ACARA IBADAH KELUARGA MINGGU EXAUDI

HKBP DESA DURIAN RESSORT DAME

CENGKERING
MINGGU, 24 MEI 2020

Ev: Mateus 20 : 29 - 34 Ep: Psalmen 27 : 7 – 14

TOPIK :
DITANGIHON JAHOWA DO JOUJOU NI HALAK NA PORSEA

I. PAMUHAI :
U Hamuna angka dongan na hinaholongan, sadarion sahat ma hita tu minggu
EXAUDI, lapatanna : Sai tangihon ma soarangku, ale Jahowa. (Psalmen 27 : 7).
Marhite parmingguonta sadari on, joujou ma hita tu Debata, ai Debata do na tuk
manangihon soaranta dohot hoihointa jala asi do rohaNa mida angka na joujou tu
Ibana. Antong hamu na hinaholongan, joujou ma hita tu Debata mangido asi ni
rohaNa, tapasahat ma pujipujian holan tu Ibana, marende ma hita.

1. Marende BE No. 2 : 1, 3 “Naeng Pujionku Ho Jahowa”

2. Tangiang Pamuhai: (U: Uluan K: Keluarga)
U (Molo partohonan dijaha ma di jolo Votum ) Sai tangihon ma soarangku ale
Jahowa molo joujou ahu. Didok rohangku, Ho mandok: Lului hamu ma
bohingKu. Antong bohiM ma na hulului ale Jahowa. Sai unang ma tabunihon
bohiM maradophon ahu. Jahowa do panondangi di ahu dohot hatuaonhu, tung
mida ise ma mabiar ahu ? Jahowa do partanobatoan ni ngolungku, tung mida
ise ma ahu biahaton ?Haleluya.
K (Mangendehon) : Haleluya, Haleluya,Haleluya.
U Martangiang ma hita: Ale Tuhan Debata, Pargogo na so hatudosan,
Amanami na di banua ginjang i! Usehon ma TondiM na badia i dohot
hapistaran na sian Ho i tu saluhut HuriaM, asa lam rarat jala lam hot HataM na
badia i di tongatonga ni hami on. Lehon ma hiras ni roha di naposoM
manjamitahon HataM, asa lam pita jala lam ganda HuriaM na badia i.
Patongtong ma huhut rohanami mangoloi Ho sahat ro di ujung, di bagasan
haporseaon na ture, marhitehite AnakMu, Tuhan Jesus Kristus, Tuhannami.
Amen.

3. Marende BE No. 262 : 1 “ Jahowa Tuhanki”

4. Patik
U Patik ni Debata sihangoluhonta di minggu Exaudi sadari on, ima na tarsurat
di

1
 I Korint 16 : 13. Dungo ma hamu, marsihohot marhaporseaon, tang ma
hamu jala margogo. (Antong rap mangido gogo ma hita sian Tuhan Debata).
K Ale Tuhan Debata, sai pargogoi ma hami mangulahon na hombar tu
PatikMi. Amen.

5. Marende BE No. 688 : 1 + 3 “ TUHAN ”

6. Manopoti Dosa
U:Tatopoti ma dosanta na godang i!
U/K Ale Amanami jala Debatanami, na di banua Ginjang, Pargogo na so hatudosan!
Pardenggan basa do Ho, jala ro di salelenglelengna do asi ni rohaM. Sai
marpamuati ma rohaM dihajahatonnami! Jala sai unang be ingot angka
dosanami; ai jotjot do hami mardosa maradophon Ho, jala jotjot do husungguli
hami rimasMu marhite sian pangalaosionnami, di hataM. Ale Tuhan Jahowa,
sai unang paingotingot pangalaosionnami, unang alang asi ni rohaM, sai urupi
ma hami, hoale Tuhan Debata hatuaonnami, palua hami, jala sesa dosanami,
ala ni AnakMu, Tuhan Jesus Kristus Tuhannami. Amen.
U Bagabaga ni Debata : Ro ma hamu tu Ahu, asa mangolu tondimuna, ninna
Tuhan Jahowa. Tung sura rara dosamuna songon abit bunga dapdap, bontar
do bahenonHu songon itak; nang pe rara songon abit hasumba, gabe songon
hapas do muse. Hasangapon ma di Debata na di ginjang!
K Amen.

7. Marende BE No. 248 : 1 - 2 “ Saleleng Ho Di Tano On ”

8. EPISTEL
U Hata ni Debata turpuk Epistel diMinggunta sadari on, ima na tarsurat di
Psalmen 27 : 7 – 14. Tajaha ma marsingkat sorin.
U (Ima sahatna. Martua ma angka na tumangihon Hata ni Debata jala na
umpeopsa). Amen.

9. Marende BE No. 691 : 1 “ Hupasahat Ma Tu Jesus ”

10. MANGHATINDANGHON HAPORSEAON
U Rap ma hita manghatindanghon haporseaonta i:
S Ahu porsea . . . .
11. Marende BE No. 707 : 1 “Hagogoon Dohot Apulapul”
12. Tangiang Pangondianon
13. Marende BE No.25:1 "HataMi Ale Tuhanku"
14. Jamita: Mateus 20 : 29 – 34
“DITANGIHON JAHOWA DO JOUJOU NI HALAK NA PORSEA”
Horas, selamat hari minggu ma di hita saluhut na!
Haporseaon di haradeon ni Debata mangalusi hita uju joujou i ringkot lam
togu di ganup panggulmiton ni ngolunta, di na patupa angka na denggan di ngolu
on tu donganta jolma, di na mangadopi tantangan na so tarhamonangkon hita,

2
nang di na mangadopi parsahiton na so tarpamalum ni angka parbinotoan medis,
psikologis nang sosial di partingkianta nuaeng on. Ido joujou sian dua halak na
mapitung na dibagasan haporseanna boi do Jesus palumhon nasida.
Joujou do nasida mandok “Jesus ‘Anak ni si Daud, asi ma roham di hami.
Joujou nasida i ndang ‘Anak ni si Josep’ manang ‘Anak ni si Maria’, nunga pintor
takkas dodoon panandaon ni dua halak na mapitung on taringot tu panghirimon ni
Israel di Mesias, Sipalua Hajolmaon. Jala andorang so pajumpang dua halak na
mapitung on tu Jesus, pasti nunga sai dipaihutihut ibana haporseaon taringot tusi.
Marpinda sian jolma namameop panghirimon hasipelebeguon tu jolma na mameop
panghirimon  na marlatarbelakang haporseaon ni Jahudi/Jesus Kristus, ulaon na
denggan alai na maol do i. Buktina, sahat tu nuaeng adong do jolma na sai manjou
Jesus i Mesias (al-Masih), alai olat ni sahat tu panandaon songon sada panurirang
do tolapna mananda Jesus i. Ndang tolapna mananda Jesus i Tuhan, dohot Anak ni
si Daud. Paling sahat tu na mananda Jesus i anak ni si Maria, na adong dibortian ni
si Maria ala ni surusuruan  Gabariel. Ujungna ndang tolap tangiangna (pangidoanna)
dohot haporseaonna, mambahen malum angka na marsahit di tongatonga ni
bangsona. Artina manghaporseai huaso ni Jesus, Anak ni Debata, patar ma dingolu
nasida huaso ni Jesus, sebalikna na so togu manghaporseai Ibana, ndang hilalaonna
huaso ni Jesus i. Ringkot manghaposi jala maporus tu Ibana dingoluni siganup ari
asa masa i diangka pardalanan ni ngoluna.
Ay. 32 dialusi Jesus do joujou nasida, na porsea tu Ibana, pargogo na tuk
mangalehon na pinangido nasida i. didok nasida ma: “Aha dipangido rohamuna
sibahenonKu tu hamu?. Nang pe tontu diboto Jesus do nasida naeng pamalumon
sian parsahotonna i, alai dipangido Jesus alus sian nasida, aha ma na boi bahenon
ni Jesus laho mangalusi pangidoannasida i. na marlapatan diboto Jesus do, na masa
dingolunta, alai ringkot do hita joujou tu Ibana di nasa parngoluanta, jala ringkotdo
hita mangido tu adopanna, atik pe naung diboto Debata i, asa saurdot haporseaon
ni mangido na dibagasan haporseaon i dohot Debata na patulushon pangidoanta i
(Mat. 7:7) jala di na mangido nasida dibagasan haporseaonna i ima “naeng
mungkap matanasida” pintor dijama Jesus matanasida i, laos gabe bungkama mata
nasida, marnida ma nasida.
Alani do naeng tangkas tatanda Jesus do pangubati jala parmahan na
denggan, na marroha do Ibana laho patureturehon halak na torop i, nang
parngoluanta ganup. Mansai godang do angka na marsahit pamatang nang roha pe
dipamalum Jesus. Alai hamalumonna i torop do i jumpang ala porsea nasida di Jesus
dohot ala pangidoan ni na marsahit i na mandok : Ale Jesus Asi ma rohaM dihami.
Ragam do cara dibahen Jesus laho pamalumhon jolma i, adong do i holan ala na
manjama mata ni na marsahit, adong do holan manjama ulos ni Jesus boi do
malum, boasa ndang tangan di na masijalangan, boasa ndang dais pamatang ni
Jesus tu na marsahit ?, ai parhitean do i sude, boi pe malum nasida ala Porsea do
nasida di Huaso ni Tuhan Jesus Kristus. Hea do dipamalum Jesus sahalak ina na
marsahit bulan (pendarahan), alai ala ni haporseaonna tu Jesus; holan dijama ulos
ni Jesus i, gabe malum do ibana jala tarsar do barita taringot tu hamalumon ni ina

3
na marsahit bulan i. Lapatanna mansai uli  do molo angka ulaon na metmet pe
manang hal-hal sederhana boi tarpatupa hita gabe hahisaron nang las ni roha dohot
hahipason tu torop jolma; isarana rupani; na masitabian di angka na pajumpang,
masijalangan, hahormaton, hata horas-horas di angka na masihaholongan, mansai
ringkot do i di angka na porsea. Asa marhite i ma hita angka na porsea masitoguan,
masihaposan, jala masihaholongan. Apalagi molo tapatupa ulaon asi ni roha
mangurupi angka na patut siurupon; isara ni bantuan, materil dohot moril. Ala ni i
naeng ma huria ni Tuhanta nang angka ruas ni huria boi gabe parhitean ni Debata
laho pahisarhon angka na marsahit, angka na mabugang, angka na pogos, angka na
gale, na so mardihadiha. Jala tarjou do hita angka naung pinillitNa tu Hangoluan na
saleleng ni lelengna dibagasan Kristus Jesus i laho patupahon ulaon asi ni roha i.
Molo Jesus do  parmahan na denggan di hita angka na porsea jala rap hita Joujou
tu adopanNa pasti tarida ma panghorhonna tu ngolunta na olo marmahani angka
jolma na dibagasan hahurangan, hagaleon, dohot na mangadopi sahit ala ni virus
corona saonari. Tapangido ma asiasi dohot pangurupion sian Tuhanta Jesus Kristus,
asa unang mapitung mata partondionta, alai asa parsidohot hita gabe jolma
parasiroha songon Tuhanta Jesus Parasiroha i. Jumpang ma roha na marpanarihon
tu dongan, dohot roha na tongtong Porsea di Huaso Hagogoon ni Tuhanta Jesus.
Songon Goar niMinggunta Exaudi, rap ma hita manjaouhon GoarNa; ai Tangihonon
ni Tuhan i do soara alualu ni na porsea tu Ibana. Amen. (Martangiang)

15.Marende BE No. 758 : 1+3 “Jahowa Pangurupi” ( P. Pelean )

16.Tangiang Pangujungi:
U Martangiang ma hita: Mauliate nasa rohanami di Ho, ale Debata Jahowa, ala
diudut Ho dope di hami asi ni rohaM, naung paloashon hami marsaor dohot Ho
nabadia, di napatupa parsombaon hami maradophon Ho di bagasnami on. Na
porsea situtu do hami, na raphon Ho hami mamungka sahat tu na paujunghon
parsombaonnami on. Asi roham! Sai jalo ma puji-pujian,
tangiang_elekeleknami, ro di peleannami bahen uap na huhus di joloM. Lam
paganda di hami partinandaan di angka pambahenan dohot holongMu di
ngolunami, asa lam girgir hami mandok mauliate tu Ho di bagasan serep ni
roha. Pasupasu ma huriaM laho mangaramoti dohot mamparhaseang
peleannami on bahen hasangapon di GoarMu di sisik ni tano on.
U+R Ale Amanami na di banua ginjang!...dohot udutna
U+R (Molo Partohonan, ditutup ma dohot tangiang pasupasu)
Mangendehon : Amen-Amen-Amen

Pelean Amplop Parmingguon Keluarga, tu Huria :

Sian Hami Keluarga : ..........................................................................

Godang na : ..........................................................................

4
II Kor 9 : 7b “Ai dihaholongi Debata do na las roha mangalehon!”.