SERMON JAMITA TU PARTANGIANGAN, RABU KAMIS TGL 29 30 MARET 2017

Turpuk : Hesekiel 37 : 1 14

Panurirang Hesekiel i ma anak ni malim Busi (Hesekiel 1:3), na rap diboan tu Babel dohot
marriburibu bangso Israel alani hadadabu ni Jerusalem. Dijou do Hesekiel gabe Panurirang di tingki
habuangan. Hesekiel lapatanna : Jahowa Hagogoonku (Allah kekuatanku). Jotjot do Hesekiel
manjalo hata ni Debata na langsung tu ibana marhite parnidaan, penglihatan jala disuru laho
pasahathon i tu bangso ni Debata, Israel na tarbuang asa marhamubaon nasida huhut manghaporseai
na so lupahonon ni Debata nasida, lumobi ma ndang tadingkonon ni Debata nasida di habuangan
Babel i. Ditaringoti si Hesekiel do habadiaon, hamuliaon ni Debata dohot hamubaon ni bangso Israel.
Dipabotohon do marhite sejarah sebagian bangso Israel boi denggan parngoluanna di tano Babel,
ndang pola diparhatoban nasida songon na di Misir. Alai sasintongna anggo ateate, roha dohot tondi
nasida songon na kosong do hilalaon. Molo taida pandohan di tingki habuangan songon : holi-holi
na masak jala marrarahan (ayat 2, 4), pesan aroparop ni roha jala pidom (ayat 11), sasintongna i
patuduhon parungkilon ni rohanasida. Dibagasan habuangan i, nunga tung mansai porsuk
panghilalaan nasida hira na so adong be sihirimon, siala huta Jerusalem na dihaporseai nasida songon
tanda ni pandonganion ni Debata tu nasida pe nunga di hancurkan. Dipillit jala disuru Debata do
Panurirang Hesekiel pasahathon barita na uli, barita haluaon na gok halongangan. dilehon Debata do
tu si Hesekiel huasona laho pangoluhon nasida jala asa di tanda nasida ise do Debata na pangoluhon
nasida i. Nunga mago hian panghirimon nasida i, nunga madabu tu ngolu na mandate, na so adong be
semangat hidup manang ndang adong be semangat juang nasida. Justru di tongatonga ngolu si songon
i, mangula do Debata patuduhon holongNa, huasoNa dohot hagogoonNa tu bangso i asa mangolu
muse nasida. Sangkap ni Debata di luar batas pamingkirion ni jolma. Ndang adong na mampu
mamangke logika sekalipun laho mangantusi dalan ni Debata. Pengalaman ni bangso Juda jotjot
manggombarhon pengalamanta na mardalan hita di hasiangan on. Nang pe naung Kristen hita, tabolus
do panghilalaan na hurang singkop di ngolu on.Ganup jolma hea do mangae parungkilon na borat di
ngoluna, alai ganup jolma pe hea do manghilalahon halongangan pangurupion sian Debata di ngoluna.
Sipata tutu olo do parungkilon na masa di ngolunta mambahen hita gale jala mandele, hira na so boi
malua hita sian parungkilon i, ujungna manghilala ndang adong sihirimon. Alai olo do tarsonggot hita
jala ndang managam di pambahenan ni Debata na paluahon hita sian parungkilon na maol i, gabe
tadok ma, sai songon na marnipi do au di halongangan na pinatupa ni Debata tu au. Hira na so
porsea hita, hape nunga diurupi jala dipalua Debata hita sian parungkilon na borat i. Jala tahaporseai
do bahwa tondi ni Debata mangalehon hangoluan, semangat, panghirimon na mangolu holan tu
Debata, haimbaruon di pola pikir dohot tindakan. Laho menghadapi tantangan ni zaman na hatop
mubauba,dipaingot do hita asa mangasahon holong ni Debata, huaso ni Debata na sun gogo i. Jotjot
do jolma on mamangke hagogoonna sambing sehingga ndang berdaya mangadopi hagogoon ni
portibion. Tangi ma hita di soara ni Tondi Debata marhite hata ni Debata na mangalehon jaminan ni
ngolu tu hita.Dalam penglihatannya Yehezkiel menyaksikan bagaimana Allah membangun dan
membangkitkan tulang-tulang yang berserakan itu. Allah juga memberi nafas kehidupan. Dan melalui
firman-Nya, umatnya harus mematuhi perintah-Nya, sehingga dapat menyenangkan hati Tuhan dan
menjadi berkat bagi sesamanya. Naeng ma tutu songon si Hesekiel hita, na serep jala mangoloi hata ni
Debata. Molo tung pe masa angka sitaonon nang parungkilon di ngolunta ndang mandok na so tuk
jala margogo Debatanta, alai asa lam margogo jala ingkon mangasahon ibana hita. Ala ni i, lam
marhabiaran tu Debata ma hita jala mian Tondi ni Debata na managelehon panghirimon dohot
haimbauruon di ngolunta. Asa ganup na tinogihon ni Tondi ni Debata, mangula do Tondi i
pangoluhon, patupahon dohot padengganhon ngolunta gabe dumenggan hombar tu lomo ni roha ni
Debata. Amen