaga ni Debata, pangurupion dohot haluaon
dibagasan Kristus Jesus na naeng ro i. Tangkas di padan na baru dipatorang ia Jesus Kristus ima
penggenapan/penyempurna/hagogok ni padan/bagabaga ni Debata. Jesaya bindu 11 on ima bagian sian 39 bindu
na marisi nubuatan ni Jesaya andorang so tu habuangan nasida. ima nubuatan taringot tu uhum ala bangso i
nunga mangalo Debata, ngoluna ndang hombar tu lomoni rohani Debata, ndang satia be nasida tu patikni
Debata, paginjanghon diri, manomba ganaganaan, panggomgomni nasida be nunga manimbil sian dalan ni
Debata jala nunga memberontak bangso i tu Debata. Alai nang pe songoni, masa depan na denggan tongtong do
dapot nasida muse marhite haroroni Raja Sipardame na dibagabagahon Jesaya dijamita on.

II. Hatorangan Ni Turpuk/Tafsiran

1. Raja Si Pardame Sian Pomparan Ni Si Isai (Ay 1)
Di turpuk ta on dipatorang ma disi na ruar ma sada tunas sian tungko (chooter/bahasa Heber) nisi Isai na
marparbuehon tubis sian uratna (shoresh/Heber), na marlapatan ima raja si pardame (mesias) ro sian pomparan
ni si Isai (Daud) (Mateus 5:1,5-6) (sian tarombo ni si Daud). Tunas na tubu sian tungko ni si Isai, ima songon
tanda tunas na tubu sian sian hau naung ditaba (tunggul/tungko), hau naung ditaba hian (mate) ro ma tunas na
baru sian panabaan i. Patuduhon tu halak Israel hatiha I, nang hita dipartingkian on Mesias na ro I, ima mesias
na mamboan hangoluan tu angka jolma naung mate ala ni dosa. Jesus sandiri mandok Ibana do dalan dohot
hangoluan, anggo so ro Jesus ndang adong hangoluan be di halak naung mate ala ni dosana, alai Jesus na
mangolu/mesias I mangalehon hangoluan (Joh 3:16). Sada tunas na tubu sian tunggul I, untoru/unpendek doi
sian hau na tubu sian sada hau, na marlapatan haroroni Mesias i, ima ro sian haserepon, Jesus na ro patutoru
dirina na gabe jolma, ro ma ibana sian langgatan harajoanNa (Pilipi 2:5-8), tubu ibana sian bara ni dorbia
(Lukas 2:2).
2. Raja Sipardame i, ro dibagasan tondi ni Jahowa (ay.2)
Ia tunas isonggopan ni Tondi ni Jahowa Ibana jala manontong do Tondi i maringan di ibana. Istilah
“songgop” (Heber :nakha) na marlapatan nunga adong hian di Ibana Tondi ni Jahowa, asa ndada di pudian ni
ari besonggop tondi i, alai tibu andorang so tubu Ibana nunga dibagasan Ibana Tondi ni Jahowa. (Jesus
gabegabean sian tondi parbadia/Mateus 1:18, Jesus dibagasan tondi parbadia (Lukas 4:1), uju tardidi Jesus ro
do tondi parbadia songon darapati (Mateus 3:16). Adong 7 ragam na digoari Tondi na songgop, ima: Tondi ni
Jahowa, Tondi ni Habisuhon, Tondi Hapistaran, Tondi Panuturion,Tondi Hagogoon, Tondi Parbinotoan,
dohot Tondi biar Maradophon Jahowa.Saintongna sada do Tondi ni Jahowa, ndang 7, alai umbahen na gabe
digoari 7 disi, ima na patuduhon hasongkalon/hebat ni Tondi ni Jahowa na so adong hatudosanna. Molo dang
adong habisuhon (hokmah), hapistarah (binnah) di raja, gabe ma ibana raja na menindas, na sopatigor uhum.
Halak naung dibagasan habisuhon dohot hapistaran diboto ma manimbangi na roa dohot na denggan, ido
umbahen Raja Salomo mangido habisuhon ala I do na rumingkot di ngolu ni jolma, manang sahalak raja (1 Raj
3:1-15). Tondi panuturi, dohot tondi hagogoon, ima songon kemampuan ni sada raja manguluhon na
diuluhonna, hagogoonNa manguluhon sada harajaon (Jaha Poda 8:14). Tondi parbinotoan dohot tondi na
biar maradophon Jahowa, haunduhon ni raja pardemei na mananda hagogoon ni Debata, na biar mida
Jahowa, ndada songon harajaon na di portibion na olo sipata ndang mabiar tu Jahowa, na marginjang ni roha.
3. Raja Sipardamei, ima manguhum dibagasan hatigoran. (4-5)
Dungi Debata Jahowa do mangalehon ragam ni angka silehonlehon tu Ibana asa saut ulaon pangkhobasion i.
Tondi na manggohi hadirion ni Mesias ima Tondi hapantason laho pahothon angka jolma dibagasan parsaoran
dohot Debata. Laos dipatorang do Ia Raja na naeng ro i sumurung do sian angka raja dohot panguhum na di
tano on. Jotjot do panguhum na di tano on hatiha i, dang jujur, olo manjalo sisip,jala haputusan na binaen nasida
marguru tu sinadongan dohot mamereng-mereng rupa (siida bohi). Gabe jotjot ma mangae jala marungkil
angka na pogos dohot angka na dangol. Alai ianggo Mesias i dang songon ihadirion-Na. Mangasahon
hasintongan dohot hatigoran do anggo Ibana manguhum. Dang adong kepalsuan. Lapatanna ia panimbangion
ni Mesias dang marguru tu ruhut parduru, ima na niida ni mata manang na binege ni pinggol. Alai mamereng
torus tu ringring dohot pusupusu ni hajolmaon. Jala pajongjong uhum pe Ibana tingkos jala sintong, dang malua
ianggo parjahat sian adopan-Na. alai libasonna do marhita batahi ni pamangan-Na. Raja si pardame na ro I
manguhum halak parjahat, jala patigor uhum tu angka na dangol, dohot na metmet. Marhitehiite Batahi ni
pamangan libasononna angka si parjahat na marlapatan songon rimas do Debata tu angka na so unduk tu
uhum na tigor, alai ibana ma di ari sogot manguhum angka si parjahat i. Ai Ibana raja na marhohoshon
hatigoran, hohos ima tanda ni pahean na longkot di badan, molo so adong hohos na gabe tallus ma
celana/pahean. Lapatanna disi, hatigoranNa dang mubauba, alai longkot do di dirina hatigoran dohot uhum.
Laos on ma gombaran haroro ni Jesus na paduahalihon manguhumi di ari sogot (pangungkapon 20:12).
 4. Haroro nisi Pardamei, mamboan hadameon tu angka pangisi ni portibio (jolma dohot binatang,
binatang dohot binatang, dohot jolma dohot jolma) (ayat 6-10)
Angka binatang buas hian (“gompul di lambung ni birubiru, manggopang babiat dilambung ni hambing,
dakdanak marmahan nasida. Manjampal ma lombu dohot babiat, dakdanak marmeam ulok dari……”).
Lapatanna sude na di portibion mangolu dibagasan dame, jolma dohot angka binatang dibagasan hadameon,
sian mulana hian pe denggan do parsaoran ni jolma dohot angka binatang (1 musa 1:29, 1 Musa 2:19). Taida
sada gombaran keadaan na so jumpang be parmusuonmarhite angka binatangbuas na sai marmusu hian
gabemardame sonang jala rap marjampal. Disi tarida perobahan habitat manang pangalaho ni angka binatang i.
isarana: babiat na sai memangsa binatang na asing muba gabe marjampal duhut-duhut.Gompul na sai marmusu
dompak biru-biru hian gabe boi rap mardongan jala sauduran. Posoposo na sai mabiar tu ulok, gabe boi
marmeam dilambung ruang ni ulok dari dang pola mabiar. Sandok sude adong perobahan ima “perobahan
habitat”. Saluhutna i bahasa symbol manang gombaran pangalaho di tingkina naeng ro. Laos songon I ma
situasi parngoluon ni angka jolma di harajaon hadameon tu tingki na naeng ro. Ima songon di haroro ni Jesus
napaduahalihon mambahen tano on gabe tano na imbaru na so adong be angka angguk angguk dohot arsak
( Pangungkapon 21). Dungi i muse udut ni harajaon hadameon na naeng ro ima hamumuba ni pangalaho ni
jolma, sian na sai olo manjahati manang mangago hian gabe dang be manjahati. Laos di tingki i hadameon i di
papangket marhite panandaon dohot parbinotoan tu Jahowa. Alai dung ojak harajaon hadameon i gabe konkrit
mai sude. Anggo saonari masiboan pikkiranna dohot haporseaon na dope angka jolma. Alani i do umbahen na
marragam angka agama na adong di portibi on. Bahkan di sada agama pe tubu angka sekte na masialoan, gabe
dang dapot hasadaon. Alai anggo tu tingki na naeng ro ingkon gabe sada do sude jolma i jala mardame. Dungi
nasa jolma, jala nasa bangso, huhut nasa pamangan ingkon mangaku, Kristus i do Tuhan (Pil. 2:10), jala nasa
huaso dohot nasa ulu ni tot ingkon somba tu Jesus (Jes. 45:23), ido na nidok ni si Jesaya di turpukta sadari on,
nasa bangso gabe usouso di urat ni si Isai, lapatanna diujungna sude marsiajar tu Jesus (10).

III. Sipahusohusoron/renungan/Aplikasi Khotbah

1. Paloas ma dirim diuluhon tondi, ima tondi parbadia naung dilehon Debata, molo so adong tondi parbadia
manang tondi di rohanta, saluhut parulaonta gabe manghorhon na so denggan. Halak naso olo mian dibagasan
tondi ni Debata, ndang adong dame mian disi. Unang parguru dirim sambing, alai loas tondi marhuraja
dibagasan roham. Rohanta on ima inganan manang bagas joro ni Debata, molo sai mangulahon dosa do hita
dang mian tondi I, alai mian ma tondi hajahaton (tondi parbadabadaon, tondi hamongkuson, tondi hahodaron,
dohot angka tondi na asing).
2. Di Minggu Advent on, naeng lam tangkas rohanta manghaposi di hasasaut ni bagabaga ni Jahowa nang pe
nunga songon tungko situasi na taalami ganup (isara ni: roha biar, arsak, parungkilon, hasusaan na
marragam dlna), artina sai hira na so adong be sihirimon sian i molo mangihuthon pamikkirion ni hajolmaon.
Alai anggo baga-baga ni Jahowa saut jala tulus do. Marhite pandohan, ruar sada tunas sian tungko ni si Isai,
jala marparbue sada tubis na tubu sian uratna. Taida ma, dibagasan Jesus Kristus do hasasaut dohot hagogok ni
baga-baga i. Alani i na so tupa hita mandele, nang pe nunga songon tungko na so adong be sihirimon, unang
laos mandele, alai hot ma hita marpanghirimon tu Jahowa asa Jahowa na pasaut angka na tahirim i. Jala
taingot ma Hata ni surusuruan i na mandok,“dangadong na so tarpatupa Debata” (Luk. 1:37).

3. Di minggu Advent on, ndada na paimahon haroro ni Kristus be hita tu portibi on. Ai tibu Ibana ro tu portibi on
marhite hatutubu-Na, alai na tumimbo sian i, na tapaima (secara pro-aktif) ima hasasaut ni harajaon hadameon
i. Ndada na maimaimahon hita di tingki Advent on, alai na manomunomu do manang menjemput na naeng ro
i, ima harajaon hadameon i. Ala na maimaima na passip doi alai na manomunomu aktif do i mangula
siulaonna pasauthon haroro ni hajaon hadameon i. Alani aha do perananta ? parsidohot do hita dipangido
Debata Jahowa aktif laho pasauthon harajaon hadameon i. jala sasintongna nunga dibagasan dirinta. Asa
terwujud i tu na humaliang hita, dipangido Debata do hita parsidohot gabe subjek ni hadameon i. ibarat ni
halak na menuntut keadilan, molo holan na paimahon do dang saut terwujud keadilan i. alai asa saut I, ingkon
jumolo ma na menuntut i pasauthon keadilan i di dirina sandiri, dungi tu humaliangta. Songon i do nang
harajaon hadameon i.

Selamat Memasuki Minggu Adven

sambutlah Sang Raja Damai itu, diam dalam hati kita.

Vic. Pdt. Samuel Hutabarat, S.Th.