JAMITA EPISTEL MINGGU UJUNG TAON HURIA

MINGGU, 26 NOPEMBER 2023

JESAYA 65: 17 – 23
MAIMAIMA DI LANGIT NA IMBARU DOHOT TANO NA IMBARU
Pamuhai
Nuaeng masuk ma hita di minggu ujung taon huria, jala di minggu ujung taon huria on dijouhon do angka ruas ni
huria naung jumolo marujung ngolu di sataon bolon manipat taon huria sian tanggal 27 Nopember 2022 – 26 Nopember
2023 apala di minggu sadari on. Ndang na paribakribak bulung pasigatsigat bulung gaol, ndada na mangarungkari
hinalungun paingotingot sidangolon hita nuaeng di ulaon ala naung jumolo marujung keluarga, sisolhot, alealenta sian
hasiangan on. Parningotan on ingkon do patubuhon jala patoguhon panghirimonta taringot udut ni ngolu ni angka na porsea
dung dibolus ibana hamatean di pardanging on. molo pe ingkon mamolus hamatean pardaging on angka na porsea, alai
anggo tondina i rap do dohot Jesus Kristus di inganan na mansai uli, inganan na imbaru, inganan na so masa adong
panahitnahiton. Boi do dohonon anggo hamatean ima dalan ni angka na porsea bungkas sian rura partangisan, rura gok arsak,
rura na gok ganggu ni roha, hoihoi manang angka panahiton, jala masuhanna ma sada inganan parolopolopon dohot
suraksurak mamuji dohot marsomba tu IBANA na Badia, na marsihundul di inganan na Sun Badia. Bungkas sian langit
dohot tano na olo salpu on mandalani tu langit dohot tano na imbaru na hot jala na manongtong. Laos on do turpuk jamita di
minggunta sadari on, ima na manaringoti langit dohot tano na imbaru. Asa lam antus hita mangantusi turpuk on, masuk ma
hita tu pamatang ni jamita.
Pamatang ni Jamita
Turpuk jamita on ima bagian sian buku Jesaya na patoluhon (trito Isaiah) na mangondolhon taringot tu huaso dohot
hamuliaon ni Jahowa naung paluarhon bangso Israel sian panggomgomion ni Babel dohot na papunguhon halak Israel mulak
sian inganan habuangonnasida be, jala hinorhon ni i masa ma parolopolopon dohot pamujion ni bangso Israel mangolophon
dohot mamuji hamuliaon dohot huaso ni Jahowa Debaa. Dipangke Jahowa do harajaon ni Persia na digomgomi Koresy
(Cyrus) laho papatarhon huaso dohot hamuliaon-Na na paluarhon, papunguhon halak Israel sian habuangannasida laos
marhite si Koresy do jongjong ma bagas joro na imbaru (the second Temple) ima hataridaan naung mulak do Israel i muse
gabe sada bangso, bangso na mardaulat jala na marharajaon nang pe bangso i digomgomi harajon ni Persia.
Hombar tu pangantusion goar ni Jesaya: “Jahowa do na paluahon, Jahowa do na patupahon haluahon”, laos i do na
gabe ojahan di turpuk jamita on taringot angka pambahenan ni Jahowa dohot haluaon na naeng sipatupaon Jahowa muse.
Lapatanna haluaon na pinatupa ni Jahowa ndada holan fakta sejarah angkau naung masa (past and present eskhaton) alai
marudut dope tu na naeng sipatupaon dohot sipapataronna muse (future eskhaton). Turpuk jamita on ima haluaon na naeng
sipapataron ni Jahowa marhite langit na imbaru dohot tano na imbaru (ay. 17 – 18). Langit na imbaru dohot tano na imbaru
na didok di turpuk jamita on ndada langit na di ginjang i na imbaru manang tano sidegan i na imbaru, alai sada partingkian
hangoluan ni bangso Israel na imbaru marhite naung jongjong sada bagas joro na imbaru. Dipatupa Jahowa do partingkian
asa marolopolop bangso i dung mulak nasida sian tano habuangonnasida, mangolophon angka naung dipatupa Jahowa tu
bangso i. dang be ingotonnasida angka na hansit manang tarsunggul di rohanasida. Mago ma angka sahit dohot angka nal
lungun i, mago uas ni roha. masa do angka i saluhutna marhite naung singkop jongjong bagas joro i, jala mulak ma muse
hadirio ni bangso i gabe sada bangso na bolon, bangso ni Jahowa (‘am YHWH).
Di ay. 19 – 20 dipabotohon: “Jahowa sandiri pe marolopolop do mida Jerusalem, jala marlasniroha Ibana mida
bangsoNa”. Ingot do hita taringot barita hamumulak ni anak siampudan ni sada keluarga, anak naung dirimpu naung mate.
Alai marhite na mulak siampudanna i, ndang hapalang las ni roha ni natorasna i (ida. Luk. 15: 11 – 32). Tung mansai las roha
ni Jahowa songon sada Ama molo niida ianakhonna marlasniroha unduk mangoloi angka hatana, jala na olo manolsoli angka
pambahenanna na humurang i. Dung masa langit na imbaru dohot tano na imbaru, masa ma parolopolopon, dang adong
arsak, ndang adong marungutungut, ndang adong be angka panahitnahit, sude marlas ni roha jala mansoarahon ende
parolopolop mamuji dohot mangendehon hasangapon ni Jahowa (pat. Pangk. 21: 1 – 4). Silamlam urukuruk silamlam aek
toba, sian posoposo, dakdanak, sahat tu na matua saluhutna do marlasniroha (ay. 20). Gariada na marumur 100 taon pe otik
dope dihilala umurna martimbangkon las ni rohana na marDebatahon Jahowa, alai anggo halak parjahat hona bura dohot
uhum.
Marolopolop ma bangso i mian di huta, di bagas na pinaulinasida i jala las roha nasida manganhon parbue na
niulanasida be. Torop do jolma ndang holan lojana sambing didapot, alai dohot do parbue halojaonna didapotnasida. Songon
i nang angka pinomparnasida (pat. Psalm. 128). Na so jadi hurangan di sipanganon, jala gok dame dohot hasonangan ma tahe
di langit na imbaru dohot tano na imbaru. Ndang masa be disi jumpang angka na marsisoroan songon babiat manoro
sisoroanna. Sude na di humaliang dapotan las ni roha. ndang margogo be disi angka pargogo na mangasahon gogo
botohonna, gogo ni parporanganna ala Jahowa sandiri do na gabe panggomgom jala Raja. Alai anggo angka parjahat dohot
angka pangansi dang parsidohot di na masa i. ndang adong disi jumpang angka parroha na jungkat dohot partahitahi na jat.
Alai anggo halak partigor dohot na satia jongjong do di Bagas Joro ni Debata. Haleluya.

Pangujungi
Nuaeng mardalan ma hita di ragam angka na masa di parngoluan on, mardalan dope hita di rura partangisan, rura na
gok anggukangguk dohot ragam angka holso nang panahiton paima jumpang tingkina hita sahat tu ujung ni ngolunta sian
hasiangan on. Laos marhite minggu ujung taon huria on dipaingot do hita na nigoaran: memento mori na marlapatan “ingot
ma na mate do ho, jala na ingkon mate do ho”. Istilah i ndang pabiarbiarhon (mengancam) hita halak Kristen na mangolu
dope di hasiangan on, alai sada kepastian do i anggo hamatean na so boi juaon jala na so boi dipasiding sian hangoluanta ai i
do ujung ngolunta. Halak na porsea ndang dihabiari be hamatean alai marhite haporseaonna i do paposhon rohana martua ma
angka na mate di bagasan Jesus Kristus. Jesus Kristus mandok: “Ahu do haheheon dohot hangoluan; na mangolu do na
porsea di Ahu, nang pe mate ibana. Jala ganup na mangolu jala na porsea di Ahu, na so tupa mate ibana salelenglelengn.
Porsea do ho disi?” aha do na gabe alusta di pandohan ni Jesus i?
Hamatean ndada ujung ni ngolu ni angka na satia jala na porsea di Jesus Krsitus, alai sada pardalanan do di angka na
porsea bungkas sian tano dohot langit na laho buruk dohot na salpu masuk tu langit na imbaru dohot tano na imbaru ( ima na
ginoaranna Surgo). Masuhanna ma Bagas Joro ni Jahowa na so pinauli tangan ni jolma jala na so pinauli pingkiran ni jolma.
Masuhanna ma inganan parolopolopon, na so masa be disi haraparon, angguk bolon, na so masa be disi parporangan,
panahiton, arsak, holso, biar ni roha dohot ganggu ni roha. Ndang be manaringoti aha do sipanganon, parabiton, siinumon
jala aha do sipangkeon disi, ai ndang tusi be lao roha. Dung masuk tu langit na imbaru dohot tano na imbaru holan
parolopolopon dohot ende pamujionnama marsaringar disi.
Molo songon do hape masa di langit dohot tano na imbaru i, naeng ma hatop rohanta on tu partingkian i. alai ndada
lomonta, tung lomo ni Tuhan i do andigan do masa ujung ni ngolunta jala dungkon ni i masa paruhuman na parpudi ( future
eskhaton). Disi ma hita dipapungu jala dipasada tu parsaoran angka Anak ni Debata naung tinobus jala na satia ro di ujungna.
Ingot ma hita di basabasa dohot holong ni roha ni Jahowa di ngolunta marhite Jesus Kristus Tuhanta i, naung pasadahon hita
di parsaoran Anak ni Debata (ida. Pangk. 21: 1, 4).
Ido hapatean panghirimonta di bagasan haporseaon na polin di Tuhan Jesus Kristus. Molo panghirimon tontu
sipaimahon dope. Rap maimaima ma hita di langit na imbaru dohot tano na imbaru i di bagasan hasatiaon na polin
manghaporseai Jesus Kristus. halak na paimahon hasasautna i saluhutna ima halak na totop mangulahon angka na denggan,
mangurupi/ manarihon angka na hurangan dohot na gale, na ringgas mangguruhon, manangihon, mamarengehon dohot
manghangoluhon hata ni Debata di ngoluna. Unang be lalap hita di mangalului arta, sangap, dohot hamuliaon di portibi on na
boi mambahen hita tading paradehon rohanta marnida langit na imbaru dohot tano na imbaru i. “ndang parmianan tano on,
sai surgo i do na tongtong, ai rura partangisan on, di ginjang sonang rohangkon” (BE. 353: 5), amen.