Barita Nauli Napaimbaruhon I. Patujolo Huta Rom ima sada huta di Italia, namansai balga, jala ujui gabe pusat Harajaon Romawi. Surat on di tongos di taon 56/57 ima singkat ni pangebationna tu huta Rom. Ndang hea dope Apostel I pajumpa dohot huria I (Jahudi dohot Junani), angka naporsea tu Jesus Kristus alai tung marsigorgor do rohana naing pajumpang (ay.1-10-11; 15:23-24). Surat Rom ima surat na parpudi digurithon Apostel Paulus alani ima digoari surat on ima surat warisani, wasiat namarisihon saluhutna angka teanteanan na laho sipasahatonna. Tujuan ni Paulus mambahen surat on ima asa halak Kristen na adong di Rom (halak Jahudi dohot halak Junani) asa togu haorseaonna ai naing pasahaton ni Debata do tu nasida haluaon na salelengnilelengna marhite AnakNya Tuhan Jesus Kristus. Sian saluhuta surat natinongos ni si Paulus tu huria-huria, targoar do surat Rom on ma mansai jojor dipatorang songon dia do hakristenon I, na targoar hita na porsea tu Kristus. Ndada holan merek siihuthon Jesus alai natumimbo sian I ima parange nabadia songon siihuthon Kristus. Huria di Rom disosoi asa mian dibagasan hadaulaton, tongtong porsea tu Kristus, mamelehon saluhut arta, daging, tondi gabe pelean na hushus tu adopan ni Debata. Turpuk on paandarhon taringot tu hagogoon ni Barita nauli, ima hagogoon ni Debata na paluahon nasa na porsea, jala namangolu do partigor I hinorhon ni haporseaonna. II. Penjelasan Nats Rom 1:16-17 ayat on ima mansai ringkot napatoguhon haporseaon ni halak Kristen. Jala ayat on do na mambahen perubahan besar dalam sejarah hakaristenon marhitehite hadirion ni Marthin Luther namangajarhon holan dibagasan haporseaon di Tuhanta Jesus do haluahon ndanda holan alani ulaon na denggan sambing malua jolma I alai tung basa-basa ni Tuhan do napaluahon jolma di bagasan haporseaon. Jala godang do penafsir Alkitab na menyuarahon la ayat on songon inti ni surat Rom, holan di bagasan haporseaon tu Tuhan Jesus do haluaon i di bagasan pangajarionna diarahon Apostel Paulus halak Rom asa unang holan mangasahon hapistaran ni hajolmaon dinalaho manjangkon Jesus I, asa unang holan mangasahon pikkiran/logika. Jala on do sihol ni roha ni Apostel Paulus laho manogu-nogu bangso na leban angka parhapistaran nang di angka na hurang roha (14) asa lam togu haporseaon ni nasida tu Tuhan Jesus Kristus. Sada tantangan na mansai borat do laho marbarita Nauli di kota Rom on ala luati ima ibukota kekaisaran Romawi na gabe pusat budaya, ekonomi dohot parugamaon ni Romawi. Godang do halak na pistar, na mora siala ni jotjot do halak Kristen dang di jangkon nasida ala bertentangan tu budaya dohot parugamaon ni nasida. Alai sudena i ndang mambahen apostel Paulus mundur sian semangat laho mambaritahon Barita Nauli ala songon na nidokna di ayat 16, i disuarahon apostel Paulus do: "Ai ndang na huhailahon Barita na Uli i." na marlapatan mai hatoguon ni haporseaonna. Ndang maila ibana patuduhon haporseaonna i ala godang do nasida na maila patuduhon haporseaonna tu na torop. Boasa maila? Di halak Jahudi barita Nauli i songon batu sandungan (pargasipan) jala haotoon doi di bangso na Leban (1Kor. 1:23). Di pandangan ni halak Jahudi, Jesus na digoari Mesias i dang boi paluahon DiriNa sian silang i. Mate di bagasan haleaon do Jesus i bohama Ibana paluahon jolma na mardosa? Jala disisi na asing godang do tantangan di halak Kristen ujui mangihuthon Jesus ima manaon porsuk, di tangkup jala dihurung, di leai jala di aniaya, dihukum habis-habisan dohot dipasiding sian parsaoran ni natorop. On ma jotjot halak Kristen i maila patuduhon haporseaonna. Alai dipatogu Jesus do di mulana i angka siseanNa asa unang maila mangihuthon Jesus i, togu ma nasida manghaporseai Tuhan i atikpe haotoon i di na deba (Markus 8: 38) "Asa molo adong na maila ala ni Ahu laos maila do Anak ni jolma i sogot mangkatindangkon i, di na ro Ibana di bagasan hasangapon ni Amana dohot suru-suruan angka nabadia I”. Porsea do Apostel Paulus ia barita nauli I hagogoon ni Debata doi paluahon nasa naporseai. Mamaritahon barita nauli dang holan barita sambing alai boi gabe paubahon roha laos paubahon hadirion ni angka na mambege Alana barita haluaon na sian Jesus I do, ido umbahen marhuaso do Debata di barita nauli i Diboto Ap. Paulus do sangkap hatuaon ni Debata sian mulanai, ditongos Debata pe Patik i nang angka panurirang, asa adong do dalan manogunogu atau siparorot asa uli jala denggan pangalaho ni bangsoNa. Alai ndang adong na tolap laho mangulahon angka patik i. Ido alana umbahen ditongos Debata sandiri Anak HaholonganNa i Tuhan Jesus tu portibi on, laho manggohi Patik i nang na sinuriranghon ni angka panurirang. Dihaholongi Ap. Paulus do donganna Jahudi, ala ibana pe sian horong Jahudi na panatik hian do. On ma utangna, na ingkon gararonna marhite na marbarita nauli ibana (Rom 1:14),Suang songon i ma, ia barita nauli i na gabe hagogoon ni Debata laho paluahon halak Gorik nang bangso na leban. Sian on boi nilapatan, ia barita nauli i ndang terbatas holan tu halak Jahudi alai dohot do nang bangso na leban na olo porsea di Kristus i. Ayat 17, “ai dipapatar do disi hatigoran ni Debata, na sian haporseaon tu haporseaon, hombar tu natarsurat hian, namangolu do partigor I hinorhon ni haporseonna” Huaso ni Barita Nauli ndada holan barita haluaon alai manogu jolma tu haporseaon na sintong Ai sian Barita Nauli i do jolma dapotan pangantusion na sintong taringot Kehadiran dohot hatigoran ni Debata, laos disi do patar ise do Debata. Hatigoran ni Debata dimulai sian dipadenggan Jesus do parsaoran atau hubungan ni Debata dohot jolma pardosa i dibagasan Ibana. Ditobus do jolmai sian hadosaon asa marhitehite haporseon dohot hasatiaonna mangulahon hata ni Tuhan i sahat di ujung ni ngoluna parjambar ma nasida di haluaon i. Angka jolma na porsea I gabe mangolu ma dibagasan haporseaonna, gabe mangoluma haporseaon na sintong na paubahon ngoluna gabe satia mangulahon na denggan, porsea ma di Barita Nauli i, asa haporseaon i mangarahon jolma i tu mudarNa. Ido umbahen haporseaon i do kunci ni haluaon I, Jala on ma holong ni rohani Debata, dijou Debata pe angka jolmai asa porsea nasida jala parjambar di haluaon na dipinaradeNa. Jala margogo do Tuhan i manogu jolma i jala marhuaso patigorhon pardosai asa unang be nasida dilinggomi huaso ni dosa i. Alai bohama jolma i naeng malua sian hadosaoni molo dang porsea nasida mambege Barita Nauli i. Bohama ibana mananda Debata di bagasan hasintongan i? Tu sude jolma do barita nauli i di baritahon alai dang sude jolma olo manjangkon jala manghaporseai Barita Nauli i. On ma na disuarohon ni Apostel Paulus, dang maila ibana mambaritahon Barita Nauli i, ala porsea do lbana, ai hagogoon ni Debata do i paluahon nasa na porsea jala patar do disi hatigoran ni Debata laos mangolu do partigor hinorhon ni haporseaonna, (orang benar akan hidup oleh iman). III. Sipahusor-husoron Sude do jolma mardosa, jala patut do jolma I sandiri mangae uhum akibat ni dosa I, dang boi jolma I laho paluahon dirina sian dosa I “manusia tidak mampu menyelamatkan dirinya sendiri akibat dosa” alai alani holong ni Debata naingkon paluaonna do jolma I sian hadosaon I, ido umbahen Ibana sandiri ma na ro tu portibion marhite Jesus Kristus laho paluahon jolma. On ma barita nauli I, tu sude jolma do barita nauli I dipasahat asa marhamubaon jolma I, alai dang sude jolma na olo manjangkon dohot manghaporseai, godang dope namangasahon hasintonganna sandiri, alai angka na porsea I didok gabe mangolu do partigor I di bagasan haporseaonna, songon tema ni Sermonta ima “Barita nauli napaimbaruhon” jolma na manjalo barita nauli I gabe dipaimbaru do hape, marparbue ma haporseaonna I di bagasan ngoluna gabe parsidohot ma ibana di ngolu na salelengnilelengna. Denggan ma ta radoti haimbaruon napinasahat ni Debata marhita namangauhon jala mangulahon denggan basa ni Debata tu saluhut nahumaliangta. Amen