ACARA PARTONDING NI PARMINGGUAN

UJUNG TAON PARHURIAON

( PARNINGOTAN DI ANGKA NAUNG MONDING )
HKBP SIONGGANG RESSORT GEMPOLAN
DISTRIK XIV TEBING TINGGI DELI
Kec. Sei bamban-kab. Serdang bedagai
Pendeta Ressort : Pdt. Melva Simorangkir, S.Th (08126413197)
Bertyna Sinaga (081375072416)

Minggu XXIII DUNG TRINITATIS, 20 November 2022

 Ev: 1 Korint 15 : 50 - 58  Ep: Parjamita 8 : 9 - 17
TOPIK:
DIPAMONANG DEBATA HITA MARHITE JESUS KRISTUS
Parhobas Ibadah Sikola Minggu Ibadah siang pkl.10.00 wib
Jamita Septiara St. Sinurat
Agenda CSt. Br. Aruan St. Siregar
Tingting Wenny St. Sinaga

1. Marende B.E No 834 : 1 - 3. “NA MASIHOL DO ROHANGKU” BL. 834.

2. VOTUM – INTROITUS – TANGIANG:

U : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar
ni Tondi Parbadia na tumompa langit dohot tano on. Amen. Songon duhutduhut do saluhut
daging jala songon bungabunga ni duhutduhut i do saluhut hasangapon ni jolma. Nunga
malos duhutduhut i jala nunga marurus bungabungana i, alai na hot do Hata ni Tuhan i ro di
saleleng ni lelengna. Sai burju ma ho rasirasa mate, dung i lehonongKu ma tu ho tumpal
hangoluan. Haleluya!
H : (Mangendehon): BE HKBP No. 852 : 1 “HALELUYA HKBP (3X)”
 Haleluya, Haleluya, Haleluya!
U : Martangiang ma hita! Ale Tuhan Debata, Pargogo na so hatudosan! Ho do na manjou
hami jala Ho do na papunguhon angka na pinillitMu tu huriaM na badia i. Mauliate ma
rohanami, ala naung dipasahat Ho hami tu AnakMu, asa Ibana nampuna hami. Asi ma
rohaM, sai pargogoi ma hami mangulahon na nidok ni HataM, asa domu hami dohot
naung tolhas tu lambungMu. Sai patogu ma haporseaonnami sahat ro di ajalnami, asa
sahat hami sogot tu halalas ni roha na sumurung, na pinaradeM di angka na manghaholongi
Ho, asa pujionnami Ho disi saleleng ni lelengna marhitehite Tuhan Jesus Kristus,
Tuhannami. Amen.
( Hundul )

3. Marende BE. No. 495 : 4 - 5. “Maringan do di surgo i” BL. 36.

4. PATIK:
U : Tatangihon ma Patik ni Debata sian Buku Pangungkapon 3:11. Magira ma Ahu ro. Tiop ma
1
 na di ho, unang adong na mambuat tumpalmi! Antong rap mangido gogo ma hita sian Tuhan
Debata!
U & H : Ale Tuhan Debata! Sai pargogoi ma hami mangulahon na hombar tu PatikMi. Amen.

5. Marende BE. No. 432 : 1 - 2. “Sian hurungan ni dosangki” BL. 292.

6. MANOPOTI DOSA:
U : Tatopoti ma dosanta, martangiang ma hita! Ale Tuhan Debata, Ama ni Tuhan Jesus
Kristus, Ho do Debata Pargogo na so hatudosan, sitompa nasa na adong, paruhum na
tigor, na manguhumi jolma manisia! Na ro do hami tu joloM manopoti dosanami, angka
na huula hami marhite sian pangalaosionnami di PatikMu, i ma marhitehite sian tubutubu
ni rohanami na roa i, nang sian panghataionnami na so ture, ro di pangoloionnami di
hisaphisap ni rohanami.
H : Na tama situtu do hona uhum hami ala ni dosanami i, alai na tarsolsolbagi do hami
nuaeng alani i. Asi ma rohaM di hami, ale Debatanami. Pardengganbasa jala Parasi
roha do Ho ala ni Anak haholongan ni rohaM, Tuhan Jesus Kristus Tuhannami.
U : Sai sesa ma dosanami saluhutna, jala suru ma Tondi Parbadia tu rohanami be, asa
tarbahen hami mangoloi Ho di bagasan hatigoran dohot habadiaon, gabe sahat hami tu
hangoluan na so ra suda, na pinarbagabagaM di angka na porsea di AnakMu, Tuhan Jesus
Kristus, Tuhannami. Amen.
Tabege ma bagabaga ni Debata taringot tu hasesaan ni dosanta! Adong do di hita
sintua ni malim na songon i, na hundul di siamun ni habangsa hatongamon di banua
ginjang. Dibahen i tarbahen Ibana do pangoluhon ro di ujungna angka na sandok ro tu
Debata marhitehite Ibana; na mangolu do Ibana tongtong, asa ditangianghon nasida.
Hasangapon ma di Debata na di ginjang!
H : Amen.
(Hundul)
7. KOOR: INA KAMIS
8. Marende BE. HKBP No. 403 : 2 “POS ROHANGKU DI TUHANKU” BL. 402.
9. E P I S T E L
U :Tatangihon ma hata ni Debata turpuk Epistel di Minggu Ujung Taon Parhuriaon, ima na
tarsurat di buku Parjamita 8:9-17. Luhutna i nunga huida uju diranapi rohangku saluhut
pambahenan angka na masa di hasiangan on, uju sada jolma mangarajai donganna jolma
mambahen ibana marhinamago.
H : Angkup ni i, nunga huida tipak tartanom halak parjahat; hape anggo halak na
mangulahon na denggan, angka na ro sian inganan na badia, dihalupahon donganna
sahuta do i. I pe hata oto do i.
U : Ala so tibu manginona pambahenan angka na jahat i, dibahen i gok roha ni jolma manisia
di bagasan mangulahon hajahaton.
H : Alai tung sura pe ratus hali halak pardosa mangulahon hajahaton, pola sanga
sarimatua ibana, tangkas do huboto: Martua sogot halak na manghabiari Debata,
angka na marparange di jolona.

2
 U : Alai ndang tagamon sonang anggo halak parjahat i, jala ndang tagamon paganjangonna
ariarina; alai songon halinu do ibana, ala so marhabiaran tu Debata.
H : Adong dope sadanari halongangan masa di atas tano on: Adong halak partigor, hira
pambahenan ni halak parjahat niulana, parsorionna timbangon; jala adong halak
parjahat, hira pambahenan ni halak partigor niulana, parsorionna timbangon.
Nunga pola hudok halongangan do i.
U : Dibahen i hupapujipuji las ni roha, ala na so adong na dumenggan di jolma i saleleng di
hasiangan on, ia so na mangan minum dohot marlas ni roha; i do na tinggal di ibana sian
ulaonna saleleng ariari ni ngoluna, angka na nilehon ni Debata tu ibana di hasiangan on.
H : Dung i diringkoti rohangku muse naeng mananda hapistaran dohot manangkasi
hinamago na masa di atas tano on, pola tung balisaon mata ni jolma borngin dohot
arian, ndang tarpodom.
U : Jadi tangkas ma huida sandok jadijadian ni Debata, na so tardodo jolma i pambahenanna
angka na masa di hasiangan on. Nang pe maradu ngalutan roha ni jolma i mandiori,
ndang tagamon jumpangsa; tung sura pe ninna roha ni halak na pistar leak botoonna do i,
ndang tagamon jumpangsa. Ido sahatna. Martua do angka na tumangihon Hata ni Debata
jala na umpeopsa.
H : Amen.
10. KOOR : Remaja-Naposobulung
11. Marende BE. HKBP No. 88 : 3 - 4. “JESUSHU NAUNG MANOBUS AU” BL.106.
12. MANGHATINDANGHON HAPORSEAON:

U : Tahatindanghon ma haporseaonta i, songon na hinatindanghon ni donganta sahaporseaon

di sandok portibi on. Rap ma hita mandok!
H : Ahu porsea di Debata Jahowa…. d.u
(Hundul)
13. TINGTING:
14. PARNINGOTAN DI NA MONDING
Marende BE No. 334 : 3 + 5. “Nasa jolma ingkon mate” BL. 186.

Jesus Kristus nunga mate ala ni mangolu au. Singkop tua diparade, i pe las rohangku lao.
Manadinghon pardagangan, mandapothon hasonangan. Mandapothon Jesushi, ai
malungun au tusi.

Dohot do disi maringan na badia i sude. Ompu dohot panurirang, nang sude apostel pe. Ai
marriburibu taonna lao tumopot ingananna. Angka na badia i pasangaphon Tuhan i.

U: Hamuna angka dongan sahaporseaon! Nunga sahat hita tu minggu ujung taon parhuriaon.
Dipaingot i do hita paboa na laho marujung do sandok ngolu on, ai ndang adong na hot di
portibi on. Di bagasan minggu ujung taon parhuriaon on, tama do ingotonta angka donganta
naung jumolo monding di bagasan na sataon parhuriaon i. Ndada asa marsak jala tumatangis
hita umbahen taingot nasida naung jumolo monding i, alai asa lam tapanghilalahon do paboa

3
 parsatongkinan do ngolunta di portibi on. Na ingkon borhat do hita muse manopot angka na
badia i di inganan na pinarade ni Jesus Tuhanta i. Antong tabege ma goar-goar ni angka
donganta naung jumolo monding i!
(Sekretaris Huria manang sahalak sian tongatonga ni partohonan Manjaha goar-goar ni
na monding)

U: Nunga tabege goargoar ni angka naung monding manipat na sataon parhuriaon on. Antong
tama do ingotonta angka pambahenan nasida na denggan i tagan di ngoluna bahen
sorminan na arga di hita. Laos tapangido ma gogo sian Tuhanta i asa lam margogo hita
mangulahon hataNa saleleng mangolu hita, asa unang marisuang sambing tingki na
pinasahat ni Debata tu hita molo diudut Ibana dope hosanta sahat ro di tingiki on. Antong
martangiang be ma hita di bagasan rohanta, laos jongjong ma hita di ingananta be!
( Martangiang na hohom huhut manghuling organ angonangon BE No. 347 dua ayat ).
…….Amen…..
Marrende BE No. 347 : 1 - 2. “Sai masipaidaan” BL. 11

Sai masipaidaan do na porsea i. Dung sahat be langkana tu hasonangan i,

tu hasonangan i, tu hasonangan i
Antong burju ma hita mangalo dosa i. Sai unang tading hita di
tongan dalan i, di tongan dalan i, di tongan dalan i.

U: Antong tapuji ma Debata ala diparade di hita inganan na sonang, na andul ummuli jala
dumenggan sian nasa na adong di hasiangan on, inganan na hot ro di saleleng ni lelengna.
Alani i, taparhatopot ma di bagasan rohanta pandohan ni apostel Paulus na mandok: “Ai
Kristus do hangoluan di ahu, jala laba nang hamatean.” Marende ma hita laho papunguhon
peleanta!
(Hundul)

14. Marende BE.HKBP No. No. 240 : 1 – 3 “O HAMUNA NA PORSEA” BL.222. (Pelean Ia,
Ib)
15. J A M I TA: 1 Korint 15 : 50 - 58.
16. Marende BE. HKBP No. No.251 : 1 – 3 “NA MONANG I DO” BL.138. (Papungu Pelean
II tu Kantor Pusat HKBP)
17. Tangiang Pelean dohot pasupasu.
U : Tatangianghon ma peleanta, martangiang ma hita! Ale Debata, Amanami na di banua
ginjang! Ho do haroroan ni saluhut silehonlehon na denggan dohot nasa ulibasa na
mauliutus. Hupasahat hami ma sian na nilehonMi tu hami, pelean nami tu Ho. Sai jalo ma
i gabe uap na hushus di joloM. Pasupasu ma i jala ramoti asa huparhaseang hami pelean
on, patimbulhon harajaonMu di tongatonga ni huriaM dohot di portibi on. Buhai ma
rohanami marhitehite TondiM, asa lam hutanda hami godang ni silehonlehonMi tu hami,
asa lam girgssir hami mandok mauliate tu Ho, marhitehite Jesus KristusTuhannami.
Amen.
H : (Mangendehon)BE HKBP No. 204 : 2 “Ndang Tadingkononhu Ho” BL 73
 Nasa na nilehonMi tondi ro di pamatanghu
Hosa dohot gogongki ro di saluhut artangku
4
 Hupasahat i tu Ho na so unsatonhu do
U : Ale Tuhan Debata, na sian nahinan jala na mangolu ro di saleleng ni lelengna! Huingot
hami sadari on angka na mate sian hami, naung pajolohon tu lambungMu. Di Ho do
anakhinsu ni banua ginjang, jala diungkap Ho do i di angka na mangasahon Tuhan Jesus
Kristus. Na rungka do rohanami sadari on marningot ajalnami, dohot di haheheon ni
daging di ari sogot. Mauliate ma rohanami tu Ho, ala ditubuhon Ho hami tu panghirimon
na mangolu, gabe partohap hami di hangoluan na so ra suda. Ndada na mandele hami di
ari parningotan on, alai na malungun do hami di sambulo ni tondinami. Nunga torop
dongannami naung nialapMu; tau sipaingot do ujung ni langka nasida di hami, bahen
pangkirimon mida Tuhan Jesus di ujung ni langkanami be. Sai sungguli ma rohanami
mambahen tiruan na denggan di angka pinomparnami. Sai apuli ma na marsak roha dohot
angka na matean, asa unang mangandungi jala mandele nasida. Sai taiti ma rohanasida
mamereng dompak ginjang. Sai lehon tondiM tu hami asa tangkas dihatindanghon tu
hami, naung dohot do hami anakMu jala panean di arta na di banua ginjang. Sai padao ma
ganggu ni roha sian hami asa hot haporseaonnami maniop Tuhan Jesus sipangolu i,
andorang hubolus hami rura linggoman ni hamatean i. Molo homur matanami be, ungkap
ma mata ni rohanami asa tangkas diida dalan tu hasonangan i. Molo hallang dilanami, so
binoto be manghuling, pargogoi ma hami marhitehite TondiM i, asa tarjouhon hami: Ale
Amang! Sahat tu tanganMu ma tondingku! Sai patiur hian rohanami, asa hobas
langkanami jala sonang hami laho mate di bagasan Tuhan Jesus Kritus, Tuhannami.
Amen.
Ale Amanami na di banua ginjang! Sai pinarbadia ma GoarMu! Sai ro ma harajaonMu!
Sai saut ma lomo ni rohaM di banua tonga on songon na di banua ginjang! Lehon ma tu
hami sadari on hangoluan siapari! Sesa ma dosanami songon panesanami di dosa ni
dongan na mardosa tu hami! Unang hami togihon tu pangunjunan! Palua ma hami sian
pangago!

H (Mangendehon):
 Ai Ho do nampuna harajaon dohot hagogoon
Ro di hasangapon salelengnilelengna. Amen
U : Tangiang Pasupasu !
H : (Mangendehon) Amen, Amen, Amen.
========
SELAMAT HARI MINGGU
TUHAN MEMBERKATI