&

JUMAT, 11 NOVEMBER 2022, PKL. 15.00 WIB

i – GEREJA GBKP RG. UJUNG SERDANG
ielai :
Pdt. Anita Br Sembiring, S.Th

1
 PERSIKAPEN
Pengendesen Pengantin ibas orangtua nari man Runggun Gereja i
lebe-lebe pintun Gereja.
- Orangtua :
“Enda kami reh keluarga BARUS mergana ras GINTING JAWAK mergana
ngendesken anak kekelengen kami REY PERMANA PUTRA BARUS ras
SYLVIA VERONICA BR GINTING JAWAK man Runggun Gereja, ija anak
kami enda duana atena erjabu i pasu-pasu, gelah min Runggun
ngaturkensa dahin enda alu mehuli. Tek kami maka kam ipake Tuhan
ngelakoken dahin enda.”
- Runggun Gereja :
“Bujur ibas pengendesen keluarga man Runggun Gereja kerna dahin enda,
segelah sura-sura anakta enda ibas perjabunna ipasu-pasu banci erdalan
alu mehuli.
Emaka mari kam duana anak kami, orangtua, keluarga, Perpulungen radu
ras kita bengket ku rumah pertoton gelah sibenaken kebaktin pemasu-
masun enda.

PENARUH KU BAS KEBAKTIN

Mejuah-juah ibas gelar Tuhan Yesus Kristus.
Perban enggo ersada arih Runggun Gereja radu ras keluarga BARUS
mergana ras GINTING JAWAK mergana, maka sendah pulung kita ibas
rumah pertoton enda, mindo pemasu-masun Tuhan Dibata, nandangi
perjabun kekelengenta sidilaki ras sidiberu. Pengarapenta arah kebaktin
pemasu-masun enda tangkas tergejap keleng ate Tuhan si mabai dingen
ngarak-ngarak perjabun si ni persadakenNa. Janah tek kita gelar Tuhan
tetap terpuji dingen ermulia ibas kebaktin enda, sebab ibahanNa
metunggung tetap kita ngaloken pemasu-masunNa, man kekelengenta si
atena pejabuken bana wari si sendah. Si pesikap dage ukurta, si bengketi
me kebaktin pemasu-masun enda alu ras kita Rende : KEE No. 278 : 1 -3
(Perp. tedis)
1) Ku dahi rumah persembahen, segelah aku jumpa Tuhan
Ban Ia sumbul keriahen, nggo b’reNa bangku kesangapen
Reff :
Ersada me anakNdu k’rina, bas kiniteken tetap paguh
Bagem biak anak Dibata, tetap nembah ras muji gelarNdu
2) Iadep-adepen Dibata, Si akukenlah k’rina dosa
Je robah kita dingen jera, Sigejap me pengaleminNa.
Reff :
3) Begikenlah Kata Dibata, Em kap si nerangi geluhta
Jadikenlah wari-warinta, Penembahenta e man baNa
Reff :
(2)
KEBAKTIN.
1. Votum - Salam
Lit : Kebaktin pemasu-masun enda lit ibas gelar Dibata
Bapa si njadiken manusia, ibas gelar Yesus Kristus takal
perpulungen, ras ibas gelar kesah si Badia si
mpersadaken jabu kalak si erkiniteken. Perkuah ate ras
dame ibas Dibata Bapa, ras ibas Tuhan Yesus Kristus
nari, ibas kerembaken Kesah si Badia, ras kita k’rina
gelah. Amin.
Perp : Amin…Amin…Amin.
2. Invocatio : Kerinalah kam ngergaken perjabun. Kegeluhen
perbulangen ras ndehara ibas perjabun la banci
melket (Heber 13 : 4ab)
3. Rende KEE No. 368 : 1 – 2
1) Sipuji Tuhan Dibatanta, Kataken bujur baNa
Sabab Ia simerekenca pasu-pasu man banta
Reff : Mbelin ras mulia kekelengen Tuhan ibas doni enda
Ajari o Tuhan, kami krina anakNdu
Naksiken kerina perbahanenNdu
2) Geluh kami meriah tuhu, kerina sikrajangenNdu
Sabab kalak sinembah baNdu, Datken pasu-pasuNdu... Reff:
4. Koor / VG : (Perp. Kundul)
5. Ngoge Kata Dibata bagin Sipemena : Kolose 3 : 12 – 17
(Responsoria)
Lit. : Kam anak-anak Dibata. Kam ikelengi dingen ipilih Dibata
jadi sikerajangenNa. Emaka pakekenlah paken ate
perkuah, mehuli, rukur meteruk, lemah lembut dingen
saber.
Perp. : Ola kam pergelut dingen sialem-alemen salahlah adi kitik
ukurndu ibahan kalak. Kam arus sialem-alemen salah
bagi Tuhan enggo ngalemi salahndu.
Lit. : Janah ibabo si e kerina, arus kam sikeleng-kelengen
sabab keleng ate mpersadaken kerinana alu serta.
Perp. : Dame siibereken Kristus ibas pusuhndu min singajari
kam erbahan keputusen-keputusenndu. Sabab guna
dame kam ipilih Dibata jadi sada kula. Emaka ngataken
bujurlah.
Lit. : Kata Kristus si dem alu kinibayaken nggeluh min ibas
pusuh peratenndu. Siajar-ajaren kam alu kepentaren.
Endekenlah masmur, ende-enden pujin ras ende-enden
pertendin. Rendelah muji Dibata dingen ngataken bujur
ibas ukurndu.
(3)
 Perp. : Dage ntah kai gia ibahanndu, subuk ibas ngerana ntah
ibas perbahanen, bahanlah e ibas gelar Tuhan Jesus
janah ngataken bujur man Dibata Bapa arah Ia.
Lit. : Ketuahen kalak simegiken Kata Dibata dingen
simakekenca ibas geluhna si tep-tep wari. Haleluya.
Perp. : Haleluya .... Haleluya ..... Haleluya (iendeken)
6. Khotbah :
7. Pengakun Kiniteken (Perp. Tedis)
8. Koor / VG : (Perp. Kundul)
9. Nehken Persembahen.
a. Kata Dibata sijadi palas ibas kita nehken pengataken
bujur : Roma 12 : 1b “Endeskenlah kulandu man Dibata
saja selaku persembahen si nggeluh rikutken si ngena
ateNa. Sabap bage me arusna kam ersembah man Dibata
sue ras biakndu selaku mahluk si rukur” (Roma 12 : 1 )
b. Rende KEE No. 343 : 1 - 3
1) Pasu-pasu bas Tuhan nari, gejapken kami teptep wari
Bas paksa-paksa geluh kami, Kam kap tetap singkawali
Pasu-pasu bas Tuhan nari, jadi pergegeh tendi kami
Guna ndalani wari-wari, sirehna bas Tuhan nari
Reff : Pasu-pasu dage o Tuhan persembahen kami anakNdu
Labo kapen enda metunggung,
Persembahen si enggo pepulung
AjariNdu pe kami gelah min,
Tetap ngasup mere man Tuhan
2) Buaten lit kami o Bapa, gejapken kami Kam empuna
Tanda ukur kami meriah, ndesken kami baNdu Bapa
Persembahen enda o Bapa, desken bunga ncole merimna
Persembahen ateNdu ngena, bagelah akapNdu o Bapa.
Reff…..
3) Aloken min dage o Tuhan, persembahen kami anakNdu
Labo ban beluh kami o Tuhan, Lako mere ku adepenNdu
Pakeken min dage o Tuhan, persembahen kami anakNdu
Guna pebelangken kataNdu, nandangi kerina tinepaNdu.
Reff….
c. Pertoton Persembahen
10. Koor / VG :
11. Nehken Pemasu-masun Perjabun
a. Ngogeken Palas, Tujun ras pendilo ku bas Perjabun
b. Perpadanen Perjabun
(4)
 Sidilaki :
Aku si REY PERMANA PUTRA BARUS muat kam si SYLVIA
VERONICA BR GINTING JAWAK jadi ndeharangku. Aku
erpadan tetap ngaloken kam subuk ibas paksa senang entah
pe susah, subuk ibas paksa sehat entah pe sakit, subuk ibas
paksa meriah ukur bage pe erceda ate, janah aku erpadan
njaga keabadin perjabunnta seh Dibata nirangken kita alu
kematen.
Sidiberu :
Aku si SYLVIA VERONICA BR GINTING JAWAK muat kam REY
PERMANA PUTRA BARUS jadi perbulangenku. Aku erpadan
tetap ngaloken kam subuk ibas paksa senang entah pe susah,
subuk ibas paksa sehat entah pe sakit, subuk ibas paksa
meriah ukur bage pe erceda ate, janah aku erpadan njaga
keabadin perjabunnta seh Dibata nirangken kita alu kematen.
Lit: Erjimpuh dage kam duana janah alokenlah pasu-pasu idur Dibata
nari :“Ipasu-pasu janah ikawali Dibata kam, siang ayo
Dibata ersinalsal ibabodu janah melias atena ngenehen
kam. Itatap Dibata ku kam janah malem atendu
ibahanNa. Amin”
Rende KEE No. 124 : 1
I pasu-pasu Tuhan Dibatandu, O kam si empo kam si tersereh
Bahanlah Tuhan Yesus man temuendu, Lah sura-sura si mehuli seh
Bre Ia min si nujurken jabundu, Gegeh ras ukur pe ras peraten
Lah kekelengen ibas kam pekepar, La lesap pe seh nirang kematen
~ Ertoto guna jabu si mbaru
~ Makeken Cincin Perjabun (adi lit)
Nina Pandita :
"Dibata pengarapen idemina pusuhndu alu erbage-bage keriahen
dingen dame ibas kiniteken, maka bayak kam ibas pengarapen
salu kuasa Kesah Si Badia" (bdk. Roma 15:13).
12. Koor / VG :
13. Nehken Persembahen Kulebe : Rende KEE No. 247: 1-3
1) Ipasu-pasu ni Tuhan Dibatandu,
Kam si dilaki bagepe si diberu
‘Di Tuhan Yesuslah tetap temueNdu,
Gedang geluhku la kam er medu-medu
Itadingkenndu me kap orangtuanta
Segelah tumbuk ersada duana
Adina enggo persadaken Dibata
Lanai arusna sirangken manusia
(5)
 2) Si kelengina kin tetap ndeharana
Keleng atena bandanna k ape tole
Dagena ola merampus kam kempaksa
Madin persada gelah ukurndu jine
Dage ikutken kata perbulangenndu
Perbahan ia nge kap penghulu jabu
Gelgel mehangke dingen tegel ukurndu
Tentu jabundu pe tetap nge erluhu
3) Dame ni Kristus min ringan bas pusuhndu
Si ngerajaisa perlangkah ras perlagu
Si ‘ngkawalisa dingen si masu-masu
Alu bage nge maka malem atendu
Tutus dagena lawes ku perminggun
Bage pe tampak kam rehku perpulungen
Emaka Tuhanlah jadi penggurundu
La banci lang ! Lalap ersinalsal jabu
14. Pertoton Syafaat.
15. Koor : Moria se GBKP
16. Tekad ibas Perjabun (perp. tedis)
Lit. : Pehaga ras pebadiakenlah perjabun si enggo
ipanteki Dibata rikutken sura-suraNa.
Perp : Ngasup ngkelengi teman nggeluh sienggo
iberekenNdu alu bage tetap mehaga ras badia
jabu kami.
Lit : Ibas perdalinen jabu, Tuhan labo njadiken sibagi
ukurta saja tapi pe lit sila bagi ukurta
Perp : Ngasup aku ngaloken sura-suraNdu ibas jabu.
Kerina sijadi ibas jabungku jadilah ibas
rencanaNdu.
Lit : Jabu singasup ngaloken sura-sura Dibata tenang
geluhna, malem atena dingen ersada ukurna.
Penganten : Kuendesken tetap jabungku man baNdu Tuhan,
maka sangap jabu kami dingen ermulia Kam
tetap.
L + P : Amin.
17. Rende KEE No. 286 : 1,3
1) Kuikutken me dalanNdu, Dalan dame man bangku
Terkelin me kap geluhku, Itebusi darehNdu
(6)
 Reff : Kuikutken me dalanNdu, Kuendesken geluhku
Bas Kam o Juru S’lamatku, Dame senang tendingku
3) Kupersilahangken bangku, Ngikutken pendiloNdu
Kudalanken peratenNdu, Dat aku pasu-pasu Reff :
18. Pertoton Tuhan
19. Pemasu-masun & Pengutusen
Lit : Berkatlah ndalani geluhndu, jadilah kam pasu-pasu
man temanndu manusia, janah guna si e aloken pasu
pasu idur Dibatanta nari :
Dibata simada perkuah ate, si enggo nenahken kam ku
kemulianNa si rasa lalap ibas Kristus, Ia-lah sinjadiken
kam serta, njadiken kam tetap megegeh dingen paguh.
Ia nge simada kuasa seh rasa lalap. Amin.
Perp : Amin…Amin…Amin.

ACARA KENCA KEBAKTIN.

1. Ngendesken surat pasu-pasu
2. Penganten ergambar ras Pendeta.
3. Penganten ergambar ras Pendeta, Pt./Dk. si hadir.
4. Penganten ergambar ras Perpulungen kedua belah pihak
5. Penganten ergambar ras orangtua siempo.
6. Penganten ergambar ras orangtua sinereh.
7. Penganten ergambar ras orangtua pekepar (janah ngerana )
8. Runggun Gereja ngendesken acara ergambar man anak beru
pekepar guna iaturken alu ratur.

(7)
PASU-PASU ( Koor Moria Se - GBKP )

O Tuhan i jenda kami naruhken anakNdu kin

Si nggo 'rpadan i lebeNdu, 'rjabu i adepenNdu
Dengkehken min o Bapa, toto kami man baNdu
Useken min dame baNa, jabuNa rembak ras Kam

B're min tuah pasu-pasuNdu,

ku jabu anak kami Bapa
Tuhan lias siang ayoNdu, lalaplah bana la erleka
Tuhan Kam lah naruhken ia, nuduhken
dalin man bana kap
Gelah ibas jabuna gia, dame rusur seh rasa lalap

B're min tuah pasu-pasuNdu,

ku jabu anak kami Bapa
Tuhan lias siang ayoNdu, lalaplah bana la erleka
Tuhan Kam lah naruhken ia, nuduhken dalin
man bana kap
Gelah ibas jabuna gia, dame rusur seh rasa lalap
Dame rusur seh rasa lalap.

(8)