Kebaktian Pekan Keluarga Wari Si-1 ken

Invocatio : “Aku ngenca meteh sura-surangku nandnagi kam, e me gelah kam senang
labo gelah cilaka. Rencanangku e me mereken wari sipepagi bagi
siiarapkenndu.” Jeremia 29:11
Ogen : Kejadin 7:1-5
Kotbah : Epesus 2:1-10
Tema : Jabu Si Ndahiken Rencana Dibata

I. KATA PERLEBE
Malem kel ateta ibas penemani Tuhan kegeluhenta ras kegeluhen gerejanta seh maka enggo
ka kita itaruhken Tuhan ku bas ahir tahun 2023 enda. Janah rikutken kalender gerejanta enggo ka
kita seh kubas pekan keluarga tahun 2023. Ibas pekan keluarga tahun 2023 enda tetap ilumbaken
jabu-jabunta nggeluh i bas orat nggeluh kalak si enggo iselamatken Tuhan Dibata e me nggeluh i
bas rencana Dibata. Oratna kita geluh jadi pelaku-pelaku rencana Dibata. Manusia nggeluh guna
nehi sura-sura Dibata e me nggeluh guna kemulian Dibata. Ertina kerinana manusia si nggeluh i bas
doni enda nggeluh min guna kemulian Dinata terlebih manusia si enggo nggaloken perkuah ate
Dibata dingen tek man baNa.

II.ISI
I bas suratna man perpulungen Epesus Paulus nuriken perbahanen Dibata nandangi kalak si
ipilihna, Dibata e perkuah. Bas IA lit kekelengen si mbelin. KekelrngeNa e me mabai kegeluhen.
Arah perbahaneNa jine manusia siniarusna iukum seh mate erkiteken kesalahenna tapi ipegeluh
mulihi erkiteken lias ate Dibata. Alu kata sideban perkuah ate Dibata e erbahanca si pemena
ngaloken keterkelinen. Kata Enda isehken Paulus erkiteken perpulungen Efesus e lit kalak Jahudi
ras la kalak Jahudi. Pengertin kalak Jahudi maka keterkelinen jadi erkiteken ndalanken undang-
undang Taurat, erdandanken si e ilakoken me kerina Taurat alu tujun ndatken keselamatan. Lit
pengakap maka manusia banci terkelin arah bekas perbahaneNa si mehuli.
Tapi manusia banci terkelin erkiteken perkuah ate Dibata, alu mereken AnakNa si Tonggal
guna nebusi dosa manusia erkiteken perkuah ate Dibata si la ersibar, erkiteken lias ate Dibata i bas
Kristus Jesus (bdk.Joh.3:16-17). Erkiteken lias ate ateNa maka manusia enggo terkelin e maka labo
lit dalanna manusia mujiken bana.
Lias ate Dibata (God's mercy: kemurahan hati Allah) ertina e me "Sada si patut ialoken
manusia (mate) tapi Jesus ngelakoken ukumen e". Anem pe intina seri ras lias ate e me kerna Jesus
Kristus, tapi lain sitik pemahamen lias ate ibandingken ras perkuah ate (grace:anugrah). Perkuah ate
e me" sada si patut sialoken, tapi sialoken, e me Jesus sebage pemere (anugrah) Dibata".
Emaka ibas kita enggo ngaloken lias ate, kemurahan hati, kita enggo ipersada ras Kristus Jesus,
ijadikeNa manusia guna ndahiken dahin-dahin si mehuli si enggo leben irencanakenNa manusia
guna ndahiken dahin-dahin si mehuli si enggo leben irencakenNa gelah sidahiken e. Pemere-pemere
si lit bas perpulungen ipakeken jadi pengataken bujur man Tuhan.
Ibas Ogen Kej 7:1-5 banci si idah uga keluara Nuh eme keluarga sipatuh man Tuhan. Ia
ngenca simehuli ibas jamana (Indonesia: benar dan tidak bercela). Tidak bercela ibas bahasa Ibrani
Tamiym: Bukan hanya tidak memiliki kekurangan tapi sempurna sesuai dengan kehendak perintah
Tuhan. Berjalan sesuai dengan arahan, perentah Tuhan.Emaka ipujiken Tuhan si Nuah alu melasken
sada kam nari nge ngenca i bas doni enda erbahan simehuli kuakap.
Ibas Invocasio Jeremia 29:11 isengetken maka alu tegas Dibata melasken maka ia ngenca meteh
sura-suraNa man bangsaNa. Sura-suraNa e, e me sura-sura si mehuli. Rencana e me mereken wari
pepagi bagi siniarapken bangsa Israel.
III.PENGKENAINA
Tema Pekan Keluarga wari si pemena dingen e pe jadi tema umum Pekan Keluarga GBKP
Tahun 2023 e me: jabu si Ndahiken Rencana Dibata.
Adi ikawitken kotbah, ogen,invocasio e me manusia si enggo ngaloken keselamaten i bas lias ate
Dibata arus Ngelakoken perbahanen si mehuli bagi sinilakoken Nuah ras se isi jabuna. Sabab em
sura-sura Dibata kempak anak-anakNa si enggo irencanakenNa. Rencana Dibata pasti mereken si
mehuli saja kempak kita anak-anakna.
Emaka i bas kita enggo ngaloken keselamaten e tetaplah kita geluh i bas keselamaten si
enggo sialoken e. Konsisten kita geluh i bas keselamaten. Tujunta geluh eme guna kemuliaan
Dibata. Tetap kita Ngelakoken singena ateNa. Nggeluh kita ndalanken rencana Dibata. Patuh kita
ndalanken perentah Tuhan i bas kita enggo nggeluh i bas lias ate Dibata. Geluh kita i bas geluh si
baru. Jabunta banci nggusih bagi kai silakoken keluarga Nuah alu tetap patuh man perentah Dibata.
Jabunta harus tetap ipimpin Dibata. Jabunta tetap nggeluh guna kemulian Dibata ras jabunta pe
tetap lit i bas kemalemen ate.

Pdt. Berandes Ginting, S.Th, M.Psi

 Kebaktian Pekan Keluarga Wari Si-2 ken
Invocatio : “Kataken bujur man Tuhan erkiniteken kiniulinNa; keleng ateNa tetap rasa
lalap.” 1 Kronika 16:34
Ogen : 1 Samuel 12:20-25
Kotbah : 1 Tesalonika 5:16-18
Tema : Jabu Singataken Bujur I bas Sikugapana Pe

I. Kata Perlebe
Mula-mulana Dibata njadiken doni enda, perjabun labo gagasen manusia. Tapi Perjabun e
me gagasen Dibata. Janah i bas perjabun e tercipta me jabu/keluarga. I bas buku Darrell L. Hines
dengan judul Pernikahan Kristen konflik dan solusinya mengatakan bahwa keluarga merupakan
sebuah kata yang berakar di dalam sebuah nama. Kita cenderung berfikir mengenai keluarga dalam
kaitan dengan marga kita. Namun demikian, Alkitab memberitahukan kepada kita bahwa keluarga
pada dasarnya berakar di dalam nama Yesus Kristus. Dialah yang menetukan keluarga. Dalam buku
Kawin, Siapa Takut! Sebah tulisan karya Pdt. Yvonne Diana Taroreh-Loupatty mengatakan
bahwa keluarga adalah lembaga ciptaan Tuhan (Kej. 2:24) dan merupakan gugus terkecil dalam
struktur masyarkat dan gereja. Suami adalah kepala keluarga dan istri adalah ibu rumah tangga.
Dalam kesetaraan, suami dengan istri serta anak-anak mengambil peran masing-masing dalam
dinamika hidup berkeluarga.
I bas pemahamen kidekah enda, maka jabu e lit ije Bapa, Nande ras anak-anak. Tapi adina
nina Andar Ismail i bas bukuna Selamat Memanusia, maka keluarga bukanlah berbicara tentang
komposisi yang ada di dalamnya (Ayah, Ibu dan Anak), tetapi yang mencirikan keluarga adalah
komitmen untuk saling terima, saling memahami, saling menghargai, saling didik, saling perbaiki,
saling tegur, saling memaafkan, saling setia, saling tolong dan lain sebagainya (95).

II. Isi
Surat Paulus si pemena man kalak Tesalonika isaratken mpegegehi ras petetap ukur kalak
Kristen i kota e. Ikatakenna bujur sabab ibegina berita si mehuli kerna kiniteken ras kekelengen
kalak e; ipersingetina man kalak e kerna kegeluhenna jine asum ia nggeluh i tengah-tengahna. 1
Tesalonika 5:16-18 alu judul perikopna “Pedah si perpudina ras salam” lit telu pedah si ipeseh
Paulus man perpulungen I Tesalonika:
1. Ay. 16, Meriahlah atendu katawari pe: pedah enda harus siangkai keriahen secara
rohani, labo keriahen secara doni enda. Sebab, adi i bas doni enda labo kerina hal banci
erbahansa ukurta meriah, sebab tupung la bagi ukurta labo meriah siakap. Tapi, adi
keriahen secara rohani ntah pe keriahen ukur i bas Dibata, maka ngasup kita ermeriah
ukur katawari pe, aminna pe paksana gulut ukurta, melala perbeben, mberat baban
geluhta. E maka si jadi perayaken geluhta labo keriahen i bas doni, tapi keriahen i bas
Dibata nari.
2. Ay. 17, Ertotolah katawari pe: Salah sada cara gelah ngasup ermeriah ukur katawari
pe, eme ertoto katawari pe, sebab arah kita ertoto katawari pe ngasup kita ngalaken
perbeben iugapana pe. Salah sada senjata kalak si erkiniteken eme alu ertoto katawari
pe. Ertoto labo hanya tupung gulut ukur, tapi ertoto pe sangana ermeriah ukur. Maka
keriahen ukur e erlipat-lipat jadina.
3. Ay. 18, Ngataken Bujur sikugapana pe: Adi kita ertoto katawari pe, maka labo lit
alasen guna la ngataken bujur man Dibata i bas sikugapana pe. Bali bagi kita mpeseh
pemindon-pemindonnta man Dibata alu pengarapen, ije ka me kita la banci lupa guna
mpeseh pengataken bujur man Dibata (Ep. 4:6). Arus me kita ngataken bujur i bas
sikugapana pe. Ngataken bujur labo sanga meriah ukur ngenca, sebab adi sanga meriah
ukur ngenca kalak si la tek man Dibata pe ngasup ngataken bujur. Tapi tupung baban
mberat, melala perbeben e pe harus ngasup ngataken bujur man Dibata. E me bedana
kalak si erkiniteken ras si la erkiniteken. Sebab hal si bagenda singena ate Dibata.
 Ogenta 1 Samuel 12:20-25, Pidato perpisahen Samuel man bangsa Israel, bangsa pilihen
Dibata. Nina Samuel man bangsa Israel, maka “ola kam mbiar” kalimat penguaten si ipeseh
Samuel, aminna pe erbahan jahat, tapi ola sempat nilah i bas Dibata nari. Tapi harus tetap ersembah
man Dibata aku bulat ukur. Kalak si la nilah arah Dibata dingen nembah Dibata alu bulat ukur, kecil
kemungkine guna ngelakoken perbahanen si jahat, aminna gia bage, Samuel tetap mereken pedah
man bangsa Israel gelah tetap setia man Dibata, janah ula ndigan pe nembah dibata-dibata sideban.
Tapi, adi lagu langkah bangsa e tetap nilah ntah erbahan dosa, maka la banci lang harus ikernepken.
Lit konsekuensi nandangi kalak si la patuh man Dibata.
Invocationta 1 Kronika 16:34 “Kataken bujur man TUHAN, erkiteken kiniulinNa;
keleng ateNa tetap rasa lalap”. Si gejapken nge kiniulin Dibata i bas kegeluhennta? Penungkunen
si rusur ipeseh man perpulungen, maka kerina perpulungen ngaloi, igejapken kami. Tapi, engkai
maka melala denga kalak si nggejapken kiniulin dingen keleng ate Dibata e lupa ngataken bujur
man baNa. Maka lit kalak ngaloi, sanga meriah e labo ingat Dibata, sanga susah e maka inget
Dibata. Arah invocatio enda, maka ipertegas mulihi maka kalak si nggejapken kiniulin dingen
keleng ate Dibata, harus me ia ngataken bujur man Dibata. Sebab, keleng ate Dibata e tetap rasa
lalap. Kiniulin ras keleng ate Dibata e, labo hanya i bas keriahen ukur, tapi i bas kiniguluten, baban
si mberat e pe, kiniulin dingen keleng ate Dibata tetap rasa lalap.

III. Pengkenaina
Tema kebaktian Pekan Keluarga ibas wari si peduaken enda Jabu Singataken Bujur I bas
Sikugapana Pe. I bas jabu labo mungkin la lit konflik, janah i bas jabu labo lalap lit konflik.
Perbeben si terjadi ibas jabu mabai jabu guna semakin dewasa, janah perbeben e labo banci
ielakken. I bas bahan kebaktian pecan keluarga wari si peduaken enda, iajuk gelah jabu tetap
ngasup ngataken bujur man Dibata aminna gia sikugapana pe terjadi ibas jabu. Sebab labo kerina
banci bagi ukur ibas jabu. Tapi, sada hal si penting kal si inget maka Dibata enggo nikapken
rencana-rencana si mehuli nandangi anak-anakNa si ernalem dingen setia man Dibata.

Pdt. Iman Gegeh Saragih, S.Th

 Kebaktian Pekan Keluarga Wari Si-3 ken
Invocatio : “Emaka cukup min siakap adina lit nakanta ras uista.”1 Timotius 6:8
Ogen : Pilipi 4:11-18
Kotbah : Kuanen-kuanen 30:7-9
Tema : Jabu Si Ngeluh I Bas Kecukupen

I. Bena Kata
Cukup eme sada konsep si la seri ibas tep-tep jelma. Lit si erpengakap makana sukup ibas
geluh enda dikune kerina keperlun doni enda banci terpenuhi. Lit kang si enggo bayak namura tapi
lalap erpengakap makana lenga cukup. Tapi megati kal konsep “cukup” enda tolak ukurna eme
kerna materi. Bage ka pe ibas perdalinen kegeluhen itengah jabu, konsep “cukup” megati sukatenna
eme kerna erta doni. Seh makana tarum-tarum ndarami erta doni lupa kerna tanggungjawab guna
njadiken jabu jadi ingan Perberita Si Meriah. Rikutken Pekan Keluarga wari sipeteluken enda,
ibabai me ngawani perpulungen bagepe tep-tep jabu lako nggeluh ibas kecukupen setudu bagi si
iarapken Dibata.

II. Isi
Kitab Kuan-kuanen enda alu tangkas nuriken kerna kata ajar si payo ibas kegeluhen. Kitab
Kuan-kuanen 30:7-9 enda itulis Agur bin Yake. Secara khusus kitab Kuan-kuanen 30:7-9 enda
nuriken kerna pentingna nggeluh ibas kecukupen. Ibas ayat 8 tangkas ituriken maka, “Ola
pelepasndu aku musil ntah bayak.” Arah pemindon enda mabai teridah makana jadi kalak musil
entah pe bayak eme dua hal si mberat.
Kemusilen banci mahanca manusia ngelakoken erbage-bage cara guna ncukupi keperlun
geluhna. Seh makana situasi enda banci mabai manusia ndabuh ku bas dosa. Manusia banci saja
empesega-sega geluh kalak dingen nalahken Dibata. Lanai nggeluh erkemalangen man Tuhan.
Dingen banci ka pe mahanca lanai ngergaken geluhna jine.
Tapi kinibayaken labo jadi jaminen makana manusia banci nggeluh alu senang dengan dem
pengataken bujur man Tuhan. Sebab kinibayaken banci saja mahanca manusia jadi meganjang ukur.
Banci jadi kinibayaken enda ipakeken alu cara si la pas. Nggeluh ibas keborosen dingen meganjang
ukur.
Porsi si pas kerna keperlun geluh enda eme “cukup”. Tapi cukup sinimaksudken ijenda labo
cukup rikutken sura-sura manusia, tapi cukup rikutken sura-sura Dibata. Arah kecukupun
erpalasken sura-sura Dibata tentuna mabai geluh manusia tetap erpengendes dingen erpengarapen
man Dibata. Sebab kerina si nasa lit ibas doni enda Dibata kap empuna. Alu bage, pindlah maka
Dibata si ncukupken kerina keperlun geluhta.
Inti ibas pertoton Agur enda eme segelahna Dibata emperdiateken kegeluhenna dingen
mereken kai siniperlukenna. Sue bagi isi pertoton Jesus, “Bereken man kami nakan si cukup bas
wari si sendah enda”. Arah sie tangkas si idah maka Jesus pe mindo segelahna geluhna dem alu
kecukupen, la kekurangen entah pe kelebihen.
Arah bahan ogen ibas Filipi 4:11-18 tangkas ituriken Paulus kerna pentingna nggeluh ibas
kecukupen. Paulus tangkas nuriken kerna uga ia erlajar guna encukupken diri. Seh makana lanai ia
mbiar ngalaken kiniseran entah pe keriahen, erkiteken enggo ngasup ia ngalakenca. Kai siituriken
Paulus enda tangkas maka ibas geluh enda tentuna erpaksa-paksa. Bagepe rezeki idur Dibata nari.
Erdandanken sie me makana tuhu penting guna berhikmat ibas makeken pasu-pasu ibas Dibata nari
dingen nggeluh ibas “ncukupken diri”.
Arah pengataken bujur Paulus nandangi penampat perpulungen i Pilipi, tangkas teridah
makana perpulungen i Pilipi kepate nandangi Paulus. Nggit ia muat bagin guna nampati Paulus ibas
Pembarken Berita Si Meriah. Bahken ibas ayat 15 tangkas ituriken Paulus makana perpulungen
Pilipi ngenca si nampati ia tupung ia tangtangna nadingken Makedoni. Ertina maka perpulungen i
Pilipi la hanya ngukurken kerna dirina jine tapi ia pe nggit erbagi guna ngukurken keperlun kalak
sideban. Tentuna biak enda la terlepas erkiteken Dibata enggo erdahin ku bas pusuhna ras geluhna.
 Megati kal si jadi la kita mbera nampati kalak labo erkiteken la lit bas kita. Tapi erkiteken kita
merasa “tidak cukup” rikutken pemere Dibata bas geluhta. Kita merasa “miskin” seh makana kita
tuhu-tuhu miskin secara kiniteken. Ibas invocatita ndai tangkas ituriken maka “Emaka cukup min
siakap adina lit nakanta ras uista.” (1 Tim. 6:8). Biak merasa cukup eme si mahanca ngasup kita
makeken si lit bas kita alu la terjeng ngukruken dirinat jine tapi pe kita abnci jadi pasu-pasu kempak
kalak sideban. seh makana la hanya kita si merasa cukup tapi kalak sideban pe erkecukupen.

III. Aplikasi
Megati kal kinibayaken jadi tolak ukur maka geluh manusia “cukup” dingen ndatken “pasu-
pasu” idur Dibata nari. Tentuna pemahamen enda banci mahanca Dibata tempa-tempa la adil ibas
mereken pasu-pasuNa. Situhuna bayak entah musil labo banci jadi tolak ukur pasu-pasu Dibata.
Justru bayak ras musil eme situasi siipake Dibata segelahna kita nggeluh erpengendes dingen
erpengarapen man bana.
Tolak ukur ekonomi sada jabu megati kel jadi penentu keriahen sada jabu. Tentuna arah tema
Pekan Kelaurgata ibas wari sipeteluken enda, ibabai me kita ras isi jabunta labo berhikmat ibas
ngaturken keperlun geluh enda. Ula jadiken masalah ekonomi jadi alasen guna la kepate dingen
nampati kalak si man sampaten. Si jadi persoalen eme megati jabu e la tandaisa bana. Pemasukan
tidak sesuai dengan pengeluaren. Ibarat ini kuan-kuan ngatakensa, “BPJS : Bajad pas-pasasan jiwa
sosialita.” Piah kedungenna mabai jabu e ku kebenen.
Marilah kita ras isi jabunta nggeluh ibas kecukupen. Janah jadilah pasu-pasu Dibata arah
kegeluhenta ras isi jabunta. Bagi Paulus si erlajar guna ncukupken dirina, bage ka pe kita erlajar
guna nggeluh alu ncukupken si lit bas kita. Bagi perpulungen i Pilipi si erdiate kempak Paulus
dingen la erngadi-ngadi nehken penampat man bana. Bage ka pe kita ras isi jabunta erdiate dingen
jadi pancur pasu-pasu Dibata. Bagi Agur si mindo kecukupen ibas Dibata nari, bage ka pe kita
mindo segelahna Dibata si ncukupi kerina keperlun geluhta. Sebab doni enda ras kerina isina Dibata
kam si empunasa.
Pdt. Arnilia Br Bangun, S.Th

a
 Kebaktian Pekan Keluarga Wari Si-4 ken
Invocatio : “Erkiteken si e, patuhlah kam nandangi pemerentah, labo saja erkiteken
mbiar kena ukumen, tapi erkiteken pusuh peratenndu pe nuruh kam.” Roma
13:5
Ogen : Matius 21:15-22
Kotbah : Keluaren 18:17-23
Tema : Jabu Si Milih Alu Pentar

I. Bena Kata
Salah sada kalimat si megati si begi adi ngerana kerna milih eme “hidup adalah pilihan” si
tujunna guna ngataken maka bas kegeluhen enda manusia bebas memilih kai atena si ilakokenna,
kai si atena ngena, kai sura-surana ras melala pilihan sideban. Memang pas bas kegeluhen enda kita
bebas milih kai si akap cocok ras kita. Amin pe bas geluh enda manusia ibereken kebebasen milih 1
hal, tapi adi la alu kepentaren milihsa maka banci terjadi salah pilih si erbahansa melala akibat ku
pudi wari. Hak memilih memang lit bas setiap pribadi, emaka pentingkal pengajaren gelah jadi
pentar bas milih ibenaken bas jabu nari. Segelahna bicara lit si man pilihen secara pribadi banci
kepentaren e mabai ia milih si payo alu cara ertimbang kerna sebab akibat pilihenna e.

II. Pebagesi Teks

Bahan ogen Matius 21:15-22 nuriken kerna peristiwa pedualiken Jesus ,bersihken Rumah
Pertoton (Joh. 2:13-17). Paksa si e Jesus nunggalingken meja-meja ingan kalak nukari duit ras
bangku-bangku ingan kalak erdaya nderapati. Bas paksa si e pe ibahan Jesus tanda sengget,
ipepalemna kalak pentang. Ngidah kerina peristiwa enda ngilas ate imam-imam ras guru-guru
agama erkiteken nggo enterem kalak ersurak muji perbananen Jesus. Si enda ilatarbelakangi
erkiteken imam ras guru agama si iakap ngangkai undang-undang ras pentar bas agama la ngasup
ngelakooken kai si ibahan Jesus. Kalak enda kerina bagi kebenen pamor erkiteken peristiwa enda si
erbahan reh teremna kalak tek man Jesus.
Kenca itadingken Jesus Rumah Pertoton e pepagina iidah Jesus batang ara si mbur kal
bulungna tapi lalit buahna. Emaka isumpahi Jesus batang ara e ngasa ndigan pe lanai erbuah. Kenca
isumpahi Jesus minter kal kerah batang ara e. Arah kejadin enda Jesus nuriken kinirawanNa
nandangi praktek-praktek agama si la erisi. Bali bagi batang ara ndai si ndauh nari mejile man
tatapen tapi la mereken buah. Bage ka me si terjadi sangana bas Rumh Pertoton paksa si e, iidah
mejile dingen menarik tapi kerina kegiaten ersembah e lalit isina erkiteken tujunna labo ersembah
man Dibata alu tutus.
Ikataken Jesus pe kerna kiniteken si la monce-once la terjeng banci ngelakoken bagi si
lakoken Jesus lebih pe banci nuruh uruh ngangkatken bana jenari ibenterkenna bana ku lawit. Si
enda erkawiten ras kiniteken si mbelin ras mejile labo lit ertina adi la idalanken bas kegeluhen tep-
tep wari. La mbiar erbahan perubahen si la ngena ate Dibata bas Rumah Pertoton, sebab adi dem alu
kiniteken si paguh kita mindo man Dibata emaka sialoken me arah pertotonta.
Bahan kotbah Keluaren 18:17-23 eme nuriken kerna Musa si mimpin bangsa Israel. Bas
paksa e Musa ngenca sekalak pemimpin ije. Emaka megati kal sada warin Musa harus ndungi
persoalen-persoalen tengah-tengah bangsa e. enterem rusur jelma teding ngkelilingi Musa guna
ngaduken persoalenna. Bahkan masalah si kitik pe iaduken ku Musa gelah iberkeen jalan keluarna.
Situasi enda iidah Jetero, mama Musa. Ngidah buena persoalen si harus idungi Musa seh
maka melala waktu si terkuras bagepe waktu istirahat Musa pe lanai lit. Emaka Jetero mereken
pedah man Musa guna milih piga-piga kalak jadi hakim man bangsa Israel. Jetero mereken pedah
man Musa gelah nentuken piga-piga kalak jadi hakim man bangsa Israel erkiteken iidah Jetero,
Musa ngenca si erdahin sekalak ibas ngaturken bangsa Israel, paksa bangsa Israel rubati, Musa
ngenca ngerunggui perubaten-perubaten si turah ibas bangsa Isarel e janah sie erbansa Musa sibuk
erpagi-pagi nari seh ku berngina dingen nggejapken latih, bahken 2 kalak saja pe si rubat, Musa reh
erbahan keputusen apai si benar apai si lang jenari ituriken Musa kerna pedah ras Undang-undang
Dibata.
 Emaka ngidah sie kerina ibereken Jetero me pedah man Musa guna milih ibas bangsa Israel
guna jadi hakim-hakim si tetap man bangsa Israel si ngasup mimpin 1000 kalak, 100 kalak, 50
kalak, ras 10 kalak, janah si ipilih e harus kalak si erkemalangen man Tuhan, terteki janah la nggit
isogok. Si enda ilakoken erkiteken persoalen e labo mungkin terdungi Musa sekalak. Emaka kerna
soal-soal si sulit si terjadi ibas bangsa Israel hakim-hakim mpesehsa man Musa, janah adi soal-soal
si kitik hakim-hakim e saja mutuskensa. Tujun arah pedah Jetero e eme gelah kerina muat bagin
ibas dahiken dahin Tuhan, Musa pe ernahangna akapna ibas maba dahinna la ngenca iya latih
sekalak. Janah kai siipedahken Jetero enda ibegiken Musa rikut pe idalankenna alu milih bangsa
Irael jadi hakim-hakim guna mimpin 1000 kalak, 100 kalak, 50 kalak, ras 10 kalak.
Invocatio, sanga Paulus nulis surat enda, si erkuasa masa si e eme Kaisar Nero, eme sekalak si
jahatna sepanjang sejarah manusia tentu labo maksud Paulus kita matuhi pemerintah secara buta.
Tulisen Paulus enda bermakna politik, seba masa si e kalak Roma nembah man dewa-dewa, roh-
roh, animisme. Janah man kalak Roma kaisar eme bali ras dewa. Kalak Roma si nembah man dewa-
dewa bagepe kaisar mempersulit geraken kalak Kristen ras Jahudi si nembah Dibata si sada. Sikap
kalak Kristen enda mpeturah ate nembeh Nero sebab adi reh teremna kalak jadi Kristen
persembahen kurban man dewa-dewa reh sitikna. Emaka mulai me Nero nindas ras munuh kalak
Kristen.
Perbahanen Nero enda mpeturah pemberontaken ibas kaum Zelot, kalak enda berpendapat maka
lalit Raja man kalak Jahudi selain Dibata Jahwe. Janah upeti la man berenken man ise pe selain man
Dibata. Emaka yakin kalak Zelot enda Dibata labo nampati kalak enda adi la kalak enda memulai
tindaken si keras eme meniadakan pemerintahan sipil alu cara nerror pemerintahen Roma ras
munuhi sesama kalak Jahudi entah pe nutungi rumah-rumahna adi kedaten nggalar upeti man
pemerintahen Roma. Enda me si mendorong Paulus nulisken surat enda guna memisahken
kekeristenen arah geraken pemberontaken kalak Jahudi, ate Paulus ngataken maka kalak Kristen
banci nge jadi warga negara si mehuli labo warga pemberontak. Gelah ula ianggap geraken
kekristenen enda seri ras pemberontaken kalak Jahudi.
Patuh man pemerintah eme kewajiben kalak Kristen, Paulus ngatakensa kepatuhen e labo ban
biarna entah pe ngarapken sada hal. Tapi kepatuhen e ban bage kin ate Tuhan si lakoken. Sebab
sebalikna adi la patuh man pemerintah banci ndatken konsekuensi hukumen. Enda ikataken Paulus
erkiteken enggo mulai melala kalak si simpati nandangi geraken Zelot enda. Jadi kata-kata Paulus
enda situhuna erkiteken situasi masa si ndai terjadi pemberontaken man pemerintah, janah
pemerintah la terbedakensa apai kalak Kristen apai pemberontak Zelot.

III. Aplikasi
Ibas tahun si reh enda kita melala kel gelakoken pemilihen. Baik pemilihen Pt/Dk bas gereja
bagepe pemilihen pemimpin negaranta. Arah bahanta enda ipersingeti kita segelahna mabai jabuta
milih alu pentar. Alu cara mperdiateken track record si bakal ipepilihken. Si enda ertujun segelahna
kita milih e eriteken ateta baik bas gereja bagepe negaranta ipimpin kalak si mereken dirina guna
maba ku perubahen si mehuli.
Bas gerejanta sipilihlah sekalak si banci mabai gereja “ernanam” man sekelewetna. La terjeng
mejile man tatapen ngenca, tapi idah arah buah si meramis. Pemimpin si ipilih kita eme pemimpin
si nggit ngerunggui ras mereken solusi arah kepentaren Dibata nari bali bagi pemimpinpin si ipilih
Musa.

Vic. Santa Monika Surbakti, S.Th

 Kebaktian Pekan Keluarga Wari Si-5 ken

Invocatio : “Erkiteken sie maka anak-anak Dibata si ngikutken pedah-pedah Dibata

dingen setia man Jesus arus megenggeng.” Ketangkasen 14: 12
Ogen : 1 tesalonika 5:23-28
Kotbah nehemia 2:11-18
Tema : Muat Bagin Ibas Dahin Si Mehuli

I. BENA KATA
Lit pepatah ngatakensa maka “Bersatu kita teguh, bercerai kita runtuh” dahin si mberat e pe
banci menahang adi si ras-rasken adi kerina kita muat bagin tapi dahin si kitik e pe banci jadi
mberat adi sisada lalit teman arih ibas ndungisa. Emaka arah kata pepatah enda mari kita ras-ras
erdahin, ula kita si tading-tading segelahna dahin si mberat e pe jadi mehahang ukurta pe jadi
salang.

II. ISI
a. Invocatio:
I persingetina kita selaku anak anak Dibata segelahna arah dampar kegeluhen si dem kegeluten
enda pe tetap kita ngikutken perentah Tuhan dingen setia man Jesus ras arus kita megenggeng ibas
kai-kai pe sebab kerina kegeluhen enda lit prosesna

b. Ogen:
Si jadi bahan ogenta eme kesimpulunen pengaran Paulus man perpulungen i Tesalonika. Paulus
ngajuk kita kerina segelahna ngasup kita ermeriah ukur katawari pe dingen ngataken bujur katawari
pe. Biasana meriah ukurta entah pe ngataken bujur kita di kune seh sura-sura ta, adi bage
keriahenta e sifatnya menunggu, tapi keriahen si ate Paulus i turikenna man banta eme keriahen si
kita nciptakensa labo si timai e maka kai pe siterjadi ibas kegeluhen enda ngasup kita ermeriah ukur
ras ngataken bujur, erkiteken kai pe si terjadi enggo si nen arah kacamata kinitekenta.
Tole pe ikataken paulus segelahna kita tetap ertoto ibas kerina cibal kegeluhen labo sanga bas
kesusahen saja tapi ibas kerina paksa subuk paksa senang entah pe susah. Tole pe ikataken Paulus
segelahna kita ula ngambati pendahin kesah si badia dingen si lawan sura-sura dagingta ras si dilo
kesah si badia erdahin arah kegeluhenta, ibas kai kai pe perlu si uji lebe ula kita mesunahna muat
keputusen tapi si gargari lebe kebenarenna, janah ibas kegeluhen enda pe si lakokekenlah si mehuli
kai si ngena ate Dibata e me si lakoken ibas kegeluhen enda.

c. Kotbah:
Nabi nehemia sangana gulut ukurna erkiteken kuta ingan nini-nina ikuburken enggo sontar
janah pintu gerbangna enggo keri ipan api. Raja ngidah ras nungkun kai si terjadi ibas nehemi, tole
pe ninaraja ibas kai si alamina e, kai dage atendu ibahanndu nandangi kutandu e? E maka nina
nehemia ertoto ia man Dibata janah adi mehuli iakap raja i pindoken Nehemia ia lawes ku kuta
kemulihenna guna mpekena si enggo ceda e. Bagepe i pindoken nehemia man raja surat perentah
man gubernur gubernur segelah isampatina ia bas perdalanen ku juda, bagepesurat man Asap
pengawas kerangen kerajaan segelahna i sikibapkenna kayu-kayu pintu man rumah pertoton, guna
tembok e ras man rumah ingan Nehemia janah kerina pemindonna e i bereken raja.
Gia Nehemia sebagai Gubernur si lit ibas ia kekuasaan penuh arah pemerintah Persia, tapi labo
mis ipekekenna kekuasaanna e, selama 3 wari ras suara surana pe mbagun mulihi tembok e labo mis
i viralkenna. Tapi i timaina penampat Dibata emaka labo ia terburu-buru mbagun sura-surana alu
mengandalken kukuasan ras kekuaten si litibas ia tapi sebelum ia erdahin i surveyna lebe alu cermat
kai si enggo jadi nandangi tembok-tembok e bagepe kai si terjadi nandangi bangsana . kenca dung i
surverna kutana ras kondisi kuta e i kataken nehemia man kerina senina-seninana (anak kuta) “
nehenlah uga susahna siakap gundari erkiteken Jerusalem lalap lenga ipekena, emaka mari genduari
si pajekken mulihi tembok kuta e segelahna ulanai kalak megombang man banta”. Si idah ije maka
nehemia ngajuk kerina anak kuta e bekerja sama ras anak kuta e pe alu meriah ukur ikut muat bagin
ibas dahin si mehuli e

III. Pengekanaina
Kekelengen Tuhan enda enggo nandangi seh ku ujung tahun 2023 enda, kira-kira enggo seh ja
nge ndia kita aktif dingen pe muat bagin ibas dahin si mehuli e ? enggo ndia tergejap man keluarga
entah pe man perpulungen teman ta sada rg perbahanen si mehuli. Ateta min maka perbahanen si
mehuli e labo hanya sebagai wacana tapi pe si dalanken min ibas kegeluhen enda segelah
kegeluhenta banci ernanam.
Bagi bas bahan kotbahta si idah maka Nehemia rutang pusuh guna mpekena kutana si enggo
sontar janah pintu gerbangna pe enggo keri ibahan api, aminna ia enggo sukses i darat labo
ilupakenna kutana ras ersura-sura ia guna pehulisa. Janah ibas muat bagin ndahiken si mehuli e pe
labo perlu terburu-buru tapi perlu i analisa lebe kebeneranna ras kai kin situhuna kebutuhan si man
samaten, segelah arah pendahinta e tuhu-tuhu datken hasil si maxsimal dingen pe arah pendahinta e
malem ate kalak. Bagi ibas ogenta ndai nina maka ujilah segela sesuatu ula kita buru-buru muat
kepusen.emaka arah bahan pekan-pekan enda rutang pusuh lah min kita guna muat si mehuli, baik
ibas mbangun rumah pertoton, nehken kekelengen ras dahin pelayanen si ngena ate Dibata.

Det. Renita Br Ginting, S.Th

 Kebaktian Pekan Keluarga Wari Si-6ken
Invocatio : “Labo perlu i gejek-gejekken ibas kam mere e. Alu bage, Bapandu si ngidah
perbahanenndu e mereken upah man bandu.” (Mat. 6:4).
Ogen : Galati 6 :1-10
Kotbah : Kuan-kuanen 3:27-35
Tema : Bahan Si Mehuli Man Kerina Kalak

I. Kata Perlebe
American Psychological Association bas laman websitena nulisken sada artikel si
ngatakenca maka erbahan simehuli ras nampati kalak si deban berdampak man kesehaten ras
kesejahteraan kalak si deban. ‘Perilaku Prososial’ (altruisme, kerja sama, kepercayaan, dan kasih
sayang) eme unsur penting ibas masyarakat si harmonis ras berfungsi alu mehuli, ras pe
berkontribusi nandangi kesehatan mental dan fisik. Kalak si ngelakoken perilaku prososial lebih
bahagia ras memiliki kesehatan mental bagepe fisik si lebih baik dibandingken mereka yang tidak
menghabiskan banyak waktu guna nampati kalak si deban. Perbahanen si mehuli jadi salah sada
dalan menjalin hubungen bagepe empeteguhi hubungen ras teman bagepe kalak si deban, seh pe
banci empeturah kesadaren maka ibas doni enda labo banci kita nggeluh sisada, gia kita erbeda sada
ras si debanna.

II. Isi
Invocatio : Ibas pasal enda, Kristus mpersingeti kerna perilaku buruk kalak Farisi ras ahli Taurat
kerna kemunafiken ras perukuren-perukurenna si medoni. Mereken penampat, ertoto ras erpuasa
eme kewajiben ibas paksa si e. Khusus kerna mereken penampat, kerina si nggo ibereken man kalak
musil ianggap selaku hakna si patut i terimana. Tapi kewajiben enda i salahgunaken kalak si
munafik guna pepuasken kesombongen ras keangkuhenna saja. Kewajiben e memang idalankenna,
tapi labo atas dasar kepatuhen man Tuhan ntah pe keleng ate man manusia, tapi erkiteken
kesombongen ras kemuliaan si sia-sia. Padahal, mereken penampat eme sada kewajiben si i sertai
alu upah, tapi banci bene adi kewajiben e ilakoken alu kemunafiken.

Ogen : Bagin enda emekap teguran Paulus nandangi penyimpangen si terjadi ibas perpulungen
Galati. Kalak Krisen arusna nggeluhken geluh si Kristiani si meneladani Kristus. Ibs ayat 1-10
iuraiken maka ula menghakimi kalak si ndabuh tapi ngalemi ras nampati ia guna bangkit; kita pe lit
nge paksana lemah emaka arus kita erjaga-jaga gelah ula ndabuh, alu penggejaben si bage erbanca
turah sikap saling nampati ibas sapih-sapih kita; la kita menilai kalak si deban alu standar manusia
tapi kata Dibata; bersikap rendah hati guna ngaloken persinget ras hamati si mereken persinget man
banta alu dem keleng ate; Paulus pe mendorong gelahna kerina perpulungen guna bertobat ras pe
Paulus mpersingeti gelahna perpulungen mewujudken karakter Ilahi alu perbahanen-perbahanen si
mehuli ras jadi pasu-pasu man sekelewetna. Gereja arusna jadi wadah terwujudna ate keleng ibas
persaudaraan iteruh keleng ate Kristus.

Kotbah: bagin kitab kuan-kuanen enda eme nasihat/pengajuk gelah si ngogesa ngelakoken
perbahanen si mehuli. Nasihat si ibereken gelah kalak jadi bijak labo saja ibas cara rukur tapi pe
ibas perlagu langkah. Perbahan kalak si bijak eme kalak si ngelakoken perbahanen si mehuli.
Erbahan simehuli man kerina kalak, alu la nahan-nahan hakna (3:27,28) Kalak si bijak/pentar eme
kalak si tetap mengulurkan tangan, talangina pusuh peratenna ibas erbahan si mehuli, alu la
menunda-nunda waktu guna ndahiken si mehuli. la nimai pagi sebab itehna ras sadar ia pagi banci
saja lanai lit ibas ia, ras lanai ia ngasup, entah ibas wari sipepagi kalak ndai pe lanai perlu isampati.
Kalak si pentar/bijak la nggit ndaram-ndarami alasen menghindar/menunda sebab la ngena atena
kalak si deban ndekah ibas kesusahenna. Arah nasihat kitab kuan-kuanen perbahanen si mehuli e
banci si lakoken arah: Nggalari lunas utangta (adi lit) tanpa kecurangan; nggalari upah kalak si
erdahin ras kita tepat waktu; ncukupi keperlun keluarga entah pe kalak si lit ideherken kita; nehken
tanggung jawab nandangi gereja, Negara; muat bagin ibas dahin-dahin kemanusiaan; muat bagin
ibas dahin-dahin sosial; la ngerencanaken si jahat. Kalak si pentar la pernah turah ukurna erbahan si
jahat man kalak, tapi mburak ibas ukurna guna mpehuliken teman, kalak si salah pe la jahat
perbahanenna man bana tapi negu gelah si jahat e banci mulih ku dalan si mehuli (Gal 6:1) meriah
ukurna pe guna sisampat sampaten sebab sadar ia maka setiap jelma lit baban geluhna si kadang
lanai ia ngasup mbabasa si sada (Gal.6:2); la nggit erjengil; la mencimberu; la ngusih perbahanen
kalak si la bujur; nina kitab.

III. Pengkenaina
Erbahan si mehuli labo harus ibenaken alu hal-hal besar. Perbahanen si mehuli banci
ibenaken alu hal-hal sederhana, tapi bermakna. Misalna, mungkin air minum eme hal sederhana,
tapi e banci sangat bermakna adi kita merekenca man kalak si paksana muas. Janah banci saja
perbahanennta e i inget-ingetna ndekah segedang geluhna, janah banci ka mempengaruhi ia guna
erbahan si mehuli man kalak si deban termasuk kita. Labo ertina kita erbahan si mehuli guna
iperlakuken alu mehuli ka, tapi e tandana maka adi kita erbahan si mehuli, melala ulih/upah si nggo
isikapken man banta.

Pdt. Claudia br. Tarigan, S.Th.

 Kebaktian Pekan Keluarga Wari Si-7 ken
Invocatio : Matius 2:11
Ogen : Jesaya 9:1b-7
Kotbah : Lukas 2:8-20
Tema : Jabu si Maba Berita si Meriah

I. KATA PERLEBE
Erberita terlebih ibas Berita si Meriah eme tugas ras tanggung jawabta kerina manusia selaku
kalak si tek man Jesus Kristus. Emaka situhuna kal lalit alasenta la maba Berita si Meriah e ku
tengah-tengah jabu, gereja ras sekelewetta, erkiteken Berita si Meriah e pe nggo seh man banta
janah Tuhanta Jesus Kristus pe nuruh kita guna erberita. Segelahna pasu-pasu si ibere Dibata man
banta la tading bas kita saja tapi kita pe terkhusus rikut ras anggota jabunta ngasup jadi saluran
berkat nandangi kalak sideban. Emaka ibas oratenta si sendah iajuk kita ras seisi jabunta lako jadi
simaba Berita si Meriah e si mereken keriahen si mbelin man kerina manusia kerna Juruselamatta,
tandana jabu nta e eme jabu si punya identitas ibas bagin jabu/ keluarga Dibata.

II. PEBAGESI TEKS

Ibas bahan ogenta, salah sada Nabi si galang ibas 10 nabi-nabi sideban emekap Jesaya mereken
kita didiken, ajaren, nasehat si tuhu-tuhu luar biasa. Ibas ribuan tahun si lewat, nabi Jesaya nuratken
nubuatna kerna ketubuhen Raja Dame si ituliskenna ibas perikop bahan ogenta enda. Jesaya
ngerana kerna kerehen sekalak Raja Dame, Penampat si meganjangna, Dibata si Mada Kuasa ras
Bapa si rasa lalap si ibas sada paksa maba bangsa-bangsa ku bas keriahen si mbelin, dame
Sejahtera, kebenaren, ras keadilen. Janai Ia me ka psi igelari Mesias, Anak Dibata. Dibata nehken
keleng ateNa arah keselamatan si ibereNa seh maka bangsa si ibas kegelapan ras ibas negeri
kekelamen ngenehen terang ras terang e ersinalsal (Yes. 9:1-2). Bangsa Israel si lit bas kekelaman
ras kegelapan ndatken keleng ate TUHAN si erbahanca bangsa e ngasup ngidah sinalsal si erkinar si
erbahanca turah pengarapenna. Terang ibas Dibata e me pagi si ngubahken perbeben ras
penderitaan bangsa e jadi sukacita si luar biasa. Zaman eskatologis alu kerehen Sang Mesias itandai
alu melenyapken kekerasan. Perdamaian yang kekal akan dikaruniakan oleh Allah melalui kelahiran
Sang Mesias. Jesus me si memutuskan mata rantai kekerasan, kekejaman ras kejahatan si selama
enda enggo membelenggu kegeluhen manusia.
Ibas bahan khotbahta, nuriken kerna permakan-permakan ibas ngaloken Berita si Meriah kerna
ketubuhen Juruselamat. Penyambuten kerna berita e si pemena labo terjadi ibas istana ntah pe i
tengah kaun bangsawan. Janah pe labo ibas Bait Allah oleh para Imam, tapi ibas padang Efrata man
permakan-permakan. Situasi permakan-permakan tuhu-tuhu memprihatinkan, bahkan ibas suasana:
gelap lalit lampu terang, mbergeh lalit pemanas apalagi i daerah padang Efrata, iba berngi angin
rembus meter seh maka bergehna menusuk tulang, berjaga-jaga ibas keadaan waspada, sebab
sewaktu-waktu pinangko banci reh menyerang. Situasi enda me gambaran suasana si “mencekam”
ras “menakutkan”. Lukas, sekalak perberita ras tabib maba Berita si Meriah kerna penyambutan
permakan-permakan ibas ketubuhen Juruselamat sebagai kisah pemulihan oleh kuasa Allah melalui
pemberitaan kelahiran Yesus Kristus di Betlehem. Kuga permakan-permakan si nggeluh ibas
keadaan “gelap”, “mbergeh”, “tegang” ras “waspada” dipulihkan ras diubahkan jadi “keriahen si
mbelin”, “penuh suasana “kehangatan” ras “pengarepen.” Si enda terjadi erkiteken ibegina berita
ibas malekat nari: “Ola mbiar: Aku reh maba Barita si Meriah…………..” (Lukas : 10-11).
Ibas invocatio, mpersingeti kita maka materi, jabaten si lit ibas kita sipakeken guna kemulian
Tuhan labo kemulian diri sendiri. Terlebih ipersingeti kita guna mpersembahken dirinta, geluhta
jadi persembahan si nggeluh, bersih i adep-adepen Dibata. Enda jadi gelementa, maka totalitas
kegeluhenta, baik perukuren, pengerana ras perbahanen harus jadi kiniersadan si utuh guna
ipersembahken man kemuliaan Tuhan.
 III. PENGKENAINA
Arah oratenta enda lit piga-piga aplikasi si banci ilakoken ibas tengah-tengah jabunta selaku
jabu simaba Berita si Meriah e, emekap:
1. Jadilah jabu si ngelakoken perentah Tuhan guna erberita bagi malekat si maba Berita si
Meriah e.
2. Jadilah saksi Tuhan, bagi permakan-permakan si jadi saksi ngaloken Berita si Meriah e,
seh makana kegeluhenna diubahkan jadi keriahen si mbelin. Bagepe kita, tetap bersaksi
sebab “Hidup adalah Kesaksian” maka kita pe dat keriahen si mbelin.

Vic. Ria Ebre Gina Br Ginting, S.Th