LITURGI NATAL

KELUARGA
GBKP KLASIS MEDAN KAMPUNG LALANG
TAHUN 2021

Tema : Muliakenlah Tuhan ( Bnd.Lukas 2:14)

Sub Tema : Natal njemba kerina Anggota Jabu guna
encidahken Kemuliaan Tuhan alu Kreatif
merawat lingkungen
I. Persikapen (Sope Kebaktin)
1.Nikapken kerina perlengkapen guna Kebaktin Natal
Keluarga dingen ngaturken si muat bagin ibas Kebaktin
2. Adi Kebaktin Natal Keluarga e la ipimpin Serayan Tuhan
(Pdt/Pt/Dk) maka Votum, Salam ras Pemasu-masun la
padah ibelasken. Liturgos banci ibabai salah sada anggota
keluarga.
3. Ngaturken sinagani lilin Natal ras proses nagani lilin;
Ngaturken Si maba toto syafaat ras Sidebanna; Mpelajari
lagu-lagu

4. Rende KEE No : 114 :1,3

1) Sendah jumpa kita wari Raya e,
peringeten tubuh Tuhan Yesus e,
Nusur ndahi kita manusia e, keriahen kap e
Ermulia me Tuhanta E sipuji me gelarNa
Perdamen ibre Dibata, Tuhan Yesus kap e.

5. Pendilo kubas kebaktian ( banci iogeken Sekalak Anak)

Kekelengen Kristus, meriah ukurta kerna wari si sendah.
Amin pe kita ibas suasana Pandemi COVID-19 denga, tapi
iatanken Dibata denga kita guna mperingetti wari
ketubuhen Tuhanta Yesus ku doni enda. Kerehenna ku doni
enda guna encidahken keleng ateNa si mbelin man kita
manusia si perdosa enda. Keleng ateNa e mpengasup kita
guna ndalani kegeluhenta ras mpeteguhi kiniersadan
keluarganta. Erteguhna kiniersadan keluarganta encidahken
Kemuliaan Tuhan. Janah kiniersadan Keluarganta njemba
kita segelah jadi terang man sekelewetta alu kreatif merawat
bekas tinepa Dibata. Emaka marilah sibengketi Kebaktin
Natal enda alu tetap erpengarapen man Dibata ras tetap
ngejapken Keleng Ate-Na si mbelin e.
6. Rende KEE. No. 136:1 (Perp. Tedis)
1. Kam krina si tek mari surak janah puji
Pedas min kerina ku Betlehem
Nehenlah Anak tubuh man tuahta
Mari kita nembah(3x)man Raja

II. KEBAKTIN
1. Votum- Salam-Invocatio
L : Kebaktin Natal Keluarga…… enda ibenaken ibas
Gelar Dibata Bapa si erkeleng ate man doni enda,
ibas gelar AnakNa Yesus Kristus si mpeteruk
baNa jadi seri ras manusia, ras ibas gelar Kesah
Sibadia si mereken keriahen tuhu-tuhu seh rasa
lalap.
Tuhan ras kam, ibereNa pasu-pasuNa man bandu.
Amin
P : Amin…Amin…Amin (iendeken)

2. Invocatio : “Bagenda nina TUHAN, “La kap sia-sia suruh-

suruhenKu ndahiken dahinna; ipehaga dingen ipeganjang
kel Ia.” (Jesaya 52:13)
3. Rende KEE. No. 338:1
1. Kam kusembah ulu tuah ajar aku me gelah
Lah nurihi pujin kami, lalap la engadi-ngadi
Lias ras keleng atendu jujurkenndu man bangku
Nteguh paguh laterundu, kuasa ras mulia-Ndu

4. Koor/VG/Solo (Perp. Kundul)

5. Berita Kerna Sura-sura Dibata

(L: Liturgis, O: Orang tua, (A: Anak)
 L : Sabab bage pengkelengi Dibata doni enda, e maka
iberekenNa AnakNa Sitonggal, gelah ola bene ise pe
si tek man Bana, tapi gelah dat kegeluhen si tuhu-
tuhu si la erkeri-kerin.
O : Ersuraklah, ersuraklah, o anak kuta Sion ! Ersuraklah
meriah, o kalak Yerusalem ! Nehenlah Rajandu reh
ndahi kam !
A : AnakNa kal pe la itahanNa, tapi iendeskenNa
AnakNa e man gunanta kerina. Adi AnakNa kal pe
iberekenNa man banta, tentu iberekenNa nge kai pe
man banta radu ras AnakNa e.
L : Emaka sikeleng-kelengenlah kita, Kalak si erkeleng
ate, ia arus megenggeng, mehuli, la percian, la
meganjang ukur, la sombong.
O :Ia labo mekarus, la ncariken untung man bana saja, la
pergelut, la ngkira kesalahen kalak. La meriah ukurna
adi kalak erbahan si jahat, tapi ikut ermeriah ukur i
bas si benar.
A :Kalak si erkeleng ate ngasup nggengken kai-kai pe,
tek maka lit si mehuli i bas kerinana, tetap
erpengarapen dingen saber i bas kai-kai pe.
L : Pertotonku kerna kam e me: Ertoto aku man Dibata
gelah ertambahna min keleng atendu janah rikut ras
pemeteh si tuhu-tuhu ras pengangkan si serta, gelah
ietehndu milihsa apai si mehulina. Alu bage bersih
kam pagi dingen la erpandangen i bas warina Kristus
reh pedua kaliken guna ngadili kerina manusia. Amin
6. Rende KEE. 286:1
1. Kuikutken me dalanNdu, dalan dame man bangku
Terkelin me kap geluhku, itebusi darehNdu
Reff: Kuikutken me dalanNdu, kuendesken geluhku
Bas Kam o Juru S’lamatku, dame senang tendingku
7. Pengakun Dosa
Bapa : Tuhan alemi aku. Megati riahen kuakap ndalanken
hobingku asangken mujiken kam. Tupung
iingetkenNdu tanggung jawabku guna mabai jabuku
erkebaktin keluarga aku pe mekisat. Menam kerina
waktuku guna kesenangenku saja.
Nande:Alemi Aku Tuhan. Erkiteken kesibukenku
mengurus diriku ras keluargaku, piah lanai lit
waktuku guna muat bagin ibas dahin gerejaNdu.
Erkiteken si e menam lupa aku kekelengenNdu.
Anak : Aku pe aleminNdu Tuhan. Melala waktuku
terbuang guna dahin si sia-sia; meriah-meriah ras
teman. Ibas medsos aku eksis tapi ibas pelayanen
aku lang. Aku kerah secara rohani padahal gegehku
simpar ibanNdu. Alemi aku kurang mediate kerna
dahin gereja
8. Rende KEE 377:1
1. Kuakuken me dosangku i lebe Tuhan
Megati aku lalar bas kegeluhenku
Reff: Keleng ateNdu, pengarapenku
Iteruh PerkuahNdu malem me pusuhku (2 kali)

9. Padan man Kalak si ngaloken Yesus

L : Ibahanna kita badia dingen bujur ilebe-lebeNa, ibas
gedang-gedang geluhta. Janah isalsaliNa pe ku
kerina kalak si ringan ibas kegelapen eme awih
kematen. Ia me si mabai kita ku bas kegeluhen si
dame (Luk. 1:75;79).
10. Rende KEE 115:1
1. Keriahen Si Mbelinna, sikuberitaken e
Enggo tubuh si Permakan eme Tuhan Yesus e
Pujilah min Dibatanta, ras dame, dame, dame man banta
Dibatanta si erkuah ate, man kita jelma e
11. Nagani Lilin (Perp. Tedis)
Responsoria

L : Yesus eme terang si tuhu-tuhu, terang e reh ku doni

enda guna nerangi kerina manusia.
P : Tapi kalak si ndalanken si ngena ate Dibata reh ku
terang e, gelah i je teridah maka kai si ibahanna e sue
ras kai si ngena ate Dibata.

Rende No. 135 Berngi e (paksa e lilin isagani)

1. Berngi e, enggo kepe, Yesus reh ku doni e
Nusurlah ngangkut dosanta me kin,
Jadi kap musillah sangap pagin
Asa si tekTuhan e, asa si tek Tuhan e
2. Anak e, bujur pe, singena me aku e
KiniulinNdu tadingken Kam kap
Bengket ku donilah t’rang si gelap
Aku daramenNdu e, Aku daramenNdu e
3. Berngi e, nggo kepeTuhan reh ku doni e
Padan Dibata teridah tetap
KinikelengenNa banta me kap
Tuhan sipuji gelah, Tuhan sipuji gelah

12. Khotbah (Perp. Kundul)

Teks : a. Lukas 2:13-18; b. Masmur 62:1-13;
c. Heber 4:14-16; dll (Renungen terlampir ras asa
bancina iogeken)
13. Pengakun Kiniteken (Perp.tedis)
14. Koor/VG/Solo (Perp. kundul)
15. Nehken Persembahen.
a. Kata Dibata kerna Persembahen
“Ibuatna erta-erta si ibabana e jenari
ipersembahkenna man Anak si mbaru tubuh e. Erta-
 erta si ipersembahkenna e eme ; emas, kumenen ras
mur “ (Mat 2 : 11b)
b. Rende KEE. No. 193 :1-3
1) Bas sinasa tinepana, tetap krina rende trus
Nde en-den pujin badia, muji gelar penebus
Reff : Glo.......ria muliaken Tuhan
Glo.......ria muliaken Tuhan
2) Bas ingan si meganjangna, bala Tuhan i surga
Rende mriah ia kerina man Tuhan penebusta
Reff.
3) K’rina ginemgem Dibata, pehaga situbuh e
Surga doni rende ia, krina alokenna pe
Reff.
c. Ertoto kerna Persembahen ras Syafaat

16. Tekad ras pengutusan

L : Erjaga dingen ersikaplah kam katawari paksa pe
ibas nimai kerehen Tuhan
P : Pegegehi dingen pengasup kami o Tuhan segelah
katawari pe ngasup kami erjaga ras ersikap nimai
kerehen-Ndu alu make kepentaren sirehna ibas
kam nari
L : Kalak si enggo ngaloken Jesus jadi juru selamatna
tetap ia megegeh ibas krina situasi ibas geluhna ras
tetap ia ernalem man Dibata segelah tetap ngasup
jadi terang man sekelewetna
P : Pegegehindu dingen pengasupndu kami o Tuhan
segelah man bandu saja ngenca kami ernalem ras
ajarindu kami segelah kam tetap ijadiken kami ulu
gegeh kami ibas ndalani krina situasi ibas geluh
kami enda ras teridah maka terang kristus e,
ersinalsal ibas diri kami
L+P : Amin
 17. Rende KEE . No. 239 : 1 (Perp.tedis)
1. Si endekenlah ‘nde-‘nden si meriah
Man Tuhanta si ‘nggo tubuh bas pelangkah
Sabab patut nge k’rina kita nembah
Ban babaNa terang ngaruh ras pe tuah
Reff: Dage mari kita kerina,
‘lah si puji gelar Dibata
Ula nai ukur erbera,
Tuhan Yesus me kap Rajanta
18. Pertoton Tuhan

19. Pemasu-masun
L : Sibengketilah kegeluhenta si ibereken Dibata alu
pengarapen ras kiniteken si paguh, erpalasken
pemasu-masun Tuhan Dibata .
“Ipasu-pasu janah ikawali Dibata kam, siang ayo
Dibata ersinalsal ibabondu janah melias ateNa
ngenehen kam. Itatap Dibata ku kam janah malem
atendu ibahanNa “ Amin.

P : Amin…Amin…Amin (iendeken)

III. Varia Natal

Renungen Natal Keluarga

Muliakenlah Tuhan
(Lukas 2:13-20)
Kekelengen Tuhan. Natal Keluarga si ilakoken kita ibas
tahun-tahun enda tuhu-tuhu lit ibas keterbatasen. Pandemi
COVID 19 me si membatasi ruang gerakta ibas erdahin
bagepe melayani. Natal si ilakoken Gereja-gereja Tuhan i
belang-belang doni selama Pandemi Covid 19 pe irayaken
alu keterbatasen-keterbatasen eme mematuhi protokoler
kesehaten si ketat; memakai masker segedang-gedang
Kebaktin, Merayaken Natal secara Live Streaming, la banci
sisalam-salamen (sijemaken tan), pembatasen kuota peserta
Kebaktin, Pelarangen pulung-pulung bertatap muka rsd.
Erkiteken si e mau tidak mau kita “terpaksa” harus makeken
potensi si lit ibas kita guna melayani ras merayaken Wari
Tuhan dalam suasana keterbatasen.

Kekelengen Tuhan, keterbatasen pe enggo pernah inanami

Keluarga Yesus ras piga-piga kalak permakan si sangana
ngiani asuh-asuhen i mbal-mbal. Yesus tubuh ibas ingan si
terbatas eme i Karang asuh-asuhen labo ibas ingan si
mewah. Ia ipepedem ibas pelangkah labo ibas ingan medem
si empuk. Janah Yesus pe tubuh ibas bertin sekalak diberu si
sederhana ras la populer ibas masa si e. Sangana Yesus ras
nandeNa tunduh, ia ijagai sekalak dilaki si jadi bapaNa.
BapaNa e sekalak si sederhana ras polos. Ia labo sekalak
dilaki si gagah perkasa, erjabaten dingen erkuasa. Janah si
jadi bodyguard ibas peristiwa Ketubuhen si Badia e eme
asuh-asuhen si erbagi ingan ras Jesus. Sungguh keterbatasen
si mengesanken ras indah.
Bage ka pe si nialami tamu undangen Ketubuhen Yesus.
Piga-piga kalak Permakan si ngiani asuh-asuhen i mbal-
mbal pe terbatas kal kegeluhenna. Ia memiliki keterbatasen
ekonomi ras pendidiken. Ia memiliki keterbatasen pergaulen
ras kekuasaan. Ia terjeng erkuasa nandangi asuh-asuhenna
tapi ia la ngasup nandangi kegeluhenna. Si banci ilakokenna
terjeng mpermakani ras nemani asuh-asuhenna i imbalmbal
si la terbatas.

Amin pe terbatas ibas kegeluhen, tapi pusuh ras perukuren

guna mpermuliaken gelar Dibata e la banci ibatasi. Maria
Nande Yesus mpermuliaken gelar Tuhan ibas kemusilenna
(Lukas 1:46-55; ayat enda asa bancina iogeken man anggota
keluarga),Jusup mpermuliaken gelar Tuhan ibas kepolosenna
(oge Matius 1:22-24) ras Permakan pe mpermuliaken gelar
Tuhan ibas keterbatasen pendidikenna (Lukas 2:16-18).
Kerina ermeriah ukur guna ngaloken ras mberitaken kerna
Ketubuhen Jesus. Mulai ibas ingan si mesuni dingen
terbatas, Berita kerna ketubuhen Jesus ipeseh ras
ipebelangken Permakan-permakan e man kalak si deban si
ijumpaina i tengah dalan. Banci saja kalak si ijumpaina e
kalak si musil entah si bayak, kalak si erjabaten entah
bawahen, si erminaga entah penganguren, si badia entah si
erdosa. Kerina ser-ser iberitaken Permakan e kerna
Ketubuhen Jesus man kalak si ijumpaina.

Kekelengen Tuhan. Natal keluarga labo terjeng upacara

tahunen si ilakoken secara rutin. Perayaan Natal Keluarga
labo hanya sekedar pulung-pulung saja. Tapi merayaken
Natal Keluarga eme merayaken tanggung jawabta guna
mpermuliaken gelar Tuhan ibas keluarganta ibas situasi si
terbatas ras la terbatas. Perayaan Natal Keluarga eme
membagiken ras mberitaken Kemuliaan Tuhan e man seisi
jabunta ras jabu-jabu si deban. Si gejapkenlah janah teklah
kita maka Tuhan pasti makeken anggota Jabunta eme Bapa,
Nande, Anak, kempu, Permain ntah pe kela, nte ntah pe
ntah, pembantu ntah supirta, satpam ntah pe tukang
kebunta guna ngembarken Kemuliaan Dibata ibas Natal e.
Keluarga labo terjeng hubungen ikaten dareh. Kerina kalak
singkelengi begepe si ikelengi kita eme keluarga.
Muliakenlah Tuhan ibas keluarganta. Ula batasi Kemuliaan
Tuhan ras Keleng Ate Tuhan e !! Selamat Merayaken Natal
ibas Keluarganta. Dibata simasu-masu.