BAHAN SERMON HKBP RESSORT LABUH BARU

EVANGELLIUM 17 SEPTEMBER 2023

UNANG HAMU MANGUHUMI

1 Korint 4 : 1 – 5

1. Patujolo
Sasada Debata do panguhum na sasintongna. Ido ojahan ni
pandohan ni Apostel Paulus di turpuk on. Umbahen na didok ibana tu
huria Korint i asa unang diulahon nasida angka na manguhumi (1 Kor.
4:5). Jala Jesus sandiri pe mandok, “Unang hamu manguhumuhumi,
asa unang hona uhum hamu” (Mat. 7:1). Sian i, gomos ma tioponta,
dang jambarta laho manguhumi.
Manguhumi di son ima sian hata “krino” (Yunani) na
marlapatan manimbangi, mandok pendapat, manangkasi, manang
didodo roha. Sian i, boi ma antusanta molo manguhumi lapatanna ima
manimbangi manang manila angka pangalaho, pambahenan manang
hata ni halak na asing saguru tu pendapatta pribadi. Roa tutu do
lapatanni hata on molo panimbangion i sandiri bersifat sepihak,
isarana manimbangi tanpa bukti, jala on ma na tarida di turpukta
saonari. Alani do didok si Paulus di ayat 5 i, “patiuronNa do na buni
di na holom, jala papataronNa do tahitahi ni roha”. Ai masa ma di
tonga ni huria Korint i manudu na so denggan tu angka halak na asing,
termasuk ma tu Apostel Paulus sandiri, hape so adong buktina tarida
mata.
2. Hatorangan ni Turpuk
a. Konteks masalah Korintus 4:1-5.
Molo taihuthon sian 1 Korint 4:1-21 masalah na mencuat ima
parsilisian di tonga ni huria Korint taringot tu ketokohan ni
parhalado ni Kristus na manghobasi tu luat nasida. Adong tolu
tokoh kuat na dibandingbandinghon ni huria i uju i. Nasida ima
BAHAN SERMON HKBP RESSORT LABIH BARU | 1
Apostel Paulus, Apollos, dohot Kefas (1 Kor. 1:12, 3:4-6,22).
Alani i gabe adong do sian tonga-tonga ni huria i na pahata-hata
Apostel Paulus, boasa apala tung leleng ndang ro be ibana
mangebati tu huria nasida i. Ala memang tingki i Apostel Paulus
dang rap dohot nasida, alai pararathon Barita na Uli di Epesus.
Sampe tu na gabe ganggu roha nasida tu haapostelon ni Apostel
Paulus. Diuhumi huria i Apostel Paulus hape so diida nasida
songon dia situasi dohot kondisi na niadopan ni Apostel i
sasintongna. On do umbahen na didok ibana di ayat 4, “ai ndang
adong salangku anggo na huboto, alai ndada gabe pintor ahu
hinorhon ni i, Tuhan i do manguhumi ahu”.
b. Tona asa unang manguhumi.
1) Unang manguhumi diri.
Di ayat 3 Apostel Paulus mandok, “otik do huetong, anggo
hamu dohot paruhuman ni jolma manguhumi ahu, ahu pe,
ndang huuhumi diringku”. Lapatanna dang boi hape
manguhumi diri. Hape jotjot do masa di tonga ni ngolutta
mandok tu diritta, “dang jolma na malo au, dang jolma na
bagak au, dlna”. Hape na manguhumi diri do hita di si.
Umbahen na ditulak si Paulus manguhumi diri na ima ala
ibana sandiri pe ndang tolapsa laho manimbangi intap ni dia
hasintongan ni naung niulana. Hasintongan ni diritta sandiri
adong holan di bagasan relasitta dohot Debata sambing do.
Molo hita sandiri do manguhumi diritta cenderung ma hita tu
sikap na melebih-lebihkan manang baliksa gabe meremehkan.
Memang adong do Jesus mandok “E ho pangansi, jumolo
ma umpat tiang i sian matami; dung pe i, asa pingkiranmu
manang beha pangumpatmu di silbak-silbak na di mata ni
donganmi (Mat. 7:5). Ayat on tong do taringot tu asa unang
manguhumi, alai di son didok taringot tu diri sandiri. Nang pe
songoni sasintongna ndang na maralo ayat on dohot pandohan

BAHAN SERMON HKBP RESSORT LABIH BARU | 2

ni Apostel Paulus di surat na on. Alai naeng mandok do molo
dang manguhumi diri dang gabe mandok asa unang koreksi
diri. Ringkot do tong koreksi diri. Asa unang gabe sala
mangantusi hita taringot tu hata ni si Paulus di turpuk na on.
2) Unang manguhumi angka halak na asing.
Pandohan na mandok halak Kristen ndang boi manguhumi
sasintongna terkesan tidak realistis. Aha do huroha lapatanni
unang manguhumi? Na sala do molo manimbangi manang
manilai halak na asing? Na so boi be halak Kristen
mengemukakan pendapatna taringot halak na asing? Jala molo
diorai si Paulus do manguhumi antong boasa manguhumi ibana
di 1 Korint 5:3? Alusna sederhana do. Molo didok si Paulus
unang manguhumi di 4:5, ima laho mangajari hita asa unang
manguhumi roha ni halak na asing (sesuatu yang tidak dapat
diketahui dari luar), alai molo di 5:3, si Paulus manguhumi
pangalaho na memang nyata dang suman, boi tarida (ada
barang bukti). Alani mangalapati pandohan unang manguhumi
di son adong do konteksna sandiri.
Isarana, taida sahalak jolma mangalehon peleanna, unang
tauhumi rohana marhite hatatta “ah, pasti dang ikhlas ibana
mangalean i”. On ma manguhumi na nioraan ni si Paulus di
son, ala sasintongna dang boi tarida rohani na mangalehon i.
Holan namangalehon pelean i dohot Debata do na umbotosa
ikhlas manang na dang ibana di si. Alani tapaloas ma asa
Debata na manguhumi angka sisongon i. Jala marasing do molo
nunga adong sala na songon mamunu, mangalangkup, mamunu
dlna. Jelas do dohononta sala i ala ndang saurdot dohot uhum ni
Debata.
Asing ni i ingkon taparrohahon do tong pandohan ni
Jesus na mandok “unang ma marguru tu na niida sambing
uhummuna, tigor ma panguhummuna” (Joh. 7:24). Lapatanna

BAHAN SERMON HKBP RESSORT LABIH BARU | 3

 ingkon manat situtu do molo manguhumi, asa adong dapot
keadilan. Ala boi do na taida i marasing sian na sasintongna.

3. Panimpuli
Unang manguhumi songon topik ni Minggu XV Dung Trinitatis on
ima sosososo tu hita asa unang taula manguhumi angka donganta
molo so adong buktina, tarlumobi ma manguhumi sahat tu rohana.
Alai nang pe songoni, molo tung pe nga terbukti bersalah ndang gabe
taula paroa-roa nasida. Debata sambing do na mandabu uhum tu
nasida di tingkina, ima di ari haroro ni Jesus na paduahon i. Ganup
minggu rap do hita mandok, “Ahu porsea di Jesus Kristus, …na
manaek tu Surgo laho hundul tu siamun ni Debata Jahowa, AmaNa i
pargogo na so hatudosan i, di si ma Ibana paima mulak tu tano on
manguhumi halak na mangolu dohot na mate.” Molo taparrohahon do
kesaksian ta i ganup di parminggu on ta, tontu boi ma tahangoluhon
songon na pinangido ni turpuk on.

*** AMEN ***

BAHAN SERMON HKBP RESSORT LABIH BARU | 4