BAHAN SERMON EPISTEL PARHALADO HKBP JEREMIA MABAR 2 Oktober 2022

1. Marende : BE. No. 112: 1 – 2 “Haleluya Tapuji ma”

2. Votum– Introitus : A.XV. A.16 – D. XIII. 51
3. Epistel : Andung 3 : 19 - 26
4. Marende : BE. No. 30: 1 + 2 “Jesus lehon Hatorangan”
5. Jamita : 2 Timoteus 1 : 1 – 14

NDANG MARPANSOHOTAN ASI NI ROHA DI TUHAN I

Huria na hinaholongan ni Tuhanta Jesus Kristus! Solhot do relasi Paulus dohot si Timoteus di
bagasan asi ni roha ni Debata. Didok : “anakkonku na tutu di bagasan haporseaon” i ma panjouon ni Paulus
tu si Timoteus di surat na paduahon. Tujuan ni surat on laho mangalehon panogunoguon asa unang sumurut
ringgas ni Timoteus manghobasi huria ni Tuhan i. Ulaon na mansai borat do laho mamaritahon Barita Nauli
i. Alani, dipaingothon Paulus do si Timoteus asa uang dipangasahon pingkiranna nang gogona, alai tongtong
pasahathon saluhutna tu pangurupion ni Debata. Haporseaon na togu i ma bohal ni angka na porsea i laho
mamaritahon Barita Nauli.
Di ayat 5, dipatuduhon paboa haporseaon i do na mangalehon gogo nang habisuhon tu naposo ni
Debata laho mamaritahon Barita Nauli. Songon i ma pangajaran ni Paulus tu Timoteus, tung so tadinghonon
ni Debata do naposo na togu dihaporseaonna. Alani, dipaingot Paulus do haporseaon ni Timuteus na so
marlaok i, i ma haporseaon naung adong hian, sian ompung boruna si Lois dohot inangna si Oinike.
Haporseaon na so marlaok, i ma roha na ias, manang di hata Indonesia didok “Iman yang tulus ikhlas”,
lapatanna, na mangolu do haporseaon ni jolma na olo mangoloi Debata. Gabe bohal ni Timoteus do i
dipanghobasionna.
Tondi ni Debata do na mangula marhite ngolu ni Timoteus jala goar ni Debata ma na marmulia
marhite panghobasionna. Di ayat 7, dipaboa disi ai margogo do naposoNai marbarita na uli ala: dilehon
Debata do hita tondi hagogoon, tondi haholongon, tondi pangarajaion diri, ndada tondi hatahuton. Tondi ni
Debata do na mangula di ulaon marbarita na uli marhite naposoNa i. Dipargogoi do naposoNai asa unang
tahutan manang ganggu rohanasida mansoarahon hataNa i. Alai, hatahuton manang ganggu ni roha somalna
gabe manundati jolma mangulahon ulaon na denggan. Hatahuton sipata mambahen gabe lam mabiar jolma
dipardalanan ni ngoluna. Mabiar ndang mangan, mabiar ndang dapotan pangomoan, mabiar ndang jadi na ni
ula, tunga rarat na ingkon ni habiaran di portibi on. Laos i do umbahen na olo jolma i mangulahon na so tama
di adopan ni Debata. Sipata, angka ruas ni huria pe mabiar manghantindanghon hasintongan hata ni Debata.
Songon halak na porsea, unang be hita dihuphupi biar ni roha. Nunga ditaluhon Debata hatahuton na
balga sian jolma i ma hamatean. Nunga hehe Tuhanta Jesus Kristus sian hamatean ni dosa i, asa monang jala
mangolu hita. Asa marhite haheheonNa i, dipargogi do hita saluhutna mangulahon na hombar dilomo ni
rohaNa. Didok hata ni Debata di Jesaya 40 : 10 “Unang ho mabiar, ai Ahu do donganmu! Unang biahaton ho,
ai Ahu do Debatam: Ahu margogoihon ho huhut mangurupi ho, huhut maniopi ho marhitehite siamun ni
hatigoranHu”.
Diskusi:
a. Aha do na nihabiaran ni jolma di partingkian si nuaeng on?
b. Aha ma na boi patupaonta asa dao sian hatahuton manang ganggu ni roha i?

6. Marende : BE. No. 24: 1 - 2 “Tuhan Debata”

7. Tangiang sian na ro
8. Marende : BE. No. 30: 1 - 2 “Jesus Lehon Hatorangan”
9. Tangiang sian na manjabui
10. Marende : BE. No. 463: 1 -2 “Pasupasu TongosonMu” (Pelean)
11. Tangiang Pelean – Tangiang Ale Amanami – Pasupasu