Bahan Sermon Khotbah Minggu, 15 Oktober 2017

(Minggu Moria GBKP) | Stola : Ungu

Invocatio : "Kupasu-pasu ia, Kubereken ia mupus anak dilaki man bandu; ia jadi nande bangsa-bangsa janah ibas
sinursurna nari lit pagi si jadi Raja" (Kejadin 17:16)

Ogen : Rut 4:13-22 (Tunggal)

Khotbah : Matius 15:21-28 (Responsoria)

Tema : "Nande Si Erkiniteken"

Perlebe

Ndalani kegeluhen selaku kalak si erkiniteken man Tuhan tentu saja melala tantangen si man alanken. Emaka perlu
rurat mbages ibas Kristus telah la melukah kita kecewa ntah putus asa ibas ngalaken tantangen e. Ibas bahan khotbah
mingguta enda erlajar kita arah sekalak diberu bangsa Kanaan uga ia erkiniteken man Tuhan Yesus.

Penjelasen Teks

1. Matius 15:21-28

Teks enda ngerana kerna perjumpan Jesus ras sekalak diberu kanaan deherken kuta Tirus ras Sidon. Jesus reh ku kuta
e guna istirahat kenca ia ersoal jabab ras kakak Parisi bagepe guru agama kalak Jahudi kerna adat si ipake kalak end
(Ajar-ajar Jesus la erburih ope man janah si enda ikritik kalak Parisi ras guru agama kalak Jahudi). Perlu sieteh maka
Tirus ras Sidon eme dua daerah si berbeda. Dage ija peristiwa enda terjadi, Kitab Matius la mereken penjelasen kerna
sie. Tapi ibas Markus 7:24-30, penulis kitab Markus jelas ngataken maka Jesus lawes ku kuta Tirus. Ibas kitab Markus
diberu e kalak Junani, tubuh i Siro Fenisia. Ibas kitab Matius ikataken diberu e kalak Kanaan -sebutan yang lebih
umum- nandangi kalak i luar kalak Jahudi (kafir). Enda nuduhken keadaan si kontroversial, sekalak diberu kanaan
njumpai Jesus kalak Jahudi janah mindo penampat man bana.

Ituriken ibas teks enda maka diberu kanaan e sekalak nande si sangana ngenanami perbeben si mberat eme anakna
iseluki setan janah mekelek kal iakapna. Selaku nande tentu saja ia berusaha uga gelah anakna banci malem. Ibas ia
ngelebuh Jesus siidah maka diberu e nandai Jesus alu payo (O Tuhan, Anak Daud! dingen dem pengarapen telah Jesus
erkuah ate man bana. Berarti lit sada keyakinen ibas diri diberu e maka lit kuasa ibas Jesus lako pepalem anakna. Tapi
sengkebabah ranan pe la Jesus ngaloi. Tambah ka pebeben diberu e sabab ajar-ajar Jesus pe enggo gejek akapna ia
janah berusaha pelawessa. Menurut Barclay, situhuna siiarapken ajar-ajar e gelah ibereken Jesus pemindon diberu e
me lanai iganggu diberu e ia sabab gejek kal ia arah pudi kalak enda. Respon Jesus selanjutna ialoina diberu e maka
Jesus reh guna bangsa Israel ngenca. Tapi la surut diberu e malah erjimpuh ia mindo gelah Jesus nampati ia. Jenari
ngaloi Jesus maka la patut ibuat nakan anak-anak jenari ibereken man biang. Jawaben Jesus enda arus siidah arah
kacamata kalak Jahudi simenempatken dirina ganjangen asang bangsa sideban. Piga-piga cataten kami ibas ay. 26-27

"Nakan anak-anak" (Ind: roti) ngerana kerna kegeluhen. Lit tafsiren ngatakenca maka roti eme pasu-pasu
Dibata, keselamaten, kegeluhen siidangken Dibata man anak-anakna eme bangsa Israel. Kai siidangken bas
meja eme guna anggota jabu saja (kalak Israel saja- diluar itu tidak kebagian).
"Biang" - ibas kacamata kalak Jahudi, kalak si labo Jahudi biasa igelari biang. E nuduhken ketidaklayakan atau
tidak adanya kesempatan bagi orang diluar Jahudi untuk menerima berkat Tuhan.
Ibas konteks diberu kanaan kata "anjing" si ipake Jesus labo "kuon" : anjing liar tak bertuan, tapi "kunarion" :
anjing peliharaan, anjing rumahan. Man kalak Siro Fenisia biang eme lambang si mehuli - lambang
kesembuhan (dewa kesembuhan : dewa Esymun dilambangkan dengan anjing "kunarion"). Ibas sejarahna
biang enda ngelakoken proses penyembuhan alu ndilati luka-luka si lit ibas kula manusia. Alu bage banci
simaklumi maka Jesus labo atena menghina ntah merendahkan diberu e tapi Jesus ngerana ibas dua konteks
eme Jahudi si menganggap kalak diluar dirina eme biang, bagepe konteks Siro Fenisia maka "kunarion" eme
simbol kesembuhan.
Ay.27 "Tuhu Tuhan, tapi biang pe man rimah-rimah si ndabuh ibas meja tuanna nari". Pengarapen diberu
kanaan enda tuhu-tuhu luar biasa. Sadar ia Jesus ngerana ibas konteks budaya Jahudi si memprioritaskan
kalak Jahudi saja ras labo lit kesempatan kalak si deban ngaloken roti e. Emaka ipakena kata rimah-rimah

1
 "pshicion" si berarti serpihan-serpihan kitik ibas roti e nari si labo mengurangi bagian anak-anak.
Erpengarapen ia maka amin pe "kunarion" tetap nge ipelihara tuanna, "kunarion" e labo tading i darat rumah,
tapi sada rumah kap ia ras tuanna e janah dat bagian nge ia ibas roti amin pe bentukna rimah-rimah si ndabuh
ibas meja tuanna nari. Luar biasa kal kinitekenna, tek ia maka bagin rimah-rimah pasu-pasu Dibata e pe
sikerajangenna, e enggo jadi bagin simbelin kal man bana.
Ay.28. Erkiteken kiniteken diberu e man Dibata maka jadi me man bana bagi sura-surana. Minter malem
anakna paksa sie. Alu bage banci siidah kuga keleng ate Jesus man kerina bangsa, ise si erkiniteken man bana
dat bagin me ibas roti kegeluhen e.

2. Rut 4:13-22

Rut sekalak diberu bangsa Moab si enggo memilih Dibata Naomi jadi Dibatana nggeluh ipasu-pasu Tuhan. Perdalanen
geluh Naomi ras Rut dem alu perbeben. Ibas kecedan ate erkiteken itadingken perbulangen ras anakna, Naomi tetap
erpengendes man Tuhan. Rut si paksa e nggo mbalu, lit nge kesempatenna nadingken simetuana, tapi ipilihna guna
ngikut-ngikut bibina e dingen engkelengisa. Bahkan ikataken ibas perikop enda maka keleng ate Rut man Naomi
lebihen asangken pitu anak dilaki. Enda ncidahken kuga sangapna sekalak Naomi selaku bibi erpermenken Rut. (Anak
dilaki ras angka pitu melambangkan kesempurnaan). Pengalamen kegeluhen si pagit la erbanca monce kinitekenna
man Dibata tapi tetap ukurna guna Setia man Dibata. Dibata merancang kegeluhen Naomi ras Rut dem alu misteri
tapi mabai ku dame sejahtera. Rancangan Dibata nandangi keluarga Naomi ras Rut jadi rancangen si mbelin ibas karya
penyelamaten Dibata man doni enda. Kesusuren Rut ras Boas eme Obet, ia me Bapa Isai, Isai me Bapa Daud, ibas
kesusuren Daud nari me reh penampat eme Jesus Kristus.

Pengkenaina

1. Erkiniteken man Tuhan tentu arus megenggeng. Ibas paksa-paksa si tempa-tempa la kita ibegiken Tuhan, ntah la
siakap kita ialo Tuhan, tetaplah megenggeng dingen darami si ngena ate Tuhan. Mesekseklah mindo ertoto man
Dibata alu dem kiniteruken ukur bagi Diberu Kanaan e ndai.

2. Tangkas kuga Tuhan erkeleng ate man kerina bangsa. Standart si ndube ipake Tuhan (keselamaten man Israel saja)
enda enggo jadi penyelamatan universal. Enda encidahken Biak Dibata si nggit mpeteruk bana gelah terkelin kita
manusia. Alu bage kita pe ngusih perbahanen Jesus ibas kegeluhenta.

3. Selaku ajar-ajar Jesus, ula min dongkel siakap kehadiren kalak si deban si perlu man sampaten. (Bandingken sikap
ajar-ajar). Min kita jadi kalak si terbuka guna nampati kalak si deban ibas kesusahen geluhna (bandingken Boas)

4. Ibas HUT MORIA GBKP 60 tahun, malem kal ate perbulangen ras anak-anak adi ndehara- nande e kalak si
erkiniteken. Malem pe ate sekalak bibi - simetua (orangtua) adi permenna (anakna) kalak si erkiniteken. Malem kal ate
sekalak permen adi bibina kalak sierkiniteken dem alu keleng ate. Moria idilo gelah megenggeng ibas engkelengi jabu
(perbulangen, anak-anak, sangkep geluh). Nande ingan tertande arus megegeh, menjadi tiang doa ibas keluarga.

5. Perbeben si lit ibas kegeluhenta ntah pe i tengah-tengah jabunta banci saja ipake Dibata lako mabai kita kubas karya
penyelamaten Dibata man doni enda. Emaka pindo rusur hikmat man Tuhan gelah ngasup kita ngidah rancangen si
mehuli bas kegeluhenta.

SELAMAT HUT MORIA GBKP 60 TAHUN. DIBATA SIMASU-MASU MORIA GBKP.

Pdt. Debora Br. Sembiring, S. Si (Teol)