SERMON PARHALADO HKBP PAJAK BARU

JAMITA PARTANGIANGAN
Kamis, 29 Oktober 2015

Heber 9: 11-14
I. Patujolo
Surat na tu halak Heber on digurithon hirahira taon 67-69 M. Marasing do Surat Heber
sian surat-surat angka na asing na adong di padan na imbaru, somalna disurathon do ise na
manongos surat i jala ihut do tabi sian panurat. Alai mangihuthon angka pande bisuk ni padan na
imbaru disurathon surat Heber on ima laho manogunogu halak Kristen Jahudi (Heber) na
mangadopi godang hamaolon alani Tuhan Jesus. Asa unang mulak be nasida muse tu agama Jahudi,
jala asa unang sumurut be nasida sian haporseaon nasida tu Jesus. Laos dilehon ma pangantusion na
sintong dibagasan Jesus Kristus songon hapataran ni Debata di portibion. Ibana do Sintua ni Malim
na padomuhon jolma dohot Debata.

II. Hatorangan
Turpuk jamitaon memberi penekanan ia Tuhan Jesus ima Sintua ni Malim (Imam Besar) na
mangungkap dalan ni jolma tu Debata. Di Padan na Robi nunga ditanda halak Israel Pelean
pardengganan tu Debata ima marhite mudar ni hambing dohot mudar ni lombu tunggal.
Pistikkononna ma i tu atas ni undung-undung parsombaonon nasida asa sude nasida gabe badia di
adopan ni Debata (3 Musa 16: 14-16). Alai marhite turpuk jamitaon tangkas do dipaimbaru
pangatusionta taringot tu pardenggananta tu Debata. Ndada mudar ni pinahan be pardenggananta
tu Debata alai mudar ni Kristus i nama, ima Sintua ni Malim na manorusi angka banua ginjang i (4:
14). Jala holan mudar ni Kristus i do na boi gabe haluaon di hita sahat rodi salelenglelengna.
Hamatean ni Tuhan Jesus di hau pinarsilang patuduhon nunga di palua Ibana hita sian bura ni
patik i; laos Ibana sandiri do hagogok ni saluhut pelean parsombaonon tu Debata (9: 9-10). Daging
dohot mudarNa sandiri do dilehon Ibana bahen haluaonta dohot hasesaan ni dosanta, jala marhite
ima gabe tama hita marsomba tu Debata atikpe jolma na gok dosa hian hita. Margogo do mudar ni
Kristus laho paiashon dosa ni saluhut jolma, jala sahali doi dilehon Ibana tu hita marhite
hamamateNa asa mangolu hita salelengna.
Nunga diungkap Tuhan Jesus pintu ni banua ginjang diganup na porsea di Ibana. Saonari na
rumingkot ima respon/alusta laho mangalusi panjouon ni sintua ni Malim i tu hita saluhutna.
Sumurung do Tuhan Jesus sian sude angka panurirang dohot angka malim ni Jahudi, ai Ibana do
sintua ni malim na so marlindang, naso marlaok jala na badia ni Debata. Sude jolma naung targoar
siihuthon Kristus ingkon pasidingonna ma dirina sian ulaon hamatean (perbuatan yang sia-sia) ima
dosa. Alai ingkon taluhononta do dosa i jala mangolu hita dibagasan hatiuron asa tutu hita naung
pinaias ni mudar ni Jesus (1 Joh 1: 7; Pangk 1: 5). Jadi ganup angka na porsea tu Tuhan Jesus
ingkon boi do taluhononna dosa di ngoluna. Molo pe godang angka ela-ela ni tanoon na boi mambahen
hita mulak muse madabu tu dosa, tadapothon ma Kristus i asa gabe Ibana mangurupi hita
dihagaleonta be (4: 15).

III. Refleksi
 Godang dope na targoar siihuthon Kristus na sai mangolu dibagasan ulaon
hamatean/pekerjaan yang sia-sia?
 Aha ma bahenonta dalan laho manaluhon dosa di ngoluntaon?
 Adong dope sian hita na porsea tu mudar ni pinahan manang pelean na asing na boi
patupa haluaonta? (Isara: Mamele tu sahala ni ompung, dll)
 Holan mudar ni Kristus i do hape pardenggananta tu Debata, alani ingkon argahononta
mai asa malua hita jala mangolu salelengna.
 Dalan mangargahon mudar ni Kristus i, taharinggashon ma mandapothon Ibana tu
parsaoranta unang sumurut gogonta laho mangula ulaon ni Tuhan i.
 Ringkot do paratarataonta pangantusionta taringot tu hata ni Debata, ima dalanta laho
manaluhon dosa di ngoluntaon.