HURIA KRISTEN BATAK PROTESTAN (HKBP)

DISTRIK XXI MEDAN UTARA

JEREMIA MABAR
SERMON PARHALADO
Epistel Tu Minggu 12 Maret 2023

MARSOMBA SIAN NASA ROHA TU DEBATA

Parjumpangan ni Jesus dohot parompuan Samaria di sada huta na margoar Sikar
mangalehon sada panorangion dohot pangantusion na bagas taringot Parsombaon dohot
pamujion na sintong tu Jahowa Debata. Marsomba dohot mamuji Jahowa Debata ingkon
manadinghon bangko-bangko na sailaon isarana parmusuon, persaingan, mandok holan
dirina na sintong, jala sai manghopolhopol/ manorushon angka pangantusion na hurang
denggan tu angka sundut na umposo. On do na manggohi roha ni halak Yahudi dohot
Samaria gabe ndang boi marparsaoran nasida. Naeng borhat ma Jesus sian Judea manuju
Galilea, jala ingkon mamolus huta Samaria do nasida, ala ido dalan balobung/lurus manuju
Galilea.
Molo halak Jahudi ingkon pasidingonna do huta Samaria, ala hagigion do di roha
nasida mandege Samaria. Tumangon do dao dalananna asal ma unang mamolus sian huta
Samaria i. Nian halak Samaria tong do keturunan ni Yahudi na kawin campuran tu Asyur,
marhuta di Samaria. Gabe ndang polin parsombaonnasida tu Jahowa Debata. Disomba
nasida do tong debata ganaganaan ni halak Asyur (2 Raja 17:19). Dung mulak halak Jahudi
sian habuangan Babel, ditawarhon halak Samaria do haradeon nasida laho mangurupi
pembangunan kembali bagas Joro ni Debata di Jerusalem. Alai ditulak si Nehemia do
pangurupion ni halak Samaria i.
Gabe lam sobu ma hamusuon ni halak Jahudi dohot Samaria. Gabe dipajongjong halak
Samaria ma bagas joro nasida di dolok Gerizim. Ugama nasida satonga hasipelebeguon jala
satonga hajahudion. Asa mamungka sian i tung dihagigihon halak Jahudi do marparsaoran
jala pajumpang dohot halak Samaria. Halak Samaria mangongkuhon holan di Dolok Gerizim
do jolma boi pajumpang dohot Debata. Halak Jahudi mandok holan di Jerusalem do jolma
boi pajumpang jala marsomba tu Debata. Asa marhite parjumpangan ni boru Samaria
dohot Tuhan Jesus mangalehon hatorangan dohot kepastian didia do tutu inganan na lehet
marsomba tu Debata?
Marhite turpuk on diajarhon Jesus do tu parompuan Samaria i nang tu hita pe,
“Porsea ma ho di Ahu, inang! Na ro ma tingkina, gabe ndang pola be dolok an manang

1
Jerusalem partangiangan tu Ama i”(ay.21). Parsombaon na ringkot situtu tu Debata ndada
didia jala songon dia inganan i. Asa marisuang do parsalisian ni Jahudi dohot samaria
taringot u inganan marsomba tu Debata. Parsombaon tu Debata ndada inganan dohot
persyaratanna unokna, alai panandaion na tangkas dohot harosuon ni parsaoran na
sintong do tu Ama i. “Alai na ro ma tingkina jala nunga ro i nuaeng, gabe di bagasan Tondi
dohot hasintongan martangiang angka partangiang na tutu tu Ama i; ai angka partangiang
na songon i dipangido Ama i”(ay. 23).
“Alai na ro ma tingkina” martudutudu do i tu hamamate ni Tuhan Jesus. Asa
mamungka sian i ndada holan di Jerusalem be na gabe inganan haojahan goar ni Debata.
Maribak ma hirehire na di bagas Joro sian ginjang ro di toru (Mat. 27:51), jala marokso
Jerusalem dohot bagas Joro i. Na ro ma tingkina mago ma angka na mangambati parsaoran
dohot Debata marhite hamamate ni Tuhan Jesus Kristus di hau silang i. Asa ndang adong
be na boi mangambati jolma i ro marparsaoran dohot Debata. Dapot ma tingkina ndang
adong be parsalisian mandok ingkon di dolok Gerizim manang ingkon di Jerusalem inganan
marsomba tu Debata, alai nunga tung di sude inganan, jala sude houm, dohot sian sude
status boi pajumpang jolma dohot Debata. Ganup jolma nga boi marsaor dohot Debata,
asal olo ibana pasolhothon dirina sian sihol ni rohana dibagasan Tondi dohot hasintongan.
“Martangiang di bagasan Tondi dohot hasintongan” . Nunga tingkina
mangharingkothon parsombaon dohot partangiangan tu Debata dibagasan Tondi dohot
hasintongan. Panandaion na tangkas tu Debata patubuhon panindangion di habalgaon
panghokhopon ni Debata tu saluhut portibion. Boha do parange ni halak na ro marsomba
tu Debata hombar do tu lomo ni rohaNa? Aha ma gunana ro marsomba dohot martangiang
tu Debata, hape asing do pangalahona? Ai ndada ruhut parduru i diida Debata, tung roha
parbagasan i do. Tondi do anggo Debata; asa angka na martangiang tu Ibana, patut
martangiang di bagasan Tondi dohot hasintongan.
Nunga ro Messias na margoar Kristus; Mesias na margoar Kristus naung leleng
diparsinta jala dipaima halak Jahudi do na talup patupahon pardengganan dohot na tuk
mamaritahon i. nunga ro Mesias i tumopot jolma i, alai ndang adong na tumandasa. Sai
manghirim do nasida di haroro ni Mesias i, marjite i ma dihatindanghon jala dipatandahon
Jesus dirina marhite na mandok “Ahu do i, na mangkatai dohot ho!” Partingkian naung
leleng dipaima nunga dapot be jala nungnga ro nuaeng. Nunga di tongatonganta Kristus i,
jala nunga dipatupa pardengganan i. Asa marhite Jesus Kristus i, nunga tangkas tatanda
Debata Jahowa, Parholong jala Sipalua. Asa ingkon Tondi Ni Debata do margogoihon hita
gabe boi patupahon parsombaon, pamujion dohot partangiangon na sintong tu Debata.

2
Pilipi 3:3 “Ai hita do targoar parsunaton, angka parsomba di bagasan Tondi ni Debata,
angka siasahon Kristus Jesus, angka na so marpos ni roha di daging i.
1 Petrus 2:5 “Sai olo ma nang hamu paulion, songon angka batu na mangolu, gabe bagas
partondion jala hamalimon na badia, laho mamboan angka pelean partondion, halomoan
ni roha ni Debata, marhitehite Jesus Kristus”.
Huria ni Tuhanta na nihaholongan! Dia ma siparangehononta sian turpuk jamita
sadarion?
 Parsombaon tu Debata ndang marguru tu inganan dohot partingkian, alai dibagasan
tondi dohot hasintongan do. Didia pe hita boi do marparsaoran dohot Debata. Ndang
dibatasi ruang dohot partingkian Debata, ai tondi do Ibana.
 Martangiang ingkon dibagasan goar ni Tuhan Jesus (Yoh. 16:24,Yoh 1:23b), ai marhite
Ibana do adong pardenggananta dohot Debata Ama jala digoar hita gabe anak
haholonganNa. Sian pardengganan i do hita talup marparsaoran marsomba sian nasa
roha laho mangido na ringkot di ganup parngoluonta.
 Tatangkasi ma ganup dirinta, sintong do parsaoran, pamujion dohot partangiangonta
di adopan ni Debata? Asa molo naung tatanda dirinta ganup, tutu halak pardosa na
sumalin do hape hita, jala ndang adong na boi sipangasahononta asa dapot haluaon
dohot hasesaan ni dosa so holan marhite Jesus Kristus. Ro ma hita marsitutu
marsomba sian nasa roha dohot sihol ni rohanta mangolophon Ibana. Songon goar ni
minggunta “OKULI” sai tong do mangaranapi matangku dompak Jahowa (Pslm.
25:15a). Tu Debata Jahowa na marsuru Tuhan Jesus paluahon hita manisia ma
taarahon pardalanan ni ngolunta. Holong na so halompoan nunga patar marhite Jesus
i. Tapuji jala ta pasangap ma goarNa na badia i. AMEN.