BAHAN SERMON PARHALADO SA-RESORT HKBP RAJAMALIGAS, JUMAT 31 MARET2023
EVANGELIUM MINGGU, 16 APRIL 2023
NAMA MINGGU : QUASIMODOGENITI (Songon Posoposo Naimbaru Tubu [ 1 Petrus 2:2]) TOPIK MINGGU : MARPARANGE HOMBAR TU HATA NI DEBATA (HESEKIEL 36 : 22-27) ========================================================================= 1. PENDAHULUAN. Panurirang Hesekiel masuk maon di masa pembungan Babel rap dohot dua panurirang Jesaya dohot Jeremia di taon 597 SM. Mangihuthon angka pande bisuk rap do ibana dohot si Daniel di masa habuangan alai jumolo do si Daniel ima taon 605 SM, jala masuk do ibana tu horong nabisuk manurirangi alani i pola tolu hali si Hesekiel manggurithon taringot tu Ibana. Ia buku Hesekiel marisihon tolu panurirangon bolon, ima naparjolo panurirangon sorimago (nubuat penghukuman) tu bangso Israel, napaduahon: panurirngon sorimago penghukuman tu bangso jala napatoluhon panurirangon panghirimon tu bangso. Jala jamita on masukma tu horong napatoluhon namarisihon bagabaga hamumulak ni bangso Israel tu Jerusalem. 2. HATORANGAN NI TURPUK Dipabadia Debata ngolu ni bangso i mulak sian habuangon dipaingot Debata do ngolu ni bangso Israel hatiha di masa habungan huhut dipabadiahon Debata roha nasida huhut dipauba asa lam jonok nasida tu Debata ala holan asi ni roha ni Debata nasida taruli dilas niroha haluaon i. Di Babel do bangso Israel songon halak habuangan ala ni i ndang adong hak politik nasida, secara ekonomi marsingkor jala secara social tertindas. Jala mago do nang indetitas nasida songon bangso ni Debata jala nunga marongso bagas joro di Jerusalem. Gabe lea ma goar ni Debata di adopan ni bangso i. Di ayat 22-24 : molo tung pe diloas Debata bangso i tarbuang tu Babel ndada gabe natalu Jahowa maralohon debata ni babel alai nadiloas Debata do masa angka i, ido umbahen di dok di ayat 22 ndada ala hamu mmbahen songon i, ale pinompar ni Israel, ala ni goarhu nabadia i do namarlapatan: Jahowa mamboan bangso i haluar sian babel alai ndada holan hata haluar alai asa mulak do goar ni Jahowa dibagasan pamujion ni bangso i. Jala di ayat 23 dipaboa do nang gabe patar ma goarna nang huasona songon bukti hapapataronna ni Jahowa. Jala naikkon Debata do namamboan bangso i haluar sian parhatobanon, dang pasombaon ni Jahowa nasida hot di habuangan ai ido dalan laho paulakhon habadiaon ni Jahowa. Ala ni ido didok di ayat 25: “ urashononhu ma tu hamu aek angka natio, asa tung ias hamu; urasonHu hamu tahe sian saluhut haramunon muna i dohot sian saluhut ganaganaanmuna i” dipaingot di ayat on ima holan Debata do namarhuaso laho paulihon bangso laho manguras nasida sian saluhut pangalaosionna (dosa) asa ias jala mulak roha nasida tu Debata gabe marngolu naimbaru, jala dipaingot Debata marhite turpuk on holan Debata do namarhuaso manarihon ngolu nasida asa haluar sian jorbut ni dosa. Dipatupa Debata laho manguras nasida sian hajorbuton ni ngolu ni bangso Israel i asa marhamubaon, tung aha pe di ula bangso i naeng ma nasida mangolu laho mamuji dohot pasangaphon Debata. Marnampunahon ngolu nadidongani ni Tondi ni Debata dohot asi ni rohaNa Dilehon Jahowa ma tu nasida roha nang tondi na imbaru, ima roha sibuk ala nasailaonna i roha batu di nasida. Roha batu i ma roha na mangolu tu hata ni Jahowa marhite manomba debata sileban, mangula ulaon na jahat, nang ragam pangarupaon. Unsaton ni Jahowa roha batu i jala digantihon dohot roha sibuk, ima roha namangoloi Jahowa. Tondi ni Debata dilehon dibagasan ateate ni bangso Israel asa tondi imambahen roha nasida gabe roha sibuk na manghorhon parange na hombar tu hata ni Debata. Mangulahon hata ni Debata ndang be holan sian hadirion ni bangso i, ndang mangasahon hagogoon ni jolma ala gagal do molo songon naung nialaman ni bangso Israel pola sahat tu natarbuang nasida. Inggo nuaeng tondi ni Debata do napatauhon bangso i laho mangulahon patik ni Debata. 3. PANIMPULI. Ndang tarula hita patik ni Debata ianggo sian gogota sandiri, alai dilehon Debata do tu hita tondina asa gabe marroha dohot martondi naimbaru hita. Taloas ma diunsat Debata roha narobi, ima naginoaranna roha batu namanghorhon haramunan tugoar ni Jahowa. Taloas ma hita diuras Debata sian haramunon marhite mudar ni Tuhan Jesus Kristus asa ias hita di adopan ni Debata. Songon goar ni Minggunta Quasimodogeniti, namarlapatan songon posoposo naimbaru tubu na uasan disusu natama, tajanghon ma tondi ni Debata namangalehon roha sibuk tu hita asa tau hita marparange hombar tu hata ni Debata. Amen