HURIA KRISTEN BATAK PROTESTAN (HKBP)

BORNEO RESSORT BANJARMASIN

Jl. Bandarmasih Komp. DPR Gg. IV No. 6, RT.036/RW.003
Belitung Selatan - Banjarmasin, Kalimantan Selatan
Pimpinan Jemaat : Pdt. Apriando J. Rajagukguk (0821-4808-9192)
No. Rek. HKBP Borneo : 00010-01-50-042749-2 (Bank Tabungan Negara)
No. Rek. HKBP Borneo Pembangunan : 00010-01-54.000709-0 (Bank Tabungan Negara)

Bahan Sermon Parhalado Jumat, 5 Mei 2023

DEBATA DO HAGOGOONTA RO DI SALELENGNILELENGNA

1 Petrus 5, 6-10

Patujolo
Tahatindanghon do paboa na marhuaso Debata jala marhagogoon di
ginjang ni saluhutna di portibi on. Ibana do manompa, mangaramoti jala
marmudumuduhon sude angka na tinompaNa, tarlumobi hita angka na
porsea na tinobusNa marhite panghophopon ni Kristus. Alani, dipaingot do
angka huriaNa i asa pasahathon ngoluna holan tu Debata, ndada tu
hagogoon ni portibi on. Ai nunga ditaluhon Debata huaso ni portibi on
marhite hamamate dohot haheheon ni Kristus i. I do barita na uli na
pinasahat ni angka apostel ni Kristus tu angka huria na parjolo i. Asa
margogo nasida di bagasan haporseaon tu Kristus i, songon na masa di
huria na marserak di Pontus, Galatia, Kappadosia, Asia dohot Bitinia. I ma
angka huria na manjalo surat sian Petrus, apostel ni Debata.

Hatorangan ni Turpuk
Ay 5 - 6. Dialo Debata na ginjang marroha, alai diasii angka na serep
marroha. Dipaingot apostel Petrus do angka ruas ni huria i asa patuduhon
ngolu na di bagasan serep ni roha. Tangkas didok disi: ai dialo Debata do
angka na ginjang roha, alai dilehon do asiasi tu angka na serep marroha.
1
Lapatanna, ditogihon apostel Petrus asa sude angka na porsea i maniru
parohaon ni Tuhanta Jesus, Anak ni Debata na serep maroha. Ai sian banua
ginjang do Tuhanta i, alani holongNa tu hita gabe rade Ibana sorang di
Betlehem mamboan hadameon sian banua ginjang i. Ai ndang lomo roha ni
Debata marnida angka na ginjang marroha, alai ingkon boi tapatutoru dirinta
tu toru ni tangan ni Debata asa dipatimbo Debata hita di tingkina. Songon i
nang diparngoluanta siganup ari, ai ndang adong labana sahalak jolma
patimbo dirina ala ni artana, pangkat, sinamot, dohot lan na asing. Molo tung
pe godang do pasupasu na tajalo sian Debata, ingkon do tahamauliatehon,
tapaserep rohanta jala tapangke laho mangurupi angka donganta na ringkot
siurupan. Asa marmulia Debata marhite angka pambahenanta.
Ay. 7 Tingganghon nasa holso ni rohanta tu Debata, ai Ibana
manarihon ngolunta. Tung tangkas do dipangido ayat on, asa boi ganup na
porsea pasahathon nasa holso manang parsorionna holan tu Debata. Ai
Ibana do na manarihon ngolunta. Songon na tarsurat i: “Ndang tagamon
loason ni Debata angka jolma partigor i humasusa ro di salelenglelengna”
(pat. Psalm 55:23). Sipata do ganggu rohanta manang mabiar laho
mangadopi angka na masa nuaeng dohot ari naeng ro. Alai, dipaingot do hita
asa pos rohanta di pangaramotion ni Debata. Ndada holan manompa
Debata, alai tongtong do disarihon Ibana angka na ringkot i di parngoluonta
on.
Ay. 8 – 9 Torang ma rohanta mangalo sibolis i di bagasan togu ni
haporseaon. Dipatorang apostel Petrus paboa adong do hagogoon ni sibolis
laho mambahen jolma i asa mandao sian Debata. Didok do songon babiat na
marauang ibana mangalului angka na boi sibondutonna. Angka ise ma i? I
ma angka jolma na gale marhaporseaon jala na mangasahon gogo ni
2
pingkiranna sambing. Ujungna dipangke sibolis ma ibana mangulahon ulaon
na jat na maralo tu lomo n iroha ni Debata. Lilu ma rohana, jala lam mandao
sian Debata. I do umbahen sai dipaingot apostel Petrus angka ruas ni huria i,
asa “torang rohana” jala “dungo” mangalo sibolis i. Ringkot tapangido
hagogoon dohot habisuhon sian Debata asa monang hita laho mangalo
sibolis i. Ai umbalga do hagogoon ni Debata sian saluhutna. Tarlumobi,
nunga ditaluhon Tuhanta Jesus sibolis i marhite hamamate dohot
haheheonNa, asa marhamonangan jala mangolu angka na porsea i. Antong,
unang lomos alai tiop ma “gomos” haporseaonta tu Debata asa
marhamonangan hita di Ibana. Songon ende di BE. 289 : 1 “pos ma ho
rohangku di Debata, bonom ma arsak mu tu rohaNa da! Unang lomos, tiop
ma gomos haporseaonmu, unang ho bobos! PaluaonNa ho ma antong sian
nasa jea di tano on”.
Ay. 10 Debata na manjou angka na porsea i tu hasangaponNa na
manongtong di bagasan Kristus. Dijou Debata do sude huriaNa asa
parsidohot tu hasangapon ni Kristus di tongatonga ni angka parsorion na
masa di ruas ni huria i. Nang pe mangodopi ragam angka hamaolon dohot
hasusaan di na mangihuthon Tuhan Jesus i, ai tung tangkas do pauliulionNa,
dipahot jala ditogutogu Debata do sude angka huriaNa i manaon haporsuhon
i marhite Tondi Parbadia. I do pos ni rohanta tu Debata na sai tongtong
mangarorot ngolu ni na porsea, angka na joujou tu Ibana. Singkop hagogoon
dohot las ni roha ala pangaramotion dohot panarihononNa di ngolunta.
Antong, lam tapasahat ma dirinta tu Debata jala marsihohot hita
mangihuthon tona dohot parsuruonNa i di bagasan ngolu on. Asa singkop las
ni rohanta jala marhamongan hita, ala hagogoon ni Debata. Amen!