“Barita Nauli Napaimbaruhon” (Rom 1: 16-17)

Jamita Evangelium, Minggu XXII Dung Trinitatis, Ari Reformasi, 31 Oktober 2021

Pinarade ni Pdt Dr. Robinson Butarbutar

Ephorus HKBP

Hamu angka Dongan sahaporseaon,

Molo tajaha Rom 1: 16-17 i ndang apala adong kata kerja manang kata benda taringot tu paimbaruhon.
Ala ni i denggan do sungkunonta boasa ma unok ni Jamitanta di parningotan ari Reformasi di minggunta
minggu XXII Dung Trinitatis digoari “Barita Nauli Napaimbaruhon”?

Namangihot on denggan do patorangon jala dung i tarimangrimangi di ana gabe jamita tu hita di
parningotan ari reformasi sadarion.

Parjolo, di na marbarita nauli Tuhanta Jesus di Palestina di abad parjolo dihatahon Ibana do tu angka
sisean ni si Johannes na manungkunhon tu Jesus sialana umbahen na ndang marpuasa angka sisean ni
Jesus hape sisean ni si Johannes dohot Farise marupuasa. Dibege angka sisean ni Jesus hataNa i do
hataNa i jala dung mamolus tradisi lisan, digurithon evangelis panurat ni Evangelium Markus i di bindu 2:
21-22.

Alus ni Jesus songon sahalak Sipaimbaru di ugamo Hajahudion uju i songon on:

“Ndang adong na mandungkaphon abit na imbaru tu abit naung mumut; ai ribak do muse sian i
na nidungkaphon na so songon i, na imbaru sian na buruk i, jadi lam ganda ma na maribak i. Jala
ndang dipainding jolma tuak anggur siraruan tu ingangan naung buruk, ai puntason ni tuak
anggor i do inganganna i, gabe mago ma tuak anggur i nang inganganna i.”

Di Jesus Kristus sian Nasaret i, ingkon pangantusion dohot pambahenan ni Jesus sahalak pembaharu i do
siihuthonon ni si Johannes i. Ndang hasomalan-hasomalan ni halak Jahudi be. Ndang boi manjangkon
Jesus dohot harohaon na robi. Ingkon harohaon na imbaru do, asa masitomuan. Ia so i ndang tarbahen
adong haimbaruon.

Paduahon, dung disuru Jesus Kristus naung hehe sian hamatean i angka siseanNa nasampulu sada
padohot si Matias siganti ni Judas Iskariot i marbarita nauli, parjolo di Jerusalem, dung i di Judea dohot
tu ujung ni portibion tubu ma punguan ni na porsea di tongatonga ni halak Jahudi na di Judea dohot di
duru ni Judea na porsea di Jesus Kristus. Adong do na marbarita nauli di tongatonga ni halak Jahudi,
isara apostel Jakobus, na gabe uluan ni huria i di Jerusalem. Bahat do tong parbarita nauli na borhat sian
Jerusalem tu angka luat na asing. Ala songon i ma bidang dohot togu ni ruhutruhut Hajahudion, jala ala
sian tongatonga ni hajahudion do ro angka sisean ni Jesus naparjolo i, tubu ma pangantusionnasida na
mandok na ingkon songon halak Jahudi do nasida mangihuthon Jesus, i ma na unduk tu angka
ruhutruhut Hajahudion i. Ingkon songon halak Kristen Jahudi ma nian mangolu angka siihuthon Jesus na
so sian tongatonga ni Jahudi. Haluaonnasida pe ndang be singkop. Molo so songon i gabe ndang singkop
Hakristenonnasida. Ai songon i do di tongatonga ni halak Jahudi. Di nasida tangkas do ruhut on:
 “Molo ndang dipatupa angka naung niasian ni Debata Jahowa, ima bangsoNa Jahudi, angka patik
dohot ruhut-ruhut i isara ruhut parsunaton dohot ruhut habadiaon/haiason nang angka
sipanganon i, ba gabe ndang be ruas ni punguan saparpadanan dohot Debata i be nasida. Ndang
targoar be nasida ruas. Ala ni i, halak Kristen na ro sian na so Jahudi i pe songon i do: “Molo
ndang mangolu nasida songon Jahudi ba ndang singkop haluaonnasida. Ndang Kristen na tutu
dope nasida.”

Ampit do na songon i tu pangajarion dohot lomo ni roha ni Tuhanta Jesus? Ndang, ninna apostel Paulus,
na disuru Tuhanta Jesus mamaritahon barita nauli tu tongatonga ni angka na so Jahudi di angka
huta/kota di Kekaisaran Romawi, parjolo di bagian Habinsaran dung i tu bagian Hasundutan. Songon na
andar di angka surat na ginurithonna tu angka huria na di Galatia nang di Filipi dohot di Rom, disurathon
ibana na ia barita nauli jinalona sian Tuhan Jesus Kristus ndang songon i. Ndang siala mangulahon angka
ulaon ni patik ni Debata songon hinangoluhon ni halak Jahudi gabe tigor pardosa i di jolo ni Debata, alai
siala ni haporseaon di ulaon ni Jesus Kristus di hau pinorsilang na paluahon pardosa sian dosana do. Tutu
diula angka naung pinatigor ni Debata i do angka patik ni Debata dohot angka ulaon na denggan. Alai
ndang dipatupa nasida i asa tigor nasida di jolo ni Debata, alai songon hataridaan ni naung pinatigor ni
Debata i do nasida patupahon i. Haporseaon i pe na dipalumehon Debata marhite ulaon ni Tondi
Porbadia i do. I do barita nauli binaritahon ni apostel Paulus. Pamaritaan barita nauli na songon i do
haimbaruon di ulaon pamaritaan barita nauli.

Siala ni i dialo ibana do di suratna tu huria Galatia pangajarion na mandok molo so diihuthon halak
Kristen na so Jahudi patik Jahudi, i ma sunat, ndang tigor dope ibana di jolo Debata. Ndang barita nauli i.
Siala songon i isi ni barita nauli pinatolhas dohot ginurithonna tu angka na so Jahudi gabe sisogo ma
ibana di angkah halak Kristen na ro sian tongatonga ni Jahudi. Angka uluan ni huria di Jerusalem pe
ndang apala las rohanasida umbege/umboto i. Mangihuthon apostel Paulus di suratna tu Galatia ndang
olo ibana sumurut sian barita nauli na paimbaruhon pangantusion hatigoran di jolo ni Debata na songon
i. Jala di Rom 1: 16-17 didok ibana tu halak Kristen di Rom na so maila ibana mamaritahon barita nauli na
songon i. Ai hagogoon ni Debata do i.

Di tongatonga ni pardalanan ni Hakristenon tarlumbi dung abad paopathon sahat tu pasampulu

onomhon mulak muse pangajarion na pinaimbaru di apostel Paulus i tu songon niajarhon ni parbarita
nauli sian Jahudi tu Jahudi i di tongatonga ni huria Katolik. Dung diparsiajari Dr Martin Luther
pangajarion ni apostel Paulus i di partingkianna di abad pa-16-hon di Jerman dialo jala dipaimbaru ibana
ma ajaran ni huria Katolik uju i na mandok naboi do angka na mangolu di bagasan dosa jala na
mangadopi uhum na borat dung mate malua sian i molo dituhor utang sisesa dosa, indulgensia. Baliksa
hagogoon ni Debata do i barita nauli na paimbaruhon pangantusion taringot tu dalan hatigoran di jolo ni
Debata, i ma ndang marhite na mangulahon angka ulaon patik patigor jolma di jolo ni Debata, alai
marhite haporseaon do.

Patoluhon, barita nauli na paimbaruhon pangantusion na songon i do na dibaritahon Reformator Martin

Luther dohot hita angka ruas nang pangula ni huria di tongatonga ni angka huria Protestan di portibion.
Panghorhonna, gabe bungbung ma dalan hatigoranta di jolo ni Debata tu angka jolma pardosa i. Gabe
ndang be holan halak Jahudi be na gabe manjangkon barita na uli i. Alai saluhut bangsoma, angka na so
Jahudi. Sahat ma tong tu hita angka na mangolu di Indonesia, andorang so merdeka dohot dung
merdeka. Aut ndang dibaritahon apostel Paulus barita nauli na songon i, ndang dohot na so Jahudi be
gabe siihuthon Jesus manang gabe halak Kristen.
Paopathon, sahat ma hita tu pangarimangrimaon mamaritahon dohot manghangoluhon barita nauli na
paimbaruhon: Mansai bidang do panghorhon ni reformasi pangantusion barita nauli taringot tu
hatigoran ni Debata na songon i tu parngoluon siganup ari. Nasa pangantusion na so saurdot be tu
hasintongan ingkon si-reformasi-on do. Di sude pargulmiton ni ngolu do ingkon sipatupaon reformasi
pangantusion. Bangsonta Indonesia naung masuk tu jala torus manguduti era reformasi pe nunga
patupa i di ngolu parbangsoon dohot masyarakat, politik, ekonomi, sosial nang budayanta. Hita HKBP
pe, nangetnanget alai pasti patupa reformasi do. Isara mangalusi sungkunsungkun taringot tu ise do
naboi gabe pandita. Leleng do hita ndang mangaloas parompuan gabe pandita. Alai nuaeng nunga bahat
situtu panditanta. Leleng do hita mamereng angka na marhatuon na marasing, kaum difable, ndang dos
hajolmaonna do na so diffable. Panghorhonna manaon nasida. Olo didiskriminasi di jabu nang di huta.
Alai nuaeng nunga sari bangsonta dohot hurianta di kaum diffable, atik pe ndang apala timbo dope
ulaon na tapatupa padohot kaum difable di parngoluan siganup ari. Sanga do adong pangantusion na
mandok sipangkeon do angka na tinompa ni Debata di portibion tu na ringkot di jolma i sandiri, so pola
manarihon na ringkot di angka na tinompa i. Panghorhonna gabe sega portibion. Mohop. Banjir. Dna.
Ala ni i nunga tareformasi be pamangkeon ni na tinompa ni Debata na asing i. Sian na holan
mamangkesa, tu na ingkon pauliulihonsa. Sanga do di tongatonga ni huria, siala ni hasesaan ni dosa, sai
dipasombu angka na korupsi di huria. Jala molo tung adong be na korsupsi, disesa manang di-putihkan
ma i. Alai nuaeng barita nauli na dibaritahon di tongatonganta nunga mandok na so jadi diputihkan na
dikorupsi, alai ingkon digarar do. Godangnari angka contoh na boi paandaron dison.

Alai na pinatupa ni apostel Paulus i, i ma ndang maila mamaritahon barita nauli na paimbaruhon
pangantusion songon dia boi tigor di jolo ni Debata, i ma haporseaon na songon hagogoon ni Debata,
ndang marhite na mangulahon patik, ringkot do sitiruonta di ulaonta siganup ari, i ma nasa hata dohot
pambahenan na taula di bagasan goar ni Tuhanta Jesus ingkon hata dohot ulaon na paimbaruhon ma,
ndang na marasing tusi. I do na ingkon patupaon ni angka ruas ni HKBP sipatupaonna umbahen sai
ingkon tapatupa parningotan di ari Reformasi di ngolunta di jabu, masyarakat dohot negaranta. Gabe
angka sibaritahon jala siulahon barit ana uli na paimbaruhon ma hita. Mansai ringkot on tarlumboi di
partingkian pandemic Covid-19 dohot digitalisasi sinuaeng. Mangolu mar 5 manang 3-M pe di era Covid-
19 on nunga sada rumang ni reformasi pangantusion dohot pangoluhonon. Songon i do tong di
partingkian internetisasi. Ndang tarbahen hita be mangolu dohot mangula songon nasailaon uju ndang
sahat dope tu hita intertenetisasi. Ingkon bertransformasi do hita. Jala songon dia hita mangolu di
medsos pe ingkon marhaimbaruon. Mansohot ma hita gabe sialo haimbaruon di ngolungolu. Alai siboan
barita dohot sipatupa ulaon na paimbaruhon ma hita. Amen.