BAHAN SERMON TU MINGGU ESTOMIHI MINGGU, 19 PEBRUARI 2023

Ev. 2 Petrus 1: 16 – 21
Topik Minggu: Jesus Raja na sangap na Badia

I. Patujolo

Mansai tabo do begeon sarita ni sada ama taringot tu masakan khas ni hita halak Batak, i ma dekke na niura. Hira
ibana nama koki Batak na tarbarita. Dipatorang cara mangalompa, ingkon baenon kancang tano, rias, gambiri, hunik
dohot lan na asing. Jala asomna pe ndang sembarang asom, ingkon asom jungga. Asa mansai tabo do dekke na niura,
masak so pola ni lompa, ninna ibana. Hape, ibana sandiri ndang diallang dekke. Boha do sintong ni sarita on. Luar biasa
ibana patorangkon taringot tu tabo ni dekke na niura, hape so diallang dekke, so hea didai. Hatahata ni halak do
dipahatahata. Omong kasong, alias isapan jempol. Molo boi amanta na di ginjang i menyakinkan halak ala malomalo ni na
mangkatai, alai ianggo si Petrus di turpuk on ndang songon i. Ndang baliga, binaligahon, jala ndang barita binaritahon
jamita na jinamitahonna dohot angka poda na pinasahatna. Alai jamitana i pengalaman langsung bersama Tuhan Jesus. I
ma naeng paboaonna di jamita sadarion. Tapaihutihut ma di toru on.

II. Hatorangan ni turpuk

Memang soal Parusia, barita hangat do di huria na parjolo. Godang menganggap, ingkon sanga dope di
ngolunasida be idaonna haroro ni Kristus na paduahalihon i, laho manguhum angka siula hajahaton. Domu do i tu jamita
ni angka sisean i na mandok: Donok nama arina (Pil. 4: 5), gogot nama tingkina (1 Kort. 7: 29). Jala di Markus 9: 1
mandok: Adong do deba sian angka na jongjong dison, na so tupa mangae hamatean, so jolo diida ro harajaon ni Debata
marhagogoon! Hape sahat tu tingkion, ndang ra ro dope Kristus. Mulai ma muncul keraguraguan di angka ruas ni huria na
parjolo di hasisintong ni hata i. Di situasi na songon on ma mangula parpoda haliluon, na mangajarhon paboa Kristus i
ndang tutu Anak ni Debata. Garang do nasida jala tois, na so mabiar manginsahi angka parhasangapon dohot
mansoadahon Tuhan na manobus nasida (2 Pet. 2: 1, 10b). Jala ndang tutu ro Kristus paduahalihon manguhum portibion
songon na jinamitahon ni si Petrus. Barita “hoax” do i. Didok di bindu 3: 3-4: Na ro ma di angka ari parpudi angka
pangalensem, parhata insahinsak, na mangoloi angka hisapna sandiri, angka na mandok: Didia do harorona, na
pinarbagabaga i? Ai dung monding angka amanta, hot do saluhutna songon i, sian mula ni hasiangan on!

Mangalo poda on dohot pahothon roha ni huria i ditongos ma suratna na paduahon on. Parjolo: Molo masa pe
perlambatan Parusia, ndang na dipagale, manang ndang na so diingot Tuhan i hatana, alai tingki parasian do na binahen ni
Debata tu portibi on, ai ndang lomo rohaNa mago agia ise, naeng ma saluhutna sahat tu hamubaon ni roha (3: 9).
Paduahon: Asa unang ganggu huria na parjolo i dihasisintong ni jamita na jinamitahonna taringot tu haroroNa, didok si
Petrus ma di ayat 16=> Ai ndada huihuthon hami angka turiturian na piningkir ni na bisuk, di na hupabotohon hami tu
hamu hagogoon dohot haroro ni Tuhanta Jesus Kristus, tung diida matanami do hatongamonna i. Ayat 18=> I ma soara,
na hubege hami ro sian banua ginjang i, uju rap hami dohot Ibana di dolok na badia i. Hata tung diida matanami, dohot
uju rap hami dohot Ibana, patuduhon barita, manang jamita na jinamitahon ni si Petrus ndang baliga binaligahon, jala
ndang barita na binaritahon. Lapatanna, panindangion ni si Petrus taringot tu Kristus i ndang turiturian ni na piningkir ni
na bisuk, ndang sian halak na asing dijalo, manang sian sisean na asing diboto, alai ibana sandiri gabe saksi taringot tu
pelayanan, dohot ulaon ni Tuhan Jesus. Ibana ma sahalak sian angka sisean na paihutihut dohot na mengalami dohot na

Mamereng langsung angka tanda halongangan na pinatupa ni Tuhan Jesus, termasuk di hamamate, haheheon
dohot hananaekNa. Jala sada nari peristiwa na hea masa na so apala sude sisean i marnidasa, dipatorang si Petrus, i ma uju
marsangap Ibana di sada dolok na timbo rap dohot si Musa dohot si Elias. Dungi dibege nasida ma pernyataan sian
ginjang na mandok: On do Anakku, haholongan ni rohangku; na lomo do rohangku di Ibana! (Mark. 9: 2-7). Peristiwa
nyata, fakta dan realita. Bukan issu, tetapi dengan mata dan kepala sendiri melihat dan mendengarnya. Songon saksi mata
si Petrus naeng dohononna tu huria na parjolo i, unang ganggu hamu di huaso dohot di hadirion ni Tuhan Jesus Kristus,
tutu situtu do Ibana ro paduahalihon mangalap angka na porsea dohot manguhum portibi on, songon naung
binagabagahonNa hian. Patoluhon: Peristiwa na di atas dolok i ma pahothon rohana, jala lam tangkas diboto, ditanda si
Petrus taringot tu hadirion ni Kristus i. Ndang sian jolma diboto, alai soara sian banua ginjang do pabotohonsa tu ibana.
Kristus i ma Anak haholongan ni Debata. Jala diigil asa marsitiopan tusi nasida. Kahadiran ni si Musa dohot si Elias di na
rap dohot Tuhan Jesus di dolok i, patuduhon dibagasan diri ni Tuhan Jesus singkop digohi tuntutan ni patik dohot hata
bagabaga ni angka panurirang na di Padan na robi, songon na nidok ni si Paulus: Ai Kristus do ujung ni patik i, laho
mamintori nasa na porsea (Rom 10: 4).

III. Panutup

Jamita ndada hata malomalo, alai jamita bagian pangalaman hidup bersama Tuhan. Molo tangkas jolma
mangalami parjumpaan dengan Tuhan, jala tangkas dibilangbilangi pambahenan ni Debata di ngoluna, i do gabe jamita na
mangolu di ngoluna. Nasa panindangionta ingkon marojahan tu Hata ni Debata, ala i do tanda ni huria na sintong; molo
polin diajarhon, dijamitahan Hata i. Jesus Raja na sangap na badia (Epistel Psalm 99), asa patut do sude jolma martano
bato tu Ibana.